ගණන් කතාව 14:1-45
14 එය අසා මුළු සෙනඟ මහා හයියෙන් හඬන්න පටන්ගත්තෝය.+ ඔවුහු මුළු රාත්‍රිය පුරාම හැඬුවෝය.
2 මුළු සෙනඟ මෝසෙස්ට හා ආරොන්ට විරුද්ධව මැසිවිලි නඟමින්+ මෙසේ කීවෝය. “අනේ, අපි ඊජිප්තු දේශයේදීම මැරිලා ගියා නම් මීට වඩා හොඳයි. එහෙම නැත්නම් අපි මේ පාළුකරයේදී මැරිලා ගියා නම් කොතරම් හොඳද!
3 යෙහෝවා දෙවි අපිව ඒ දේශයට ගෙන යන්නේ ඇයි? ඒ දේශයේ මිනිස්සු අපිව කඩුවෙන් මරලා දායි.+ අපේ භාර්යාවන්ව හා දරුවන්ව පැහැරගනියි.+ අපි ඊජිප්තුවට හැරිලා ගියා නම් මීට වඩා හොඳයි.”+
4 ඔවුහු එකිනෙකා අතරේ මෙසේද කියාගත්තෝය. “අපි නායකයෙක්ව පත් කරගෙන ඊජිප්තුවට හැරිලා යමු.”+
5 එය අසා මෝසෙස් හා ආරොන් දණින් වැටී+ මුළු සෙනඟ ඉදිරියේ දෙවිට කන්නලව් කළෝය.
6 දේශයේ තොරතුරු සොයා බලන්න ගිය අය අතරේ සිටි නූන්ගේ+ පුත්‍රයා වූ යොෂුවා හා යෙෆුන්නෙගේ+ පුත්‍රයා වූ කාලෙබ් තම වස්ත්‍ර ඉරාගෙන+
7 සෙනඟට මෙසේ කීවෝය. “අපි බලන්න ගිය දේශය ඉතා සාරවත් දේශයක්.+
8 අපට යෙහෝවා දෙවිගේ ආශීර්වාදය තිබෙනවා නම්+ ඔහු අනිවාර්යයෙන්ම අපිව ඒ දේශයට ගෙන යයි. ඔහු කිරියෙන් හා පැණියෙන් ඉතිරෙන ඒ දේශය අපට ලබා දෙයි.+
9 යෙහෝවා දෙවිට විරුද්ධව නම් කැරලිගසන්න එපා.+ ඒ දේශයේ ජීවත් වෙන මිනිසුන්ට බය වෙන්නත් එපා.+ මන්ද යෙහෝවා දෙවි සිටින්නේ අප සමඟයි.+ නමුත් ඒ මිනිසුන්ගේ ආරක්ෂාවට කවුරුත් නැහැ. අපිට බය වෙන්න කිසිම හේතුවක් නැහැ.+ අපිට පහසුවෙන්ම ඔවුන්ව යටත් කරගන්න පුළුවන්.”+
10 එහෙත් මුළු සෙනඟ ඔවුන්ට ගල් ගැසීමට සූදානම් වූහ.+ එවිට යෙහෝවා දෙවිගේ තේජස ඔවුන් සියලුදෙනාටම පෙනෙන සේ සම්මුඛ වීමේ කූඩාරමට ඉහළින් දිස් විය.+
11 යෙහෝවා දෙවි මෝසෙස්ට මෙසේ කීවේය. “මේ සෙනඟ තව කොතරම් කාලයක්+ මේ විදිහට මට අගෞරව කරයිද?+ මම ඔවුන්ට මෙතරම් ලකුණු පෙන්වා තිබියදීත් ඔවුහු මාව විශ්වාස කරන්නේ නැත.+
12 මම ඔවුන්ව වසංගතයකින් සම්පූර්ණයෙන්ම විනාශ කර ඔවුන්ට වඩා බලවත් ජාතියක් ඔබෙන් බිහි කරන්නෙමි.”+
13 නමුත් මෝසෙස් යෙහෝවා දෙවිට මෙසේ කීවේය. “ඔබේ මහත් බලය පෙන්වා ඊජිප්තුවරුන්ගේ අතින් ගලවාගත් මේ සෙනඟට ඔබ එහෙම කළොත් ඊජිප්තුවරුන්ට ඒ ගැන ආරංචි වෙයි.+
14 ඔවුන් ඒ දේශයේ වැසියන්ටත් ඒ ගැන කියයි. යෙහෝවා දෙවි වන ඔබ මේ සෙනඟ සමඟ සිටින බවත් ඔවුන් ඉදිරියේ ඔබ පෙනී සිටි බවත්+ මේ දේශයේ වැසියන් අසා තිබෙනවා.+ එමෙන්ම යෙහෝවා දෙවි වන ඔබ මේ සෙනඟගේ කඳවුරට ඉහළින් වලා ටැඹක් තබා තිබෙන බවත් ඔවුන් දන්නවා. දවාලේදී වලා ටැඹ මගින්ද රාත්‍රියේදී ගිනි ජාලාව මගින්ද ඔබ සෙනඟට මඟ පෙන්වන බව ඔවුන් දන්නවා.+
15 ඔබ මේ සෙනඟ සහමුලින්ම මරා දැම්මොත්+ ඔබේ මහත් බලය ගැන අසා තිබෙන ජාතීන් මෙසේ කියයි.
16 ‘යෙහෝවා දෙවි මේ සෙනඟව පාළුකරයේදී මරා දැම්මේ පොරොන්දු වූ දේශයට ඔවුන්ව ගෙන යන්න නොහැකි වූ නිසයි.’+
17 යෙහෝවා දෙවියනි, ඔබේ මහත් බලය+ හැමෝටම දකින්න සලස්වන්න. ඔබ කියූ මේ දේට එකඟව ක්‍රියා කරන්න.
18 ‘යෙහෝවා දෙවි වන මම කෝප වීමට ඉක්මන් නොවන,+ ඉමහත් ප්‍රේමයක්*+ පෙන්වන දෙවි කෙනෙක්ය. මම අයුතුකම්වලටද වැරදිවලටද සමාව දෙන+ නමුත් කිසිවිටෙක වරදකරුවන්ට දිය යුතු දඬුවමින් ඔවුන්ව නිදහස් නොකරමි.+ පියවරුන්ගේ වැරදි නිසා තුන්වෙනි හා හතරවෙනි පරම්පරා දක්වා ඔවුන්ගේ පුත්‍රයන්ට අනිවාර්යයෙන්ම දඬුවම් කරන්නෙමි.’+
19 දෙවියනි, ඔබ මහත් ප්‍රේමයකින්* පිරුණු දෙවි කෙනෙක්. ඊජිප්තුවෙන් පිටත්ව ආ දවසේ සිට මේ දක්වා ඔබ මේ සෙනඟට සමාව දුන් ලෙසම දැනුත් ඔවුන්ට ප්‍රේමය පෙන්වා ඔවුන්ගේ වරදට සමාව දෙන ලෙස ඔබෙන් අයැදිනවා.”+
20 එවිට යෙහෝවා දෙවි මෝසෙස්ට මෙසේ කීවේය. “ඔබ මගෙන් ඉල්ලූ ලෙස මම ඔවුන්ට සමාව දෙන්නෙමි.+
21 ජීවමාන දෙවි මමයි. ඒ නිසා යෙහෝවා දෙවි වන මාගේ තේජසින් මේ පොළොව පිරී යන බව ස්ථිරයි.+
22 එහෙත් ඊජිප්තු දේශයේදී හා පාළුකරයේදී මා පෙන්වූ ලකුණු+ හා මාගේ තේජස+ දැක තිබියදීත් මා ඔවුන් වෙනුවෙන් මැදිහත් වී ක්‍රියා කරයිද නැද්ද කියා අනන්ත වාරයක්* මාව සෝදිසි කර බලමින්+ මට අකීකරු වූ මේ සෙනඟට,+
23 ඔවුන්ගේ පියවරුන්ට මා දෙන බවට පොරොන්දු වූ දේශය කවදාවත් දකින්න ලැබෙන්නේ නැත. මට අගෞරවනීය ලෙස සලකන කිසි කෙනෙක් ඒ දේශය නොදකිනු ඇත.+
24 එහෙත් මාගේ සේවකයා වන කාලෙබ්ට+ අනික් අයට වඩා වෙනස් ආකල්පයක් තිබෙන නිසාත් ඔහු සම්පූර්ණ සිතකින් මට සේවය කරන නිසාත්+ එම දේශයට මම අනිවාර්යයෙන්ම ඔහුව ගෙන යන්නෙමි. මම එම දේශය ඔහුගේ දරුවන්ටත් උරුමයක් ලෙස දෙන්නෙමි.+
25 දැන් මේ දේ අසන්න. අමලෙක්වරුන් හා කානානිවරුන්+ තැනිතලාවේ වාසය කරන නිසා හෙට මෙතැනින් පිටත් වී රතු මුහුදට යන මාර්ගය ඔස්සේ පාළුකරය දෙසට යන්න.”+
26 යෙහෝවා දෙවි තවදුරටත් මෝසෙස්ට හා ආරොන්ට මෙසේ කීවේය.
27 “ඊශ්‍රායෙල් සෙනඟ මට විරුද්ධව නඟන මැසිවිලි මට ඇසිණ.+ මේ දුෂ්ට සෙනඟ මට විරුද්ධව තව කොපමණ කල් මැසිවිලි නඟයිද?+
28 ඔවුන්ට මෙසේ කියන්න. ‘යෙහෝවා දෙවි පැවසූ මේ වචන අසන්න. “ඔබ පැවසූ සෑම විපතක්ම ඒ විදිහටම සිදු වීමට මම ඉඩහරින්නෙමි. මා ජීවමාන දෙවිය. එබැවින් ඒ විපත්ති ඔබ පිට පැමිණෙන බව ස්ථිරයි.+
29 මට විරුද්ධව මැසිවිලි නැඟූ අවුරුදු විස්සක් හෝ ඊට වඩා වැඩි වයසේ පසු වන ලියාපදිංචි කළ සියලුදෙනාම+ අනිවාර්යයෙන්ම පාළුකරයේදී මිය යනු ඇත.+
30 මා අත ඔසවා, දිවුරා ඔබට දෙන බවට පොරොන්දු වූ ඒ දේශයට+ යෙෆුන්නෙගේ පුත්‍රයා වන කාලෙබ් හා නූන්ගේ පුත්‍රයා වන යොෂුවා හැර වෙන කිසිවෙක් නොයනු ඇත.+
31 “‘“සතුරන් පැහැරගනියි කියා ඔබ පැවසූ ඔබේ දරුවන්ව+ මම ඒ දේශයට ගෙන යන්නෙමි. ඔබ හෙළාදුටු+ ඒ දේශය ඔවුහු භුක්ති විඳිනු ඇත.
32 නමුත් ඔබ සියලුදෙනා මේ පාළුකරයේදී මිය යනු ඇත.+
33 ඔබේ පුත්‍රයෝ අවුරුදු හතළිහක් පුරා එඬේරුන් ලෙස මේ පාළුකරයේ+ ජීවත් වෙමින් ඔබේ ද්‍රෝහිකම්වලට*+ වන්දි ගෙවන්නෝය. මේ පරම්පරාවේ සියලුදෙනාම මිය යන තෙක් ඔවුන්ට පාළුකරයේ ජීවත් වීමට සිදු වනු ඇත.+
34 දේශයේ තොරතුරු සොයා බැලීමට ඔබට දවස් හතළිහක්+ ගත වුණේය. ඔබ කළ වරද නිසා ඒ සෑම දවසකටම අවුරුද්දක් බැගින්+ වන්දි ගෙවිය යුතුයි. මෙසේ ඒ දවස් හතළිහ වෙනුවෙන් ඔබ අවුරුදු හතළිහක් වන්දි ගෙවනු ඇත.+ මාව ප්‍රතික්ෂේප කිරීම කොතරම් බරපතළ ක්‍රියාවක්ද කියා එවිට ඔබ තේරුම්ගනු ඇත.+
35 “‘“යෙහෝවා දෙවි වන මා ප්‍රකාශ කළ ඒ දේ එලෙසම සිදු වනු ඇත.+ මට විරුද්ධව කැරලිගැසූ මේ දුෂ්ට සෙනඟ අනිවාර්යයෙන්ම පාළුකරයේදී මිය යනු ඇත.+
36 දේශයේ තොරතුරු සොයා බැලීමට යැවූ මිනිසුන් දේශය ගැන නරක තොරතුරු කියමින්+ මුළු සෙනඟවම මෝසෙස්ට විරුද්ධව නැඟී සිටීමට පෙලඹෙවූ නිසා
37 යෙහෝවා දෙවි වන මම අනිවාර්යයෙන්ම ඔවුන්ට පහර දී ඔවුන්ව මරා දමන්නෙමි.+
38 නමුත් දේශයේ තොරතුරු සොයා බැලීමට ගිය අය අතරින් නූන්ගේ පුත්‍රයා වන යොෂුවා හා යෙෆුන්නෙගේ පුත්‍රයා වන කාලෙබ්ගේ ජීවිත ගැලවෙනු ඇත.”’”+
39 මෝසෙස් ඒ සියල්ල ඊශ්‍රායෙල් සෙනඟට පැවසුවේය. එවිට මුළු සෙනඟ හඬා වැලපෙන්න පටන්ගත්තෝය.+
40 ඔවුහු පසුවදා උදෑසනින්ම නැඟිට මෙසේ කියමින් කන්ද මුදුනට යන්න සූදානම් වූහ. “අපි යෙහෝවා දෙවිට විරුද්ධව පාපයක් කළ බව අපි පිළිගන්නවා. දැන් අපි ඔහු කියූ තැනට යන්න සූදානම්.”+
41 නමුත් මෝසෙස් ඔවුන්ට මෙසේ කීවේය. “ඔබ යෙහෝවා දෙවිට අකීකරු වෙන්නේ ඇයි?+ ඔබ කරන්න යන දේ සාර්ථක වෙන්නේ නැහැ.
42 මන්ද යෙහෝවා දෙවිගේ ආශීර්වාදය ඔබට ලැබෙන්නේ නැහැ. ඒ නිසා ඔබ කඳුකරයට ගියොත් අනිවාර්යයෙන්ම සතුරන්ගේ අතින් පරාජයට පත් වෙනවා.+
43 අමලෙක්වරුන් හා කානානිවරුන් ඔබට විරුද්ධව සටන් කර+ ඔබව කඩුවෙන් මරා දමයි. ඔබ යෙහෝවා දෙවිව ප්‍රතික්ෂේප කළ නිසා යෙහෝවා දෙවිත් ඔබව ප්‍රතික්ෂේප කරලයි තිබෙන්නේ.”+
44 නමුත් ඔවුහු හිතුවක්කාර ලෙස කඳුකරයට ගියෝය.+ යෙහෝවා දෙවිගේ ගිවිසුම් පෙට්ටිය කඳවුරෙන් පිටතට ගෙන ගියේවත් මෝසෙස් කඳවුරෙන් පිටතට ගියේවත් නැත.+
45 කඳුකරයේ ජීවත් වූ අමලෙක්වරු+ හා කානානිවරු ඊශ්‍රායෙල් සෙනඟ වෙතට පැමිණ ඔවුන්ට පහර දී හොර්මා+ දක්වා ඔවුන්ව පන්නාගෙන ගියෝය.
පාදසටහන්
^ හෝ, “ළැදි ප්‍රේමයක්.”
^ හෝ, “ළැදි ප්‍රේමයකින්.”
^ මූ.අ., “දහ වතාවක්.”
^ මූ.අ., “ඔබේ දුරාචාරකම්වලට.”
