ක්‍රියා 18:1-28

18  ඒ සිද්ධීන්වලට පසු ඔහු ඇතන්ස්වලින් පිටත් වී, කොරින්තියට ගියේය.  එහිදී පොන්තස් නම් නුවරෙහි උපන් අකිලා+ නම් යුදෙව්වෙකුව සහ ඔහුගේ භාර්යාව වූ ප්‍රිසිලාව ඔහුට හමු විය. ඔවුන් ඉතාලියේ සිට එහි පැමිණ+ වැඩි දවසක් ගත වී තිබුණේ නැත. ඔවුන් ඉතාලියෙන් පිටත්ව ආවේ ක්ලෝදියස් අධිරාජ්‍යයා+ සියලු යුදෙව්වරුන්ට රෝමයෙන් පිට වීමට අණ කර තිබූ නිසාය. පාවුල් ඔවුන්ව හමු වූ විට,  ඔවුන් තමා මෙන් රැකියාව ලෙස කරන්නේ කූඩාරම් සෑදීම බව දැනගත්තේය. ඒ නිසා ඔහු ඔවුන්ගේ නිවසේ නැවතී සිටියේය. ඔවුහු කූඩාරම් සෑදීමේ කාර්යයේ එකට නිරත වූහ.+  පාවුල් සෑම සබත් දවසකදීම එහි සිනගෝගයට ගොස්+ රැස්ව සිටි අයව අමතා යුදෙව්වරුන්ටද ග්‍රීකවරුන්ටද කාරණා නිවැරදිව අවබෝධ කරගෙන විශ්වාසයක් ඇති කරගැනීමට උපකාර කළේය.  සීලස්+ සහ තිමෝති+ මැසිඩෝනියාවෙන් පැමිණි විට පාවුල් ඔවුන් සමඟ එක්ව වෙහෙස මහන්සි නොබලා ඉතා උද්‍යෝගයෙන් දෙවිගේ පණිවිඩය ගැන කතා කරන්න පටන්ගත්තේය. ඔහු යුදෙව්වන්ට පැහැදිලි සාක්ෂි සපයමින් ඔප්පු කළේ යේසුස් ඇත්තෙන්ම ක්‍රිස්තුස් බවය.+  නමුත් ඒ මිනිසුන් දිගින් දිගටම ඔහුට විරුද්ධව කතා කරමින් ඔහුට නින්දා කළ නිසා+ ඔහු තම වස්ත්‍ර ගසා දමා,+ “ඔබ සම්බන්ධයෙන් මම නිදොස්.+ ඔබේ ලේවලට+ වග කියන්න සිදු වන්නේ ඔබටමයි! මෙතැන් පටන් මම යන්නේ වෙනත් ජාතීන්ට අයත් මිනිසුන් වෙතටයි”+ කියා ඔවුන්ට කීවේය.  ඔහු එතැනින් පිටත් වී සිනගෝගයට යාබදව පිහිටි තිතියස් ජස්ටස්ගේ නිවසට ගියේය. එම පුද්ගලයා දෙවිට නමස්කාර කරන කෙනෙකි.  මේ අතරතුර සිනගෝගය භාරව සිටි නිලධාරියා වූ ක්‍රිස්පස්ද+ ඔහුගේ නිවසේ සිටි සියලුදෙනාද ස්වාමීන්ව පිළිගෙන ඔහුගේ අනුගාමිකයෝ වූහ. ශුභාරංචියට සවන් දුන් කොරින්තියේ වැසියන් බොහෝදෙනෙකු තුළද විශ්වාසයක් ඇති වී ඔවුහු බව්තීස්ම වූහ.  මේ අතරේ එක් රාත්‍රියක පාවුල් දර්ශනයක් දුටු අතර එහිදී ස්වාමීන් ඔහුට මෙසේ පැවසුවේය.+ “කිසි දෙයකට භය වෙන්න එපා. නිර්භීතව දිගටම කතා කරන්න. ඔබේ උත්සාහය අත්හරින්න එපා. 10  මම ඔබ සමඟ සිටින බව නිතරම මතක තබාගන්න.+ ඔබට පහර කන්න සිදු වුණත් එයින් ඔබේ ජීවිතයට අනතුරක් වන්නේ නැහැ. මන්ද මේ නුවරේ මට එකතු වෙන තවත් බොහෝදෙනෙක් සිටිනවා.” 11  එහෙයින් ඔහු ඔවුන් අතරේ දෙවිගේ පණිවිඩය උගන්වමින් එහි අවුරුද්දකුත් මාස හයක් ගත කළේය. 12  ගලියෝ, ඇකේයා පළාතේ ආණ්ඩුකාරයාව+ සිටියදී යුදෙව්වරු එකා මෙන් පාවුල්ට විරුද්ධව එකතු වී ඔහුව අල්ලාගෙන විනිශ්චයාසනය ඉදිරියට ගෙනැවිත්,+ 13  මෙසේ කීවෝය. “මේ මිනිසා රජයේ නීතියට විරුද්ධ වන ආකාරයකින් දෙවිට නමස්කාර කරන්න කියා මිනිසුන්ව පොලඹවනවා.”+ 14  පාවුල් යමක් කියන්න සූදානම් වූ විට ගලියෝ යුදෙව්වරුන්ට මෙසේ පැවසුවේය. “යුදෙව්වරුනි, මේ මිනිසා මොනවා හරි අපරාධයක් හෝ වැරදි දෙයක් හෝ කර තිබෙනවා නම් මම ඔබ කියන දේට ඉවසිලිවන්තව සවන් දෙන්නම්. 15  නමුත් මේ ප්‍රශ්නය, ඇතැම් වචන ගැන හෝ ඇතැම් නාමයන් ගැන හෝ+ ඔබේ නීතිය ගැන හෝ+ නම් ඒ දේවල් විසඳාගැනීම ඔබේම වගකීමක්. ඊට මැදිහත් වෙන්න මම කැමති නැහැ.” 16  එසේ කියා විනිශ්චයාසනය ඉදිරියේ සිටි ඔවුන්ව ඔහු වහාම විසුරුවාහැරියේය. 17  එවිට ඒ සියලුදෙනාම එකතු වී සිනගෝගය භාරව සිටි නිලධාරියා වූ සොස්තනේස්ව අල්ලා+ විනිශ්චයාසනය ඉදිරිපිටදීම ඔහුට තැළුවෝය. නමුත් ගලියෝ ඒ දේ දැක නිහඬව සිටියේය. 18  පාවුල් දවස් ගණනාවක්ම තවදුරටත් එහි නැවතී සිටි පසු සහෝදරයන්ගෙන් සමුගෙන, ප්‍රිසිලා සහ අකිලා සමඟ එක්ව සිරියාව බලා ගමන් කිරීමේ අදහසින් නැව් නැග්ගේය. ඔවුන් සෙන්ක්‍රෙයාය නුවරට+ පැමිණි විට පාවුල් තම හිසකෙස් කොටට කපාගත්තේය.+ ඔහු එසේ කළේ ඔහු දෙවිට භාරයක් වී සිටි නිසාය. 19  ඔවුන් එතැනින් පිටත් වී එෆීසයට ගිය පසු පාවුල් ඔවුන් දෙදෙනාව එහි නතර කර තනිව සිනගෝගයට ඇතුල් වී+ යුදෙව්වරුන්ට ශුද්ධ ලියවිල්ලේ තොරතුරු තර්කානුකූලව පහදා දුන්නේය. 20  තවත් කාලයක් නැවතී සිටින්න කියා ඔවුන් ඔහුගෙන් ඉල්ලා සිටියත් ඔහු ඊට එකඟ නොවී, 21  ඔවුන්ගෙන් සමුගෙන+ මෙසේ පැවසුවේය. “යෙහෝවා දෙවි කැමති නම්+ මට පුළුවන් වෙයි ඔබව නැවත හමු වෙන්න.” ඉන්පසු ඔහු එෆීසයේ සිට මුහුදින් ගමන් කර, 22  සිසේරියට ගියේය. එතැනින් යෙරුසලමට ගොස් එහි සභාවේ අයව හමු වූ ඔහු, පසුව අන්තියෝකිය බලා ගියේය. 23  ඔහු එහි යම් කාලයක් ගත කළ පසු එතැනින්ද පිටත් වී ගලාති ප්‍රදේශය+ හරහාද ෆ්‍රිජිය+ නම් පළාත හරහාද ගොස් තැනින් තැන සිටි ගෝලයන් සියලුදෙනාව ශක්තිමත් කළේය.+ 24  මේ අතර ඇලෙක්සැන්ඩ්‍රියාවේ උපන් අපොලොස් නම් යුදෙව්වෙක්+ එෆීසයට පැමිණියේය. දක්ෂ ලෙස කතා කිරීමේ හැකියාව තිබූ ඔහුට ශුද්ධ ලියවිල්ල ගැන මනා දැනුමක්ද තිබිණ.+ 25  ඒ වන විට යෙහෝවා දෙවිගේ මාර්ගය ගැනත් ඔහුට කියා දී තිබිණ. දෙවිගේ බලය ඔහු තුළ ප්‍රබලව ක්‍රියාත්මක වූ නිසා+ ඔහු ඉතා උද්‍යෝගයෙන් කටයුතු කළ අතර යේසුස් ගැන ඉතා නිවැරදිව කතා කරමින් හා උගන්වමින් සිටියේය. නමුත් ඔහු අවබෝධ කරගෙන සිටියේ යොහන් සිදු කළ බව්තීස්මය+ ගැන පමණි. 26  ඔහු සිනගෝගයේදී නිර්භීතව කතා කළේය. ප්‍රිසිලා සහ අකිලා+ ඔහුට සවන් දී තම නිවසට ආරාධනා කර ඔහුට දෙවිගේ මාර්ගය ගැන වඩාත් නිවැරදි අවබෝධයක් ලබා දුන්නෝය. 27  අපොලොස් ඇකේයාව ප්‍රදේශයට යන්න කැමැත්තෙන් සිටි නිසා ඔහුව සාදරයෙන් පිළිගන්නා ලෙස එෆීසයේ සිටි සහෝදරයෝ එහි සිටි ගෝලයන්ට දන්වා යැවූහ. ඔහුගේ පැමිණීම දෙවිගේ මහත් කරුණාව අද්දකිමින්+ විශ්වාසයක් ඇතුව සිටි අයට මහත් උපකාරයක් විය.+ 28  මන්ද ඔහු යේසුස් ඇත්තටම ක්‍රිස්තුස් බව+ ශුද්ධ ලියවිල්ලෙන් පෙන්වා+ දෙමින් යුදෙව්වරුන් වැරදි බව සියලුදෙනා ඉදිරියේ ඉතා ප්‍රබලව ඔප්පු කළේය.

පාදසටහන්