ක්‍රියා 17:1-34

17  ඔවුහු අම්ෆිපොලිස් සහ අපොලෝනිය යන නුවරවල් හරහා ගමන් කර තෙසලෝනිකයට ගියෝය.+ එහි යුදෙව්වරුන්ගේ සිනගෝගයක් තිබිණ.  පාවුල් වෙනදා මෙන්+ සිනගෝගයට ඇතුල් වී සබත් දවස් තුනක් පුරා ඔවුන්ට ශුද්ධ ලියවිල්ල පදනම් කරගෙන කාරණා තර්කානුකූලව පහදා දුන්නේය.+  ක්‍රිස්තුස් වධ විඳිය යුතු බව+ සහ මරණයෙන් නැඟිටිය යුතු බව+ කලින්ම ශුද්ධ ලියවිල්ලේ දක්වා තිබෙන ආකාරය ඔහු පැහැදිලිව පෙන්නුවේය. ඔහු පැවසුවේ, “මම ඔබට කතා කරන්නේ මෙහි සඳහන් ක්‍රිස්තුස් ගැනයි.+ ඔහු තමයි යේසුස්” කියාය.  එය අසා සමහරදෙනෙක් යේසුස්ගේ අනුගාමිකයන් වී+ පාවුල් සහ සීලස්ට එකතු වූහ.+ එමෙන්ම දෙවිට නමස්කාර කළ ග්‍රීකවරුන් විශාල පිරිසක්ද සමාජයේ ඉහළ පෙළේ ස්ත්‍රීන් බොහෝදෙනෙක්ද එසේ කළෝය.  නමුත් යුදෙව්වරු ඔවුන්ට ඊර්ෂ්‍යා කර+ වෙළඳපොළට වී නිකරුණේ කාලය ගත කරමින් සිටි අය අතරින් මැර පිරිසක් එකතු කරගෙන නගරයේ කෝලහලයක් ඇති කළෝය.+ ඉන්පසු ඔවුහු රැස්ව සිටි සමූහයා ඉදිරියට පාවුල්ව සහ සීලස්ව ගෙන ඒමේ අදහසින් ජේසන් නම් සහෝදරයාගේ නිවසට කඩාවැදුණෝය.+  ඔවුන්ව එහි සොයාගත නොහැකි වූ විට ඔවුහු ජේසන්ව සහ සමහර සහෝදරයන්ව නුවරේ පාලකයන් ඉදිරියට ඇදගෙන ගොස් කෑගසමින් මෙසේ කීවෝය. “මුළු ලෝකයම පෙරළා දැමූ අර මිනිස්සු මෙහාටත් ඇවිල්ලා.+  ඒ මදිවට මේ ජේසන් ඔවුන්ට සහයෝගය දක්වනවා. ඔවුන් සියලුදෙනාම කියන්නේ යේසුස් නම් තවත් රජෙක් සිටිනවා කියායි.+ ඒ කියන්නේ ඔවුන් සීසර් අධිරාජ්‍යයාගේ නියෝගවලට විරුද්ධව කැරලිගසනවා.”+  ඒ දේවල් නුවරේ වැසියන්ට හා පාලකයන්ට ඇසුණු විට ඔවුන් තුළ මහත් කැලඹීමක් ඇති විය.  නමුත් ඔවුහු පසුව ජේසන්ව සහ අනික් අයව ඇප මත නිදහස් කළෝය. 10  කළුවර වැටුණු විගස+ සහෝදරයෝ පාවුල්ව සහ සීලස්ව බෙරීය නුවරට යැව්වෝය. ඔවුහු එම නුවරට ගිය විට එහි තිබූ යුදෙව්වරුන්ගේ සිනගෝගයට ගියෝය. 11  එහි සිටි අය තෙසලෝනිකයේ සිටි අයට වඩා සාධාරණව හා පුළුල්ව සිතීමට හැකියාව තිබුණු පිරිසකි. මන්ද ඔවුහු තමන් ඇසූ දේවල් සැබෑද කියා බැලීමට+ දිනපතාම ශුද්ධ ලියවිල්ල+ හොඳින් පරීක්ෂා කර බැලුවෝය.+ එහෙයින් ඔවුන් දෙවිගේ පණිවිඩය පිළිගත්තේ මහත් උනන්දුවකිනි. 12  ප්‍රතිඵලයක් ලෙස සමාජයේ ඉහළ පෙළේ සිටි+ ග්‍රීක ජාතික ස්ත්‍රීන් හා පුරුෂයන් ඇතුළු බොහෝදෙනෙක් යේසුස්ගේ අනුගාමිකයෝ බවට පත් වූහ. 13  නමුත් පාවුල් බෙරීය නුවරෙහි දෙවිගේ පණිවිඩය ගැන ප්‍රකාශ කරන බව තෙසලෝනිකයේ සිටි යුදෙව්වරුන්ට ආරංචි වූ විට ඔවුහු ජනතාව උසිගන්වා+ කලබලයක් ඇති කිරීමේ අදහසින්+ එතැනටත් ගියෝය. 14  එවිට සහෝදරයෝ වහාම පාවුල්ව වෙරළබඩ තීරය දෙසට පිටත් කර යැව්වෝය.+ නමුත් සීලස් සහ තිමෝති එහි නැවතී සිටියෝය. 15  පාවුල්ව ඇරලීමට ගිය අය ඇතන්ස් දක්වාම ඔහු සමඟ ගියෝය. ඔවුන් ආපසු ඒමට පෙර පාවුල් ඔවුන්ගෙන් ඉල්ලා සිටියේ හැකි ඉක්මනින් තමා වෙතට සීලස්ව හා තිමෝතිව+ එවන ලෙසය. ඉන්පසු ඔවුහු නැවත ආවෝය. 16  පාවුල් ඔවුන් පැමිණෙන තෙක් ඇතන්ස් නුවරේ බලා සිටියදී ඒ නුවර දේවතා රූපවලින් පිරී ඇති ආකාරය දැක ඔහු තුළ මහත් පිළිකුලක් ඇති විය.+ 17  එවිට ඔහු සිනගෝගයේදී යුදෙව්වරුන්ට සහ දෙවිට නමස්කාර කළ වෙනත් අයටද දිනපතාම වෙළඳපොළෙහි ගැවසුණු අයටද+ ශුද්ධ ලියවිල්ලේ තොරතුරු තර්කානුකූලව පහදා දුන්නේය.+ 18  නමුත් දාර්ශනිකයන් කිහිපදෙනෙක් එනම්, එපිකියුරිය සහ ස්ටොයික දර්ශන අනුගමනය කළ කිහිපදෙනෙක්+ ඔහු සමඟ වාද කළෝය. “මේ මිනිසා මොනව දොඩවනවාද”+ කියා සමහරු ඇසූහ. තවත් සමහරු මෙසේ පැවසුවෝය. “පෙනෙන විදිහට ඔහු වෙනත් දෙවිවරුන් ගැන කතා කරනවා වගෙයි.” ඔවුන් ඒ දේවල් පැවසුවේ ඔහු යේසුස් ගැන සහ නැවත නැඟිටීම පිළිබඳ ශුභාරංචිය ගැන ප්‍රකාශ කරමින් සිටි නිසාය.+ 19  ඔවුහු ඔහුව ඇරියොපගස් කන්දට* ගෙන ගොස් මෙසේ කීවෝය. “සියලුදෙනාට ඔබ කියා දෙන මේ අලුත් ඉගැන්වීම ගැන අපට තවත් විස්තර දැනගන්න පුළුවන්ද?+ 20  ඇත්තෙන්ම ඔබ කියා දෙන සමහර දේවල් හරිම අමුතුයි. ඒ නිසා ඒ දේවල් ගැන වැඩි විස්තර දැනගන්න අප කැමතියි.”+ 21  ඇතන්ස්හි වැසියන් හා එහි තාවකාලිකව නැවතී සිටි විදේශිකයන් පුරුදු වී සිටියේ තමන්ට ලැබෙන විවේක කාලයේදී නිතරම යම් අලුත් දෙයක් ගැන කතාබහ කිරීමට හෝ එවැනි දෙයකට සවන් දීමටය. 22  ඇරියොපගස් කන්දෙහි මැද සිටගත්+ පාවුල්, ඔවුන්ට මෙසේ කීවේය. “ඇතන්ස්හි පුරුෂයෙනි, දෙවි දේවතාවන් ගැන අන් අයට වඩා ඔබ තුළ මහත් භක්තියක් ඇති බව මට පැහැදිලියි.+ එය ඔබ කරන හැම ක්‍රියාවකින්ම මම දුටුවා. 23  ඔබ මහත් භක්තියෙන් සලකන දේවල් දිහා හොඳින් බලමින් යද්දී මම එක පූජාසනයක් දැක්කා. එහි සඳහන් කර තිබුණේ, ‘නාඳුනන දෙවි කෙනෙකුටය’ කියායි. මම දැන් ඔබට කියා දෙන්නේ ඔබ මෙතෙක් නොදැන සිටියත් මහත් භක්තියකින් සැලකූ ඒ දෙවි ගැනයි. 24  ලෝකයත් එහි තිබෙන සියල්ලත් සෑදූ ඒ දෙවි, ස්වර්ගයෙත් පොළොවෙත් ස්වාමීන් වන නිසා+ ඔහු මිනිසුන් සාදා ඇති දේවස්ථානවල වාසය කරන්නේ නැහැ.+ 25  ඔහු සියලු දෙයින් සම්පූර්ණ දෙවි කෙනෙක්. ඒ නිසා ඔහුට මිනිසුන්ගේ ඇප උපස්ථාන අවශ්‍ය නැහැ.+ මන්ද සියලුදෙනාටම ජීවිතයත්+ හුස්මත් අන් සියලු දේත් දෙන්නේ ඔහුයි.+ 26  ඔහු එක මිනිසෙකුගෙන්+ සියලුම ජාතීන් බිහි කළා.+ ඒ වගේම ඔවුන්ගෙන් මුළු පොළෝතලයම ජනාවාස කළා.+ මිනිසුන් වාසය කළ යුතු දේශ සීමා ගැනත්+ ඔවුන් එසේ වාසය කළ යුත්තේ කුමන කාල වකවානුවලද යන්න ගැනත් තීරණය කරන්නේ ඔහුයි.+ 27  දෙවි එසේ කරන්නේ සියල්ලන්ම දෙවි වෙතට හැරී ඔහුගේ මඟ පෙන්වීම් පැතීම සඳහායි.+ ඇත්තෙන්ම ඔවුන් ඒ සඳහා මහත් උත්සාහයක් දැරුවොත් ඔහුට ළං වෙන්නත් ඔවුන්ට හැකි වෙයි.+ එයට හේතුව ඔහු අපෙන් දුරස්ව සිටින කෙනෙක් නොවන නිසයි. 28  අපේ ජීවිතයත් පැවැත්මත් අප කරන සෑම දෙයක්මත් රඳා පවතින්නේ ඔහු මතයි.+ ඇත්තෙන්ම ඔබේ ඇතැම් කවිකාරයන්+ ඒ ගැන පවසා තිබෙන්නේ “අපි ඔහුගේ දරුවෝ” වන බවයි.’ 29  “අප දෙවිගේ දරුවන් නම්+ රන්, රිදී හෝ ගල් යොදා මිනිසුන් විසින් සාදා ඇති රූපයකට+ දෙවිව සමාන කිරීම සුදුසු දෙයක් වන්නේ නැහැ.+ 30  මිනිසා මෙතෙක් නොදැනුවත්කමින් කළ දේ අමතක කර දමන්න දෙවි කැමතියි.+ ඒ නිසා දැන් ඔහු මුළු මිනිස් වර්ගයාටම කියන්නේ, පසුතැවිලි වන්න කියායි.+ 31  එයට හේතුව ධර්මිෂ්ඨ ලෙස මුළු මිනිස් වර්ගයාම විනිශ්චය කිරීමට ඔහු එක්තරා දවසක් නියම කර තිබීමයි.+ ඒ විනිශ්චය සිදු කරන්නේ ඔහු විසින්ම පත් කර ඇති මිනිසෙකු විසිනුයි. ඒ වගේම ඒ දේ අනිවාර්යයෙන් සිදු වන බවට සාක්ෂියක් ලෙස දෙවි ඒ මිනිසාව මරණයෙන් පවා නැවත නැඟිටුවා තිබෙනවා.”+ 32  මිය ගිය අයගේ නැවත නැඟිටීම ගැන පාවුල් කතා කරනවා ඔවුන්ට ඇසුණු විට සමහරු ඔහුට සමච්චල් කළෝය.+ නමුත් තවත් සමහරු, “ඔබ පැවසූ මේ දේවල් ගැන තවත් විස්තර වෙනත් වේලාවක අහන්න අපි කැමතියි” කියා පැවසුවෝය. 33  පසුව පාවුල් එම ස්ථානයෙන් පිටත්ව ගියේය. 34  සමහරු ඔහු සමඟ එකතු වී, යේසුස්ගේ අනුගාමිකයෝ බවට පත් වූහ. ඔවුන් අතරේ ඇරියොපගස් අධිකරණයේ විනිශ්චයකාරයෙකු වූ දියොනිසියස්ද+ දමරිස් නම් ස්ත්‍රියක්ද තවත් කිහිපදෙනෙක්ද සිටියෝය.

පාදසටහන්

මෙය පුරාණ ඇතන්ස් නුවරේ පිහිටි කුඩා කන්දකි. ශ්‍රේෂ්ඨාධිකරණය රැස් වූයේ එහි එක් ස්ථානයකය.