ක්‍රියා 16:1-40

16  එතැන් සිට පාවුල් දර්බයටත් ඉන්පසු ලිස්ත්‍රාවටත් ගියේය.+ එහි තිමෝති නම් ගෝලයෙක් සිටියේය.+ යුදෙව් ස්ත්‍රියක් වූ ඔහුගේ මව යේසුස්ගේ අනුගාමිකයෙක් වූ අතර ඔහුගේ පියා ග්‍රීක ජාතිකයෙකි.  තිමෝති ලිස්ත්‍රාවෙහි සහ ඉකෝනියෙහි සහෝදරයන් අතර හොඳ නමක් දිනාගෙන සිටි කෙනෙකි.  පාවුල් තමා යන ගමන්වලට ඔහුව රැගෙන යෑමට කැමති බව කියා සිටියේය. ඒ පළාත්වල යුදෙව්වරුන් සිටි නිසා ඔහු මුලින්ම කළේ ඔහුව චර්මච්ඡේදනය කිරීමය.+ එයට හේතු වූයේ අවට සියලුදෙනා ඔහුගේ පියා ග්‍රීක ජාතිකයෙකු බව දැන සිටීමය.  ඔවුහු නුවරෙන් නුවරට ගොස් යෙරුසලමේ සිටි නියෝජිතයන්* හා වැඩිමහල්ලන් තීරණය කළ දේ ගැන නුවරවල සිටි සහෝදරයන්ව දැනුවත් කළෝය.+  ප්‍රතිඵලයක් ලෙස සභාවල සිටි සියලුදෙනාගේ විශ්වාසය ශක්තිමත් වූ අතර+ එහි සිටි අයගේ ගණනද දිනෙන් දින වැඩි විය.  ඉන්පසු ඔවුහු ෆ්‍රිජිය සහ ගලාතිය ප්‍රදේශය මැදින් ගියෝය.+ එයට හේතුව නම් ආසියා පළාතට ගොස් ශුභාරංචිය ගැන කතා නොකරන ලෙස දෙවි තම බලය මාර්ගයෙන් ඔවුන්ට මඟ පෙන්වා තිබීමය.  ඉන්පසු ඔවුන් මිසියාවට ගොස් එතැන් සිට බිතිනියට යන්න උත්සාහ කළ විටද+ යේසුස් දෙවිගේ බලය මාර්ගයෙන් එතැනට නොයන ලෙස මඟ පෙන්වීය.  එමනිසා ඔවුහු මිසියාව පසු කර ත්‍රෝවසට ගියෝය.+  පාවුල්ට එදින රාත්‍රියේදී දර්ශනයක් පෙනිණ.+ ඔහු දුටුවේ මැසිඩෝනියානු මිනිසෙකු, “මැසිඩෝනියාවට ඇවිත් අපට උපකාර කරන්න” කියා ඔහුගෙන් බැගෑපත්ව ඉල්ලා සිටි ආකාරයයි. 10  ඔහු ඒ දර්ශනය දුටු පසු අප තේරුම්ගත්තේ මැසිඩෝනියාවට ගොස්+ එහි ශුභාරංචිය ප්‍රකාශ කිරීමට දෙවි අපට මඟ පෙන්වන බවයි. එහෙයින් මැසිඩෝනියාව බලා යෑමට අපි සැලසුම් කළෙමු. 11  අපි ත්‍රෝවසේ සිට නැවෙන් ගමන් කර කෙළින්ම සැමොත්‍රෙසයට ගියෙමු. පසුවදා අප ගියේ නෙයපොලිසයටය. 12  එතැනින් අප ගමන් කළේ මැසිඩෝනියානු ප්‍රදේශයේ ප්‍රධාන නුවරද+ රෝමයේ යටත් විජිතයක්ද වූ ෆිලිප්පියටය.+ අපි ඒ නුවරෙහි දින කිහිපයක්ම නැවතී සිටියෙමු. 13  සබත් දවසේදී අපි නුවරේ දොරටුවෙන් පිට ගලා ගිය ගඟක් අසලට ගියෙමු. අප එතැනට ගියේ යාච්ඤාව සඳහා වෙන් කළ ස්ථානයක් එහි ඇති බව සිතූ නිසාය. අපි එතැන ඉඳගෙන එහි පැමිණ සිටි ස්ත්‍රීන්ට කතා කරන්න පටන්ගත්තෙමු. 14  සවන් දෙමින් සිටි අය අතරේ තියතීරා නුවරින් පැමිණි+ ලිදියා නම් ස්ත්‍රියක් සිටියාය. ඇය දම් පැහැති රෙදි අළෙවි කරන දෙවිට නමස්කාර කරන තැනැත්තියකි. පාවුල් පවසමින් සිටි දේ පිළිගැනීමට යෙහෝවා දෙවි ඇගේ හදවත තුළ මහත් පෙලඹීමක් ඇති කළේය.+ 15  ප්‍රතිඵලයක් ලෙස ඇයද ඇගේ නිවසේ සිටි සියලුදෙනාද බව්තීස්ම වූහ.+ ඉන්පසු ඇය මෙසේ ඉල්ලා සිටියාය. “මම යෙහෝවා දෙවිට විශ්වාසවන්ත කෙනෙක් කියා ඔබ සිතනවා නම් මගේ නිවසට ඇවිත් නතර වෙන්න.”+ ඇය අපට කොතරම් පෙරැත්ත කළාද කිවහොත් අපට එම ආරාධනාව ප්‍රතික්ෂේප කළ නොහැකි විය.+ 16  දිනක් අප යාච්ඤා කරන ස්ථානයට යද්දී තරුණ සේවිකාවක් අපට හමු විය. ඇයට භූතයෙකු වැහී සිටි නිසා+ ඇයට පේන කීමේ හැකියාවක් තිබිණ.+ එම හැකියාව නිසා ඇගේ ස්වාමිවරු ඇය මාර්ගයෙන් බොහෝ මිල මුදල් උපයාගත්තෝය.+ 17  එම තරුණිය පාවුල් හා අප පසුපසම එමින්, “මේ මිනිස්සු මහෝත්තම දෙවිගේ සේවකයෝයි. ඔවුන් ඔබට ප්‍රකාශ කරන්නේ දෙවි ඔබට ගැලවීම ලබා දෙන ආකාරය ගැනයි” කියා කෑගැසුවාය.+ 18  ඒ දේ දින කිහිපයක් පුරාම සිදු විය. අන්තිමේදී පාවුල්ට එය තවදුරටත් ඉවසිය නොහැකි වූ නිසා+ ඔහු ඇය දෙසට හැරී භූතයාට මෙසේ කීවේය. “යේසුස් ක්‍රිස්තුස්ගේ නාමයෙන් මම ඔබට අණ කරන්නේ, මේ තරුණියගෙන් පිටතට එන්න කියායි.”+ ඒ මොහොතේදීම එම භූතයා ඇගෙන් පිටතට ආවේය.+ 19  තමන් මිල මුදල් උපයාගත් මාර්ගය නැති වී ඇති බව තේරුම්ගත් එම තරුණියගේ ස්වාමිවරු,+ පාවුල් සහ සීලස්ව අල්ලාගෙන වෙළඳපොළේ* සිටි පාලකයන් වෙතට ඇදගෙන ගියෝය.+ 20  ඔවුහු සිවිල් ආණ්ඩුකාරයන් වෙතට ඔවුන්ව ගෙන ගොස් මෙසේ කීවෝය. “මේ මිනිස්සු අපේ නුවර තුළ මහ කලබලයක් ඇති කරනවා.+ ඔවුන් යුදෙව්වන්. 21  රෝම චාරිත්‍ර වාරිත්‍රවලට අනුව අපට පිළිගන්නවත් කරන්නවත් තහනම් දේවල් කරන්න කියා ඔවුන් උගන්වනවා.”+ 22  එවිට රැස්ව සිටි මුළු සමූහයාද ඔවුන්ට විරුද්ධව කතා කරන්න පටන්ගත්තෝය. එහෙයින් සිවිල් ආණ්ඩුකාරයෝ ඔවුන්ගේ පිට වස්ත්‍ර ඉරා ඉවත් කර ඔවුන්ට කෝටුවලින් තළන්න අණ කළෝය.+ 23  ඔවුහු ඔවුන්ට බොහෝ සෙයින් පහර දුන් පසු+ ඔවුන්ව සිරභාරයට නියම කළෝය. ඔවුන්ව භාර දෙන විට ඔවුන් සිරගෙයි භාරකරුට පැවසුවේ ඔවුන්ව හොඳින් මුර කරන්න කියාය.+ 24  භාරකරුට එවැනි නියෝගයක් ලැබුණු නිසා ඔහු ඔවුන්ව රැගෙන ගියේ සිරගෙයි අභ්‍යන්තරයේ තිබූ සිරකුටියකටය.+ එහිදී ඔහු ඔවුන්ගේ පාද දඬුකඳන්වල ගැසුවේය.+ 25  මධ්‍යම රාත්‍රියේදී පමණ+ පාවුල් සහ සීලස් යාච්ඤා කරමින්ද දෙවිට ප්‍රශංසා ගී ගයමින්ද සිටියෝය.+ ඔවුන්ගේ හඬ සිරකරුවන්ටද ඇසිණ. 26  හදිසියෙන්ම මහත් භූමිකම්පාවක් ඇති විය. සිරගෙයි අත්තිවාරම් පවා දෙදරුම් කෑවේය. මේ අතර සියලුම දොරවල් එකවරම විවෘත වූ අතර සියලුදෙනාට දමා තිබූ විලංගුද ගැලවී ගියේය.+ 27  නින්දෙන් අවදි වූ සිරගෙයි භාරකරු, සිරගෙයි සියලු දොරවල් විවෘත වී ඇති බව දුටුවේය. සිරකරුවන් පැන ගොස් ඇති බව සිතූ ඔහු,+ තම කඩුව අතට ගෙන සිය දිවි හානි කරගැනීමට සූදානම් විය.+ 28  නමුත් පාවුල්, “ඔය කරන්න යන දේ නවත්වන්න.+ අපි සියලුදෙනාම මෙහි සිටිනවා” කියා මහත් හඬකින් කීවේය. 29  එවිට ඔහු පහනක් ඉල්ලාගෙන විගස ඇතුළට දිව ගොස් පාවුල් සහ සීලස් ඉදිරියෙහි වෙවුලමින් දණින් වැටුණේය.+ 30  ඔහු ඔවුන්ව සිරගෙයින් පිටතට ගෙන ගොස්, “මහත්වරුනි, ගැලවීම ලබාගන්න නම් මම මොනවාද කරන්න ඕනේ”+ කියා ඇසුවේය. 31  ඔවුහු මෙසේ පිළිතුරු දුන්නෝය. “ස්වාමීන් වන යේසුස්ව විශ්වාස කරන්න.+ එවිට ඔබටත් ඔබේ නිවසේ සිටින සියලුදෙනාටත් ගැලවීම ලැබෙයි.”+ 32  ඉන්පසු ඔවුහු ඔහුටත් ඔහුගේ නිවසෙහි සිටි සියලුදෙනාටත් යෙහෝවා දෙවිගේ පණිවිඩය ගැන කියා දුන්නෝය.+ 33  ඔහු වහාම ඒ රාත්‍රියේම ඔවුන්ව ගෙන ගොස් ඔවුන්ගේ තුවාල වතුරෙන් සෝදා පිරිසිදු කළේය. පසුව කල් නොදමා ඔහුද ඔහුගේ පවුලේ සියලුදෙනාද බව්තීස්ම වූහ.+ 34  ඔහු ඔවුන්ව තම නිවසට ගෙන ගොස් ඔවුන් වෙනුවෙන් කෑමක් පිළියෙල කළේය. දෙවි ගැන විශ්වාසයක් ඇති වූ නිසා ඔහුත් ඔහුගේ පවුලේ සියලුදෙනාත් බොහෝ සෙයින් සතුටු වූහ. 35  පසුවදා උදෑසන සිවිල් ආණ්ඩුකාරයෝ,+ “ඒ මිනිසුන්ව නිදහස් කරන්න” කියා ආරක්ෂක නිලධාරීන් අත පණිවිඩයක් යැවූහ. 36  එවිට සිරගෙයි භාරකරු ඒ පණිවිඩය පාවුල්ට දන්වමින් මෙසේ කීවේය. “ඔබ දෙදෙනාව නිදහස් කර හරින්න කියා සිවිල් ආණ්ඩුකාරයන් මිනිසුන්ව එවා තිබෙනවා. ඉතින් පිටතට ඇවිත් සමාදානයෙන් යන්න.” 37  එවිට ඒ ආරක්ෂක නිලධාරීන්ට පාවුල් මෙසේ කීවේය. “ඔවුන්, රෝමයේ පුරවැසියන් වන අපිව+ වරදකරුවන් බව ඔප්පු කරන්නේවත් නැතුව සියලුදෙනා ඉදිරියේ තළා, සිරභාරයට නියම කළා. දැන් ඔවුන් හදන්නේ රහසින් අපව පිටත් කර හරින්නද? එහෙම කරන්න බැහැ. ඔවුන්ටම ඇවිත් අපිව නිදහස් කරන්න කියා කියන්න.” 38  එවිට ආරක්ෂක නිලධාරීහු සිවිල් ආණ්ඩුකාරයන්ට එය දැන්වූහ. එම මිනිසුන් රෝමයේ පුරවැසියන් බව ඔවුන් දැනගත් විට ඔවුන් තුළ මහත් බියක් ඇති විය.+ 39  එහෙයින් ඔවුහු ඇවිත් ඔවුන්ගෙන් සමාව ඉල්ලා ඔවුන්ව පිටතට ගෙනාවෝය. නමුත් ඔවුහු තම නුවරින් පිටත් වී යන මෙන් ඔවුන්ගෙන් ඉල්ලා සිටියෝය. 40  සිරගෙයින් පිටතට ආ පසු ඔවුන් ගියේ ලිදියාගේ නිවසටය. එහිදී ඔවුහු සහෝදරයන්ව හමු වී ඔවුන්ව දිරිගන්වා+ නුවරින් පිටත් වී ගියෝය.

පාදසටහන්

හෝ, “යවනු ලැබූවන්.”
මෙය මහජනයා එක් රැස් වූ ස්ථානයකි.