එසකියෙල් 44:1-31

44  ඔහු නැවතත් මාව දේවමාලිගාවේ නැඟෙනහිර දෙසින් තිබූ ඇතුල් වීමේ ශාලාව ළඟට ගෙනාවේය.+ එහි දොරටුව වසා තිබිණ.+  එවිට යෙහෝවා දෙවි මට මෙසේ පැවසීය. “මෙම දොරටුව විවෘත නොකර දිගටම වසා තබනු ලබන්නේය. කිසි මිනිසෙක් එයින් ඇතුල් වන්නේ නැත. යෙහෝවා නම් වූ ඊශ්‍රායෙල්හි දෙවි වන මා+ එම දොරටුවෙන් ඇතුල් වී තිබෙන හෙයින් එය දිගටම වසා තැබිය යුතුය.  එහෙත් එයින් ඇතුල් වී එහි හිඳගෙන යෙහෝවා දෙවි වන මා ඉදිරියේ ආහාර අනුභව කිරීමට+ අධිපතියාට+ අවසර ලැබෙනු ඇත. ඔහු ශාලාවේ දොරටුවට යාබදව පිහිටි ආලින්දය හරහා පිටත මළුවට පිවිසෙයි. ඔහු නැවත පිටත් වී යන්නෙත් ඒ හරහාමය.”+  ඉන්පසුව ඔහු උතුරු දෙසින් පිහිටි ඇතුල් වීමේ ශාලාව හරහා මාව දේවමාලිගාව ඉදිරියට ගෙනාවේය. ඒ අවස්ථාවේදී, යෙහෝවා දෙවිගේ තේජසින් යෙහෝවා දෙවිගේ ගෘහය පිරී තිබුණ බව මම දුටුවෙමි.+ එය දැක මම මුණින් වැටුණෙමි.+  පසුව යෙහෝවා දෙවි මට මෙසේ පැවසීය. “මනුෂ්‍ය පුත්‍රය, මේ දේවල් හොඳින් සිතට ගන්න.+ මා ඔබට පෙන්වන දේවල් දෙස හොඳින් බලන්න. යෙහෝවා දෙවි වන මාගේ ගෘහයට සම්බන්ධව මා දෙන සියලු නීතිරීතිවලට හොඳින් ඇහුම්කන් දෙන්න. ඔබ මෙම ගෘහයට ඇතුල් වන මාර්ගය ගැනද එයින් පිට වීමට ඇති සියලු ස්ථාන ගැනද හොඳ අවධානයකින් සිටිය යුතුයි.  ඔබ කැරලිකාර+ ඊශ්‍රායෙල් ජනතාවට මේ දේ කියන්න. ‘විශ්වයේ පාලකයාණන් වන යෙහෝවා දෙවි මෙසේ පවසන්නේය. “ඊශ්‍රායෙල් ජනයෙනි, මේ සියලු පිළිකුල්සහගත දේවල් කිරීමට මා ඔබට ඉඩහැරිය කාලය දැන් හොඳටම ඇති.+  සිත් පවිත්‍ර කර නොගත් අචර්මච්ඡේදිත විදේශිකයන්ව මාගේ ශුද්ධස්ථානයට ගෙනැවිත්+ ඔබ එය කෙලෙසා ඇත. ඔබ මට කැප කළ ආහාරද+ තෙල්ද+ ලේද+ මා ඉදිරියට ගෙනැවිත් ඔප්පු කළත් ඔබේ පිළිකුල්සහගත ක්‍රියා නිසා මා සමඟ කළ ගිවිසුම කඩ කර ඇත.+  මට කැප කළ පරිශුද්ධ දේවල් හා බැඳි වගකීම් ඔබ පැහැරහැර ඇත.+ මාගේ ශුද්ධස්ථානයේ ඔබට ඇති වගකීම් ඉටු කිරීම සඳහා ඔබ වෙන කිසිවෙකුව පත් කළේද නැත.”’+  “‘එහෙයින් විශ්වයේ පාලකයාණන් වන යෙහෝවා දෙවි මෙසේ පවසයි. “ඊශ්‍රායෙල් සෙනඟ අතරේ සිටින සිතින් පවිත්‍ර නොවූ මෙන්ම අචර්මච්ඡේදිත වූ කිසි විදේශිකයෙකුට මාගේ ශුද්ධස්ථානයට ඇතුල් වෙන්න මම අවසර නොදෙමි.”’+ 10  “‘ඊශ්‍රායෙල් ජනයා මාගෙන් ඉවත් වී පිළිකුල්සහගත රූප පසුපස ගිය විට ලෙවීවරුද මාව අත්හැර ගියෝය.+ එහෙයින් ඔවුන් කළ වැරදිවල ප්‍රතිඵල විඳින්න ඔවුන්ටද සිදු වනු ඇත.+ 11  ඉන්පසුව නැවතත් මා වෙතට එන ඔවුහු මාගේ ශුද්ධස්ථානයේ ඇතුල් වීමේ ශාලාවල හා ඒ අවට භූමියෙහි අධීක්ෂණ කටයුතුවල නිරත වෙමින් මට සේවය කරනු ඇත.+ ඔවුහු සතුන්ව මරා, දවන පූජා හා ජනයා වෙනුවෙන් ඔප්පු කරන පූජා සූදානම් කරනු ඇත.+ ඔවුහු ජනයා ඉදිරියට ගොස් සේවය කරන්නෝය.+ 12  එහෙත් අතීතයේදී ඊශ්‍රායෙල් සෙනඟව වැරදි මඟට යොමු කරමින්+ ඔවුහු පිළිකුල්සහගත රූපවලට පුදපූජා ඔප්පු කළෝය.+ මාගේ බලවත් හස්තයෙන් ඔවුන්ට පහර දුන්නේ ඒ නිසාය’+ කියා විශ්වයේ පාලකයාණන් වන යෙහෝවා දෙවි පවසයි. ‘ඒ නිසා ඔවුන් කළ වැරදිවල ප්‍රතිඵල විඳින්න ඔවුන්ට සිදු වන්නේය. 13  ඔවුහු පූජකයන් ලෙස මා ඉදිරියේ සේවය නොකරන්නෝය. මා ඉතා පරිශුද්ධව සලකන මාගේ ශුද්ධස්ථානයට ඔවුහු පැමිණෙන්නේ නැත.+ ඔවුන් කළ පිළිකුල්සහගත දේවල් නිසා ඔවුහු අනිවාර්යයෙන්ම අවමානයට ලක් වන්නෝය.+ 14  එහෙත් පසු කලෙක මාගේ ගෘහයේ සියලු වගකීම් භාරව කටයුතු කරන්න මම ඔවුන්ව පත් කරන්නෙමි. මාගේ ගෘහය හා බැඳි සියලුම සේවාවන් මම ඔවුන්ට භාර දෙන්නෙමි.’+ 15  “‘ඊශ්‍රායෙල් සෙනඟ මාගෙන් ඈත් වූ විට,+ ලෙවී ගෝත්‍රයේ පූජකයන්+ වන සාදොක්ගේ පුත්‍රයෝ+ මට සේවය කරන පිණිස මාගේ ශුද්ධස්ථානයට පැමිණියෝය. ඔවුහු මට සතුන්ගේ තෙල්ද+ ලේද+ ඔප්පු කරන පිණිස මා ඉදිරියට පැමිණ මට සේවය කරනු ඇත.’+ එසේ පවසන්නේ විශ්වයේ පාලකයාණන් වන යෙහෝවා දෙවිය. 16  ‘මාගේ ශුද්ධස්ථානයට ඇතුල් වී,+ මට සේවය කරන පිණිස මාගේ මේසය* අසලට පැමිණෙන්නේ ඔවුන්ය.+ ඔවුහු මගේ ගෘහයේ කළ යුතු සියලුම වගකීම් ඉටු කරමින් මට සේවය කරන්නෝය.+ 17  “‘ඇතුල් මළුවට පිවිසෙන ශාලා තුළින් පැමිණෙන විට ඔවුන් ලිනන් රෙදිවලින් නිමැවූ වස්ත්‍ර ඇඳගෙන සිටිය යුතුය. ඔවුන් ඇතුල් මළුවට පිවිසෙන ශාලාවල සේවය කරන විටදී හා ඇතුල් මළුවේ සේවය කරන විටදී ලොම්වලින් නිමැවූ වස්ත්‍ර නොඇඳිය යුතුය.+ 18  ඔවුන් ලිනන් රෙදිවලින් සෑදූ හිස්වැසුම්ද+ ලිනන් රෙදිවලින් මසන ලද යට ඇඳුම්ද ඇඳගෙන සිටිය යුතුය.+ දහඩිය දමන වස්ත්‍ර ඇඳීමෙන්ද වැළකිය යුතුය. 19  ඔවුන් ජනතාව රැස්ව සිටින ස්ථානය වන පිටත මළුවට යෑමට පෙර, ඇතුල් මළුවේදී ඇඳගෙන සිටි වස්ත්‍ර ගලවා+ ශුද්ධ භෝජන ශාලාවල තබා යා යුතුය.+ ඔවුන් ඒ වෙනුවට වෙනත් වස්ත්‍රයක් ඇඳිය යුතුය. එසේ කළ යුත්තේ පූජකයන්ට පමණක් හිමි විය යුතු ශුද්ධ තත්වය ජනතාවට නොලැබෙන පිණිසය.+ 20  හිස බූ ගෑමවත්+ හිසකෙස් දිගට වැවීමවත් පූජකයන්ට සුදුසු නැත. ඔවුන් තම හිසකෙස් කොටට කැපිය යුතුය.+ 21  ඇතුල් මළුවට පැමිණෙන විට වයින් පානය කිරීම පූජකයන්ට තහනම්ය.+ 22  පූජකයෙක් වැන්දඹුවක හෝ දික්කසාද වූ ස්ත්‍රියක විවාහ කර නොගත යුතුය.+ ඔහුට විවාහ කරගත හැක්කේ ඊශ්‍රායෙල් ජනයා අතරේ සිටින කන්‍යා ස්ත්‍රියක+ හෝ පූජකයෙකුගේ වැන්දඹුවක පමණය.’ 23  “‘ඔවුන් මාගේ ජනතාවට ශුද්ධ දේ හා දූෂිත දේ අතර ඇති වෙනස පැහැදිලිව අවබෝධ කර දිය යුතුය. ඔවුන්ට පවිත්‍ර හා අපවිත්‍ර දේ අතර ඇති වෙනසද තෝරා දිය යුතුය.+ 24  යමෙකු නඩුවක් ඔවුන් වෙත ගෙනාවොත් ඒ නඩුව විනිශ්චය කිරීමේ වගකීම පැවරී ඇත්තේ ඔවුන්ටය.+ ඔවුන් විනිශ්චයක් දිය යුත්තේ මා තීන්දු කර ඇති දේවලට එකඟවය.+ මා නියම කර ඇති උත්සව පවත්වද්දී ඔවුන් ඒ සඳහා මා දී ඇති නීතිරීති පිළිපැදිය යුතුය.+ මා නියම කර ඇති සබත් දවස් ශුද්ධ බව සිහි කළ යුතුය.+ 25  ඔවුන් අපවිත්‍ර නොවන පිණිස මළ සිරුරක් ළඟටවත් නොයා යුතුය. නමුත් මිය ගිය තැනැත්තා තමන්ගේ පියා හෝ මව හෝ පුත්‍රයා හෝ දියණිය හෝ සහෝදරයෙකු හෝ අවිවාහක සහෝදරියක හෝ වේ නම් ඒ අවස්ථාවේදී ඔවුන්ට මේ නියෝගය අදාළ නොවේ.+ 26  එවැනි අවස්ථාවකට සහභාගි වූ පූජකයෙකු පවිත්‍ර වීමෙන් අනතුරුව දවස් හතක් ගත වන තෙක් සේවයට නොයා යුතුය.+ 27  ඔහු සේවය සඳහා ඇතුල් මළුවේ පිහිටි ශුද්ධස්ථානයට පැමිණෙන දවසේදී පාප පූජාවක් ඔප්පු කළ යුතුය.’+ එසේ පවසන්නේ විශ්වයේ පාලකයාණන් වන යෙහෝවා දෙවිය. 28  “‘ඔවුන්ට උරුමයක් ලැබෙනු ඇත. ඒ උරුමය මමය.+ ඒ නිසා ඊශ්‍රායෙල් දේශයේ ඔවුන්ට උරුමයක් නොදිය යුතුය. මන්ද ඔවුන්ගේ උරුමය මමය. 29  ඔවුන්ට ධාන්‍ය පූජාව, පාප පූජාව හා වන්දි පූජාව අනුභව කිරීමට අවසර ඇත.+ ඊශ්‍රායෙල් දේශයේ දෙවි වන මට කැප කරන සෑම දෙයක්ම ඔවුන්ට අයිති වන්නේය.+ 30  ඔබේ කෙත්වතුවල මුල්ම පලදාවෙන් හොඳම කොටසද සෙනඟ ප්‍රදානය කරන සියලු තෑගිවලින් හොඳම තෑගිද පූජකයන්ට අයිති වන්නේය.+ ඔබේ මුල්ම ධාන්‍ය අස්වැන්නෙන් ලබාගත් පිටිද පූජකයාට දිය යුතුය.+ ජනයෙනි, ඔබ එසේ කළොත් ඔබේ නිවහනට මගෙන් ආශීර්වාද ලැබෙනු ඇත.+ 31  මිය ගොස් ඇති සතෙකුවත් සතෙකු හෝ පක්ෂියෙකු විසින් මරා දමනු ලැබූ සතෙකුවත් පූජකයන් ආහාරයට නොගත යුතුය.’+

පාදසටහන්

එනම්, පූජාසනය.