එසකියෙල් 37:1-28

37  යෙහෝවා දෙවිගේ බලය මා තුළ ක්‍රියා කරන්න පටන්ගත්තේය.+ එවිට යෙහෝවා දෙවි තම බලය මාර්ගයෙන් මාව තැනිතලාවක් මැදට ගෙන ගියේය.+ එම තැනිතලාව ඇටකටුවලින් පිරී තිබිණ.+  ඔහුගේ අණ පරිදි මම ඒ ඇටකටු අවට ඇවිද්දෙමි. හොඳටම වියළී තිබුණු ඒ ඇටකටු+ තැනිතලාව පුරාම විසිර තිබිණ.  දෙවි මට මෙසේ කීවේය. “මනුෂ්‍ය පුත්‍රය, මේ ඇටකටුවලට පණ දිය හැකිද?” එවිට මම, “විශ්වයේ පාලකයාණන් වන යෙහෝවා දෙවියනි, ඒවාට පණ දිය හැකිද කියා දන්නේ ඔබ පමණයි”+ කියා පිළිතුරු දුන්නෙමි.  එවිට ඔහු මට මෙසේ කීවේය. “මේ ඇටකටු ගැන මෙසේ අනාවැකි කියන්න. ‘වියළී ගිය ඇටකටු, යෙහෝවා දෙවි පවසන මේ දේට දැන් සවන් දෙන්න.  “‘විශ්වයේ පාලකයාණන් වන යෙහෝවා දෙවි මෙම ඇටකටුවලට පවසන්නේ මෙයයි. “ඔබව නැවත ජීවත් කරවන පිණිස මම ඔබ තුළට ජීවන හුස්ම හෙළන්නෙමි.+  මම ඔබව නහරවලින්ද* මස්වලින්ද සමෙන්ද වසන්නෙමි. මම ඔබට ජීවන හුස්මද දී ඔබව යළි ජීවත් කරවන්නෙමි.+ එවිට මා යෙහෝවා දෙවි බව පිළිගන්න ඔබට සිදු වනු ඇත.”’”+  මට කියූ ලෙසම මම අනාවැකි කීවෙමි.+ මා අනාවැකි පැවසූ වහාම මට ශබ්දයක් ඇසුණේය. එය නම් ඇටකටු එකිනෙක ගැටෙන ශබ්දයයි. ඒත් සමඟම, ඒ එක් එක් ඇටකටු ඒවාට ගැළපෙන ඇටකටු ළඟට ගොස් ඒවා සමඟ සම්බන්ධ විය.  මා ඒ දෙස බලා සිටියදීම, එම ඇටකටු නහරවලින්ද මස්වලින්ද වැසී සමෙන් ආවරණය විය. එහෙත් ඒවා තුළ ජීවන හුස්ම තිබුණේ නැත.  දෙවි මට තවදුරටත් මෙසේ පැවසීය. “මනුෂ්‍ය පුත්‍රය, ඔබ දැන් සුළඟට අනාවැකි කියන්න. ඔබ මෙසේ පැවසිය යුතුයි. ‘විශ්වයේ පාලකයාණන් වන යෙහෝවා දෙවි පවසන්නේ මෙයයි. “සුළඟ, සතර දිගින් හමා එන්න! මැරුම් කෑ+ මේ ජන පිරිස මත හමා ඔවුන්ට ජීවය ලබා දෙන්න!”’”+ 10  ඔහු අණ කළ ලෙසම මම අනාවැකි කීවෙමි. එවිට ජීවන හුස්ම ඔවුන් වෙත පැමිණ ඔවුන්ට පණ දුන්නේය. ඒත් සමඟම ඔවුහු සිටගත්තෝය.+ ඔවුහු දැවැන්ත යුධ හමුදාවක් මෙන් වූහ. 11  දෙවි මට තවදුරටත් මෙසේ පැවසීය. “මනුෂ්‍ය පුත්‍රය, මේ ඇටකටුවලින් සංකේතවත් කරන්නේ මුළු ඊශ්‍රායෙල් ජනතාවයි.+ ‘අපේ ඇටකටු හොඳටම වියළී ගොස් ඇත. අපේ බලාපොරොත්තු සුන් වී තිබේ.+ අපව සියලුදෙනාගෙන්ම වෙන් කර තනි කර ඇත’ කියා ඊශ්‍රායෙල් ජනයා පවසති. 12  එබැවින් ඔබ ඔවුන්ට මෙම අනාවැකිය කියන්න. ‘විශ්වයේ පාලකයාණන් වන යෙහෝවා දෙවි පවසන්නේ මෙයයි. “මාගේ ජනයෙනි, මේ අසන්න! මම ඔබේ සොහොන් ගෙවල් විවෘත කර+ ඔබව පිටතට ගන්නෙමි. ඉන්පසු මම ඔබව නැවත ඊශ්‍රායෙල් දේශයට රැගෙන යන්නෙමි.+ 13  මාගේ ජනයෙනි, මා ඔබේ සොහොන් විවෘත කර ඔබව පිටතට ගෙනෙන විට මා යෙහෝවා දෙවි බව පිළිගන්න ඔබට සිදු වනු ඇත.”’+ 14  ‘මම මාගේ බලය ඔබ තුළ ක්‍රියාත්මක වීමට සලස්වන්නෙමි. එවිට ඔබ ජීවත් වන්නහුය.+ ඉන්පසු මම ඔබේ දේශයෙහි ඔබව පදිංචි කරන්නෙමි. එවිට මේ දේ පැවසුවෙත් ඒවා ඉටු කළෙත් යෙහෝවා දෙවි වන මා බව පිළිගන්න ඔබට සිදු වනු ඇත.’ එසේ පවසන්නේ යෙහෝවා දෙවිය.”+ 15  යෙහෝවා දෙවි මට තවදුරටත් මෙසේ පැවසුවේය. 16  “මනුෂ්‍ය පුත්‍රය, ගසක දිගටි අත්තක් ගෙන,+ ‘යූදා සහ ඔහුගේ සහෝදරයන්* වූ ඊශ්‍රායෙල් සෙනඟ සඳහාය’ කියා ඒ මත ලියන්න.+ තවත් දිගටි අත්තක් ගෙන, ‘යෝසෙප් සහ ඔහුගේ සහෝදරයන් වූ මුළු ඊශ්‍රායෙල් සෙනඟ සඳහා වූ+ එෆ්‍රායිම්ගේ අත්ත’ කියා ඒ මත ලියන්න.+ 17  පසුව ඒ අතු දෙක එකට ළං කරන්න. එවිට ඒවා ඔබේ අතේ එක අත්තක් බවට පත් වනු ඇත.+ 18  පසුව, ‘මේ දේවල අර්ථය ඔබ අපට පැහැදිලි කර දෙන්නේ නැද්ද’ කියා ඔබේ ජනතාව ඔබෙන් විමසනු ඇත.+ 19  ඔවුන්ට මෙසේ පවසන්න. ‘විශ්වයේ පාලකයාණන් වන යෙහෝවා දෙවි පවසන්නේ මෙයයි. “මෙන්න, එෆ්‍රායිම් අතේද ඔහුගේ සහෝදරයන් වන ඊශ්‍රායෙල්හි සියලුම ගෝත්‍රයන් අතේද තිබෙන යෝසෙප්ගේ අත්ත රැගෙන යූදාගේ අත්තට යා කරන්නෙමි. ඒවා මාගේ අතේ එක අත්තක් බවට පත් කරන්නෙමි.”’+ 20  එසේ ළං කළ අතු දෙක සියලුදෙනාට පෙනෙන සේ ඔබේ අතේම තබාගන්න.+ 21  “ඔවුන්ට මෙසේ පවසන්න. ‘විශ්වයේ පාලකයාණන් වන යෙහෝවා දෙවි පවසන්නේ මෙයයි. “විවිධ ජාතීන් අතර විසිර ගොස් සිටින ඊශ්‍රායෙල් සෙනඟව මම රැස් කර තමන්ගේම දේශයට ගෙනෙන්නෙමි.+ 22  මම ඔවුන්ව එක ජාතියක් බවට පත් කරන්නෙමි.+ ඔවුහු ඊශ්‍රායෙල් කඳුකරය මත එක සෙනඟක් සේ වසන්නෝය. එක් රජෙක් ඔවුන් සියලුදෙනාවම පාලනය කරනු ඇත.+ ඔවුහු තවදුරටත් ජාතීන් දෙකක් සේ ක්‍රියා කරන්නේ නැත. රාජ්‍යයන් දෙකක් සේ බෙදී පවතින්නේද නැත.+ 23  තවදුරටත් ඔවුහු තමන්ව අපවිත්‍ර කරවන දේවල යෙදෙන්නේ නැත. ඔවුහු පිළිකුල්සහගත රූප සාදාගන්නේවත් නින්දිත ලෙස හැසිරෙන්නේවත් පව්කාර ක්‍රියාවල යෙදෙන්නේවත් නැත.+ ඔවුන් තම වාසස්ථානවලදී කළ සියලුම පව්කාර ක්‍රියාවලට මම සමාව දී ඔවුන්ව පවිත්‍ර කරන්නෙමි.+ ඔවුහු මාගේ සෙනඟ වන්නෝය. මමද ඔවුන්ගේ දෙවි වන්නෙමි.+ 24  “‘“මාගේ සේවක දාවිත් ඔවුන්ගේ රජු වනු ඇත.*+ ඔවුන් සියලුදෙනාටම එක එඬේරෙක් සිටිනු ඇත.+ ඔවුහුද මාගේ තීරණවලට යටත් වී+ මා දුන් අණපනත්වලට කීකරුව ජීවත් වන්නෝය.+ ඔවුහු ඒවා කිසිවිටෙක කඩ කරන්නේ නැත.+ 25  ඔවුහු මාගේ සේවකයා වූ යාකොබ්ට මා දුන් දේශයෙහි අනිවාර්යයෙන්ම වාසය කරන්නෝය.+ ඔවුන්ගේ මුතුන්මිත්තන් වාසය කළ ඒ දේශයේ+ ඔවුහුද ඔවුන්ගේ පුත්‍රයෝද පුත්‍රයන්ගේ පුත්‍රයෝද සදහටම වාසය කරනු ඇත.+ මාගේ සේවක වූ දාවිත් සදහටම ඔවුන්ගේ අධිපති ලෙස කටයුතු කරන්නේය.+ 26  “‘“මම ඔවුන් සමඟ සමාදානයේ ගිවිසුමක් ඇති කරන්නෙමි.+ ඒ ගිවිසුම සදහටම පවතිනු ඇත.+ මම ඔවුන්ව දේශයේ පදිංචි කරවා ඔවුන්ගේ ගණන මහත් සේ වැඩි කරන්නෙමි.+ ඔවුන් අතරෙහි මාගේ ශුද්ධස්ථානය සදහටම පිහිටුවන්නෙමි.+ 27  මාගේ කූඩාරමද ඔවුන් අතරෙහි පිහිටුවන්නෙමි.+ මම ඔවුන්ගේ දෙවි වන්නෙමි. ඔවුහුද මාගේ සෙනඟ වන්නෝය.+ 28  මාගේ ශුද්ධස්ථානය ඔවුන් අතරෙහි සදහටම පිහිටුවනු ලබන විට,+ ඊශ්‍රායෙල් ජාතිය ගෞරවයට පත් කරන්නේ යෙහෝවා දෙවි වන මා බව සියලු ජාතීන්ට පිළිගන්න සිදු වනු ඇත.”’”+

පාදසටහන්

මූ.අ., “පේශී සහ අස්ථි සම්බන්ධ කරන දැඩි තන්තුමය පටක.”
මූ.අ., “හවුල්කරුවන්.”
එනම්, දාවිත්ගෙන් පැවතෙන තැනැත්තෙකි.