එසකියෙල් 32:1-32

32  දොළොස්වන වසරේ, දොළොස්වන මාසයේ පළමුවන දින යෙහෝවා දෙවි මට මෙසේ පැවසුවේය.  “මනුෂ්‍ය පුත්‍රය, ඊජිප්තුවේ රජු වන පාරාවෝ ගැන විලාප ගීයක් ගයන්න. ඔබ ඔහුට මෙසේ පැවසිය යුතුයි. ‘ජාතීන් අතරේ සැරිසැරූ තරුණ කේශර සිංහයෙකු මෙන් වූ ඔබව දැන් නිහඬ කර ඇත.+ “‘ඔබ මහ සයුරේ ජීවත් වූ සද්දන්තයෙකු වැනිය.+ ඔබේ අණසක යටතේ තිබූ ගංගා දිගේ ඔබ බිය පතුරුවමින් වේගයෙන් ගමන් කළෙහිය. ඔබේ දෙපාවලින් ඔබ දිය පහරවල් මඩ කළෙහිය. ගංගාවන් කලඹවා අපවිත්‍ර කළෙහිය.’  “විශ්වයේ පාලකයාණන් වන යෙහෝවා දෙවි ඔබට මෙසේ පවසයි. ‘මම විශාල ජන සමූහයක් එවා ඔබ මතට දැලක් හෙළන්නෙමි.+ ඔවුහු ඔබව ඒ දැලට හසු කරගෙන ගොඩට ඇදගෙන එන්නෝය.+  මම ඔබව බිම හෙළා අත්හැර යන්නෙමි. ඔබව වනාන්තරයට ඇද දමන්නෙමි.+ මාගේ අණ පරිදි සියලු පක්ෂීහු ඔබ මත වහන්නෝය. පොළොවේ සියලු වනමෘගයෝ ඔබේ මස් කා තෘප්තියට පත් වනු ඇත.+  මම ඔබේ මාංසය කඳු මත විසුරුවා, ඔබේ මළ කුණෙන් තැනිතලා පුරවන්නෙමි.+  වැගිරෙන ඔබේ ලෙයින් මුළු දේශයම තෙමන්නෙමි.+ කඳුකරයද දිය පහරවල්ද ඔබේ ලෙයින් පිරී යනු ඇත.’  “‘මම ඔබව විනාශ කර දමන විට අහස අඳුරු කර එහි තරුවල දීප්තිය නැති කරන්නෙමි. වලාකුළුවලින් හිරුව වසන්නෙමි. සඳෙන්ද කිසි ආලෝකයක් නික්මෙන්න ඉඩ නොදෙන්නෙමි.+  මම ඔබ නිසා අහසේ සියලුම ආලෝක වස්තු අඳුරු කරන්නෙමි. ඔබේ දේශය පුරාම ගන අඳුර පතුරුවන්නෙමි.’ එසේ පවසන්නේ විශ්වයේ පාලකයාණන් වන යෙහෝවා දෙවිය.  “‘ඔබ නොදන්නා දේශවල වෙසෙන ජාතීන් වෙතට ඔබෙන් සමහරෙකුව වහල්කමට රැගෙන යනු ඇත.+ එය දැක බොහෝදෙනෙක් කුපිත වන්නෝය. 10  ඔබට සිදු වන දේ නිසා බොහෝදෙනෙක් විස්මයට පත් වනු ඇත.+ ඔවුන්ගේ රජවරුන් ඉදිරිපිට මාගේ කඩුව ඔසවන විට ඔවුහු බියෙන් වෙවුලන්නෝය.+ ඔබ වැටී යන දවසේදී ඔවුහු මර බියෙන් ගැහිගැහී සිටිනු ඇත.’+ 11  “විශ්වයේ පාලකයාණන් වන යෙහෝවා දෙවි මෙසේද පවසයි. ‘බැබිලෝනියේ රජුගේ කඩුව ඔබට විරුද්ධව පැමිණෙන්නේය.+ 12  මම ඔබට පහර දීමට ජාතීන් අතරේ සිටින කුරිරු බලවතුන්ව එවන්නෙමි.+ ඔවුහු ඇවිත් කඩුවලින් පහර දී ඔබේ ජනයාව මරා දමා ඊජිප්තුවේ තේජස නැති කරන්නෝය. ඔබේ ජනතාවද සහමුලින්ම නැති වී යනු ඇත.+ 13  දිය පහරවල් අසල ලගින ඔබේ සියලු සතුන්වද මම විනාශ කර දමන්නෙමි.+ තවදුරටත් ඒ දිය පහරවල් මිනිසුන්ගේ පාදවලින් හෝ සතුන්ගේ කුරවලින් හෝ කැලඹී මඩ වන්නේ නැත.’+ 14  “‘ඒ කාලයේදී මම මඩ වූ දිය පිරිසිදු කරන්නෙමි. ගංගා තෙල් මෙන් ගලා යෑමට සලස්වන්නෙමි.’ එසේ පවසන්නේ විශ්වයේ පාලකයාණන් වන යෙහෝවා දෙවිය. 15  “‘මම ජනාකීර්ණව තිබෙන ඊජිප්තුවේ සියලු වැසියන්ට පහර දී එය පාළු, හිස් දේශයක් බවට පත් කරන්නෙමි.+ එවිට මා යෙහෝවා දෙවි බව පිළිගන්න ඔවුන්ට සිදු වනු ඇත.+ 16  “‘මෙය විලාප ගීයකි. ජනතාව අනිවාර්යයෙන්ම එය ගයනු ඇත. අවට ජාතීන්ගේ දූවරු පවා එම ගායනයට හවුල් වන්නෝය. ඔවුන් එම විලාපය නඟන්නේ ඊජිප්තුවටත් එහි වැසියන්ටත් සිදු වූ දේ නිසාය.’+ එසේ පවසන්නේ විශ්වයේ පාලකයාණන් වන යෙහෝවා දෙවිය.” 17  ඉන් අනතුරුව දොළොස්වන වසරේ, මාසයේ පහළොස්වන දින යෙහෝවා දෙවි මට මේ දේද කීවේය. 18  “මනුෂ්‍ය පුත්‍රය, ඊජිප්තුවේ ජනතාව ගැන විලාප නඟන්න.+ මිනී වළට යන අය සමඟ+ ඔවුන්වද කීර්තිමත් ජාතීන්ගේ දූවරුන්වද පොළෝගැබට හෙළනු ලබන බව ප්‍රකාශ කරන්න.+ 19  “‘ඔබ සිතන්නේ ඔබ අනික් අයට වඩා ප්‍රියකරුයි කියාද?+ එසේනම් ඔබ සිටින තැනින් දැන් පහතට බසින්න. ඔබව අචර්මච්ඡේදිතයන් සමඟ තැන්පත් කරනු ලබන්නේය.’+ 20  “‘කඩුවෙන් මරා දමන අය සමඟම ඊජිප්තුවරු මිය යනු ඇත.+ ඊජිප්තු දේශය කඩුවෙන් විනාශ කිරීමට නියම කර ඇත. ජනයෙනි, ඇයවත් ඇගේ සියලු වැසියන්වත් දැන් ඇදගෙන යන්න. 21  “‘බලවතුන්ගේ නායකයන් මිනී වළේ සිට ඊජිප්තුවේ රජුටත් ඔහුගේ මෙහෙකරුවන්ටත් හඬගසනු ඇත.+ ඊජිප්තුවරු අනිවාර්යයෙන්ම ඔවුන් වෙතට බැස යන්නෝය.+ ඔවුහු අචර්මච්ඡේදිතයන් හා කඩුවෙන් මැරුම් කෑ අය සමඟ සැතපෙන්නෝය. 22  ඇසිරියාවත් ඇගේ මුළු ජන පිරිසත් සැතපී සිටින්නේ එහිය.+ ඇසිරියාවේ රජුගේ සොහොන අසලම ඔහුගේ යටත්වැසියන්ගේ සොහොන් ගෙවල්ද පිහිටා ඇත. ඔවුහු සියල්ලෝම කඩුවෙන් මැරුම් කෑවෝය.+ 23  ඔවුන්ව තැන්පත් කර ඇත්තේ පොළෝගැබේ ඉතා පාළු තැන්වලය.+ රජුගේ සෙනඟවද ඔහු වටා තැන්පත් කරන ලදි. ඔවුහු සියලුදෙනාම කඩුවෙන් පහර කෑවෝය. ඔවුන්ට ඒ දේ සිදු වූයේ ඔවුන් ජීවත්ව සිටි කාලයේදී ලෝවැසියන් අතරේ භීතිය පැතිරෙවූ නිසාය. 24  “‘ඒලාම්ද+ ඇය වටා ඇගේ මුළු සෙනඟද එහි තැන්පත් කර ඇත. ඔවුහු සියල්ලෝම කඩුවෙන් මැරුම් කෑවෝය. ඔවුහු ගෞරවනීය භූමදානයක් නොලබා* පොළෝගැබට බැස ගියෝය. ජීවත්ව සිටි කාලයේදී ලෝවැසියන් අතරේ භීතිය පැතිරෙවූ නිසා මිනී වළට යන අන් සියලුදෙනා සමඟම ඔවුහුද අවමානයට ලක් වනු ඇත.+ 25  ඒලාම් වෙනුවෙන් යහනක් පිළියෙල කර ඇත.+ මරා දමනු ලැබූ ඇගේ සෙනඟ මැද එය තබා ඇත. ඔවුහු සියල්ලෝම කඩුවෙන් මැරුම් කෑ අචර්මච්ඡේදිතයෝය.+ ඔවුන්ට ඒ දේ සිදු වූයේ ඔවුන් ලෝවැසියන් අතරේ භීතිය පැතිරෙවූ හෙයිනි. මිනී වළට යන අන් සියලුදෙනා සමඟම ඔවුහුද අවමානයට ලක් වනු ඇත. මෙසේ, ඒලාම් මැරුම් කෑ අය අතරේ සිටියි. 26  “‘මෙෂෙක්වද+ තූබල්වද+ ඔවුන්ගේ යටත්වැසියන්වද තැන්පත් කර ඇත්තේ එතැනය. ඔවුහු සියලුදෙනාවම ඔවුන්ගේ රජු වටා තැන්පත් කර ඇත. ඔවුහු සියලුදෙනා කඩුවෙන් පහර කෑ අචර්මච්ඡේදිතයෝය. ඔවුන්ට එවැනි දෙයක් අත් වූයේ ඔවුන් ලෝවැසියන් අතරේ භීතිය පැතිරෙවූ නිසාය. 27  අවි අමෝරාගෙන මිනී වළට ගිය අචර්මච්ඡේදිත බලවන්තයන් සමඟ ඔවුහු සදහටම සැතපී සිටිනු ඇත.+ ඔවුන්ගේ කඩු ඔවුන්ගේ හිස යට තබා තිබේ. ඔවුන් කළ වැරදි නිසා ඔවුන්ට ගෞරවනීය භූමදානයක් නොලැබෙයි.*+ මන්ද ඒ බලවන්තයෝද ලෝවැසියන් අතරේ භීතිය පැතිරෙව්වෝය.+ 28  ඊජිප්තුවේ රජ්ජුරුවෙනි, අචර්මච්ඡේදිතයන් ඉදිරියේම ඔබ මිය යනු ඇත. කඩුවෙන් මැරුම් කෑ අය සමඟ ඔබ සැතපෙනු ඇත. 29  “‘ඒදොම් දේශයද+ ඇගේ රජවරුද ඇගේ සියලු අධිපතීහුද මිනී වළෙහි සැතපී සිටිති. බලවන්තයන්ව සිටි ඔවුහු මැරී වැටුණෝය. කඩුවෙන් මැරුම් කෑ අය අතරේ ඔවුහුද සිටිති.+ අචර්මච්ඡේදිතයන් සමඟද+ මිනී වළට යන අය සමඟද ඔවුන්ව තැන්පත් කර තිබේ. 30  “‘උතුරු දේශවල විසූ සියලුම පාලකයන්වද සියලුම සීදොන්වරුන්වද+ තැන්පත් කර ඇත්තේ එතැනය. මහත් බලයක් හොබවමින් බොහෝදෙනෙකුව බියට පත් කළත් නින්දිත මරණයකට ගොදුරු වෙන්න ඔවුන්ට සිදු වී ඇත. ගෞරවනීය භූමදානයක් නොලැබූ ඔවුන්ව කඩුවෙන් මැරුම් කෑ අය සමඟ තැන්පත් කර ඇත. මිනී වළට යන අන් සියලුදෙනා සමඟම ඔවුහුද අවමානයට ලක් වනු ඇත.+ 31  “‘පාරාවෝද ඔහුගේ මුළු හමුදා බළඇණියද කඩුවෙන් මැරුම් කන්නෝය. එහෙත් ඔහුට කලින් පොළෝගැබට ගිය අයව දැක පාරාවෝ තමාට අහිමි වූ අතිමහත් ජනතාව ගැන සැනසෙනු ඇත.’+ එසේ පවසන්නේ විශ්වයේ පාලකයාණන් වන යෙහෝවා දෙවිය. 32  “‘ඔහුට ඒ දේ සිදු වූයේ ඔහු ලෝවැසියන් අතරේ භීතිය පැතිරෙවූ නිසාය.+ පාරාවෝවත් ඔහුගේ මුළු සමූහයවත් අචර්මච්ඡේදිතයන් හා කඩුවෙන් මැරුම් කෑ අය අතර තැන්පත් කළ යුතුය.’ එසේ පවසන්නේ විශ්වයේ පාලකයාණන් වන යෙහෝවා දෙවිය.”

පාදසටහන්

මූ.අ., “අචර්මච්ඡේදිතයන් ලෙස.”
මූ.අ., “ඔවුන්ගේ ඇටකටු පිට දඬුවම් පැමිණෙයි.”