එසකියෙල් 31:1-18

31  ඉන් අනතුරුව එකොළොස්වන වසරේ, තුන්වන මාසයේ, පළමුවන දින යෙහෝවා දෙවි මට මෙසේ පැවසීය.  “මනුෂ්‍ය පුත්‍රය, ඊජිප්තුවේ රජු වන පාරාවෝට හා ඔහුගේ ජනතාවට මෙසේ කියන්න.+“‘ඔබ ශ්‍රේෂ්ඨය. ඔබේ ශ්‍රේෂ්ඨත්වය මා කුමකට සමාන කරන්නද?  ඔබ ඇසිරියානු ජාතිකයෙකු මෙන් බලවත්ය. ඔබ ලෙබනොන් දේශයේ හොඳින් වැඩුණු දේවදාර ගසකට සමානය.+ වලාකුළුවල ගෑවෙන තරම් උස් වූ ඔබ,+ සැමට සෙවණ දෙන ශෝභන අතු ඇති+ දැවැන්ත ගසකි.+  ඒ ගස ඒ තරම් සරුසාරව හැදුණේ එයට හොඳින් ජලය ලැබුණු නිසාය.+ ගැඹුරු දිය උල්පත් ඒ අවට තිබූ හෙයින් එය අහස උසට වැඩුණේය. ඒ දිය උල්පත්වලින් නික්මුණු ජල දහරා ගස වටා ගලා ගියේය. ඒ දිය පහරවල් වනයේ සියලු ගස් දක්වාද ගලා ගියේය.  ඒ නිසා මෙම ගස වනයේ අන් සියලු ගස්වලට වඩා උසට වැඩුණේය.+ “‘බොහෝ ජලයෙන් පෝෂණය ලැබූ නිසා එහි අතු තව තවත් සරුසාරව වැඩුණේය.+  සියලු පක්ෂීහු එහි අතුවල තම කැදැලි තනාගත්තෝය.+ වනමෘගයෝ එහි අතු යට තම පැටවුන් බිහි කළෝය.+ එහි සෙවණේ මහත් ජාතීහු වාසය කළෝය.  එය දිග අතු ඇති විශාල ගසක් බවට පත් විය. එහි පෙනුම ඉතා අලංකාර විය.+ මන්ද එහි මුල් බොහෝ ජලය ඇති දිය උල්පත් දක්වා ගැඹුරට විහිදී ගියේය.  මාගේ උයනෙහි ඇති සියලුම දේවදාර ගස්වලට වඩා ඒ ගස ඉතා සරුසාරව වැඩුණේය.+ එහි අතු ජුනිපර් ගස්වල අතුවලට වඩා හාත්පසින්ම වෙනස්ය. ඒවා ප්ලේන් ගස්වල අතුවලටත් වඩා වෙනස්ය. මාගේ උයනෙහි වැඩුණු කිසිදු ගසක් එයට සම කළ නොහැකි විය.+  අතු විහිදී ගිය අලංකාර ගසක් වූ එය සරුසාරව වැඩෙන්න සැලැස්වූවේ මමය.+ සැබෑ දෙවි වන මාගේ උයන වන ඒදන්හි සියලු ගස් එම ගසට ඊර්ෂ්‍යා කළෝය.’+ 10  “එබැවින් විශ්වයේ පාලකයාණන් වන යෙහෝවා දෙවි මෙසේ පවසයි. ‘එම ගස* වලාකුළුවල ගෑවෙන තරම් උසට වැඩුණේය.+ එහෙත් උසට වැඩෙන්න වැඩෙන්න ඒ ගස උඩඟු විය.+ 11  එහෙයින් මම, ජාතීන් අතරේ ඒකාධිපතියෙකු ලෙස බලය පාන කෙනෙකුගේ අතට ඒ ගස පත් කරන්නෙමි.+ ඔහු නොවරදවාම එම ගසට විරුද්ධව පියවර ගන්නේය. එම ගස බොහෝ දුෂ්ටකම්වලට වග කිව යුතු නිසා මම ඔහු ලවා එය විනාශ කර දමන්නෙමි.+ 12  ජාතීන් අතරේ ඉතාම කුරිරු ලෙස බලය පාන විදේශීය සෙනඟක් ඇවිත් ඒ ගස කපා දමන්නෝය. එය කඳුවල අත්හැර දමනු ලැබේ. සියලු තැනිතලාවල එහි කොළ අතු වැටී තිබෙනු ඇත. එහි අතු කඩා දමා පොළොවේ සියලු දිය පහරවල් අසල දමනු ලබන්නේය.+ එයින් සෙවණ ලැබූ පොළොවේ සියලු වැසියෝ එය අත්හැර යන්නෝය.+ 13  කපා දමනු ලබන එහි කඳ මත සියලු පක්ෂීන් ලැගුම් ගන්නා අතර, ඒ මේ අත විසිරී ඇති එහි අතු අතරේ සියලු වනමෘගයෝ සැරිසරන්නෝය.+ 14  මා ඒ ගසට එසේ කරන්නේ දිය දහරාවලින් පෝෂණය ලබන අන් කිසිදු ගසක් වලාකුළුවල ගෑවෙන තරම් උසට වැඩී උඩඟු නොවන පිණිසය. එහෙයින් කිසිදු ගසක් අහස උසට වැඩෙන්නේ නැත. ඒ සියල්ල විනාශයට නියම කරන්නෙමි.+ ඒවා පොළෝගැබටම යවන්නෙමි.+ මිනී වළෙහි සැතපී සිටින මිනිසුන්ට සිදු වූ දේම ඒවාටද සිදු වනු ඇත.’ 15  “විශ්වයේ පාලකයාණන් වන යෙහෝවා දෙවි මෙසේ කියයි. ‘එම ගස මිනී වළට යන දවසේදී මහත් වැලපීමක් සිදු වීමට සලස්වන්නෙමි.+ මම පොළොව යටින් ගලා යන දිය උල්පත් වසා දමන්නෙමි. ගලා යන ජල දහරා සිඳුවන්නෙමි. මම ලෙබනොන් දේශය ඝන අන්ධකාරයෙන් වසා දමන්නෙමි. වනයේ සියලු ගස්ද මලානික වනු ඇත. 16  එම ගස වැටී යන විට නැඟෙන ශබ්දයෙන් මම ජාතීන්ව සොලවන්නෙමි. මිනී වළට යන සියලුදෙනා සමඟ එයද මිනී වළට යනු ඇත.+ ඒ දේ සිදු වන විට පොළෝගැබට ගිය ඒදන් උයනෙහි ගස්ද+ ලෙබනොන්හි වටිනා ගස්ද දිය දහරාවලින් පෝෂණය ලැබූ සියලු ගස්ද සැනසීමක් ලබනු ඇත.+ 17  මන්ද ඒ සියලු ගස්ද ඔහු සමඟ මිනී වළට ගොස් ඇත.+ ඔහුද කඩුවෙන් මැරුම් කෑ අය සැතපී සිටින තැනටම යන්නේය. ඔහුගේ සෙවණෙහි වාසය කළ විවිධ ජාතීන් අතරේ සිටි ඔහුගෙන් පැවතෙන්නන්ද යන්නේ එතැනටමය.’+ 18  “‘ඔබ තරම් සරුසාරව, තේජාන්විතව වැඩුණු ගසක්+ ඒදන් උයනෙහි නොවීය.+ එහෙත් ඒදන්හි ගස් සමඟම ඔබටත් පොළෝගැබට යන්න සිදු වනු ඇත.+ ඔබට සැතපෙන්න සිදු වන්නේ අචර්මච්ඡේදිතයන් හා කඩුවෙන් මරන ලද අය සමඟයි. පාරාවෝටත් ඔහුගේ මුළු සෙනඟටත් සිදු වන්නේ එයයි.’ එසේ පවසන්නේ විශ්වයේ පාලකයාණන් වන යෙහෝවා දෙවිය.”

පාදසටහන්

මූ.අ., “ඔහු.”