එසකියෙල් 3:1-27

3  ඔහු මට මෙසේ කීවේය. “මනුෂ්‍ය පුත්‍රය, ඔබ ඉදිරියේ තිබෙන මෙම ලියවිල්ල කන්න.+ ඉන්පසු ඊශ්‍රායෙල් සෙනඟ වෙත ගොස් මාගේ පණිවිඩය කියන්න.”  මම මාගේ මුඛය විවෘත කළෙමි. එවිට ඔහු මට ඒ ලියවිල්ල කන්න දුන්නේය.+  ඉන්පසුව ඔහු මට මෙසේ උපදෙස් දුන්නේය. “මනුෂ්‍ය පුත්‍රය, මා ඔබට දෙන මේ ලියවිල්ල කා එයින් ඔබේ බඩ පුරවාගත යුතුයි.” ඔහු කී ලෙසම මම එය කෑවෙමි. එය මීපැණි මෙන් මිහිරි විය.+  ඔහු මට මෙසේද කීවේය. “මනුෂ්‍ය පුත්‍රය, ඔබ ඊශ්‍රායෙල්වරුන්ට+ මාගේ පණිවිඩය කිව යුතුයි.  මා ඔබව යවන්නේ ඔබ නොදන්නා භාෂාවක් කතා කරන+ එසේත් නැත්නම්, ඔබට තේරුම්ගන්න අපහසු ආකාරයකින් වචන හසුරුවන+ ජන පිරිසක් වෙත නොව ඊශ්‍රායෙල් සෙනඟ වෙතටය.  මා ඔබව යවන්නේ ඔබට නොතේරෙන භාෂා කතා කරන හා ඔබට තේරුම්ගන්න අපහසු ආකාරයකින් වචන හසුරුවන විවිධ ජන පිරිස් වෙතට නොවෙයි.+ මා ඔබව යවන්නේ එවැනි සෙනඟක් වෙතට නම් ඔවුහු ඔබ දෙන පණිවිඩය පිළිගනු ඇත.+  නමුත් ඊශ්‍රායෙල් සෙනඟ නම් ඔබ පවසන දේ පිළිගන්න කැමති වන්නේ නැත. මන්ද ඔවුහු මුරණ්ඩු, දැඩි සිත් ඇති ජනතාවකි.+ ඔවුන්ගෙන් එක් කෙනෙක්වත් මා කියන දේ පිළිගැනීමට කැමති නැත.+  එහෙත් දරුණු සිත් ඇති ඒ මුරණ්ඩු සෙනඟට මුහුණ දීමට අවශ්‍ය ශක්තිය මම ඔබට දෙන්නෙමි.*+  මම ඔබේ නළල ගිනිගලකටත්+ වඩා ශක්තිමත් වූ දියමන්තියක් මෙන් වීමට සලස්වන්නෙමි. ඒ නිසා ඔවුන්ට භය නොවන්න.+ ඔවුන්ගේ දරුණු පෙනුම දෙස බලා තැති නොගන්න.+ මන්ද ඔවුහු කැරලිකාර සෙනඟකි.”+ 10  ඔහු මට මෙසේද කීවේය. “මනුෂ්‍ය පුත්‍රය, මා කියන සෑම දෙයකටම හොඳින් සවන් දී ඒවා ඔබේ සිතට ගන්න.+ 11  තම දේශයෙන් පිටුවහල් කර ඇති ඒ ජනතාව+ වෙත ගොස්, ‘විශ්වයේ පාලකයාණන් වන යෙහෝවා දෙවි පවසන දේට සවන් දෙන්න’ කියා ඔවුන්ට කියන්න. ඔවුන් ඔබ කියන දෙයට සවන් දුන්නත් නැතත් එම පණිවිඩය ඔවුන්ට දැනුම් දෙන්න.”+ 12  එවිට යම් බලයක්* මාව උසුලාගෙන යන බව මට දැනිණ.+ “තම වාසස්ථානයේ සිටින තේජාන්විත යෙහෝවා දෙවිට ප්‍රශංසා වේවා”+ කියා පවසන හඬක්ද මට පිටුපසින් ඇසිණ. එය මහ සුළඟකට සමාන ඝෝෂාකාරී හඬක් විය.+ 13  ඒ හඬට අමතරව ජීවීන්ගේ පියාපත් එකිනෙක ගැටෙන හඬද මට ඇසිණ.+ ජීවීන් අසලම පිහිටා තිබූ රෝදවලින්ද ශබ්දයක් නික්මුණේය.+ 14  ඒ බලය දැඩි ශෝකයෙන් හා දැවෙන උදහසකින් සිටි මාව දිගටම උසුලාගෙන ගියේය.+ යෙහෝවා දෙවිගේ බලය මා කෙරෙහි ප්‍රබලව ක්‍රියාත්මක විය.+ 15  එවිට මම කේබාර් ගඟ+ අසල ටෙල්-ආබිබ් නම් ස්ථානයට පැමිණ, එහි වාසය කළ+ පිටුවහල් කරන ලද ජනතාව සමඟ වාසය කරන්න පටන්ගත්තෙමි. කම්පනයට පත්ව සිටි මම දවස් හතක් පුරාම ගල්ගැසුණාක් මෙන් සිටියෙමි.+ 16  දවස් හතක් ගෙවී ගිය පසු යෙහෝවා දෙවි නැවතත් මට කතා කර මෙසේ කීවේය. 17  “මනුෂ්‍ය පුත්‍රය, මම ඔබව ඊශ්‍රායෙල් සෙනඟ වෙනුවෙන් මුරකරුවෙකු ලෙස පත් කරන්නෙමි.+ ඔබ මා පවසන දෙයට සවන් දී මා දෙන අනතුරු ඇඟවීම ඔවුන්ට දැනුම් දිය යුතුයි.+ 18  ‘ඔබ අනිවාර්යයෙන්ම මිය යනවා’+ කියා මා දුෂ්ට කෙනෙකුට පැවසුවොත් ඔබ ඔහුට කතා කර ඔහුගේ දුෂ්ට ක්‍රියා ගැන අනතුරු අඟවා ඔහුගේ ජීවිතය බේරාගැනීමට උත්සාහ කළ යුතුයි.+ ඔබ එසේ නොකළොත් ඔහු කළ දුෂ්ටකම් නිසා ඔහු මිය යයි.+ නමුත් ඔබ ඔහුගේ ජීවිතය වෙනුවෙන් මට වන්දි ගෙවිය යුතුයි.+ 19  එහෙත් ඔබ දුෂ්ට කෙනෙකුට අනතුරු අඟවා තිබියදීත්+ ඔහු තම දුෂ්ට ක්‍රියාවලින් හැරෙන්නේ නැත්නම් ඒ දුෂ්ටකම් නිසා ඔහුට මිය යන්න සිදු වෙයි.+ නමුත් ඔබ ඔබේ ජීවිතය ගලවාගන්නවා ඇත.+ 20  ධර්මිෂ්ඨ කෙනෙකු තම ධර්මිෂ්ඨකම අත්හැර+ අයුක්තිසහගත ලෙස ක්‍රියා කරනවා නම් මම ඔහුව වැටීමට සලස්වමි.+ ඔහු පව් කළ නිසා මිය යන්නේය.+ ඔහු කළ ධර්මිෂ්ඨ ක්‍රියාද සිහි කරනු නොලබන්නේය.+ එහෙත් ඔහුට අනතුරු ඇඟවූයේ නැති නිසා ඔහුගේ ජීවිතය වෙනුවෙන් ඔබ මට වන්දි ගෙවිය යුතුයි.+ 21  අනික් අතට ඔබ ධර්මිෂ්ඨ කෙනෙකුට පව් නොකර සිටින්න කියා අනතුරු ඇඟෙවූ පසු+ ඒ තැනැත්තා ඔබ දුන් අනතුරු ඇඟවීම සිතට ගෙන පව් නොකර සිටිනවා නම් ඔහු අනිවාර්යයෙන්ම තම ජීවිතය බේරාගන්නේය.+ ඔබද ඔබේ ජීවිතය ගලවාගන්නවා ඇත.”+ 22  යෙහෝවා දෙවිගේ බලය මා කෙරෙහි ක්‍රියාත්මක වෙන්න පටන්ගත්තේය. ඔහු මට මෙසේ පැවසීය. “නැඟිට තැනිතලාවට යන්න.+ එහිදී මම ඔබට කතා කරන්නෙමි.” 23  මම නැඟිට තැනිතලාවට ගිය විට ඒ මුළු ස්ථානයම යෙහෝවා දෙවිගේ තේජසින් පිරී තිබුණ බව දුටිමි.+ එය කේබාර් නදිය අසල සිටිද්දී මා දුටුවා හා සමාන තේජසකි.+ එය දැක මම මුණින් වැටුණෙමි.+ 24  නමුත් දෙවිගේ බලය මා තුළ ක්‍රියාත්මක වූ නිසා+ මම නැඟිට සිටියෙමි.+ එවිට දෙවි මට මෙසේ පැවසීය. “ඔබ ගොස් ඔබේ නිවස තුළම රැඳී සිටින්න. 25  මනුෂ්‍ය පුත්‍රය, ඔබට ඔවුන් අතරට යෑමට නොහැකි වන ලෙස ඔවුන් අනිවාර්යයෙන්ම ඔබව දම්වැල්වලින් බඳිනවා ඇත.+ 26  එවිට මම ඔබේ දිව ඔබේ උඩු තල්ලේ ඇලෙන්න සලස්වන්නෙමි.+ ඔබ ගොළුවෙක් මෙන් වන්නෙහිය.+ ඔවුන්ට අවවාද දෙන්න ඔබට නොහැකි වෙයි.+ මන්ද ඔවුහු කැරලිකාර+ සෙනඟකි. 27  එහෙත් මම ඔබට කතා කර ඔබේ මුඛය විවෘත කරන්නෙමි. ඉන්පසු ඔබ ඔවුන්ට මෙසේ පැවසිය යුතුයි.+ ‘විශ්වයේ පාලකයාණන් වන යෙහෝවා දෙවි පවසන දේට සවන් දෙන්න.’ සවන් දීමට කැමති අය සවන් දුන්නාවේ.+ අකමැති අය සවන් නොදී සිටියාවේ. මන්ද ඔවුහු කැරලිකාර සෙනඟකි.+

පාදසටහන්

මූ.අ., “මම ඔවුන්ගේ මුහුණු හා නළල්වලට සමානව ඔබේ මුහුණ හා නළලද ශක්තිමත් කරන්නෙමි.”
මුල් භාෂාවේ භාවිත කර ඇති වචනයෙන්, ‘දෙවිගේ බලය’ හෝ ‘දේවදූතයෙක්’ හෝ අදහස් විය හැකියි.