එසකියෙල් 21:1-32

21  යෙහෝවා දෙවි මට තවදුරටත් පැවසුවේ මෙසේය.  “මනුෂ්‍ය පුත්‍රය, ඔබ යෙරුසලම දෙසට හැරී ශුද්ධස්ථානයට* ඇසෙන සේ+ කතා කරන්න.+ ඊශ්‍රායෙල් දේශයේ වැසියන්ට විරුද්ධව අනාවැකි කියන්න.+  ඊශ්‍රායෙල් දේශයේ වැසියන්ට ඔබ මෙසේ පැවසිය යුතුයි. ‘යෙහෝවා දෙවි පවසන්නේ මෙයයි. “මම ඔබට විරුද්ධව නැඟී සිටිමි.+ මම මාගේ කඩුව කොපුවෙන් ඇද+ ඔබ අතරේ සිටින ධර්මිෂ්ඨයන්ටද දුෂ්ටයන්ටද පහර දෙන්නෙමි.+  ඔබ අතරේ සිටින ධර්මිෂ්ඨයන්වද දුෂ්ටයන්වද සහමුලින්ම නැති කර දමන පිණිස කොපුවෙන් ඉවතට ගත් මාගේ කඩුවෙන් දකුණේ සිට උතුර දක්වා සිටින සියලුදෙනාටම පහර දෙන්නෙමි.+  එවිට යෙහෝවා දෙවි වන මා, මාගේ කඩුව කොපුවෙන් ඉවතට ගෙන ඇති බව සියලුදෙනාටම දැනගන්න සිදු වෙනවා ඇත.+ ඒ කඩුව නැවත කොපුවට දමන්නේ නැත.”’+  “මනුෂ්‍ය පුත්‍රය, බියෙන් වෙවුලන්න.+ ඔවුන් ඉදිරියෙහිම මහත් වේදනාවෙන් සුසුම්ලන්න.+  ‘ඔබ සුසුම්ලමින් සිටින්නේ ඇයි’ කියා ඔවුන් ඔබෙන් ඇසුවොත්,+ ‘ලැබුණු ආරංචියක් නිසාය’+ කියා ඔවුන්ට පවසන්න. ඔබට ආරංචි වන එම දේ අනිවාර්යයෙන්ම සිදු වන්නේය.+ සියලුදෙනාගේම සිත් බියෙන් සලිත වනු ඇත.+ ඔවුන්ගේ අත් වෙවුලනු ඇත. සෑම කෙනෙක්ම කලකිරෙන්නෝය. ඔවුන්ගේ දණහිස් තෙමී යන්නේය.*+ ඒ විපත ඔවුන් පිටට පැමිණෙන බව විශ්වයේ පාලකයාණන් වූ යෙහෝවා දෙවි වන මම ස්ථිර වශයෙන්ම පවසමි.”+  යෙහෝවා දෙවි මට තවදුරටත් මේ දේද පැවසුවේය.  “මනුෂ්‍ය පුත්‍රය, අනාවැකි කියන්න. ‘යෙහෝවා දෙවි ඔබට මෙසේ පවසා ඇත’ කියමින් ඔවුන්ට මෙසේ දැනුම් දෙන්න. ‘කඩුවක්! කඩුවක්!+ ඒ කඩුව මුවහත් කර තිබේ.+ එය දීප්තියෙන් බැබළෙයි. 10  එය මුවහත් කර තිබෙන්නේ මහත් ඝාතනයක් සිදු කිරීමටය. එය ඔප දමා ඇත්තේ දීප්තියෙන් බැබළීමටය.’”+ “එහෙත් අපට ප්‍රීති වෙන්න හේතුවක් නැද්ද?”+ “‘ඒ කඩුව අන් සියලු රාජ යෂ්ටීන්* පහ කර දැමුවාක් මෙන්+ මගේම පුත්‍රයාගේ+ රාජ යෂ්ටියත් පහ කර දමනු ඇත.+ 11  “‘මෙම කඩුව හොඳින් මුවහත් කර ඔප දමා තිබේ. එය මුවහත් කළෙත් ඔප දැමුවෙත් මිනී මරන්නෙකුගේ අතට භාර දීමටය.+ 12  “‘මනුෂ්‍ය පුත්‍රය, මහත් හඬින් කෑ මොර ගසන්න.+ මන්ද එය පැමිණෙන්නේ මාගේම සෙනඟ පිටටත්+ ඊශ්‍රායෙල්හි අධිපතීන් පිටටත්ය.+ මාගේ සෙනඟ සමඟ අධිපතීහුද කඩුවට ගොදුරු වනු ඇත.+ එමනිසා ශෝකයෙන් ඔබේ කළවයට ගසාගන්න.+ 13  කඩුව මුවහත්ද කියා සෝදිසි කරනු ඇත.+ ඒ කඩුව රාජ යෂ්ටියට පවා අවමන් කරයි. එවිට කුමක් සිදු වෙයිද?+ රාජ යෂ්ටිය තවදුරටත් නොපවතිනු ඇත.’+ එසේ පවසන්නේ විශ්වයේ පාලකයාණන් වූ යෙහෝවා දෙවි වන මමය. 14  “මනුෂ්‍ය පුත්‍රය, අනාවැකි කියා ඔබේ අත්ලට ගසාගන්න.+ ‘කඩුවක්’ කියා තුන් වතාවක් පවසන්න.+ එය ලේ වගුරුවන කඩුවකි. එය උත්තමයන්ව ඝාතනය කරන කඩුවකි. සෑම පැත්තකින්ම ඔවුන්ව වට කරගෙන පහර දෙන කඩුවකි.+ 15  කඩුවෙන් මෙම විනාශය සිදු කරන්නේ මමය. ඔවුන්ව බියගැන්වීම සඳහාත්+ නුවර දොරටුව අසලදීම+ බොහෝදෙනෙකුව යටත් කරගැනීම සඳහාත් මම එය එවන්නෙමි. එය මුවහත් කර ඔප දමා තිබෙන්නේ මහත් ඝාතනයක් සිදු කිරීමටය.+ 16  කඩුව, ඔබේ මුවහත රැකගනු!+ දකුණටත් වමටත් ගොස් පහර දෙනු! හැරෙන හැරෙන පැත්තට පහර දෙනු! 17  මමද මාගේ අත්ලට ගසාගන්නෙමි.+ එවිට ඔබට විරුද්ධව ඇවිළ තිබූ මාගේ උදහස+ නිවී යන්නේය.+ මේ සියල්ල පවසන්නේ යෙහෝවා දෙවි වන මමය.” 18  යෙහෝවා දෙවි මට තවදුරටත් පැවසුවේ මෙසේය. 19  “මනුෂ්‍ය පුත්‍රය, යම් දේශයකින් ඇරඹෙන මාර්ගයක් දැන් සටහන් කරගන්න. ඒ මාර්ගය එක්තරා මංසන්ධියකදී දිශා දෙකකට විහිදෙයි. කඩුවක් අතැතිව එන බැබිලෝනියේ රජුට එම මංසන්ධියේදී තමන් කුමන මාර්ගයේ යනවාදැයි තේරීමක් කරන්න සිදු වෙයි.+ නුවරට යන දිශාව පෙන්වන සලකුණක් එක් මාර්ගයක තබන්න.+ 20  කඩුවක් අතැතිව සටනට එන රජුට යෑම සඳහා මාර්ග දෙකක් ඔබ මෙලෙස සලකුණු කළ යුතුය. අම්මොන්වරුන්ට අයත් රබ්බා නුවරට+ යන මාර්ගයද යූදා දේශය හා යෙරුසලමේ බලකොටු දෙසට යන මාර්ගයද සලකුණු කරන්න.+ 21  බැබිලෝනියේ රජ එම මංසන්ධියට පැමිණ නවතිනු ඇත. ඒ ස්ථානයේදී ඔහු නිමිති බලනු ඇත.+ ඔහු ඒ සඳහා ඊතල සොලවා, ටෙරෆිම් රූප මාර්ගයෙන් තොරතුරු විමසන්නේය.+ ඔහු සතෙකුගේ අක්මාව මගින්ද නිමිති බලනු ඇත. 22  ඔහුගේ දකුණතට හසු වන දේ අනුව තමන් යෙරුසලම බලා යා යුතුයි කියා ඔහු තීරණය කරනු ඇත.+ එහෙයින් යුද්ධයට සැරසෙන්නයයි මහත් හඬින් අණක් නික්මෙයි.+ යෙරුසලමට පහර දී මහත් ඝාතනයක් සිදු කිරීමට ඔහුගෙන් අණක් නික්මෙයි. නුවරේ දොරටු කඩා දැමීමට යුධෝපකරණ සූදානම් කිරීමටත් නුවර වටලා පවුරු ගොඩනැඟීමටත් ඔහුගෙන් අණ ලැබෙනු ඇත.+ 23  එහෙත් යෙරුසලමේ වැසියන් නිමිති බැලීමෙන් හෙළි වූ ඒ දේ සත්‍යයක් ලෙස පිළිගන්නේ නැත.+ මන්ද ඔවුන් දිවුරුම් දී ඔහු සමඟ ගිවිසුමක් ඇති කරගෙන තිබෙන හෙයිනි.+ නමුත් ඔවුන්ගේ කැරලිකාරකම නිසා+ බැබිලෝනියේ රජ ඔවුන්ව හසු කරගැනීමට පැමිණෙන්නේය.+ 24  “එබැවින් විශ්වයේ පාලකයාණන් වන යෙහෝවා දෙවි මේ දේ පවසයි. ‘ඔබ කළ සෑම වරදක්ම හෙළි වී ඇත. ඔබ කර ඇති දේවලින් ඔබේ පව්කාරකමද පැහැදිලිව පෙනේ. එමනිසා ඔබේ සියලු වැරදි සිහි කරනු ඇත.+ ඒවාට ප්‍රතිඵල විඳින්න ඔබට සිදු වේ. ඔබ සියලුදෙනා ඔබේ සතුරාගේ අතට හසු වන්නහුය.’+ 25  “දරුණු ලෙස පහර කෑ ඊශ්‍රායෙල්හි+ දුෂ්ට අධිපති වූ ඔබ+ කළ සියලු වැරදිවලට දඬුවම් විඳීමට දැන් කාලය පැමිණ ඇත. ඔබේ අයුතුකම්වල අවසානය පැමිණ ඇත.+ 26  විශ්වයේ පාලකයාණන් වන යෙහෝවා දෙවි මෙසේ පවසයි. ‘හිස්වැස්ම ගලවා දමන්න. ඔටුන්න ඉවත් කරන්න.+ දැන් මහත් වෙනසක් සිදු වෙනවා ඇත.+ පහත් තැනැත්තාව උසස් කරන්න.+ උත්තමයාව පහත් කරන්න.+ 27  විනාශයක්! විනාශයක්! මම මහත් විනාශයක් සිදු කරන්නෙමි.+ නීත්‍යනුකූල අයිතිය ඇති තැනැත්තා පැමිණෙන තෙක්+ ඔටුන්න කිසිවෙකුටවත් හිමි වන්නේ නැත. ඔහු පැමිණි විට මම එය ඔහුට දෙන්නෙමි.’+ 28  “මනුෂ්‍ය පුත්‍රය, දැන් අනාවැකි කියන්න. ඔබ පැවසිය යුත්තේ මෙයයි. ‘විශ්වයේ පාලකයාණන් වන යෙහෝවා දෙවි අම්මොන්වරුන් ගැනත් ඔවුන්ගෙන් සිදු වූ නින්දාව ගැනත් පවසන්නේ මෙසේය. කඩුවක් කොපුවෙන් ඉවතට ගෙන ඇත. ඒ කඩුව ඔසවා ඇත්තේ ඝාතනයක් සිදු කිරීමටය. එය ඔප දමා ඇත්තේ මහත් විනාශයක් කිරීමටය. එය දිදුලයි.+ 29  එසේ වන්නේ ඔබේ අනාගතවක්තෘවරුන් ඔබට බොරු අනාවැකි පැවසූ නිසාය. ඔවුන් නිමිති බලා ඔබව මුළා කළ නිසාය.+ එහෙයින් සියලු අයුතුකම්වල අවසානය පැමිණෙන දවසේදී මරා දමනු ලබන අයගේ මළ කඳන් සමඟ ඔබේ මළ කඳන්ද ගොඩගසනු ලැබේ.+ 30  කඩුව නැවත කොපුවේ දැමිය යුතුය. ඔබ උපන් දේශයේදීම+ මම ඔබව විනිශ්චය කරන්නෙමි. 31  මම ඔබට විරුද්ධව ප්‍රකාශ කර ඇති මාගේ කෝපය වගුරුවන්නෙමි. මාගේ උදහසද ගින්නක් මෙන් ඔබට විරුද්ධව ඇවිළෙන්නේය.+ මම තිරිසන් ගති ඇති දරුණු මිනිසුන් අතට ඔබව හසු කර දෙන්නෙමි. ඔවුහු විනාශ කිරීමට දක්ෂ සෙනඟකි.+ 32  ඔබ ගින්නට ඉන්ධන මෙන් වනු ඇත.+ ඔබේ ලේ දේශය පුරා ගලා යන්නේය. ඔබව නැවත සිහි කරනු ලබන්නේ නැත. මන්ද මේ දේ නියම කරන්නේ යෙහෝවා දෙවි වන මමය.’”+

පාදසටහන්

මූ.අ., “ශුද්ධස්ථානවලට.”
එස 7:17හි පාදසටහන බලන්න.
මූ.අ., “ගස්.”