එසකියෙල් 19:1-14

19  “ඔබ ඊශ්‍රායෙල්හි අධිපතීන් ගැන+ විලාප ගීයක් ගයන්න.+  ඔබ පැවසිය යුත්තේ මෙසේය. ‘ඔබේ මව කවුද? ඇය සිංහයන් අතරේ වාසය කළ සිංහ ධේනුවකි.+ කේශර සිංහයන් අතරේ ලැගුම් ගනිමින් ඇය තම පැටවුන්ව පෝෂණය කළාය.  “‘ඇය ඇතිදැඩි කළ එක් පැටවෙක්+ කේශර සිංහයෙක් මෙන් වැඩී තම ගොදුරු ඉරා දමන්න ඉගෙනගත්තේය.+ ඌ මිනිසුන්ව පවා කා දැමීය.  අවට ජාතීන්ට ඌ ගැන ආරංචි විය. ඔවුහු ඌට බොරු වළක් අටවා, ඌව හසු කරගෙන කොකු දමා ඊජිප්තුවට ගෙනාවෝය.+  “‘බලාපොරොත්තු සුන් වූ දෑසින් එදෙස බැලූ ඇය, තවත් පැටවෙකු ගෙන+ කේශර සිංහයෙකු වන තෙක් ඌව ඇතිදැඩි කළාය.  ඌ කේශර සිංහයෙකු මෙන් වැඩුණු පසු සිංහයන් අතරේ සැරිසරන්න පටන්ගත්තේය. ගොදුරු ඉරා දමන්න ඌද ඉගෙනගත්තේය.+ ඌ මිනිසුන්ව පවා කා දැමීය.+  ඌ ඒ මිනිසුන්ගේ බලකොටු පුරාම ඇවිද ඒවා ගැන දැනුවත් වී ඔවුන්ගේ නුවරවල් විනාශ කර දැමුවේය.+ ඌ නිසා මුළු දේශයම පාළුවට ගියේය. උගේ ගර්ජනා හඬ දේශය පුරාම දෝංකාර දුන්නේය.+  එවිට අවට විසූ ජාතීහු ඌට විරුද්ධව නැඟී සිට+ ඌ මත දැලක් හෙළූහ.+ ඌද ඔවුන් ඇටවූ උගුලට හසු විය.+  අන්තිමේදී ඔවුහු කොකු දමා ඌව කූඩුවක සිර කර බැබිලෝනියේ රජු වෙතට ගෙනාවෝය.+ තවදුරටත් ඊශ්‍රායෙල් කඳුකරයෙහි උගේ හඬ නොඇසෙන පිණිස+ ඔවුහු ඌ මත දැලක් එළා බැබිලෝනියට ගෙනාවෝය. 10  “‘ඔබේ මව+ දිය දහරා අසල සිටෙවූ මිදිවැලක්*+ හා සමානය. කිසිදු ජල හිඟයක් නොතිබූ නිසා+ ඇය බොහෝ අතු විහිදුවමින් පල දැරුවාය. 11  එම අතුවලින් පාලකයන්ගේ රාජ යෂ්ටි තැනීමට උචිත සවිශක්තියෙන් යුත් දඬු කපාගන්නා ලදි.+ එම මිදිවැලේ අතු අවට පිහිටි සියලු ගස්වල අතුවලට වඩා ඉහළින් විහිදෙන්න පටන්ගත්තේය.+ 12  එහෙත් දෙවිගේ උදහසේ ප්‍රතිඵලයක් ලෙස ඇයව උදුරා දමා+ පොළොවට හෙළා දමන ලදි. ඉන්පසු නැඟෙනහිර දෙසින් හැමූ සුළඟකින් ඇගේ පල වියළී ගියේය.+ ඇගේ සවිමත් දඬු කඩා දමනු ලැබූ අතර ඒවා වියළී ගියේය.+ ඒවා ගින්නෙන් දවා දමන ලදි.+ 13  දැන් ඇයව සිටුවා තිබෙන්නේ දිය පොදක්වත් නැති පාළු,+ වියළි දේශයකය.+ 14  ගින්නක් ඇගේ දඬුවලින් නික්ම ඇවිත්+ ඇගේ අතු රිකිලි සහ පල සියල්ල දවා දැමීය. ඒ නිසා සවිශක්තියෙන් යුත් දණ්ඩක්වත් පාලකයන්ගේ රාජ යෂ්ටියක්වත් ඇයට ඉතුරු නොවීය.+ “‘එය විලාප ගීයකි. ඒ කතා පුවත විලාපයක් සේ ගයනා කළ යුතුය.’”+

පාදසටහන්

හෙබ්‍රෙව් භාෂාවේ, “ඔබේ ලෙයින් වට වූ මිදිවැලක්” යන අදහසද ඇතුළත්ය.