එසකියෙල් 18:1-32

18  යෙහෝවා දෙවි මට තවදුරටත් පැවසුවේ මෙසේය.  “‘අමු මිදි කෑවේ පියවරුය. එහෙත් හිරි වැටුණේ දරුවන්ගේ දත්ය’ යන කියමන ඔබ ඊශ්‍රායෙල් දේශය පුරාම පතළ කර තිබේ.+ එහෙත් එම කියමනෙහි අරුත ඔබ දන්නවාද?  “‘මෙම ප්‍රසිද්ධ කියමන යළි කෙදිනක හෝ ඊශ්‍රායෙල් දේශයේ ඔබට භාවිත කරන්න ලැබෙන්නේ නැත. මා ජීවමාන දෙවිය. එබැවින් මා පවසන මේ දේ අනිවාර්යයෙන්ම සිදු වන්නේය.’ එසේ පවසන්නේ විශ්වයේ පාලකයාණන් වන යෙහෝවා දෙවිය.  සියලු ජීවිත මට අයිතිය.+ පියාගේ ජීවිතය+ මෙන්ම පුත්‍රයාගේ ජීවිතය අයිති වන්නෙත් මටය.+ පව් කරන පුද්ගලයා+ අනිවාර්යයෙන්ම මිය යන්නේය.+  “‘යහපත්, යුක්තිගරුක ජීවිතයක් ගත කරමින් ධර්මිෂ්ඨව ක්‍රියා කරන+ මිනිසෙකු ගැන සිතන්න.  ඔහු කඳු මත+ ඇති රූපවලට පිදූ ආහාර අනුභව කරන්නේ නැත.+ ඊශ්‍රායෙල් දේශයේ තිබෙන පිළිකුල්සහගත රූප දෙස බලන්නේවත් නැත.+ ඔහු තම මිතුරාගේ බිරිඳ සමඟ සයනය නොකරන්නේය.+ අපවිත්‍ර තත්වයක සිටින ස්ත්‍රියක සමීපයටවත් නොයන්නේය.+  ඔහු කිසිවෙකුට හිංසා කර නැත.+ ණයකට ඇපයක් ලෙස ගත් දේ ඔහු ආපසු භාර දෙන්නේය.+ ඔහු කිසිම දෙයක් කොල්ල කන්නේ නැත.+ කුසගින්නෙන් පෙළෙන පුද්ගලයාට ඔහු තමාගේම කෑම වේල වුවද දෙන්නේය.+ නිර්වස්ත්‍රව සිටින කෙනෙකුට අඳින්න වස්ත්‍රයක්ද දෙන්නේය.+  ඔහු පොලියට මුදල් නොදෙන්නේය.*+ අයුතු ලෙස ලාභ උපයාගන්නේද නැත.+ අයුක්තිසහගත දේවල් කිරීමෙන් ඔහු වැළකී සිටින්නේය.+ මිනිසුන්ට මැනවින් යුක්තිය ඉටු කර දෙන්නේය.+  ඔහු මාගේ අණපනත්වලට අනුව ජීවත් වන්නේය.+ සත්‍යවාදීව කටයුතු කිරීමට තිබෙන ආශාව නිසා ඔහු මා තීන්දු කළ දේට එකඟව ජීවත් වෙයි.+ ඔහු ධර්මිෂ්ඨ තැනැත්තෙකු වන බැවින්+ අනිවාර්යයෙන්ම ජීවත් වන්නේය.’+ එසේ පවසන්නේ විශ්වයේ පාලකයාණන් වන යෙහෝවා දෙවිය. 10  “‘යමෙකුගේ පුත්‍රයෙකු, සොරෙකු,+ මිනී මරුවෙකු+ හා වෙනත් දුෂ්ට දේවල් කරන කෙනෙකු බවට පත් වී ඇතැයි සිතමු. 11  (එහෙත් පියා මේ කිසිවක් කර නැත.) ඒ පුත්‍රයා කඳු මත තිබෙන රූපවලට පිදූ ආහාර අනුභව කරන්නේය.+ තම මිත්‍රයාගේ බිරිඳ සමඟ ඔහු සයනය කර ඇත.+ 12  අසරණ වූ අයටත් දුප්පත් අයටත් ඔහු පීඩා කරන්නේය.+ ඔහු අන් අයගේ වස්තු කොල්ල කන්නේය.+ ඇපයට යමක් ගත් පසු එය නැවත භාර දෙන්නේ නැත.+ ඔහු පිළිකුල්සහගත රූපවලින් පිහිට පතයි.+ එවැනි කෙනෙකු හැසිරෙන්නේ ඉතා නින්දාසහගත ලෙසය.+ 13  ඔහු පොලී අය කරන්නෙකි.+ අයුතු ලෙස ලාභ උපයාගන්නේය.+ ඔහු මේ සියලු පිළිකුල්සහගත ක්‍රියාවල යෙදී ඇත.+ ඒ නිසා ඔහු ජීවත් වීමට සුදුස්සෙකු නොවෙයි. අනිවාර්යයෙන්ම ඔහුව මරා දමනු ඇත. ඔහුගේ ජීවිතයට වග කිව යුත්තේ ඔහුමය.+ 14  “‘පියා කළ සෑම පාපයක්ම දැක ඒ සියල්ලෙන් වැළකී සිටින පුතෙකු සිටිනවායයි සිතමු.+ 15  ඔහු කඳු මත රූපවලට පිදූ ආහාර අනුභව කරන්නේ නැත. ඊශ්‍රායෙල් දේශයේ තිබෙන පිළිකුල්සහගත රූපවලින් පිහිට පතන්නේ නැත.+ ඔහු තම මිත්‍රයාගේ බිරිඳ සමඟ සයනය කරන්නේ නැත.+ 16  ඔහු කිසිම මිනිසෙකුට හිරිහැර නොකරන්නේය.+ ණයක් දුන් පසු ඒ වෙනුවෙන් ගත් ඇපය නොදී සිටින්නේද නැත.+ ඔහු කිසිවක් සොරකම් කර නැත.+ කුසගින්නෙන් සිටින කෙනාට ඔහු තමාගේ කෑම වේලද ලබා දෙන්නේය.+ නිර්වස්ත්‍රව සිටින කෙනාට වස්ත්‍රයක්ද දෙන්නේය.+ 17  අසරණව සිටින අයට පීඩා කරන්නේ නැත. ඔහු පොලී අය කරන්නේවත්+ අයුතු ලෙස ලාභ උපයාගන්නේවත් නැත.+ ඔහු මා තීන්දු කළ දේට අනුව කටයුතු කරන්නේය.+ ඔහු ජීවත් වන්නේ මාගේ අණපනත්වලට එකඟවය.+ එහෙයින් ඔහු තම පියා කළ වැරදි නිසා මිය යන්නේ නැත.+ අනිවාර්යයෙන්ම ඔහුගේ ජීවිතය ගැලවෙන්නේය.+ 18  එහෙත් ඔහුගේ පියා තමා කළ වරදට+ මිය යා යුතුය.+ මන්ද ඔහු එළිපිටම වංචා කරමින් සහෝදරයෙකුගෙන් කොල්ල කෑවේය.+ ඔහු තම සෙනඟ අතරේ දුෂ්ට දේ කළේය.+ 19  “‘ජනයෙනි, “පියා කළ වරදට පුතා දඬුවම් නොලබන්නේ මන්ද”+ කියා ඔබ අසනවා ඇත. එහෙත් පුත්‍රයා යුක්තියෙන් හා ධර්මිෂ්ඨකමින් ක්‍රියා කර ඇත.+ ඔහු මාගේ සියලු අණපනත් රකිමින් ජීවත් වන්නේය.+ එමනිසා ඔහු අනිවාර්යයෙන්ම ජීවත් වන්නේය.+ 20  නමුත් පව් කරන පුද්ගලයා අනිවාර්යයෙන්ම මිය යන්නේය.+ පියා කළ වරදට කිසි ලෙසකින්වත් පුත්‍රයෙකු වග කිව යුතු නැත. පුත්‍රයා කළ වරදට කිසි ලෙසකින්වත් පියාද වග කිව යුතු නැත.+ ධර්මිෂ්ඨයා කළ යහපත් දේවල ප්‍රතිඵල ඔහුම භුක්ති විඳින්නේය.+ දුෂ්ටයා කළ නපුරුකම්වල ප්‍රතිඵල ඔහුටම විඳින්න සිදු වෙයි.+ 21  “‘දුෂ්ටයෙක් තමා කළ සියලු පාප ගැන පසුතැවී+ මාගේ සියලු අණපනත් රකිමින් යුක්තියෙන් හා ධර්මිෂ්ඨකමින් ක්‍රියා කරන්න පටන්ගන්නේ නම්+ ඔහු අනිවාර්යයෙන්ම ජීවත් වන්නේය. ඔහු මිය යන්නේ නැත.+ 22  ඔහු අතින් සිදු වූ සෑම වරදක්ම නැවත නැවතත් මතක් කරනු ලබන්නේ නැත.+ ඔහුගේ ධර්මිෂ්ඨ ක්‍රියා නිසා ඔහුගේ ජීවිතය රැකෙයි.’+ 23  “විශ්වයේ පාලකයාණන් වන යෙහෝවා දෙවි පවසන්නේ මෙසේය. ‘දුෂ්ටයෙකු වැරදි මාර්ගයෙන් හැරී දිගටම ජීවත් වෙනවාට මිස+ ඔහු මිය යනවා දකින්න මම කිසි ලෙසකින්වත් කැමති නැත.’+ 24  “‘ධර්මිෂ්ඨ කෙනෙක් තම ධර්මිෂ්ඨ ජීවිතය අත්හැර අයුක්තිසහගත දේවල් කරමින්+ දුෂ්ටයන් මෙන් සියලුම පිළිකුල්සහගත ක්‍රියාවල නිරත වන්නේ නම්+ ඔහු කලින් කළ කිසිම ධර්මිෂ්ඨ ක්‍රියාවක් මතක් කරනු ලබන්නේ නැත.+ ඔහුගේ ද්‍රෝහිකම නිසාත් ඔහු කළ පව් නිසාත් ඔහු මිය යන්නේය.+ 25  “‘ජනයෙනි, ඔබ එවිට අනිවාර්යයෙන්ම මෙසේ පවසනවා ඇත. “යෙහෝවා දෙවි ක්‍රියා කරන ආකාරය සාධාරණ නැහැ.”+ එහෙත් ඊශ්‍රායෙල් ජනයෙනි, මා පවසන දේට සවන් දෙන්න. මා ක්‍රියා කරන ආකාරය සාධාරණ නැද්ද?+ අසාධාරණව ක්‍රියා කරන්නේ ඔබ නොවේද?+ 26  “‘ධර්මිෂ්ඨ කෙනෙක් තම ධර්මිෂ්ඨ ක්‍රියාවලින් ඉවත් වී අයුක්තිසහගත දේවල් කර+ එහි ප්‍රතිඵලයක් ලෙස මිය යන විට, ඔහු මිය යන්නේ ඔහුම කළ අයුක්තිසහගත දේවල් නිසාය.+ 27  “‘දුෂ්ට කෙනෙක් තමාගේ දුෂ්ට ක්‍රියාවලින් ඉවත් වී ධර්මිෂ්ඨ ජීවිතයක් ගත කරමින් යුක්තිගරුකව ක්‍රියා කරන්න පටන්ගන්නා විට+ ඔහු තමාගේ ජීවිතය රැකගන්නේය.+ 28  ඔහු තමා කළ වැරදි තේරුම්ගෙන+ තමා කළ සෑම නපුරු ක්‍රියාවක්ම අත්හරින විට+ ඔහු අනිවාර්යයෙන්ම ජීවත් වන්නේය. ඔහු මිය යන්නේ නැත.+ 29  “‘එවිට ඊශ්‍රායෙල් වැසියන් නිසැකවම මෙසේ පවසනු ඇත. “යෙහෝවා දෙවි ක්‍රියා කරන ආකාරය සාධාරණ නැහැ.”+ එහෙත් ඊශ්‍රායෙල් වැසියෙනි, මා ක්‍රියා කරන ආකාරය සාධාරණ නැද්ද?+ අසාධාරණව ක්‍රියා කරන්නේ ඔබ නොවේද?’+ 30  “විශ්වයේ පාලකයාණන් වන යෙහෝවා දෙවි පවසන්නේ මෙයයි.+ ‘ඊශ්‍රායෙල් ජනයෙනි, මා සියලුදෙනාව විනිශ්චය කරන්නේ ඔවුන් එකිනෙකා ක්‍රියා කරන ආකාරයට අනුවය.+ එබැවින් ඔබ අතින් සිදු වූ සියලු වැරදි ගැන පසුතැවිලි වී ඒවායින් ඉවත් වන්න.+ එවිට ඔබේ විනාශයට හේතු විය හැකි කිසි වරදක් ඔබ අතින් සිදු වන්නේ නැත.+ 31  ඔබ කළ සියලු වැරදිවලින් ඉවත් වන්න.+ ඔබේ සිතත්+ මනසත් අලුත් කරගන්න.+ ඊශ්‍රායෙල් ජනයෙනි, ඔබ නිකරුණේ මිය යා යුත්තේ මන්ද?’+ 32  “විශ්වයේ පාලකයාණන් වන යෙහෝවා දෙවි පවසන්නේ මෙයයි. ‘කිසිවෙකු මිය යනවාට මම කැමති නැත.+ එමනිසා ජනයෙනි, ඔබේ සියලු වැරදි අත්හැර ජීවත් වන්න.’”+

පාදසටහන්

එනම්, දුගී අයගෙන් පොලී නොගත්තේය.