උත්පත්ති 47:1-31

47  යෝසෙප් පාරාවෝ වෙතට ගොස් ඔහුට මෙසේ දැනුම් දුන්නේය.+ “මගේ පියාත් මගේ සහෝදරයනුත් ඔවුන්ගේ එළු බැටළු රැළවල්, ගව රැළවල් සහ ඔවුන්ට අයිති සියල්ලත් රැගෙන කානාන් දේශයේ සිට ආවා. ඔවුන් දැන් ඉන්නේ ගෝෂෙන් දේශයේ.”+  ඔහු තම සහෝදරයන්ගෙන් පස්දෙනෙකුව තෝරා පාරාවෝ ඉදිරියට ගෙන ගියේය.+  පාරාවෝ ඔහුගේ සහෝදරයන්ගෙන්, “ඔබේ රැකියාව කුමක්ද”+ කියා ඇසුවේය. ඔවුහුද, “ඔබේ සේවකයන් වන අපි එඬේරුන්.+ අපේ මුතුන්මිත්තනුත් කළේ ඒ රැකියාවමයි”+ කියා පාරාවෝට පිළිතුරු දුන්නෝය.  ඔවුහු පාරාවෝට මෙසේද කීවෝය. “කානාන් දේශයේ සාගතය+ දරුණු නිසා අපේ සතුන්ට එහි තණබිම් නැහැ.+ ඔබේ සේවකයන් වන අප මේ දේශයේ විදේශිකයන්+ ලෙස ජීවත් වෙන්න ආවේ ඒ නිසයි. ඔබේ සේවකයන්ට ගෝෂෙන් දේශයේ ජීවත් වීමට+ ඉඩ දෙන්න කියා අපි ඔබෙන් බැගෑපත්ව ඉල්ලා සිටිනවා.”  එවිට පාරාවෝ යෝසෙප්ට මෙසේ කීවේය. “ඔබේ පියාත් ඔබේ සහෝදරයනුත් දැන් මෙහෙ ඉන්නවා.  ඊජිප්තු දේශයේ ඕනෑම පළාතක් තෝරාගන්න.+ ඔබේ පියාවත් ඔබේ සහෝදරයන්වත් දේශයේ හොඳම පළාතේ පදිංචි කරවන්න.+ ඔවුන්ට ගෝෂෙන් දේශයේ+ ජීවත් වෙන්න අවසර තිබෙනවා. ඔබේ පවුලේ ශක්තිමත් පුරුෂයන්+ ඉන්නවා නම් මගේ ගව රැළවල් රැකබලා ගැනීමට ඔවුන්ව පත් කරන්න.”+  ඉන්පසු යෝසෙප් තම පියා වන යාකොබ්ව පාරාවෝට හඳුන්වා දුන්නේය. ඒ අවස්ථාවේදී යාකොබ් පාරාවෝට ආශීර්වාද කළේය.+  පාරාවෝද, “ඔබට වයස කීයද” කියා යාකොබ්ගෙන් ඇසුවේය.  යාකොබ් පාරාවෝට මෙසේ කීවේය. “මම අවුරුදු එකසිය තිහක් විදේශිකයෙක් ලෙස ජීවත් වෙලා තියෙනවා.+ මගේ ජීවිතය හරිම කෙටියි. එයත් දුක්බර ජීවිතයක්.+ විදේශිකයන් ලෙස ජීවත් වූ මගේ පියවරුන් තරම් දිගු කාලයක් මම ජීවත් වෙයි කියා මම සිතන්නේ නැහැ.”+ 10  යාකොබ් පාරාවෝට ආශීර්වාද කර එතැනින් ඉවත්ව ගියේය.+ 11  යෝසෙප් පාරාවෝ අණ කළ පරිදි තම පියාවද තම සහෝදරයන්වද දේශයේ හොඳම පළාත වන රමෙසේස්හි+ පදිංචි කරවා ඔවුන්ට ඊජිප්තු දේශයේ බිම් කොටසක් ලබා දුන්නේය. 12  යෝසෙප් තම පියාටද තම සහෝදරයන්ටද තම පියාගේ පවුලේ සියලුදෙනාටද කෑම දුන්නේය.+ එක් එක් පවුල්වල සිටි දරුදැරියන් සංඛ්‍යාව බලා ඔහු ඔවුන්ට අවශ්‍ය ආහාර ද්‍රව්‍ය ලබා දුන්නේය.+ 13  සාගතය ඉතා දරුණු වූ නිසා දේශයේ කිසිම තැනක ආහාර තිබුණේ නැත.+ සාගතය නිසා කානාන් දේශයේ මෙන්ම ඊජිප්තු දේශයේ ජනයාද මලානිකව සිටියෝය.+ 14  ජනයා ධාන්‍ය මිල දී ගැනීමට යෝසෙප් වෙතට ආවෝය. ඒ නිසා ඊජිප්තු දේශයේ හා කානාන් දේශයේ ජනයා සතු සියලු මුදල් ඔහුගේ අතට ලැබිණ.+ යෝසෙප් තමා එකතු කරගත් මුදල් පාරාවෝගේ නිවසට ගෙනාවේය. 15  කලක් ගෙවුණු පසු ඊජිප්තු දේශයේ සහ කානාන් දේශයේ ජනයාගේ මුදල් සියල්ල වියදම් විය. ඊජිප්තුවේ සියලු වැසියෝ යෝසෙප් වෙතට පැමිණ, “අපිට කෑම ගන්න දැන් මුදල් නැහැ. අපිට කෑම දෙන්න!+ නැත්නම් අපි මෙතැනම මැරිලා යයි”+ කියා පැවසුවෝය. 16  එවිට යෝසෙප් මෙසේ කීවේය. “ඔබට මුදල් නැත්නම් ඔබේ සත්තු දෙන්න. මම ඔබට කෑම දෙන්නම්.” 17  ඔවුහු යෝසෙප් කී ලෙස තමන්ගේ සතුන් ඔහුට ගෙනැවිත් දුන්නෝය. යෝසෙප් ඔවුන් ගෙන ආ අශ්වයන්, එළුවන්, බැටළුවන්, ගවයන් හා බූරුවන්+ වෙනුවට ඔවුන්ට ආහාර දුන්නේය. ඒ අවුරුද්දේදී ඔවුහු තමන්ගේ සියලු සතුන්ව යෝසෙප්ට ගෙනැවිත් දුන්නෝය. ඔහුද දිගටම ඔවුන්ට ආහාර දුන්නේය. 18  ඒ අවුරුද්ද අවසානයේදී ඔවුහු යෝසෙප් වෙතට පැමිණ මෙසේ කීවෝය. “අපේ ස්වාමීනි, අපිට මේ කාරණය ඔබෙන් සඟවන්න බැහැ. අපේ මුදල් සියල්ලම ඉවරයි. අපිට දෙන්න තව සත්තුත් නැහැ. ඒ සියල්ල අපි ඔබට දුන්නා.+ දැන් අපේ ඉඩකඩම් හා අපි හැර වෙන දෙන්න කිසිම දෙයක් ඉතුරු වී නැහැ.+ 19  අපද අපේ ඉඩම්ද ඔබ ඉදිරියේ නැති නාස්ති වී යන්න ඉඩ දෙන්නේ මොකටද?+ ධාන්‍ය වෙනුවට අපිව ගන්න. අපේ ඉඩම් පවා ගන්න.+ අපි පාරාවෝට දාසකම් කරන්නම්. අපේ ඉඩම්ද ඔහුට අයිති කරගන්න පුළුවන්. අපිට බීජ දෙන්න. නැත්නම් අපේ ඉඩකඩම් පාළුවට ගොස් අපත් මිය යයි.”+ 20  මෙසේ, යෝසෙප් පාරාවෝගේ නමට ඊජිප්තුවරුන්ගේ සියලු ඉඩම් පවරාගත්තේය.+ සාගතය ඊජිප්තුවරුන්ට දරුණු ලෙස බලපෑ නිසා සියලුදෙනාම තම තමන්ගේ ඉඩම් වික්කෝය. මුළු දේශයම පාරාවෝට අයිති විය. 21  ඔහු ජනයාව ඊජිප්තු දේශය පුරාම පිහිටි නුවරවල පදිංචි කෙරෙව්වේය.+ 22  ඔහු පූජකයන්ගේ ඉඩම් පමණක් නොගත්තේය.+ මන්ද පූජකයන්ට ආහාර ලැබුණේ පාරාවෝගෙනි.+ පාරාවෝ ඔවුන්ට කන්න ආහාර දුන් නිසා ඔවුහු තමන්ගේ ඉඩම් පාරාවෝට වික්කේ නැත.+ 23  එවිට යෝසෙප් ජනයාට මෙසේ කීවේය. “මම ඔබවද ඔබේ සියලු ඉඩම්ද පාරාවෝගේ නමට පවරාගත්තා. මම ඔබට බීජ දෙන්නම්. දේශයේ වගා කරන්න.+ 24  අස්වැන්න නෙළන කාලයේ+ ඔබ පහෙන් කොටසක් පාරාවෝට දිය යුතුයි.+ ඉතුරු කොටස් හතර ඔබ තියාගන්න. කෙතේ වැපිරීමටත් ඔබටත් ඔබේ ගෙයි වැසියන්ටත් ඔබේ දරුවන්ටත් කෑම සඳහා එය ගන්න.”+ 25  එබැවින් ඔවුහු මෙසේ කීවෝය. “ස්වාමීනි, ඔබ අපේ ජීවිත බේරගත්තා.+ අපි පාරාවෝගේ දාසයෝ වෙන්න කැමතියි. අපිට කරුණාවෙන් සලකන්න කියා ඔබෙන් ඉල්ලා සිටිනවා.”+ 26  ඊජිප්තුවේ කෙත්වතුවල අස්වැන්නෙන් පහෙන් කොටසක් පාරාවෝට දිය යුතු බවට නියෝගයක් යෝසෙප් පැනෙව්වේය. එම නියෝගය අද දක්වාම පවතී. පූජකයන්ගේ ඉඩම් පමණක් පාරාවෝට අයිති නොවීය.+ 27  ඊශ්‍රායෙල්වරු ඊජිප්තු දේශයේ ගෝෂෙන් නම් පළාතේ දිගටම ජීවත් වූහ.+ ඔවුහු එහි ජීවත් වී දරුවන් බිහි කර බොහෝ සෙයින් ගණනින් වැඩි වූහ.+ 28  යාකොබ් ඊජිප්තු දේශයේ අවුරුදු දහහතක් ජීවත් විය. යාකොබ් ජීවත් වූ මුළු අවුරුදු ගණන එකසිය හතළිස්හතක් විය.+ 29  ඊශ්‍රායෙල් මිය යන දවස ළං වූ විට+ ඔහු තම පුත් යෝසෙප්ට කතා කර මෙසේ කීවේය. “ඔබ මට ආදරේ නම් ඔබ මාත් එක්ක විශ්වාසවන්තව කටයුතු කර මට කරුණාව* පෙන්වන බවට පොරොන්දු වෙන්න.+ මම මැරුණාට පස්සේ ඔබ මාව ඊජිප්තුවේ තැන්පත් කරන්නේ නැහැයි කියා+ මගේ කළවයට යටින් අත තබා පොරොන්දු වෙන්න.+ 30  මම මැරුණාට පස්සේ ඔබ මාව ඊජිප්තුවෙන් පිටතට ගෙනිහින් මගේ පියවරුන්ගේ+ සොහොනේ මාව තැන්පත් කරන්න.”+ යෝසෙප් ඔහුට මෙසේ පිළිතුරු දුන්නේය. “මම ඔබ කියන විදිහටම කරන්නම්.” 31  එවිට යාකොබ්, “මට දිවුරා පොරොන්දු වෙන්න” කියා කීවේය. යෝසෙප්ද ඔහුට දිවුරා පොරොන්දු විය.+ එවිට ඊශ්‍රායෙල් ඇඳේ සිට හිස නමා යාච්ඤා කළේය.+

පාදසටහන්

හෝ, “ළැදි ප්‍රේමය.”