උත්පත්ති 45:1-28

45  යූදා කී දේවල් ඇසූ විට යෝසෙප්ට තම හැඟීම් පාලනය කරගත නොහැකි විය.+ ඒ නිසා ඔහු, “හැමෝම මෙතැනින් යන්න” කියා තමා ඉදිරියේ සිටි සේවකයන්ට කීවේය. යෝසෙප් තම සහෝදරයන්ට තමා කවුද කියා හෙළි කළ විට වෙන කිසිවෙක් එතැන සිටියේ නැත.+  යෝසෙප් ඒ අවස්ථාවේදී හයියෙන් අඬන්න පටන්ගත්තේය.+ ඔහු අඬන ශබ්දය ඒ අවට සිටි ඊජිප්තුවරුන්ටත් ඇසිණ. පාරාවෝගේ ගෙයි වැසියන්ටත් ඒ ගැන ආරංචි විය.  අවසානයේදී යෝසෙප් තම සහෝදරයන්ට මෙසේ කීවේය. “මම යෝසෙප්! මගේ පියා තවමත් ජීවත් වෙනවාද?” එහෙත් ඔහුගේ සහෝදරයෝ ඔහු කී දේ නිසා කැලඹී ඔහුට උත්තරයක් දීමට නොහැකිව සිටියෝය.+  එබැවින් යෝසෙප්, “මා ළඟට එන්න” කියා ඔවුන්ට කීවේය. ඔවුහුද ඔහු ළඟට ගියෝය. ඉන්පසු ඔහු මෙසේ කීවේය. “මම යෝසෙප්. ඔබ ඊජිප්තුවට වික්ක ඔබේ සහෝදරයා මමයි!+  ඔබ මාව විකුණූ නිසා දැන් දුක් වෙන්නවත්+ ඔබටම දොස් කියාගන්නවත් එපා. ඔබේ ජීවිත ආරක්ෂා කරන්නයි දෙවි මාව මේ දේශයට ගෙනාවේ.+  දැන් අවුරුදු දෙකක් තිස්සේ පොළොව පුරාම සාගතය පවතිනවා.+ තව අවුරුදු පහක් යන තුරු බීජ වපුරන්නවත් අස්වැන්න නෙළාගන්නවත් ලැබෙන්නේ නැහැ.+  ඔබ මේ දේශයට එන්න කලින්ම දෙවි මාව මෙතැනට ගෙනාවා. දෙවි එහෙම කළේ පුදුම ක්‍රියාවකින් ඔබේ ජීවිත බේරා ඔබේ පරම්පරාව දිගටම පොළොවේ පවතින්න සලස්වන්නයි.+  මාව මෙතැනට එව්වේ ඔබ නොවෙයි,+ සැබෑ දෙවියි. මම දැන් පියෙකු වගේ පාරාවෝට මඟ පෙන්වනවා.+ ඔහුගේ සියලු ගෙයි වැසියන්ගේ ස්වාමියා ලෙස කටයුතු කරනවා. මුළු ඊජිප්තු දේශයම පාලනය කරනවා. ඒ සියල්ල සිදු වෙන්න සැලැස්සුවේ දෙවියි.  “දැන් ඉක්මනට මගේ පියා  ළඟට ගිහින් මෙහෙම කියන්න. ‘“දෙවි  මා ඊජිප්තු දේශයේ ස්වාමියා ලෙස පත් කර තිබෙනවා.+ දැන් ප්‍රමාද  නොවී මා ළඟට එන්න” කියා ඔබේ  පුත් යෝසෙප් ඔබට පණිවිඩයක් එව්වා. 10  “ඔබේ පුත්‍රයනුත් පුත්‍රයන්ගේ දරුවනුත් ඔබේ එළු බැටළු රැළ හා ගව රැළ ඇතුළු ඔබේ සියලු සතුනුත් රැගෙන ගෝෂෙන් දේශයට+ ඇවිත් මාත් එක්ක ජීවත් වෙන්න. 11  නැත්නම් ඔබට තියෙන හැම දෙයක්ම නැති වී ඔබත් ඔබේ ගෙයි වැසියනුත් අන්ත දුගී තත්වයට පත් වෙයි. සාගතය තව අවුරුදු පහක් පුරාම පවතිනවා. ඒ කාලයේදී මම ඔබට කන්න දෙන්නම්”+ කියා ඔබේ පුත් යෝසෙප් ඔබට කිව්වා.’ 12  දැන් ඔබත් එක්ක කතා කරන්නේ මමම කියා මගේ සහෝදර බෙන්ජමින්ටත් ඔබ සියලුදෙනාටත් තේරෙනවා ඇති.+ 13  ඊජිප්තුවේ මට ලැබුණු ගෞරවය හා ඔබ මෙහෙ දුටු හැම දෙයක්ම මගේ පියාට කියන්න. දැන් ඉක්මනට ගිහින් මගේ පියාව මේ දේශයට එක්කගෙන එන්න.” 14  එසේ කී පසු ඔහු තම සහෝදර බෙන්ජමින්ව බදාගෙන ඇඬුවේය.+ බෙන්ජමින්ද ඔහුව බදාගෙන ඇඬුවේය. 15  ඔහු අනික් සහෝදරයන්ව සිපගෙන ඔවුන්වද බදාගෙන ඇඬුවේය.+ ඉන්පසු ඔහුගේ සහෝදරයෝ ඔහු සමඟ කතා කළෝය. 16  “යෝසෙප්ගේ සහෝදරයන් ඇවිත් ඉන්නවා” කියා පාරාවෝගේ නිවසේ අයට ආරංචි වූ විට පාරාවෝද ඔහුගේ සේවකයෝද ඒ ගැන සතුටු වූහ.+ 17  පාරාවෝ යෝසෙප්ට මෙසේ කීවේය. “ඔබේ සහෝදරයන්ට මෙහෙම කියන්න. ‘ඔබේ සතුන් පිට බඩු පටවාගෙන කානාන් දේශයට යන්න.+ 18  ඔබේ පියාවත් ඔබේ ගෙයි වැසියන්වත් මගේ දේශයට එක්කගෙන එන්න. මම ඔබට ඊජිප්තු දේශයේ තියෙන හොඳම දේ දෙන්නම්. දේශයේ තියෙන හොඳම කෑම ඔබට කන්න පුළුවන්.’+ 19  ඔබ ඔවුන්ට මෙහෙමත් කියන්න.+ ‘ඊජිප්තු දේශයෙන් කරත්ත+ රැගෙන ඔබේ කුඩා දරුවන්වත් භාර්යාවන්වත් ඔබේ පියාවත් කැඳවාගෙන එන්න.+ 20  ඔබට අයිති බඩු බාහිරාදිය එහෙ දාලා එන එක ගැන කනගාටු වෙන්න එපා.+ ඔබට ඊජිප්තු දේශයේ සැප සම්පත් භුක්ති විඳින්න පුළුවන්.’”+ 21  ඊශ්‍රායෙල්ගේ පුත්‍රයෝ පාරාවෝ කී දේට එකඟ වූහ. පාරාවෝ අණ කළ පරිදි යෝසෙප් ඔවුන්ට කරත්තද ගමනට අවශ්‍ය දේවල්ද දුන්නේය.+ 22  ඔවුන් එකිනෙකාට ඔහු ඇඳුම් කට්ටලය බැගින් දුන්නේය.+ නමුත් ඔහු බෙන්ජමින්ට රිදී ෂෙකෙල් තුන්සියයක්ද ඇඳුම් කට්ටල පහක්ද දුන්නේය.+ 23  ඔහු තම පියාට බූරුවන් දහදෙනෙකු පිට ඊජිප්තුවේ හොඳ දේවල්ද ඊජිප්තුව බලා එන ගමනට බූරුදෙනුන් දහදෙනෙකු පිට අවශ්‍ය ධාන්‍ය සහ කෑමද යැව්වේය. 24  ඔහු තම සහෝදරයන්ව පිටත් කර යැවූ අවස්ථාවේදී, “ගමන යන අතරතුරේදී රණ්ඩු වෙන්න එපා”+ කියා උපදෙස් දුන්නේය. 25  කල් යත්ම ඔවුහු කානාන් දේශයට පැමිණියෝය. ඔවුහු තමන්ගේ පියා වන යාකොබ් වෙතට ගොස් 26  මෙසේ කීවෝය. “යෝසෙප් තවමත් ජීවතුන් අතර ඉන්නවා! ඔහුව මුළු ඊජිප්තු දේශයේම පාලකයා ලෙස පත් කර තිබෙනවා.”+ නමුත් යාකොබ් ඔවුන් කී දේවල් විශ්වාස නොකළ නිසා ඒ ගැන කිසිම හැඟීමක් ඔහුට ඇති නොවීය.+ 27  ඉන්පසු ඔවුහු යෝසෙප් කී සියල්ල තම පියාට කීවෝය. යාකොබ් තමාව රැගෙන යෑමට යෝසෙප් එවා තිබූ කරත්ත දුටු විට ඔහුගේ සිත සතුටින් ඉපිල ගියේය.+ 28  ඊශ්‍රායෙල් ඉතා හැඟීම්බරව මෙසේ කීවේය. “අනේ මගේ පුතේ, යෝසෙප්, ඔබ ඇත්තටම තවමත් ජීවත් වෙනවාද? මගේ ඇස් පියවෙන්න කලින් ඔබේ මුහුණ දැකගන්න පුළුවන් නම් මට ඒ ඇති.”+

පාදසටහන්