උත්පත්ති 43:1-34

43  සාගතය ඉතා දරුණු ලෙස දේශයට බලපෑවේය.+  ඊජිප්තුවෙන්+ ගෙන ආ ධාන්‍ය සියල්ල ඉවර වූ පසු ඊශ්‍රායෙල් ඔහුගේ පුත්‍රයන්ට මෙසේ කීවේය. “ආපහු ගිහින් කෑම ටිකක් රැගෙන එන්න.”+  එවිට යූදා+ ඔහුට මෙසේ කීවේය. “ඒ මිනිසා, ‘ඔබේ සහෝදරයා නැතුව ආයෙත් මා ඉදිරියට එන්න එපා’ කියා අපට තදින්ම කිව්වා.+  ඔබ අපේ සහෝදරයාව ගෙනි යන්න අපට ඉඩ දෙනවා නම්+ අපි ගිහින් කෑම අරගෙන එන්නම්.  නමුත් ඔබ ඔහුව යවන්නේ නැත්නම් අපි යන්නේ නැහැ. මන්ද ‘ඔබේ සහෝදරයා නැතුව මා ඉදිරියට එන්න එපා’ කියා ඒ මිනිසා අපට කිව්වා.”+  එවිට ඊශ්‍රායෙල්+ මෙසේ ඇසුවේය. “ඔබ මට මේ විදිහට දුක් දෙන්නේ ඇයි? ඔබට තව සහෝදරයෙක් ඉන්නවා කියා ඔහුට නොකියා ඉන්න තිබුණා නේද?”  එවිට ඔවුහු මෙසේ කීවෝය. “ඒ මිනිසා අපේ පවුලේ විස්තර ඇහුවා. ‘ඔබේ පියා තවමත් ඉන්නවාද?+ ඔබට තව සහෝදරයෙක් ඉන්නවාද’ කියා ඔහු අපෙන් ඇහුවා. අපි ඒ විස්තර ඔහුට කිව්වේ ඒ නිසයි.+ ‘ඔබේ සහෝදරයාව එක්කගෙන එන්න’+ කියා ඔහු අපට කියන බව අපි දැනගෙන හිටියේ නැහැ.”  අන්තිමේදී යූදා තම පියා වන ඊශ්‍රායෙල්ට මෙසේ කීවේය. “දරුවාට මාත් එක්ක යන්න දෙන්න.+ නැත්නම් අපේ දරුදැරියන් එක්කම අපි සියලුදෙනාම+ මැරිලා යයි.+  මම දරුවාට කිසිම හානියක් වෙන්න ඉඩ තියන්නේ නැහැ.+ ඔහුට අනතුරක් වුණොත් ඔබ මට දඬුවම් කරන්න.+ ඔහුව නැවත ඔබ ළඟට ගෙනාවේ නැත්නම් මම මැරෙන තුරුම ඒ වරදට දඬුවම් විඳිනවා. 10  අපි මේ තරම් කාලයක් බලාගෙන හිටියේ නැත්නම් මේ වෙද්දී දෙවතාවක්ම ඊජිප්තුවට ගිහින් එන්න තිබුණා.”+ 11  එබැවින් ඊශ්‍රායෙල් ඔහුගේ පුත්‍රයන්ට මෙසේ කීවේය. “එහෙමනම්+ අපේ දේශයේ තියෙන හොඳම දේවල් ඒ මිනිසාට තෑග්ගක්+ හැටියට ගෙනි යන්න. බෝල්සම් තෙල්,+ මීපැණි,+ ලැබ්ඩනම් මැලියම්, රුක්ලාටු,+ පිස්ටැෂියෝ ඇට හා ආමන්ඩ් ඇටත්+ ඔබේ මලුවල අරගෙන යන්න. 12  ගිය වතාවේ ගෙන ගිය මුදල් ප්‍රමාණය මෙන් දෙගුණයක් ගෙනි යන්න. ඔබේ මලුවල තිබුණු මුදලුත් අරගෙන යන්න.+ සමහරවිට ඒ මුදල් ඔබේ මලුවලට දාන්න ඇත්තේ වැරදීමකින් වෙන්න ඇති.+ 13  දැන් ඔබේ සහෝදරයා එක්ක ඒ මිනිසා ළඟට යන්න. 14  ඒ මිනිසා ඔබට අනුකම්පා කර සිමියොන්ටත් බෙන්ජමින්ටත් ඔබත් එක්කම එන්න දෙයි කියා මම සියලු බලැති දෙවිගෙන් ඉල්ලනවා.+ නමුත් මගේ දරුවන්ව මට නැවත දැකගන්න නොලැබුණොත් ඒ දුකත් මම කොහොමහරි දරාගන්නම්.”+ 15  ඔවුහු තෑග්ග සහ පෙරට වඩා දෙගුණයක් මුදල් රැගෙන බෙන්ජමින් සමඟ පිටත්ව ගියෝය. ඔවුහු ඊජිප්තුවට ගොස් යෝසෙප් ඉදිරියට පැමිණියෝය.+ 16  ඔවුන් සමඟ බෙන්ජමින් සිටින බව දුටු විට යෝසෙප් තම නිවස භාරව සිටි සේවකයාට මෙසේ කීවේය. “දැන් මේ මිනිසුන්ව නිවස ඇතුළට ගෙනි යන්න. ඔවුන් අද දවල් කෑම කන්නේ මාත් එක්කයි. සතුන්ව මරා කෑමට සූදානම් කරන්න.”+ 17  ඒ මිනිසා යෝසෙප් කී ලෙසම කළේය.+ ඔහු ඒ මිනිසුන්ව යෝසෙප්ගේ නිවසට ගෙන ගියේය. 18  එහෙත් ඔහුගේ නිවසට ගෙන ගිය බැවින් යෝසෙප්ගේ සහෝදරයෝ භය වී+ මෙසේ කීවෝය. “කලින් වතාවේදී අපි ගෙවූ මුදල් ඔවුන්ට නොලැබුණු නිසයි අපිව මෙතැනට ගෙනාවේ. දැන් ඔවුන් අපිට පහර දී අපේ බූරුවන්ව පැහැරගෙන අපිව වහලුන් හැටියට තියාගනී.”+ 19  ඔවුහු යෝසෙප්ගේ නිවස භාරව සිටි සේවකයා වෙතට ගොස් දොරකඩ ළඟ සිට ඔහුට කතා කර 20  මෙසේ කීවෝය. “මාගේ ස්වාමීනි, අපට සමාවෙන්න. අපි කලින් වතාවේ ඔබේ දේශයට ආවේ කෑම මිල දී ගන්නයි.+ 21  අපි නවාතැනට+ ගියාට පස්සේ අපේ මලු ඇරලා බලද්දී අපි ගෙවූ මුදල් ආහාර ද්‍රව්‍යවලට උඩින්ම තිබුණා. අපි දුන්න සම්පූර්ණ මුදලම තිබුණා. ඒ මුදල් ටික ආපහු අපේ අතින් භාරගන්න කියා අපි ඉල්ලා සිටිනවා.+ 22  මෙවරත් කෑම මිල දී ගන්න අපි මුදල් ගෙනාවා. අපේ මුදල් ආපහු මලුවලට දැම්මේ කවුද කියා අපි ඇත්තටම දන්නේ නැහැ.”+ 23  එවිට ඔහු මෙසේ කීවේය. “කලබල වෙන්න එපා. භය වෙන්න කිසිම හේතුවක් නැහැ.+ ඔබේ මුදල් මගේ අතටම ලැබුණා. ඔබේ මලුවල වස්තු පිරෙව්වේ ඔබ අදහන ඔබේ පියාගේ දෙවියන්.”+ ඉන්පසු ඔහු සිමියොන්ව+ ඔවුන් ළඟට ගෙනාවේය. 24  යෝසෙප්ගේ සේවකයා ඔවුන්ව නිවසට ගෙන ගොස් ඔවුන්ගේ පාද සෝදන පිණිස වතුර ගෙනැවිත් දුන්නේය.+ ඔවුන්ගේ බූරුවන් සඳහා ආහාරද දුන්නේය.+ 25  ඔවුහු යෝසෙප්ට ගෙන ආ තෑග්ග සූදානම් කළෝය.+ මන්ද ඔවුන් යෝසෙප්ගේ නිවසේ දවල් කෑම කන බව ඔවුන්ට දැනගන්න ලැබිණ.+ 26  යෝසෙප් නිවසට පැමිණි විට ඔවුහු ඉදිරියට ගොස් තමන් ගෙන ආ තෑග්ග දී හිස නමා ඔහුට ආචාර කළෝය.+ 27  ඔහු ඔවුන්ගේ සැප දුක් විමසා+ මෙසේ ඇසීය. “මහලු වයසේ ඉන්න ඔබේ පියා කොහොමද? ඔහු හොඳින් ඉන්නවාද?”+ 28  ඔවුහුද, “ඔබේ සේවකයා වන අපේ පියා හොඳින් ඉන්නවා” යයි පිළිතුරු දුන් පසු ඔහු ඉදිරියේ මුණින් වැටුණෝය.+ 29  එවිට යෝසෙප් එකම කුසේ උපන් තම සහෝදරයා වන බෙන්ජමින්ව දැක,+ “මේ ඉන්නේ ඔබේ බාල සහෝදරයාද”+ කියා ඔවුන්ගෙන් ඇසුවේය. ඔහු බෙන්ජමින් දෙස බලා, “පුතේ, ඔබට දෙවිගෙන් ආශීර්වාද ලැබේවා”+ යයි කීය. 30  යෝසෙප් තම සහෝදරයාව දුටු බැවින් ඇඬෙන තරමට හැඟීම්බර විය.+ එබැවින් ඔහු විගස නිවස ඇතුළට ගොස් හැඬුවේය.+ 31  ඉන්පසු ඔහු මුහුණ සෝදාගෙන පිටතට ඇවිත් තමාගේ හැඟීම් පාලනය කරගෙන සේවකයන්ට මෙසේ කීවේය.+ “කෑම ගේන්න.”+ 32  සේවකයෝ ඔහුටද ඔහුගේ සහෝදරයන්ටද ඔහු සමඟ සිටි ඊජිප්තුවරුන්ටද වෙන වෙනම කෑම පිළිගැන්වූවෝය. මන්ද ඊජිප්තුවරුන් හෙබ්‍රෙව්වරුන් සමඟ එකට කෑම වේලක් ගැනීම පිළිකුල් දෙයක් ලෙස සැලකූ බැවිනි.+ 33  යෝසෙප්ගේ සහෝදරයෝ ඔහු ඉදිරියේ හිඳගෙන සිටියෝය. වැඩිමලාට හිමි ගෞරවය දෙමින්+ ඔවුන්ව වැඩිමලා සිට බාලයා දක්වා අනුපිළිවෙළට ඉන්දවා තිබිණ. ඔවුහු පුදුමයෙන් එකිනෙකා දෙස බලා සිටියෝය. 34  යෝසෙප් ඔහුගේ මේසයෙන් ඔවුන්ට කෑම යැව්වේය. නමුත් ඔහු බෙන්ජමින්ට යැවූ ප්‍රමාණය අන් සියලුදෙනාටම යැවූ ප්‍රමාණයට වඩා පස් ගුණයකින් වැඩි කළේය.+ මෙසේ, ඔවුහු තෘප්තියට පත් වන තුරුම ඔහු සමඟ කමින් බොමින් සිටියෝය.+

පාදසටහන්