උත්පත්ති 37:1-36

37  යාකොබ් තම පියා විදේශිකයෙකු ලෙස ජීවත් වූ+ දේශය වන කානාන්හි+ දිගටම ජීවත් විය.  යාකොබ්ගේ ජීවිත කතාව මෙයයි. වයස අවුරුදු දහහතක් වූ යෝසෙප්+ තම සහෝදරයන් සමඟ බැටළුවන් රැකබලා ගනිමින් සිටියේය.+ ඔහු යෞවනයෙකුව සිටි නිසා ඔහු තම පියාගේ භාර්යාවන් වන බිල්හාගේද+ ෂිල්පාගේද පුත්‍රයන්+ සමඟ රැළ බලාගත්තේය. එක් දිනක් යෝසෙප් තම පියා වෙතට ගොස් ඔහුගේ සහෝදරයන්ගේ නපුරු ක්‍රියා ගැන කීවේය.+  ඊශ්‍රායෙල් තම සියලුම පුත්‍රයන්ට වඩා ආදරේ කළේ යෝසෙප්ටය.+ මන්ද යෝසෙප් ඉපදුණේ ඔහු මහලුව සිටියදීය. ඔහු යෝසෙප්ට විශේෂ ඇඳුමක් මසා දුන්නේය. එය ඉරි වැටුණු, අත් ඇති දිග වස්ත්‍රයකි.+  ඊශ්‍රායෙල් ඔහුගේ සියලු පුත්‍රයන්ට වඩා යෝසෙප්ට ප්‍රේම කළ බව තේරුම්ගත් විට යෝසෙප්ගේ සහෝදරයෝ ඔහුට වෛර කරන්න පටන්ගත්තෝය.+ ඒ නිසා ඔහු සමඟ සමාදානයෙන් කතා කරන්න ඔවුන්ට නොහැකි විය.+  දිනක් යෝසෙප් සිහිනයක් දුටුවේය. ඔහු ඒ ගැන තම සහෝදරයන්ට කියූ විට+ ඔවුහු තව තවත් ඔහුට වෛර කරන්න පටන්ගත්තෝය.  ඔහු ඔවුන්ට මෙසේ කීවේය. “මම දැක්ක හීනය ගැන ඔබට කියන්න මට ඉඩ දෙන්න.+  අපි සියලුදෙනා කෙතේ අස්වැන්න මිටි බඳිද්දී, එකපාරටම මගේ මිටිය නැඟිට කෙළින් හිටගත්තා. ඊටපස්සේ ඔබ හැමෝගේම මිටි මගේ මිටිය වටේට හිටගෙන හිස නැමුවා.”+  එවිට ඔහුගේ සහෝදරයෝ ඔහුට මෙසේ කීවෝය. “ඔබ අපේ රජ වෙන්නද හිතාගෙන ඉන්නේ?+ ඔබ ඇත්තටම හිතුවාද ඔබට අපව පාලනය කරන්න පුළුවන් වෙයි කියලා?”+ ඔහු දුටු සිහින නිසාද ඔහු කියූ දේවල් නිසාද ඔවුහු ඔහුට තව තවත් වෛර කරන්න පටන්ගත්තෝය.  ඉන්පසු යෝසෙප් තවත් සිහිනයක් දුටුවේය. ඒ ගැනත් ඔහු තම සහෝදරයන්ට කීවේය. “මම තවත් හීනයක් දැක්කා. ඒ හීනයේදී ඉර, හඳ හා තාරකා එකොළහක් මට හිස නමා ආචාර කළා.”+ 10  පසුව ඔහු ඒ ගැන තම පියාටත් කීවේය. ඒ අවස්ථාවේදී ඔහුගේ සහෝදරයන්ද එතැන සිටියේය. ඔහුගේ සිහිනය ගැන ඇසූ විට පියා, “ඔබ දැක්ක හීනයේ තේරුම කුමක්ද? මමත් ඔබේ මවත් ඔබේ සහෝදරයනුත් ඔබ ළඟට ඇවිත් හිස නමා ආචාර කරන්න යනවා කියාද ඔබ කියන්නේ” යයි කියමින් ඔහුට තරවටු+ කළේය. 11  යෝසෙප් පැවසූ දේවල් නිසා ඔහුගේ සහෝදරයෝ ඔහුට ඊර්ෂ්‍යා+ කරන්න පටන්ගත්තෝය. නමුත් ඔහුගේ පියා ඒ දේවල් සිතේ තබාගත්තේය.+ 12  එක් දිනක් ඔහුගේ සහෝදරයෝ ෂීකෙම්+ අසල පිහිටි තණබිමකට පියාගේ රැළ රැගෙන ගියෝය. 13  ඊශ්‍රායෙල් යෝසෙප්ට කතා කර, “ඔබේ සහෝදරයෝ ෂීකෙම් ළඟ රැළ බලාගෙන ඉන්නවා. ඔබත් ඔවුන් ළඟට යන්න කැමතිද” කියා ඇසීය. එවිට ඔහු, “මම යන්න කැමතියි”+ කියා පැවසුවේය. 14  එවිට ඊශ්‍රායෙල්, “ඔබ ගිහින් ඔබේ සහෝදරයන් හා රැළේ සත්තු කිසි අනතුරක් නැතුව හොඳින් ඉන්නවාද කියා බලා මට ඇවිත් කියන්න.”+ එසේ කියා ඔහු යෝසෙප්ව හෙබ්‍රොන් තැනිතලාවේ+ සිට පිටත් කර යැව්වේය. යෝසෙප් ෂීකෙම් බලා ගියේය. 15  පසුව යෝසෙප් තණබිමක ඇවිදිමින් සිටියේය. මිනිසෙක් ඔහුව දැක, “ඔබ කාවද හොයන්නේ” කියා ඔහුගෙන් ඇසුවේය. 16  ඔහුද, “මම මගේ සහෝදරයන්ව හොයනවා. ඔවුන් රැළ බලාගන්නේ කොහෙද කියා මට කියන්න පුළුවන්ද?” 17  එවිට මිනිසා ඔහුට මෙසේ කීවේය. “ඔවුන් කූඩාරම් අකුළගෙන මෙතැනින් ගියා. ‘අපි දොතාන් වෙතට යමු’ කියා ඔවුන් කතා වෙනවා මට ඇහුණා.” එබැවින් යෝසෙප් දොතාන් දක්වා ඇවිදගෙන ගියේය. එතැනට පැමිණි විට ඔහු තම සහෝදරයන්ව දුටුවේය. 18  යෝසෙප්ගේ සහෝදරයෝ දුර තියාම ඔහුව දැක කූට ලෙස ඔහුව මරා දැමීමට කුමන්ත්‍රණය කළෝය.+ 19  ඔවුහු එකිනෙකා අතරේ මෙසේ කතා වූහ. “ඔය එන්නේ අර හීන මවන්නා!+ 20  අපි ඔහුව මරා දමා වතුර වළකට විසි කරමු.+ ඊටපස්සේ, නපුරු වනමෘගයෙක් ඔහුව මරා දැම්මා කියලා කියමු.+ එතකොට බලමු ඔහුගේ හීනවලට මොනවද වෙන්නේ කියලා.” 21  ඔවුන් කුමන්ත්‍රණය කරමින් සිටි දෙය දැනගත් විට රූබෙන් යෝසෙප්ව බේරාගන්න උත්සාහ කරමින්+ මෙසේ කීවේය. “අපි ඔහුගේ ජීවිතේට හානියක් නොකරමු.”+ 22  රූබෙන් ඔවුන්ට මෙසේද කීවේය. “අනේ, ඔහුව මරන්න නම් එපා.+ අපි පාළුකරයේ තියෙන මේ වතුර වළට ඔහුව තල්ලු කරලා දාමු. නමුත් ඔහුට කිසි අනතුරක් කරන්න එපා.”+ ඔහු මෙසේ කීවේ යෝසෙප්ව ඔවුන්ගේ අතින් ගලවා නැවත පියාට භාර දීමේ අදහසින්ය. 23  යෝසෙප් තම සහෝදරයන් ළඟට පැමිණි විට ඔවුහු යෝසෙප් ඇඳ සිටි ඉරි වැටුණු දිග වස්ත්‍රය ගලවා,+ 24  ඔහුව ගෙන ගොස් වතුර වළට තල්ලු කර දැමුවෝය.+ ඒ කාලයේදී එහි වතුර හිඳී ගොස් තිබිණ. 25  ඉන්පසු ඔවුහු කෑම කන පිණිස හිඳගත්තෝය.+ ටික වේලාවකට පසු, ගිලියද් සිට පැමිණෙන ඉෂ්මායෙල්වරුන්ගේ+ තවලමක් ඔවුහු දුටුවෝය. ඊජිප්තුවේ වෙළඳාම් කිරීමට රැගෙන ගිය ලැබ්ඩනම් මැලියම්ද බෝල්සම් තෙල්ද රුක්ලාටුද+ ඔවුන්ගේ ඔටුවන් පිට පටවා තිබිණ. 26  යූදා ඔවුන්ව දැක තම සහෝදරයන්ට මෙසේ කීවේය. “අපි අපේ සහෝදරයාව මරා දැමුවා කියා අපිට තියෙන වාසිය මොකක්ද?+ 27  අපි ඔහුට කිසි හානියක් නොකර+ ඉෂ්මායෙල්වරුන්ට විකුණමු.+ අනික ඔහු අපේම සහෝදරයානේ.” ඔවුහු යූදා කියූ දේට සවන් දුන්නෝය.+ 28  මිදියන් ජාතික වෙළෙන්දෝ+ එතැන පසු කරමින් ගියෝය. එවිට ඔවුහු යෝසෙප්ව වතුර වළෙන් ගොඩට ගෙන+ ඔහුව ඉෂ්මායෙල්වරුන්ට රිදී ෂෙකෙල් විස්සකට වික්කෝය.+ ඉෂ්මායෙල්වරු යෝසෙප්ව ඊජිප්තුවට ගෙන ගියෝය. 29  පසුව රූබෙන් නැවත වතුර වළ ළඟට ගොස් බැලුවේය. යෝසෙප් එහි නැති බව දුටු විට ඔහු බොහෝ සෙයින් දුක් වී තම වස්ත්‍ර ඉරාගත්තේය.+ 30  ඔහු තම සහෝදරයන් වෙතට දුව ගොස් මෙසේ ඇසුවේය. “දරුවා නැහැනේ! දැන් මම මොනවාද කරන්නේ?”+ 31  ඔවුහු එළුවෙකුව මරා යෝසෙප්ගේ දිග වස්ත්‍රය උගේ ලේවල පෙඟෙව්වෝය.+ 32  ඉන්පසු ඔවුහු මේ පණිවිඩය සමඟින් ඒ වස්ත්‍රය තමන්ගේ පියා වෙතට යැව්වෝය. “අපිට මේක හම්බ වුණා. මේ ඔබේ පුතාගේ ඇඳුමද+ කියා බලන්න.”+ 33  එවිට ඔහු ඒ දෙස බලා හඬ නඟා මෙසේ කීවේය. “මේ මගේ පුතාගේ දිග වස්ත්‍රයනේ! අනේ මගේ පුතාව නපුරු සතෙක් මරලා දාන්න ඇති!”+ 34  ඉන්පසු යාකොබ් තම වස්ත්‍ර ඉරාගෙන තම ඉණ වටේ ගෝණි රෙදි ඇඳ දවස් ගණනාවක්ම තම පුත්‍රයා නිසා වැලපුණේය.+ 35  ඔහුගේ දූපුතුන් සියලුදෙනාම ඔහුව සනසන්න උත්සාහ කළ+ නමුත් ඔහු, “අනේ, මගේ පුතා එක්කම මාත් මැරුණා නම්” යයි කියමින් බොහෝ සෙයින් ඇඬුවේය. යෝසෙප්ගේ පියා දවස් ගණනාවක්ම මෙසේ හඬා වැලපුණේය.+ 36  මිදියන්වරු යෝසෙප්ව ඊජිප්තුවට ගෙන ගොස් පාරාවෝගේ මාලිගාවේ නිලධාරියෙකු සහ ආරක්ෂක නිලධාරීන්ගේ ප්‍රධානියා+ වන පොතිෆර්ට වික්කෝය.+

පාදසටහන්