උත්පත්ති 27:1-46

27  ඊසාක් මහලු වියේ පසු විය. ඔහුගේ ඇස් නොපෙනෙන තරමටම දුර්වල වී තිබිණ.+ දිනක් ඔහු තම වැඩිමල් පුත්‍රයා වන ඒසව්ට, “මගේ පුතේ” කියා හඬගැසුවේය.+ ඒසව්ද, “ඇයි තාත්තේ” කියා ඔහු ළඟට ගියේය.  ඊසාක් ඔහුට මෙසේ කීවේය. “මේ අහන්න. මම දැන් වයසට ගිහින්.+ කවදා මැරෙයිද දන්නේ නැහැ.+  ඒ නිසා ඔබේ ඊකොපුවත් දුන්නත් රැගෙන දඩබිමට ගිහින් දඩමස් ටිකක් ගේන්න.+  ඒ මස් ටික මම ආස කරන විදිහට රසට උයලා දෙන්න. මම එයින් කා සතුටු වී මැරෙන්න කලින් ඔබට ආශීර්වාද+ කරන්නම්.”  ඊසාක් තම පුත් ඒසව්ට කතා කරමින් සිටියදී රෙබෙකා එය අසාගෙන සිටියාය. පසුව ඒසව් තම පියාට දඩමස් ගෙනෙන පිණිස දඩබිමට ගියේය.+  එවිට රෙබෙකා තම පුත් යාකොබ්ට+ මෙසේ කීවාය. “දැන් ටිකකට කලින් ඔබේ තාත්තා ඔබේ සහෝදරයා වන ඒසව්ට කතා කරනවා මට ඇහුණා.  ‘දඩමස් ටිකක් ගෙනැවිත් මම ආස කරන විදිහට ඒක රසට උයලා දෙන්න. මම එයින් කා සතුටු වී මැරෙන්න කලින් යෙහෝවා දෙවි ඉදිරියේ ඔබට ආශීර්වාද කරන්නම්’+ කියා ඔහු ඒසව්ට කිව්වා.  ඒ නිසා දැන් ඔබ මම කියන විදිහට කරන්න.+  ගිහින් රැළේ ඉන්න හොඳ එළු පැටවුන් දෙන්නෙක්ව තෝරා මට ගෙනත් දෙන්න. මම ඔබේ තාත්තා කන්න ආස විදිහට ඒ මස් ටික රසට උයලා දෙන්නම්. 10  ඔබ එය තාත්තාට ගිහින් දෙන්න. ඔහු එයින් කා සතුටු වී මැරෙන්න කලින් ඔබට ආශීර්වාද කරයි.” 11  එවිට යාකොබ් තම මව වන රෙබෙකාට මෙසේ කීවේය. “මගේ සහෝදරයාගේ ඇඟ පුරාම රෝම තියෙනවා. ඒත් මගේ ඇඟේ එච්චර රෝම නැහැ.+ 12  හදිස්සියේවත් තාත්තා මාව අතගාලා+ බැලුවොත් මම ඔහුව රවට්ටන්න හදනවා+ කියලා ඔහු හිතයි. එතකොට ඔහු මට ආශීර්වාද කරනවා වෙනුවට මට ශාප කරාවී.”+ 13  එවිට මව ඔහුට මෙසේ කීවාය. “මගේ පුතේ, ඔබට කරන ශාපය මා පිටට පැමිණේවා!+ ඔබ මම කියන දේට සවන් දී+ සතුන් දෙන්නාව මට ගෙනත් දෙන්න.” 14  එබැවින් යාකොබ් උන්ව රැගෙන ඇවිත් ඔහුගේ මවට දුන්නේය. ඇයද ඊසාක් ආස කරන විදිහට එය රසට පිසුවාය. 15  ඉන්පසු රෙබෙකා ඇගේ වැඩිමල් පුත්+ ඒසව්ගේ වස්ත්‍ර ගෙන ඇගේ බාල පුත්+ යාකොබ්ට ඇන්දුවාය. ඇය ඔහුට ඇන්දුවේ ගෙයි තිබූ ඒසව්ගේ හොඳම වස්ත්‍රයි.+ 16  ඔහුගේ අත් දෙක හා බෙල්ලේ රෝම නැති තැන් ඇය එළු පැටවුන්ගේ හම්වලින් වැසුවාය.+ 17  ඉන්පසු ඇය රසට පිළියෙල කළ ව්‍යංජනය සමඟ රොටි කිහිපයක් ඇගේ පුත් යාකොබ්ගේ අතට දුන්නාය.+ 18  යාකොබ් තම පියා වෙතට ගොස්, “තාත්තේ” කියා ඔහුට හඬගැසුවේය. එවිට පියා, “ඔබ කවුද මගේ පුතේ” කියා ඇසුවේය. 19  යාකොබ් තම පියාට කතා කරමින් මෙසේ කීවේය. “මම ඔබේ වැඩිමල් පුත් ඒසව්.+ මම ඔබ කියූ විදිහටම කළා. දැන් වාඩි වී මම උයපු දඩමස් ටික කන්න. ඊටපස්සේ මට ආශීර්වාද කරන්න.”+ 20  එවිට ඊසාක් තම පුත්‍රයාට මෙසේ කීවේය. “මගේ පුතේ, ඔබ මේ තරම් ඉක්මනට දඩමස් හොයාගත්තේ කොහොමද?” එවිට යාකොබ්, “ඔබේ දෙවි වන යෙහෝවා මට එය ලැබෙන්න සැලැස්සුවා” යයි කීවේය. 21  එවිට ඊසාක් යාකොබ්ට මෙසේ කීවේය. “පුතේ මා ළඟට එන්න. ඔබව අතගා බලා ඔබ ඇත්තටම මගේ පුත් ඒසව්ද කියා මට බලන්න ඕනේ.”+ 22  එවිට යාකොබ් තම පියා වන ඊසාක් ළඟට ගියේය. පියාද ඔහුව අතගා බලා මෙසේ කීවේය. “ඔබේ කටහඬ යාකොබ්ගේ වගෙයි. ඒත් අත් දෙක නම් ඒසව්ගේ වගෙයි.”+ 23  ඔහුගේ සහෝදර වූ ඒසව්ගේ අත් මෙන් ඔහුගේ අත් පුරාම රෝම තිබුණ නිසා ඊසාක් ඔහුව හඳුනාගත්තේ නැත. එබැවින් ඔහු යාකොබ්ට ආශීර්වාද කළේය.+ 24  ඉන්පසු ඔහු මෙසේ ඇසුවේය. “ඔබ ඇත්තටම මගේ පුත් ඒසව්ද?” ඔහුද, “ඔව්, මම ඒසව්”+ කියා උත්තර දුන්නේය. 25  එවිට ඔහු මෙසේ කීවේය. “පුතේ, කෑම ටික ළඟට ගේන්න. ඔබ දඩයමේ ගිහින් ගෙනා මස් ටික කෑවට පස්සේ මම ඔබට ආශීර්වාද කරන්නම්.”+ එවිට යාකොබ් මස් ව්‍යංජනය පමණක් නොව වයින්ද ඔහුගේ පියාට ගෙනැවිත් දුන්නේය. පියාද කෑම කා වයින් බීවේය. 26  ඉන්පසු ඔහුගේ පියා වන ඊසාක් ඔහුට මෙසේ කීවේය. “පුතේ දැන් මා ළඟට ඇවිත් මාව සිඹින්න.”+ 27  යාකොබ් පියා ළඟට ගොස් ඔහුව සිපගත්තේය. එවිට ඊසාක්ට ඔහුගේ වස්ත්‍රවල සුවඳ දැනී+ ඔහුට මෙසේ ආශීර්වාද කරන්න පටන්ගත්තේය. “මගේ පුත්‍රයාගේ සුවඳ යෙහෝවා දෙවි ආශීර්වාද කළ තණබිම්වල සුවඳ මෙනි! 28  සැබෑ දෙවිගෙන් ඔබට අහසෙන් පිනිද+ පොළොවෙන් සරු පසද+ බොහෝ ධාන්‍යද අලුත් වයින්ද+ ලැබේවා! 29  ජාතීහු ඔබ ඉදිරියේ හිස නමා ඔබට සේවය කරත්වා!+ ඔබ ඔබේ සහෝදරයන් කෙරෙහි අධිපතිකම් කරාවා! ඔබේ මවගේ පුත්‍රයෝ ඔබට හිස නමත්වා!+ ඔබට ශාප කරන සියල්ලන්ට ශාප වේවා! ඔබට ආශීර්වාද කරන සියල්ලන්ට ආශීර්වාද වේවා!”+ 30  ඊසාක් යාකොබ්ට ආශීර්වාද කර අවසන් වූ පසු ඔහු තම පියා වෙතින් ඉවත්ව ගියේය. ඒත් සමඟම ඔහුගේ සහෝදරයා වන ඒසව් දඩයමේ+ ගොස් ආවේය. 31  ඔහුද කෑමක් රසට උයා ඔහුගේ පියා වෙතට ගෙනැවිත් මෙසේ කීවේය. “තාත්තේ, නැඟිට ඔබේ පුතා ගෙනා දඩමස් ටික කන්න. ඉන්පසු ඔබට පුළුවන් මට ආශීර්වාද+ කරන්න.” 32  එවිට ඔහුගේ පියා වන ඊසාක්, “ඔබ කවුද” කියා ඇසුවේය. ඔහුද, “මම ඔබේ වැඩිමල් පුත් ඒසව්”+ කියා උත්තර දුන්නේය. 33  එවිට ඊසාක් බොහෝ සෙයින් භය වී වෙවුලමින් මෙසේ කීවේය. “එහෙනම් දැන් ටිකකට කලින් දඩයමේ ගිහින් මට දඩමස් ගෙනැවිත් දුන්නේ කවුද? ඔබ එන්න කලින් මම එයින් කා ඔහුට ආශීර්වාද කළා. ඔහුට අනිවාර්යයෙන්ම ඒ ආශීර්වාද ලැබෙයි.”+ 34  තම පියාගේ වචන ඇසූ විට ඒසව් අතිශයින් ශෝක වී මහත් හඬින් කෑගසමින්+ ඔහුගේ පියාට මෙසේ කීවේය. “අනේ තාත්තේ මටත් ආශීර්වාද කරන්න.”+ 35  නමුත් ඊසාක් මෙසේ කීවේය. “ඔබේ සහෝදරයා මාව රවටා ඔබට ලැබිය යුතු ආශීර්වාදය ලබාගත්තා.”+ 36  එවිට ඒසව් මෙසේ කීවේය. “ඔහුට යාකොබ් යන නම දුන්නේ ඒ නිසාම නොවේද? ඔහු දෙවතාවක්ම මට අයිති දේ උදුරගත්තා.+ ඔහු මුලින්ම උදුරගත්තේ මගේ කුලුඳුල්කම.+ දැන් මට ලැබෙන්න තිබුණු ආශීර්වාදයත් ඔහු උදුරගත්තා.”+ ඉන්පසු ඒසව් ඊසාක්ගෙන් මෙසේ ඇසුවේය. “අනේ, ඔබ මට ආශීර්වාදයක් ඉතුරු කළේ නැද්ද?” 37  නමුත් ඊසාක් ඒසව්ට මෙසේ උත්තර දුන්නේය. “මම ඔහුව ඔබේ අධිපතියා හැටියට පත් කළා.+ ඔහුගේ සියලු සහෝදරයන් ඔහුගේ සේවකයන් වෙනවා කියා මම කිව්වා.+ ධාන්‍ය සහ අලුත් වයින් ඔහුට බහුලව ලැබෙන්න+ කියාත් මම ආශීර්වාද කළා. ඉතින් මගේ පුතේ, ඔබට දෙන්න දැන් ආශීර්වාදයක් ඉතුරු වී නැහැ.” 38  එවිට ඒසව් මෙසේ කීවේය. “අනේ තාත්තේ, මට දෙන්න එක ආශීර්වාදයක්වත් ඉතුරු වී නැද්ද? අනේ තාත්තේ මටත් ආශීර්වාද කරන්න.”+ එසේ කියා ඒසව් කෑගසා අඬන්න පටන්ගත්තේය.+ 39  එවිට ඔහුගේ පියා වන ඊසාක් ඔහුට මෙසේ කීවේය. “ඔබ ජීවත් වෙන්නේ පොළොවේ සරු පසද අහසේ පිනිද නැති තැනකය.+ 40  ඔබේ සවිය ඔබේ කඩුවය.+ ඔබේ සහෝදරයා ඔබව යටත් කරගන්නේය.+ නමුත් ඔබේ ඉවසීම ඉක්මවූ දාට ඔබ පොරබැද ඔහුගෙන් නිදහස් වන්නෙහිය.”*+ 41  තමාගේ පියා යාකොබ්ට කළ ආශීර්වාදය නිසා ඒසව් යාකොබ් සමඟ වෛර බැඳගත්තේය.+ ඒසව් තම සිතින්+ මෙසේ කියාගත්තේය. “මගේ තාත්තා ගැන වැලපෙන කාලය දැන් අත ළඟයි.+ ඊටපස්සේ මම මගේ සහෝදරයා වන යාකොබ්ව මරා දමනවා.”+ 42  රෙබෙකා ඇගේ වැඩිමල් පුත් ඒසව්ගේ සිතේ තිබූ දේ ගැන දැනගත් විට විගස යාකොබ්ව කැඳවා ඔහුට මෙසේ කීවාය. “ඔබේ සහෝදරයා වන ඒසව් ඔබෙන් පළිගන්නයි යන්නේ. ඔහු ඔබව මරන්න හිතාගෙන+ ඉන්නවා. 43  ඒ නිසා මගේ පුතේ, මා කියන දේට සවන් දෙන්න.+ හාරාන්හි ජීවත් වෙන මගේ සහෝදරයා වන ලාබන්+ ළඟට යන්න. 44  ඔබේ සහෝදරයාගේ කෝපය නිවී යන තුරු+ කාලයක් ඔහු සමඟ ජීවත් වෙන්න. 45  ඔබේ සහෝදරයාගේ කෝපය නිවී ඔබ කළ දේ ඔහුට අමතක වන තුරු ඔබ එහෙ ජීවත් වෙන්න.+ ඔබ ආපහු පැමිණිය යුත්තේ කවදාද කියා දන්වා මම ඔබට පණිවිඩයක් එවන්නම්. එකම දවසේ ඔබ දෙදෙනාවම අහිමි කරගන්න මම කැමති නැහැ.” 46  රෙබෙකා ඊසාක්ට කිහිප වතාවක්ම මෙසේ කීවාය. “හෙත්ගේ දූවරුන් නිසා මට මගේ ජීවිතය එපා වෙලා.+ යාකොබ් කවදා හරි දවසක ඒසව් කළා වගේ මේ දේශයෙන් බිරිඳක් සොයාගත්තොත්+ මගේ ජීවිතෙන් වැඩක් තියෙනවාද?”

පාදසටහන්

මූ.අ., “ඔහු ඔබ පිට තැබූ වියගහ කඩා දමන්නේය.”