උත්පත්ති 22:1-24

22  ටික කලක් ගෙවුණු පසු සැබෑ දෙවි, ආබ්‍රහම්ගේ විශ්වාසය කොතරම් ශක්තිමත්ද කියා සෝදිසි කර බැලුවේය.+ දෙවි ඔහුට, “ආබ්‍රහම්” කියා හඬගැසුවේය. එවිට ආබ්‍රහම්, “ඇයි මාගේ ස්වාමීනි” කියා ඇසුවේය.  දෙවි තවදුරටත් මෙසේ කීවේය. “ඔබ බොහෝ සෙයින් ආදරේ කරන+ ඔබේ එකම පුත්‍රයා වන ඊසාක්+ සමඟ මොරියා+ දේශයට යන්න. මා එහිදී ඔබට පෙන්වන කන්දට ගොස් ඔහුව දවන පූජාවක් ලෙස ඔප්පු කරන්න.”+  ආබ්‍රහම් පාන්දරින්ම නැඟිට තම බූරුවාව ගමනට සූදානම් කළේය. පසුව ඔහුගේ සේවකයන් දෙදෙනෙකු හා ඊසාක් සමඟ ඔහු පිටත් වුණේය.+ ඔහු දවන පූජාව සඳහා දර පළාගෙන, සැබෑ දෙවි ඔහුට යන්න කියූ ස්ථානය වෙත ගමන් කළේය.  ඔහුගේ ගමනේ තුන්වන දවසේදී දුර සිටම ඔහු එම ස්ථානය දුටුවේය.  එවිට ආබ්‍රහම් තම සේවකයන්ට+ මෙසේ කීවේය. “ඔබ බූරුවා සමඟ මෙතන ඉන්න. මම දරුවාත් සමඟ එතැනට ගිහින් නමස්කාර+ කර එන්නම්.”  ආබ්‍රහම් දවන පූජාව සඳහා ගෙන ආ දර තම පුත් ඊසාක්ට දුන්නේය.+ ඔහු පිහියක්ද ගිනි පන්දමක්ද තමාගේ අතට ගත් පසු ඔවුහු දෙදෙනාම ඒ ස්ථානය බලා පිටත්ව ගියෝය.+  එවිට ඊසාක් තම පියා වන ආබ්‍රහම්ට, “තාත්තේ”+ කියා හඬගැසුවේය. ආබ්‍රහම්ද, “ඇයි මගේ පුතේ”+ යයි ඇසුවේය. එවිට ඊසාක් මෙසේ පැවසීය. “දවන පූජාව සඳහා ගින්දරයි දරයි තියෙනවා. ඒත් බැටළුවෙක් නැහැ!”+  එවිට ආබ්‍රහම් මෙසේ කීවේය. “මගේ පුතේ, දවන පූජාවට අවශ්‍ය බැටළුවා දෙවිම සපයයි.”+ ඒ දෙදෙනා දිගටම ඇවිදගෙන ගියෝය.  බොහෝ වේලාවක් ගත වූ පසු ඔවුහු සැබෑ දෙවි කියූ ස්ථානයට පැමිණියහ. ආබ්‍රහම් එතැනදී පූජාසනයක්+ ගොඩනඟා ඒ මත දර ගොඩගැසුවේය. ඉන් අනතුරුව ඔහු තම පුත් ඊසාක්ගේ අත පය බැඳ පූජාසනය උඩ තබා තිබූ දර මත ඔහුව තැබුවේය.+ 10  ඉන්පසු තම පුත්‍රයාව මරන්න+ ආබ්‍රහම් පිහිය අතට ගත්තේය. 11  එවිට යෙහෝවා දෙවිගේ දූතයා ස්වර්ගයේ සිට ඔහුට හඬගසා,+ “ආබ්‍රහම්! ආබ්‍රහම්” යයි කීවේය. ඔහුද, “ඔබ මට කතා කළේ ඇයි ස්වාමීනි” යයි ඇසුවේය. 12  එවිට දේවදූතයා දෙවි වෙනුවෙන් කතා කරමින් මෙසේ කීය. “දරුවාට අත තියන්න එපා. ඔහුට කිසි අනතුරක් කරන්න එපා.+ මන්ද ඔබ ඔබේ පුත්‍රයාව, ඔබේ එකම පුත්‍රයාව පවා මට දෙන්න පසුබට නොවූ නිසා ඔබට මා කෙරෙහි ගරුබියක් ඇති බව මම දැන් දනිමි.”+ 13  එවිට ආබ්‍රහම් වට පිට බැලූ විට ඔහුට නුදුරින් බැටළුවෙක් සිටිනවා ඔහු දුටුවේය. උගේ අං පඳුරක පැටලී තිබිණ. ආබ්‍රහම් ඒ බැටළුවාව රැගෙන තම පුත්‍රයා වෙනුවට ඌව දවන පූජාවක් ලෙස ඔප්පු කළේය.+ 14  ආබ්‍රහම් ඒ ස්ථානයට යෙහෝවා-යයිරෙ* යන නම තැබීය. “යෙහෝවා දෙවිට අයිති කන්දේදී සපයනු ලැබේ”+ යනුවෙන් කියමනක් තිබෙන්නේ ඒ නිසාය. 15  යෙහෝවා දෙවිගේ දූතයා දෙවන වරටත් ස්වර්ගයේ සිට ආබ්‍රහම්ට හඬගසා, 16  මෙසේ කීවේය. “යෙහෝවා දෙවි ඔබට පවසන දේ මෙයයි. ‘ඔබේ පුත්‍රයාව, ඔබේ එකම පුත්‍රයාව පවා+ ඔබ මට දෙන්න පසුබට නොවූ නිසා මම මගේම නාමයෙන් මෙසේ දිවුරන්නෙමි.+ 17  මම ඔබට අනිවාර්යයෙන්ම ආශීර්වාද කරන්නෙමි. මම ඔබෙන් පැවතෙන්නන්ව අහසේ තාරකා මෙන්ද මුහුදු වෙරළේ වැලි මෙන්ද බොහෝ සෙයින් වැඩි කරන්නෙමි.+ ඔබෙන් පැවත එන තැනැත්තා* ඔහුගේ සතුරන්ගේ නුවර* අයිති කරගන්නේය.+ 18  ඔබ මගේ හඬට සවන් දුන් නිසා ඔබෙන් පැවත එන තැනැත්තා+ මාර්ගයෙන් පොළොවේ සියලු ජාතීහු ආශීර්වාද ලබාගන්නෝය.’”*+ 19  ඉන්පසු ආබ්‍රහම් ඔහුගේ සේවකයන් වෙතට හැරී ගියේය. ඔවුහු බෙයර්-ෂෙබා+ වෙතට ගමන් කළෝය. ආබ්‍රහම් බෙයර්-ෂෙබාහි ජීවත් විය. 20  ටික කලක් ගෙවුණු පසු ආබ්‍රහම්ට මේ පුවත ආරංචි විය. “ඔබේ සහෝදරයා වන නාහෝර්ට+ මිල්කාගෙන්+ පුත්‍රයන් ලැබී ඇත. 21  ඔහුගේ කුලුඳුල් පුත්‍රයාගේ නම ඌෂ්ය. ඌෂ්ගේ සහෝදරයාගේ නම බූෂ්ය.+ ආරම්ගේ පියා වන කෙමූවෙල්, 22  කෙසෙද්, හෂො, පිල්දාෂ්, යිද්ලෆ් සහ බෙතුයෙල්+ යන අයද නාහෝර්ගේ පුත්‍රයන්ය.” 23  බෙතුයෙල් රෙබෙකාගේ+ පියාය. මිල්කා, නාහෝර්ට දාව ඒ පුත්‍රයන් අටදෙනාව බිහි කළාය. නාහෝර් ආබ්‍රහම්ගේ සහෝදරයාය. 24  නාහෝර්ට රෙයුමා නම් වූ උපභාර්යාවක්ද සිටියාය. ඇය තේබා, ගහම්, තහෂ් සහ මයකා+ යන අයව බිහි කළාය.

පාදසටහන්

තේරුම, “යෙහෝවා දෙවි සපයයි.”
උත් 3:15හි පාදසටහන බලන්න.
මූ.අ., “දොරටුව.”
උත් 12:3හි පාදසටහන බලන්න.