උත්පත්ති 12:1-20

12  යෙහෝවා දෙවි ආබ්‍රම්ට කතා කර මෙසේ කීවේය. “ඔබේ දේශයෙන් පිට වී යන්න. ඔබේ නෑදෑයන්වද ඔබේ පියාගේ නිවසද අත්හැර මා ඔබට පෙන්වන දේශයට යන්න.+  මම ඔබට ආශීර්වාද කර ඔබගෙන් මහත් ජාතියක් බිහි කරන්නෙමි. ඔබේ නම ගෞරවයට පත් කරන්නෙමි. අන්‍යයන් ඔබ මාර්ගයෙන් ආශීර්වාද ලබන්නේය.+  ඔබට ආශීර්වාද කරන අයට මම ආශීර්වාද කරන්නෙමි. ඔබට ශාප කරන තැනැත්තාට මම දඬුවම් කරන්නෙමි.+ පොළොවේ සියලු ජාතීහු නිසැකවම ඔබ මාර්ගයෙන් ආශීර්වාද ලබාගන්නෝය.”*+  එවිට ආබ්‍රම් යෙහෝවා දෙවි කී ලෙසම පිටත්ව ගියේය. ලොත්ද ඔහු සමඟ ගියේය. ආබ්‍රම් හාරාන් නුවරින්+ පිටත්ව යන විට ඔහුගේ වයස අවුරුදු හැත්තෑපහක් විය.  ආබ්‍රම් තම භාර්යාව වූ සාරයිවද+ තම සහෝදරයාගේ පුත් ලොත්වද+ හාරාන්හිදී එකතු කරගත් බඩු බාහිරාදියද+ දාසදාසීන්වද රැගෙන කානාන් දේශය බලා පිටත්ව ගියේය.+ කල් යත්ම ඔවුහු කානාන් දේශයට පැමිණියෝය.  ආබ්‍රම් ඒ දේශයේ ෂීකෙම්+ නම් ස්ථානය දක්වාම ගොස් මොරේගේ විශාල ගස් අසල+ නතර විය. ඒ කාලයේදී කානානිවරුද දේශයේ සිටියෝය.  එවිට යෙහෝවා දෙවි ආබ්‍රම් ඉදිරියේ දර්ශනය වී මෙසේ කීවේය. “මම ඔබෙන් පැවතෙන්නන්ට*+ මේ දේශය දෙන්නෙමි.”+ ඉන්පසු ආබ්‍රම් එතැනදී තමා ඉදිරියේ දර්ශනය වූ යෙහෝවා දෙවිට පූජාසනයක් ගොඩනැඟුවේය.  පසුව ඔහු බෙතෙල්+ නම් ස්ථානයට නැඟෙනහිරෙන් පිහිටි කඳුකර පළාතට ගොස් කූඩාරම් ගසාගත්තේය. ඔහු සිටි ස්ථානයට බස්නාහිරෙන් බෙතෙල්ද නැඟෙනහිරෙන් ආයි+ නගරයද තිබිණ. ආබ්‍රම් එතැනදීත් යෙහෝවා දෙවිට පූජාසනයක් ගොඩනඟා+ යෙහෝවා දෙවිට ස්තුති ප්‍රශංසා කළේය.*+  ඉන්පසු ආබ්‍රම් එතැනින් පිටත් වී නෙගෙබ්*+ දෙසට ගමන් කළේය. ඒ ගමන අතරතුරේදී ඔහු තැනින් තැන කූඩාරම් ගසා ඒවායේ වාසය කළේය. 10  ඒ කාලයේදී දේශයේ සාගතයක් හටගත්තේය. සාගතය උග්‍ර වූ නිසා+ ඊජිප්තුවට ගොස් ටික කලකට එහි ජීවත් වීමට+ ආබ්‍රම් තීරණය කළේය. 11  ඊජිප්තුවට ළඟා වෙත්ම ඔහු තම භාර්යාව වූ සාරයිට මෙසේ කීවේය. “ඔබ ඉතා ලස්සන කාන්තාවක්.+ 12  ඔබ ලස්සන නිසා ඊජිප්තුවරුන් ඔබට හොඳින් සලකයි. නමුත් මම ඔබේ ස්වාමිපුරුෂයා කියා දැනගත්තොත් ඔවුන් මාව මරා දමයි. 13  ඒ නිසා මා වෙනුවෙන් මේ දේ කරන්න. ඔබ මගේ සහෝදරිය කියා ඔවුන්ට කියන්න.+ ඔබ එහෙම කිව්වොත් මගේ ජීවිතය බේරගන්න පුළුවන්. ඔබ නිසා ඔවුන් මට හොඳින් සලකයි.”+ 14  ඔවුන් ඊජිප්තුවට ඇතුල් වූ වහාම සාරයි රුවැති කාන්තාවක් බව ඊජිප්තුවරු දුටුවෝය. 15  පාරාවෝ යටතේ සිටි පාලකයෝද ඇයව දැක පාරාවෝ ඉදිරියේ ඇය ගැන වර්ණනා කළෝය. එබැවින් ඇයව පාරාවෝගේ නිවසට ගෙන යනු ලැබීය. 16  පාරාවෝ ඇය නිසා ආබ්‍රම්ට හොඳින් සැලකුවේය. ආබ්‍රම්ට බැටළුවන්ද ගවයන්ද බූරුවන්ද බූරුදෙනුන්ද ඔටුවන්ද සේවක සේවිකාවන්ද ලැබුණේය.+ 17  ආබ්‍රම්ගේ භාර්යාව වූ සාරයි+ නිසා යෙහෝවා දෙවි පාරාවෝට හා ඔහුගේ ගෙයි වැසියන්ට දරුණු පීඩාවලින් පහර දුන්නේය.+ 18  එවිට පාරාවෝ ආබ්‍රම්ව කැඳවා මෙසේ ඇසුවේය. “ඔබ මට කුමක්ද මේ කළේ? ඇය ඔබේ බිරිඳ කියා ඔබ මට නොකීවේ මන්ද?+ 19  ‘ඇය මගේ සහෝදරිය’+ කියා ඔබ මට කීවේ ඇයි? මම ඇයව විවාහ කරගන්නයි හිටියේ! මෙන්න ඔබේ භාර්යාව. ඇයව රැගෙන මෙතැනින් යන්න!” 20  පාරාවෝ අණ කළ පරිදි ඔහුගේ සේවකයෝ ආබ්‍රම් සතු සියල්ල සමඟ ආබ්‍රම්වද ඔහුගේ භාර්යාවද මඟට ගෙනැවිත් ඇරලුවෝය.+

පාදසටහන්

මුල් භාෂාවේ භාවිත කර ඇති ක්‍රියා පදයෙන් අදහස් කරන්නේ එම ආශීර්වාදය ලබන්න නම් යමක් කළ යුතු බවයි.
මුල් භාෂාවේ භාවිත කර ඇති වචනය ‘පැවතෙන තැනැත්තා’ ලෙසද පරිවර්තනය කළ හැක.
මූ.අ., “යෙහෝවා දෙවිගේ නාමයට අයැදුවේය.”
හෝ, “දකුණු දෙසට එනම්, පොරොන්දු දේශයේ දකුණු පළාතට.”