මේ සිද්ධිය හිතින් මවාගන්න. ජෙෆ්ට අවුරුදු 17යි. එක දවසක් අම්මා කියපු වැඩ ටික ඉක්මනටම ඉවර කරලා ජෙෆ් ටීවී බලන්න පටන්ගත්තා.

ඒ වෙලාවෙම තාත්තා තරහෙන් එතැනට ආවා.

ඔයා ජෙෆ් නම් ඔයා මොකක්ද කරන්නේ?

දෙමව්පියන් එක්ක කතාබහ කරද්දී බාධා ඇති වෙන්න පුළුවන්. ඒක හරියට කාර් එකක් එළවන් යද්දී පාර වසා ඇත කියලා පුවරුවක් දකිනවා වගෙයි. එහෙම එකක් දැක්කොත් ඔයා වෙන පාරක් හොයාගන්නවා නේද?

 උදාහරණයකට:

ලෙයා කියන යෞවනිය මෙහෙම කියනවා. “තාත්තාත් එක්ක ප්‍රශ්නයක් කතා කරන්න හරි අමාරුයි. සමහර වෙලාවට මම ටික වෙලාවක් කතා කළාට පස්සේ තාත්තා මෙහෙම අහනවා. ‘මොකක්ද? මං අහන් හිටියේ නෑ.’”

මේ වෙලාවේ ලෙයාට කරන්න පුළුවන් දේවල් තුනක් තියෙනවා.

1. 1. තාත්තාට කෑගහනවා.

   “මං කියන දේ අහන්න. මේක හරි වැදගත් දෙයක්” කියලා ලෙයා කෑගහනවා.

2. 2. තාත්තා එක්ක කතා කරන්නේ නැතුව ඉන්නවා.

   ලෙයා එයාගේ ප්‍රශ්නේ ගැන තාත්තාට මුකුත්ම කියන්නේ නැහැ.

3. 3. ප්‍රශ්නේ ගැන කතා කරන්න සුදුසු වෙලාවක් එන කල් බලන් ඉන්නවා.

   ලෙයා එයාගේ තාත්තා එක්ක වෙන වෙලාවක කතා කරනවා. එහෙම නැත්නම් ලියුමක් ලියනවා.

ලෙයා කොයි දේ කෙරුවොත් හොඳයි කියලාද ඔයා හිතන්නේ?

ටිකක් හිතන්න: ලෙයාගේ තාත්තා ඉන්නේ වෙන කල්පනාවක. ඒ නිසා ලෙයාගේ හිතේ වේදනාව තාත්තාට තේරුම්ගන්න අමාරුයි. ලෙයා 1වෙනි ක්‍රමය තෝරාගත්තා නම් එයා කෑගහන්නේ ඇයි කියලා තාත්තාට තේරෙන එකක් නැහැ. කෑගැහුවයි කියලා තාත්තා එයාට ඇහුම්කන් දෙයි කියලා හිතන්නත් බැහැ. ඒ වගේම ඒකෙන් එයා තාත්තාට ගරු කරනවා කියලා පෙන්නන්නෙත් නැහැ. (එෆීස 6:2) ඒ විදිහට බැලුවොත් නම් ඒක හොඳ ක්‍රමයක් නෙමෙයි.

2වෙනි ක්‍රමය ලේසි වුණත් ඒක ඥානවන්ත දෙයක් නෙමෙයි. ලෙයාගේ ප්‍රශ්නේ විසඳගන්න නම් එයා තාත්තා එක්ක කතා කරන්නම ඕනේ. ලෙයාගේ ප්‍රශ්නේ දැනගත්තොත් විතරයි එයාට උදව් කරන්න තාත්තාට පුළුවන් වෙන්නේ. කතා නොකර ඉන්න එකෙන් කිසිම ප්‍රයෝජනයක් නැහැ.

බාධාව ජය ගන්න ලෙයා 3වෙනි ක්‍රමය තෝරාගත්තා නම් එයා වෙන වෙලාවක කතා කරන්න උත්සාහ කරනවා. නැත්නම් ලියුමකින් එයාගේ ප්‍රශ්නේ තාත්තාට ලියනවා. ලියුම ලිව්වාට පස්සේ එයාට ටිකක් හරි සහනයක් දැනෙයි.

මුහුණ දෙන ප්‍රශ්නේ ගැන හැම තොරතුරක්ම ලියුමේ ලියන්න ලෙයාට පුළුවන්. එතකොට තාත්තාට ඒ ලියුම කියවලා ප්‍රශ්නේ තේරුම්ගන්න පුළුවන් වෙයි. ඒ කියන්නේ 3වෙනි ක්‍රමයෙන් දෙන්නාටම ප්‍රයෝජන තියෙනවා. ඔයාට තියෙන ප්‍රශ්නේ, කෙලින්ම කතා කරලා හරි ලියුමක් ලියලා හරි විසඳගද්දී ඔයා පිළිපදින්නේ බයිබලයේ තියෙන මේ උපදෙසයි. ‘සමාදානයට දායක වන දේවල් කිරීමට දැඩි උත්සාහයක් දරමු.’—රෝම 14:19.

ලෙයාට තව මොන වගේ දේවල් කරන්න පුළුවන්ද?

ඔයාට යෝජනාවක් දෙන්න පුළුවන්ද? ලැබෙන ප්‍රතිඵල මොනවාද?

සමහර වෙලාවට ඔයා කියන දේ ඔයාගේ දෙමව්පියන් තේරුම්ගන්නේ වෙනස් විදිහකට.

උදාහරණයකට:

දෙමව්පියන් ඔයාගෙන් අහනවා “ඇයි මූණ එල්ලගෙන ඉන්නේ” කියලා. එතකොට ඔයා කියනවා “මම ඒ ගැන කතා කරන්න කැමති නෑ” කියලා.

ඔයා කියපු දේ දෙමව්පියන් තේරුම්ගන්නේ මේ විදිහට. “ඔයාලාට කියනවාට වඩා හොඳයි යාළුවන්ට කියන එක”.

හිතන්න ඔයා ලොකු ගැටලුවකට මුහුණ දෙන වෙලාවක ඔයාගේ දෙමව්පියන් උදව් කරන්න හදනවා කියලා. එතකොට ඔයා මෙහෙම කිව්වොත් “අම්මලා කරදර වෙන්න ඕනෙ නෑ. මට පුළුවන් තනියම ඒක විසඳගන්න.”

• ඔයා කියන දේ දෙමව්පියන් කොයි විදිහට තේරුම්ගනියිද?

• ඊට වඩා හොඳ පිළිතුරක් දෙන්න ඔයාට පුළුවන්ද?