Skip to content

අන්ධ ස්ත්‍රියකගේ යාච්ඤාවලට උත්තර ලැබුණා

අන්ධ ස්ත්‍රියකගේ යාච්ඤාවලට උත්තර ලැබුණා

ආසියාවේ ජීවත් වන සාක්ෂිකාරියක් වන යන්මෙ දවසක් අන්ධ ස්ත්‍රියකට පාර පනින්න උදව් කළා. ඒ ස්ත්‍රියගේ නම මින්ජි. * “පාර පනින්න උදව් කළාට ස්තුතියි. ඔයාට දෙවි පිහිටයි” කියලා මින්ජි කිව්වා. යන්මෙ මින්ජිගෙන් ඇහුවා බයිබලය ගැන සාකච්ඡා කරන්න කැමතිද කියලා. ටිකක් කතා කරකර ඉද්දී මින්ජි කිව්වා දෙවියන් පිළිගන්න සභාව හොයාගන්න එයාට උදව් කරන්න කියලා එයා හැමදාම දෙවියන්ට යාච්ඤා කළා කියලා. එයා දෙවියන්ගෙන් ඒ වගේ ඉල්ලීමක් කළේ ඇයි?

2008දී එයාගේ යාළුවෙක් ආබාධිත අයට උදව් කරන පල්ලියකට එයාත් එක්ක යන්න එන්න කියලා මින්ජිට කිව්වා. ඒ පල්ලියේ දීපු දේශනයට ඇහුම්කන් දුන්නාට පස්සේ මින්ජි පූජකයාගෙන් ඇහුවා එයා කියෙව්වේ මොන පොතෙන්ද කියලා. එතකොට පූජකයා කිව්වා එයා කියෙව්වේ දෙවියන්ගේ සත්‍ය වදන් තියෙන බයිබලෙන් කියලා. බයිබලය කියවන්න මින්ජිට ලොකු ආසාවක් ඇති වුණා. චීන භාෂාවෙන් තිබුණ බ්‍රේල් බයිබලයක් අරගෙන මින්ජි වෙළුම් 32කම මාස 6කින් විතර කියවලා ඉවර කළා. බයිබලේ දිගටම කියවද්දී මින්ජි තේරුම්ගත්තා එයා ගිය පල්ලියේ ත්‍රිත්වය ගැන ඉගැන්නුවත් ඒක වැරදියි කියලා. ඒ වගේම දෙවියන්ට නමක් තියෙනවා, ඒ නම යෙහෝවා කියලත් එයා තේරුම්ගත්තා.

කාලයක් යද්දී එයා ගිය පල්ලියේ අය වැඩ කරපු විදිහ දැකලා මින්ජිට කලකිරුණා. එයා බයිබලෙන් කියවන දේවලට එකඟව නෙමෙයි ඒගොල්ලෝ වැඩ කරන්නේ කියලා එයාට තේරුණා. එයාලා කෑම බෙදද්දී අනිත් හැමෝටම එදා උයපු කෑම දුන්නාට අන්ධ අයට දුන්නේ ඉතුරු වුණ කෑම. ඒ වගේ අසාධාරණකම් නිසා මින්ජිට දැනුණේ ලොකු දුකක්. එයා හිටපු පැත්තේ තිබුණ වෙනත් පල්ලි ගැන එයා හොයන්න පටන්ගත්තා. ඒ නිසා තමයි දෙවියන් පිළිගන්න සභාව හොයාගන්න එයාට උදව් කරන්න කියලා මින්ජි යාච්ඤා කරලා තිබුණේ.

යන්මෙ එයාට පෙන්නපු සැලකිල්ල නිසා මින්ජි එයාත් එක්ක බයිබලය පාඩම් කරන්න කැමති වුණා. යෙහෝවා දෙවිගේ සාක්ෂිකරුවන්ගේ රැස්වීමකට ගිය මුල්ම දවස ගැන මින්ජි මෙහෙම කියනවා. “ඒ දවස මට කවදාවත් අමතක වෙන්නේ නෑ. සහෝදර සහෝදරියන් හැමෝම මාව ආදරෙන් පිළිගත්තා. මං අන්ධ කෙනෙක් වුණත් කිසිම වෙනසක් නැතුව එයාලා මට ආදරෙන් සලකපු විදිහ මට දැනුණා.”

මින්ජි බයිබල් පාඩම හොඳින් කරගෙන ගියා. එයා හැම සතියකම වගේ රැස්වීම්වලට එන්නත් පටන්ගත්තා. රැස්වීම්වලදී එයා ආසම දේ තමයි ගීතිකා කියන එක. ඒත් එයා කියවපු බ්‍රේල් භාෂාවෙන් ගීතිකා පොත තිබුණේ නැති නිසා ගීතිකා කියන එක එයාට ටිකක් අමාරු වුණා. ඒ නිසා සභාවේ අයගෙත් උදව්වෙන් මින්ජි ගීතිකා 151කම බ්‍රේල් භාෂාවට පිටපත් කළා. ඒක කරන්න එයාට පැය 22ක් ගියා. 2018 අප්‍රියෙල් මාසේ ඉඳන් මින්ජි සභාවත් එක්ක එකතු වෙලා දේශනා සේවයේ යන්න පටන්ගත්තා. එයා මාසෙකට පැය 30ක් විතර සේවයේ හවුල් වුණා.

පොතක් බ්‍රේල් භාෂාවට පිටපත් කරන්න ගොඩක් මහන්සි වෙන්න ඕනේ

බව්තීස්මයට සූදානම් වෙන්න මින්ජිට උදව් කරන්න යන්මෙ ‘යෙහෝවා දෙවිගේ කැමැත්ත කරන්න සංවිධානය වූ සෙනඟක්’ කියන පොතේ බව්තීස්ම වෙන අය සඳහා තියෙන ප්‍රශ්න සහ බයිබල් පද රෙකෝඩ් කළා. 2018 ජූලි මාසේදී මින්ජි බව්තීස්ම වුණා. එයා මෙහෙම කියනවා. “ඒ සමුළුවේදී සහෝදර සහෝදරියන් මට පෙන්නපු ආදරේ මට දැනුණා. දෙවියන් පිළිගන්න සභාවේ ඉන්න මටත් අවස්ථාව ලැබුණානේ කියලා හිතද්දී මගේ ඇස්වලට කඳුළු ආවා.” (යොහන් 13:34, 35) මින්ජිට ඕනෙ එයාට ලැබුණ ආදරේ අනිත් අයටත් පෙන්නන්නයි. ඒ නිසා එයා දැන් පූර්ණකාලීනව සේවය කරනවා.

^ 1 ඡේ. නම් වෙනස් කර ඇත.