Skip to content

යොවුන් සිතේ ගැටලු

යාච්ඤා කරන්න ඕනෙ ඇයි?

යාච්ඤා කරන්න ඕනෙ ඇයි?

ඇමරිකාවේ පවත්වපු සමීක්ෂණයකට අනුව ඇමරිකානු යෞවන දරුවන්ගෙන් 80%ක් දෙවියන්ට යාච්ඤා කරනවා කියලා හොයාගත්තා. හැබැයි හැමදාම යාච්ඤා කරන්නේ ඒ අයගෙන් බාගයයි. යාච්ඤාව කියන්නේ අපිට මානසික සුවයක් දෙන දෙයක් විතරද? නැත්නම් ඒකෙන් ඊටත් වඩා දෙයක් වෙනවාද?

 යාච්ඤාව කියන්නේ මොකක්ද?

යාච්ඤාව කියන්නේ මුළු විශ්වයේම නිර්මාතෘ එක්ක කරන කතාබහකටයි. යෙහෝවා දෙවියන් මිනිසුන්ට වඩා හැම අතින්ම උසස්. ඒත් ඔහු ‘අපෙන් දුරස්ව ඉන්න කෙනෙක් නෙවෙයි.’ (ක්‍රියා 17:27) බයිබලයේ දෙවියන් මිනිසුන්ට මේ වගේ ආරාධනාවකුත් කරලා තියෙනවා. “දෙවිට ළං වන්න. එවිට ඔහු ඔබට ළං වෙයි.” (යාකොබ් 4:8) යාච්ඤාව කියන්නේ මොන තරම් වටින දෙයක්ද!

දෙවියන්ට ළං වෙන්න පුළුවන් කොහොමද?

  • යාච්ඤා කරලා දෙවියන්ට ළං වෙන්න පුළුවන්. ඒ මාර්ගයෙන් තමයි ඔයාට දෙවියන් එක්ක කතා කරන්න පුළුවන් වෙන්නේ.

  • බයිබලය අධ්‍යයනය කරන එකෙනුත් දෙවියන්ට ළං වෙන්න පුළුවන්. ඒ මාර්ගයෙන් තමයි දෙවියන් ඔයාට කතා කරන්නේ.

ඔයා යාච්ඤා කරලා බයිබලය අධ්‍යයනය කළොත් යෙහෝවා දෙවියන්ට ළං වෙලා ඔහුගේ කිට්ටු යාළුවෙක් වෙන්න ඔයාට පුළුවන් වෙයි.

“යෙහෝවා දෙවියන් කියන්නේ විශ්වයේ ඉන්න උසස්ම කෙනා. ඔහුත් එක්ක කතා කරන්න ලැබිලා තියෙන එක අපිට ලැබුණු වටිනාම වරප්‍රසාදයක්.”—ජෙරමි.

“මගේ හිතේ තියෙන හැම දෙයක්ම මං යෙහෝවා දෙවියන්ට කියද්දී මට දැනෙන්නේ යෙහෝවා දෙවියන් මට කිට්ටුවෙන්ම ඉන්න කෙනෙක් වගෙයි.”—මිරැන්ඩා.

 දෙවියන් මගේ යාච්ඤා අහනවාද?

දෙවියන් ගැන ඔයාට විශ්වාසයක් තිබුණත් ඔහුට ඔයා යාච්ඤා කෙරුවත් දෙවියන් ඔයාගේ යාච්ඤාවලට ඇත්තටම ඇහුම්කන් දෙනවා කියන දේ පිළිගන්න අමාරුයි කියලා හිතෙයි. ඒත් බයිබලයේ යෙහෝවා දෙවියන්ව හඳුන්වන්නේ “යාච්ඤා අසන තැනැත්තාණන්” විදිහටයි. (ගීතාවලිය 65:2) ඒ විතරක් නෙමෙයි දෙවියන් ඔයා ‘ගැන සැලකිලිමත් නිසා’ ඔයාගේ ‘කනස්සල්ලට හේතු වෙන හැම බරක්ම ඔහු පිට තියන්න’ කියලත් බයිබලයේම කියනවා.—1 පේතෘස් 5:7.

හිතන්න දෙයක්: ඔයාගේ කිට්ටු යාළුවන් එක්ක කතා කරන්න ඔයා නිතරම වගේ කාලය හොයාගන්නවාද? එහෙනම් දෙවියන් එක්ක කතා කරන්නත් නිතරම කාලය හොයාගන්න. මොකද බයිබලයේ කියන්නේ “නොකඩවා යාච්ඤා කරන්න” කියලයි. (1 තෙසලෝනික 5:17) ඒ වගේම යාච්ඤා කරද්දී දෙවියන්ගේ නම පාවිච්චි කරන්න අමතක කරන්නත් එපා.—ගීතාවලිය 86:5-7; 88:9.

“යාච්ඤා කරද්දී මං ස්වර්ගයේ ඉන්න මගේ තාත්තාත් එක්කයි කතා කරන්නේ. ඒ නිසා මං හිතේ තියෙන හැම දෙයක්ම බය නැතුව කියනවා.”—මොයිසෙස්.

“මගේ අම්මාත් එක්ක නැත්නම් කිට්ටු යාළුවෙක් එක්ක කතා කරන විදිහටමයි මං යෙහෝවා දෙවියන් එක්ක කතා කරන්නේ. මගේ හිතේ තියෙන හැම දෙයක්ම කියනවා.”—කේරන්.

 මට යාච්ඤා කරන්න පුළුවන් මොන වගේ දේවල් ගැනද?

බයිබලයේ මෙහෙම කියනවා. “යාච්ඤාවෙන් හා කන්නලව්වලින් ඔබේ සියලු ඉල්ලීම් දෙවිට පවසන්න. එමෙන්ම ඔහුට ස්තුති කිරීමටද අමතක නොකරන්න.”—ෆිලිප්පි 4:6.

ඒ කියන්නේ ඔයාට තියෙන ප්‍රශ්නයක් ගැනත් දෙවියන්ට කියන්න පුළුවන්ද? ඔව්. බයිබලයේ කියන්නේ “ඔබේ සියලු බර යෙහෝවා දෙවිට භාර දෙන්න. එවිට ඔහු ඔබව ශක්තිමත් කරන්නේය” කියලයි.—ගීතාවලිය 55:22.

ඔයාට තියෙන ප්‍රශ්න ගැන යෙහෝවා දෙවියන්ට කියන්න අවස්ථාව තිබුණත් ඒවා ගැන විතරක්ම කියන්න එපා. ෂොන්ටෙල් මෙහෙම කියනවා. “යෙහෝවා දෙවියන්ගෙන් උදව් විතරක් ඉල්ලද්දී ඔහුගේ කිට්ටු යාළුවෙක් වෙන්න අමාරුයි. මං හිතන විදිහට, යාච්ඤා කරද්දී අපි මුලින්ම ඔහුට ස්තුති කරන්න ඕනේ. එකක් දෙකක් ගැන විතරක් නෙමෙයි. ඒත් මනසට එන හැම දෙයක් ගැනම ඔහුට ස්තුති කරන්න අපි කාලය ගන්න ඕනේ.”

හිතන්න දෙයක්: ඔයා ස්තුතිවන්ත වෙන්නේ ඔයාට ලැබිලා තියෙන මොන දේවල් ගැනද? ඔයාට පුළුවන්ද අද දවසේ දෙවියන්ට ස්තුතියි කියන්න පුළුවන් දේවල් තුනක් ගැන හිතන්න?

“ලස්සන මලක් වගේ පොඩි දෙයක් ගැන වුණත් යෙහෝවා දෙවියන්ට ස්තුති කරන්න අපිට පුළුවන්.”—අනීටා.

“දෙවියන්ගේ නිර්මාණයක් ගැන හරි ඔයා වැඩියෙන්ම කැමති බයිබල් පදයක් ගැන හරි හිතන්න කාලය ගන්න. ඊටපස්සේ ඒ ගැන යෙහෝවා දෙවියන්ට ස්තුති කරන්න.”—බ්‍රයන්.