Skip to content

බයිබලයේ තියෙන අදහස් ගැටෙනවාද?

බයිබලයේ ඒ ගැන කියන දේ

බයිබලයේ තියෙන අදහස් කොහොමටවත් ගැටෙන්නේ නැහැ. බයිබලයේ සමහර කොටස් ගැටෙනවා කියලා හැඟෙනවා නම් පහත තියෙන කරුණක් හෝ කරුණු කීපයක් අදාළ කරගෙන ඒ කොටස් නිවැරදිව තේරුම්ගන්න පුළුවන්.

  1. කොටසට අදාළ අවට පද කියවලා බලන්න. කවුරු හරි ලේඛකයෙක් ලියපු දේකින් යම් වචන කීපයක් විතරක් ගත්තොත් ඔහුගේ අදහස් එකිනෙකට ගැටෙනවා කියලා හිතෙන්න පුළුවන්.

  2. ලේඛකයා බලන කෝණය තේරුම්ගන්න. යම් සිද්ධියක් ඇසින් දුටු අය ඒ සිද්ධිය නිවැරදිව වාර්තා කළත් ඔවුන් හැම කෙනාම එකම වචන හෝ එකම තොරතුරු කියන්නේ නැහැ.

  3. ඓතිහාසික තොරතුරු සහ චාරිත්‍ර වාරිත්‍ර සලකලා බලන්න.

  4. යම් වචනයක් පාවිච්චි කරලා තියෙන්නේ ඒ වචනයේ අදහස ඒ විදිහටම ගන්නද නැත්නම් සංකේතමය අර්ථයක් දෙන්නද කියලා හඳුනගන්න.

  5. කෙනෙක් යම් දෙයක් කළා කියලා කියද්දී, එයාගේ මූලිකත්වය යටතේ වෙන අය ඒක කළා වෙන්නත් පුළුවන්. *

  6. නිවැරදි බයිබල් පරිවර්තනයක් පාවිච්චි කරන්න.

  7. වැරදි ආගමික ඉගැන්වීම් සමඟ බයිබලයේ අදහස් ගළපන්න උත්සාහ කිරීමෙන් වළකින්න.

ඉහත සඳහන් කළ කරුණු 7 යොදාගෙන බයිබලයේ ඇති අදහස්වල ගැටීමක් තිබෙනවා කියලා පෙනෙන්න තියෙන තැන් නිවැරදිව තේරුම්ගන්න පුළුවන් කොහොමද කියලා බලමු.

1වෙනි කරුණ: අවට පද කියවන්න

දෙවියන් හත්වෙනි දවසේ විවේක ගත්තා නම් ඔහු දිගටම වැඩ කරමින් ඉන්නවා කියන්නේ කොහොමද? “හත්වන දවසේ සිට ඔහු ඒ සියලු වැඩවලින් විවේක ගත්තේය” කියලා බයිබලයේ උත්පත්ති පොතේ සඳහන් වෙනවා. (උත්පත්ති 2:2) නමුත් යේසුස් කිව්වා “මගේ පියාණන් මේ දක්වා වැඩ කරමින් සිටිනවා” කියලා. (යොහන් 5:17) උත්පත්ති පොතේ දෙවියන් විවේක ගත්තා කියන එකෙන් අදහස්වෙන්නේ ඔහු මේ පොළොවත් ඒකේ තියෙන භෞතික දේවලුත් නිර්මාණය කිරීමෙන් විවේක ගත්තා කියන එකයි. අවට පද කියවද්දී ඒක පැහැදිලි වෙනවා. (උත්පත්ති 2:3, 4) නමුත් ‘මගේ පියාණන් වැඩ කරමින් ඉන්නවා’ කියන එකෙන් යේසුස් අදහස් කළේ දෙවියන් කළ නිර්මාණ ගැන නෙමෙයි වෙනත් වැඩ ගැනයි. ඒ වැඩවලට ඔහුගේ බලය දීලා මිනිසුන් ලවා බයිබලය ලියන්න සැලැස්වීම, ඔහුගේ මඟ පෙන්වීම් හා ආරක්ෂාව මිනිසුන්ට දීම වගේ දේවල් ඇතුළත් වෙනවා.—ගීතාවලිය 20:6; 105:5; 2 පේතෘස් 1:21.

2වෙනි හා 3වෙනි කරුණ: ලේඛකයා බලන කෝණය සහ ඓතිහාසික තොරතුරු

යේසුස් අන්ධ මිනිසාව සුව කළේ කොහෙදිද? ලූක් පොතේ කියන්නේ යේසුස් අන්ධ මිනිසෙක්ව “යෙරිකෝවට ළඟා වෙද්දී” සුව කළා කියලයි. නමුත් මතෙව් පොතේ කියන්නේ යේසුස් අන්ධ මිනිසුන් දෙදෙනෙක්ව “යෙරිකෝවෙන් පිටත්ව යද්දී” සුව කළා කියලයි. (ලූක් 18:35-43; මතෙව් 20:29-34) මේ වාර්තා ලිව්ව ලේඛකයන් දෙන්නා එකම සිද්ධිය කෝණ දෙකකින් විස්තර කරලා තියෙනවා. ඇත්තටම වාර්තා දෙකම කියවද්දී සම්පූර්ණ චිත්‍රය දකින්න පුළුවන්. මිනිසුන් දෙදෙනෙක් හිටියා කියලා මතෙව් නිශ්චිතව සඳහන් කරද්දී ලූක් වැඩි අවධානයක් දීලා තියෙන්නේ යේසුස් එක්ක සංවාදයක් පැවැත්තුව තැනැත්තාටයි. යේසුස්ගේ කාලයේදී යෙරිකෝව නමින් නගර දෙකක් තිබුණා. එකක් යුදෙව්වන්ගේ පැරණි යෙරිකෝ නගරය වූ අතර අනික ඊට කිලෝමීටර් එකහමාරක් විතර ඈතින් තිබුණු රෝමවරුන් හදපු අලුත් යෙරිකෝ නගරයයි. යේසුස් ඒ ආශ්චර්යය සිදු කළේ එම නගර දෙක අතරමැද හිටිය අවස්ථාවකදී වෙන්න ඇති.

4වෙනි කරුණ: වචනයේ අදහස සහ සංකේතමය අදහස

පොළොව විනාශ වෙයිද? දේශනාකාරයා 1:4 “පොළොව සදහටම පවතියි” කියලා සඳහන් වුණත් “පොළොව ද එහි ඇති සියල්ල ද දැවී විනාශ වී යන්නේ ය” කියලා තවත් තැනක සඳහන් වෙන නිසා අදහස් එකිනෙකට ගැටෙන බවක් පෙනෙනවා. (2 පේතෘස් 3:10, ‘නව අනුවාදය’) බයිබලයේ සඳහන් “පොළොව” යන වචනය පෘථිවි ග්‍රහයාව හඳුන්වන්නත් මිහිපිට ජීවත් වෙන මිනිසුන්ව හඳුන්වන්නත් යොදාගෙන තියෙනවා. (උත්පත්ති 1:1; 11:1) ඒ නිසා 2 පේතෘස් 3:10 “පොළොව” විනාශ වෙනවා කීමෙන් අදහස් වෙන්නේ “දෙවිට කිසි ගෞරවයක් නොදක්වන මිනිසුන්ගේ විනාශය” මිස අපේ පෘථිවි ග්‍රහයා දැවී අළු වෙලා යනවා කියන එක නෙමෙයි.—2 පේතෘස් 3:7.

5වෙනි කරුණ: කෙනෙක්ගේ මූලිකත්වයෙන්

කපර්ණවුමේදී හමුදා නිලධාරියාගේ පණිවිඩය යේසුස්ට දැන්නුවේ කවුද? මතෙව් 8:5, 6 කියන්නේ හමුදා නිලධාරියාම යේසුස්ට ඒ පණිවිඩය දැන්නුවා කියලයි. ඒත් ලූක් 7:3 කියන්නේ හමුදා නිලධාරියා යුදෙව් වැඩිමහල්ලන් අත ඔහුගේ පණිවිඩය යැව්වා කියලයි. ඇත්තටම සිදු වුණේ යුදෙව් වැඩිමහල්ලන් ඒ පණිවිඩය යේසුස්ට දැනුම් දීමයි. නමුත් එය සිදු වුණේ හමුදා නිලධාරියාගේ මූලිකත්වයෙන් නිසා ඔහුම එය සිදු කළා කියලා මතෙව් වාර්තා කරනවා.

6වෙනි කරුණ: නිවැරදි පරිවර්තනය

අපි හැමෝම පව් කරනවාද? මුල් මිනිසා වූ ආදම්ගෙන් අපි හැමෝටම පව්කාර ස්වභාවය උරුම වෙලා තියෙනවා කියලා බයිබලයේ කියනවා. (රෝම 5:12) නමුත් 1 යොහන් 3:6 සමහර බයිබල් පරිවර්තනවල සඳහන් වෙන්නේ හොඳ අය පව් කරන්නේ නැහැ කියලයි. හැබැයි මුල් ග්‍රීක භාෂාවෙන් 1 යොහන් 3:6 පව් කරන්නේ නැහැ කියන ක්‍රියා පදය සඳහන් වෙන්නේ වර්තමාන කාලයෙනුයි. වර්තමාන කාලයෙන් ලියද්දී අදහස් වෙන්නේ යමක් දිගටම කරනවා කියලයි. ඒ අනුව එම පදයේ කතා කරන්නේ අපිට උරුම වෙලා තියෙන පව්කාර ස්වභාවය ගැන නොව හිතාමතාම දෙවිගේ නීති කඩ කරමින් පව් කිරීම ගැනයි. එමනිසා සමහර බයිබල් පරිවර්තනවල එම අදහස ‘පාපයේ නියැලෙන්නේ නැහැ’ (‘ශුද්ධ බයිබලය නව ලොව පරිවර්තනය’) කියලා හෝ “පුරුද්දක් ලෙස පව් කරන්නේ නැහැ” (Phillips) කියලා සඳහන් කරලා තියෙනවා. බයිබලයේ තියෙන අදහස්වල ගැටීමක් නැහැ කියලා ඒකෙන් තේරුම්ගන්න පුළුවන්.

7වෙනි කරුණ: බයිබලයේ තියෙන අදහස් එක්ක වැරදි ආගමික ඉගැන්වීම් ගළපන්න එපා

යේසුස් දෙවියන්ට සමානද නැද්ද? යේසුස් එක අවස්ථාවක මෙහෙම කිව්වා. ‘මාත් මාගේ පියාණන් වහන්සේත් එකමය.’ නමුත් ‘පියාණන් වහන්සේ මට වඩා උතුම්ය’ කියලා තවත් තැනක කියන නිසා අදහස් ගැටෙන බවක් පෙනෙන්න තිබෙනවා. (යොහන් 10:30; 14:28, ‘නව අනුවාදය’) ඒ බයිබල් පද දෙක පැහැදිලි කරගන්න නම් මුලින්ම යෙහෝවා දෙවියන් සහ යේසුස් ගැන බයිබලයේ කියන්නේ මොනවාද කියලා හොයලා බලන්න. ඒත් බයිබල් පදනමක් නැති ත්‍රිත්වය කියන ඉගැන්වීමට ඒ පද ගළපන්න උත්සාහ කරන්න එපා. යෙහෝවා දෙවියන්, යේසුස්ගේ පියාණන් විතරක් නෙමෙයි යේසුස් නමස්කාර කරන ඔහුගේ දෙවියන් කියලත් බයිබලයේ පෙන්වනවා. (මතෙව් 4:10; මාක් 15:34; යොහන් 17:3; 20:17; 2 කොරින්ති 1:3) එහෙමනම් යේසුස් දෙවියන්ට සමාන නැහැ.

‘මාත් මාගේ පියාණන් වහන්සේත් එකමය’ කියලා යේසුස් කිව්ව දේ තේරුම්ගන්න අවට පද කියවලා බලන්න ඕනේ. ඔහු එහෙම කිව්වේ යෙහෝවා දෙවියන්ගේ එනම් ඔහුගේ පියාණන්ගේ අරමුණට එකඟව ඔහු කටයුතු කරන බව පෙන්වන්නයි. ඊටපස්සේ යේසුස් කිව්වා ‘පියාණන් වහන්සේ මා තුළද මා පියාණන් වහන්සේ තුළද සිටිනවා’ කියලා. (යොහන් 10:38, ‘නව අනුවාදය’) යේසුස්, ඔහුගේ පියාණන්ගේ අරමුණට එකඟව කටයුතු කළා වගේ ඔහුගේ ගෝලයනුත් පියාණන්ගේ අරමුණට එකඟව කටයුතු කරනවා දකින්න යේසුස්ට උවමනා වුණා. ඔහු තම ගෝලයන් ගැන දෙවියන්ට මෙහෙම යාච්ඤා කළේ ඒ නිසයි. ‘අප ඒකත්වයක්ව සිටින්නා සේම ඔවුනුත් ඒකත්වයක් වන පිණිස ඔබ මට දුන් තේජශ්‍රීය මම ඔවුන්ට දුනිමි. මෙසේ කෙළේ මා ඔවුන් තුළද ඔබ මා තුළද සිටීමෙන්, ඔවුන් සම්පූර්ණ ලෙස ඒකත්වයට පැමිණෙන පිණිසත්ය.’—යොහන් 17:22, 23, ‘නව අනුවාදය.’

^ 8 ඡේ. උදාහරණයකට “මෝගල් අධිරාජ්‍යයා වූ ෂා ජහාන් ටජ් මහල හැදුවා” කියලා එක් විශ්වකෝෂයක සඳහන් වෙනවා. නමුත් ඒක හැදුවේ ඔහු නෙමෙයි. ඒ විශ්වකෝෂයේම සඳහන් වෙන්නේ “20,000කට වැඩි සේවක පිරිසක්” ඒක ඉදි කරන්න හවුල් වුණා කියලයි.—Encyclopædia Britannica.