Olole evideo ziriho

Gurhi Abahamirizi ba Yehova Bayigiriza Abantu Ebibliya?

Gurhi Abahamirizi ba Yehova Bayigiriza Abantu Ebibliya?

 Gurhi rhuyigiriza abantu Ebibliya?

 Ifunzo lyawe lyakurhabala ocikomereze Ebibliya omu kukulikira emyanzi eri yaganîrwa. Ifunzo lyajirwa omu njira y’okuganîra kugerera ecitabu Oshagalukire Akalamo Ensiku n‘Amango! lyakurhabala ociyigirize bunyi-bunyi ebi Ebibliya eyigiriza na gurhi yakakurhabala. Ly’ohugûkwa, olole eyi video.

 Ka rhunalipise abantu ensaranga lyo rhubayigiriza?

 Nanga. Rhunakulikire amahano Yezu ahâga abanafunzi bage erhi aderha ntya: “Mwahâbirwe busha, ninyu muhâne busha.” (Mateyo 10:8) Enyigirizo zirhu zirhaba zakulipira, ciru wananahâbwa Ebibliya n’ecitabu Oshagalukire Akalamo Ensiku n’Amango! busha

 Ifunzo lyanajira kasanzi kanganaci?

 Ifunzo lyoshi liri lya masomo 60. Wene wakacishoga gurhi osimire okuyiga. Banafunzi banji basima okucifunza isomo liguma ngasi mugobe.

 Gurhi nakaciyandikisa lyo nyigirizibwa?

  1.  1. Oyandike ebihunyirwe oku fomu y’oku enternete. Rhunakolese emyanzi wayandisire kw’eyo fomu lyo rhulonza omuntu wakakuyigiriza Ebibliya.

  2.  2. Mwalimu anakuhamagala erhi kukuyandikira. Akuyeresa gurhi ifunzo ly’enganîro lijirwa n’okushuza oku madosa gawe.

  3.  3. Mwanajira omupango haguma na mwalimu wawe. Ifunzo lyanajirirwa aha mwawe, handi-handi hantu, oku telefone, kugerera e appel video, kugera amaruba erhi kugerera e mesaje (mail). Kanji-kanji ifunzo lyanajira nsa nguma, cikoki lyanahwa duba erhi lijire kasanzi kanji nk’oku akasanzi kawe kanali.

 Ka nanajira ifunzo ly’okulola gurhi biba kone?

 Neci. Wanayandika ebihunyirwe oku fomu y’oku enternete. Amango mwaganîra na mwalimu omubwire oku olonzize okujira ifunzo ly’okulola gurhi biba kone ly’omanya erhi wanasimisibwa. Ly’obona gurhi ifunzo lijirwa, wanakolesa e broshuwa Oshagalukire Akalamo Ensiku n‘Amango! erimo masoma asharhu marhanzi g’ecitabu.

 Erhi nakayemera ifunzo, ka bananseza kuhika mbe Muhamirizi wa Yehova?

 Nanga. Bwenene Abahamirizi ba Yehova bazigira okuyigiriza abantu Ebibliya, cikoki barhaseza ndi abe Muhamirizi wa Yehova. N’obukenge, banacihangane okuyerekana ebi Ebibliya eyigiriza, banaba bamanyire oku ngasi muntu agwerhe oluhûma lw’okucishoga.—1 Petro 3:15.

 Ka nanakolesa Ebibliya yani?

 Neci, wanakolesa Ebibliya onasimire. Ciru akaba Abahamirizi ba Yehova banashagalukire Ebibliya Tafsiri ya Ulimwengu Mupya, bulya eba mw’enderho nembu okuhugûkwa na z’okunali, bayishi oku bantu banji banashagalukire okukolesa empindûlo y’Ebibliya bakomerire.

 Ka nanayegereza abandi bantu bacilunge haguma nani okw’ifunzo?

 Neci. Wanayegereza omuntu w’omulala erhi mwîra acilunge haguma nawe.

 Erhi akaba narhanziriyiga haguma n’Abahamirizi ba Yehova, ka nanacibigalukira ifunzo?

 Neci. Ciru wanacibishagalukira eprograme mpyahya y’okuciyigiriza Ebibliya bulya epatine n’amalagirire g’abantu ba zino nsiku zirhu. Ifunzo liri linja na lyakushagalusa abantu kulusha eprograme y’embere.

 Nka ndozize okuyiga buzira mwalimu, bulyo buci mwahizire ho ly’oko kuhashikana?

 Neci. Ciru akaba hali abanafunzi baciyigiriza kugerera oburhabale bwa mwalimu mulebe, banji bashagalukira okuciyigiriza bonene. Ecisanduku Ebikolanwa by’Okuyiga Ebibliya ciyerekine ebikolanwa wakaba nabyo buzira kuhâna nsaranga ly’oyiga Ebibliya. Halaga biguma bya muli ebyo bikolanwa byakakurhabala:

  •   Okuciyigiriza Amasomo g’Ebibliya oku Enternete. Ehânyire amakanuni g’obulagirire omu kalamo ka ngasi lusiku, kwa lwiganyo: Nnâmahanga ye ndi? Bulya gurhi amalibûko n’obubi biri binji? Ka Nnâmahanga Anaciyuse Amalibûko

  •   Video z’Ebibliya. Ezo video nyofofi z’okuyigiriza zishuzize oku madoso g’Ebibliya gw’omusingi.

  •   Amashuzo g’Amadoso g’Ebibliya. Ogu mwanzi gushuzize oku madoso manji lugenda Ebibliya.

  •   Amahugûlo g’Amandiko g’Ebibliya. Obone amahugûlo ga mandiko maguma na maguma erhi enderho ndebe z’Ebibliya k’okuderha gurhi.