Olole evideo ziriho

Olole emyanzi erimwo

 ISOMO LYA 12

Gurhi wankajira ly’oyegera Nnamahanga?

Gurhi wankajira ly’oyegera Nnamahanga?

1. Ka Nnamahanga anayumvirhize amasala goshi?

Nnamahanga alonzize abantu ba ngasi lubero bamuyegere kugerera oku isala. (Ennanga 65:3) Cikwone, Nnamahanga arhayumvirhiza, erhi kuyemera, ngasi isala. Rhurhole olwiganyo: Omulume olibuza mukage ciru ankasala gurhi Nnamahanga arhankamuyumva. (1 Petro 3:7) N’omu mango gamira erhi Abaisraheli bankabire bali bajira amabi, Nnamahanga akazigilahira okuyumvirhiza amasala gabo. Biyumvikine n’obwalagale oku isala karhali kantu ka busha busha. Cikwone, ciru wankajira caha cici, erhi wankaciyunjuza kobinali Nnamahanga anayumva isala lyawe.​—Osome Izaya 1:15; 55:7.

Oyerekane evideyo edesire Ka Nnamahanga Anayumvirhize Amasala Goshi?

2. Gurhi okwanine osale?

Isala eri njira nguma y’okuharamya. Muli ntyo, rhugwasirwe okusala Lulema wirhu yene, Yehova. (Mateyo 4:10; 6:9) Cikwone, bulya rhurhali bashinganyanya, rhukwanine rhugereze amasala girhu okw’izino lya Yesu bulya ye wafirire ebyaha birhu. (Yowane 14:6) Nkarhuli rhwasala, Yehova arhasima rhuje rhwagalukira enderho rhwabisire omu irhwe erhi eziyandisirwe omu citabu c’amasala. Asim’isala lirhenzire omu murhima gwa ngasi muntu.​—Osome Mateyo 6:7; Abafilipi 4:6, 7.

Omulemi wirhu anayumvirhize ciru n’amasala g’amahwe, g’omu murhima. (1 Samweli 1:12, 13) Arhuhunyire rhusale ngasi mango, kwa lwiganyo sezi na bijingo, amango g’okulya na ngasi mango rhuli embere z’amadarhi.​—Osome Ennanga 55:23; Mateyo 15:36.

3. Bici birhuma Abakristu barhimanana haguma?

Kurhali kulembu akuyegera Yehova bulya rhuli omu bantu barhayemiri Yehova banali bagayaguza eciragane cage c’okulerha omurhula han’igulu. (2 Timoteyo 3:1, 4; 2 Petro  3:3, 13) Co cirhuma rhuba rhulagirire okurhimanana haguma na bene wirhu, bulya rhunahebane omurhima omunda.​—Osome Abahabraniya 10:24, 25.

Okurhimanana n’abantu basima Nnamahanga kunarhurhabale rhuyegere larha Wirhu. Nantyo entimanano z’Abahamirizi ba Yehova zinarhuyushulire emisi kugerera oku buyemere bwa bene wirhu.​—Osome Abaroma 1:11, 12.

4. Gurhi wankajira ly’oyegera Nnamahanga?

Wanayegera Nnamahanga omu kurhimanya bwenene kw’ebi oli wayiga omu Bibliya. Okarhimanya oku mikolo, amahano gage, n’ebi arhulaganyize. Oko kurhimanya n’isala byanakurhabala obone oku Nnamahanga ali wa buzire, na kandi agwerhe obwenge bunji.​—Osome Yozwe 1:8; Ennanga 1:1-3.

Okaba n’obuyemere, okanacikubagira Nnamahanga, wamuyegera. Cikone, omanye oku obuyemere ko buli nka murhi, lyo omurhi gukula, gulagirire oku mishi. Obuyemere nabwo, bikuhunyire obulise omu kusoma Akanwa ka Nnamahanga, n’okugerereza kw’ebi oyemire na bici birhumire obiyemire.​—Osome Mateyo 4:4; Abahabraniya 11:1, 6.

5. Bunguke buci wankabona erhi wankayegera Nnamahanga?

Yehova anashibirire bwenene abamusima. Anabalange oku mazibu gankashereza obuyemere bwabo, n’amazibu gankarhuma baheza obulangalire bwabo bw’okulama emyaka n’emyaka. (Ennanga 91:1, 2, 7-10) Anarhuhanule lyo rhucilanga oku bijiro byankashereza amagala girhu, n’ebyankarhuma rhwaheza omwishingo gwirhu. Kobinali, Yehova anarhuyigirize gurhi rhwankajira lyo rhubona akalamo kinja.​—Osome Ennanga 73:27, 28; Yakobo 4:4, 8.