Olole evideo ziriho

Olole emyanzi erimwo

 ISOMO LYA 3

Ka kobinali omwazi mwinja guba omu Bibliya emwa Nnamahanga gurhenzire?

Ka kobinali omwazi mwinja guba omu Bibliya emwa Nnamahanga gurhenzire?

1. Ngahi Ebibliya yarhengaga?

Ebibliya edesire n’obwalagale oku abantu bayishilama emyaka n’emyaka han’igulu. (Ennanga 37:29) Ebibliya ejijirwe na bitabu binyinyi 66. Nnamahanga akolesize bantu bashinganyanya hofi 40 mpu bayandike ebyo bitabu by’Ebibliya. Ebitabu birhanu birhanzi by’Ebibliya byayandisirwe na Musa, hamagera hofi myaka 3 500. N’ecitabu cizinda c’Ebibliya cayandisirwe n’emtumwa Yowane hamagera myaka kulusha 1 900. Ntimanya zandi abo balume bayandisire? Nnamahanga ajaga ababwira ebi bayandika kugerera oku muka gwage mucese. (2 Samweli 23:2) Bayandika entimanya za Nnamahanga, arhali ntimanya zabo bonene. Ntyo, Ebibliya kali Kanwa ka Nnamahanga ci karhali ka bene bantu.​—Osome 2 Timoteyo 3:16; 2 Petro 1:20, 21.

Oyerekane evideyo edesire Ndi Wayandikisâgya Ebibliya?

2. Bici birhuyemeza oku emyanzi y’Ebibliya eba y’okuli?

Rhumanyire oku Ebibliya yarhengaga emwa Nnamahanga bulya nkayaderha lugenda ebyanacibe, erhanywerha. Nta muntu wankacibwira ebyanacibe oku buhashe bwage yene. (Yozwe 23:14) Nnamahanga Ogala Byosi yene wankamanya embere z’akasanzi ebyanacibe omu nsiku ziri embere n’okubiderha buzira kucirheba.​—Osome Izaya 42:9; 46:10.

Ntacindi citabu cankahika kw’Ebibliya bulya emwa Nnamahanga yarhengaga. Ebibliya eri yagabwa omu magana g’endimi kulusha ebindi bitabu byoshi. Ciru ankaba eri ya mira bwenene, emyanzi emuli enashinganane n’esiyanse. Na kandi, ebi abo bantu 40 bayandisire birhapingana. * N’ebi Ebibliya erhubwira binayerekane obuzigire bunji Nnamahanga ajira kuli rhwe. Na kuhik’ene, Ebibliya ecigwerhe obuhashe bw’okuhindula akalamo k’abantu kabe kinja. Ebyo byoshi binayemeze bantu banji oku Ebibliya kali Kanwa ka Nnamahanga.​—Osome 1 Abatesalonika 2:13.

Oyerekane evideyo edesire Bici Byakarhuyemeza oku Ebibliya Enaderhe Okuli?

 3. Myanzi mici eba omu Bibliya?

Omu myanzi mikulu y’Ebibliya, hali omwanzi mwinja guyerekine oku Nnamahanga w’obuzigire agwerhe omuhigo gw’okujirira abantu ebintu binjinja. Ebibliya eyerekine gurhi ababusi birhu barhanzi barhuhegezagya akalamo kinja omu paradizo na gurhi Nnamahanga acibi rhugalulira eparadizo han’igulu.​—Osome Amafulûlo 21:4, 5.

Omu Bibliya, wanashangamwo amarhegeko, amakanuni, n’amahano ga Nnamahanga, na kandi wanashangamwo eyindi myanzi eyerekine ebi Nnamahanga àjirîre abantu. Eyo myanzi yoshi enarhuyereke oborhere bwa Nnamahanga kuli rhwe. Kuli kuderha oku Ebibliya yanakurhabala omanye Nnamahanga. Yanakuyereka ebi ogwasirwe okujira ly’oba mwira wa Nnamahanga.​—Osome Ennanga 19:8, 12; Yakobo 2:23; 4:8.

4. Gurhi wankajira ly’oyumva n’okumanya Ebibliya?

Ehi hitabu hyakurhabala okuyumva Ebibliya, hikolesize enjira eshushine n’eyi Yezu akazigikolesa omu kuhugula emyanzi y’Ebibliya. Akazigisomera abantu amandiko anabahugulire bwinja “Amândiko.”​—Osome Luka 24:27, 45.

Nta gundi mwanzi gwankakushagalusa nk’omwanzi mwinja kurhenga emwa Nnamahanga. Haligi n’abandi balahira ogo mwanzi, ciru n’abandi barhasima baguyumve ciri n’ehitya. Ci omanye watwik’entege. Bulya, enjira nguma yone yankakurhabala ly’obona akalamo k’ensiku n’amango, kuli kumanya Nnamahanga.​—Osome Yowane 17:3.

 

^ kip. 3 Osome ehitabu Kitabu kwa Ajili ya Watu Wote.