Olole evideo ziriho

Olole emyanzi erimwo

 CIGABI CA 17

Sêra omu Buzigire Bwa Nnamahanga

Sêra omu Buzigire Bwa Nnamahanga

“Musimbane omu bubake buyubasirwe oku ciriba c’obuyemere . . . Munasêre omu buzigire bwa Nnamahanga.”​—YUDA 20, 21.

1, 2. Bici rhwakajira lyo rhusêra omu buzigire bwa Nnamahanga?

Rhusima rhube n’amagala minja rhunabe n’emisi. Co cirhuma rholonza rhulye ebiryo binja, rhujire amazowezi ngasi mango n’okucishibirira. Okujira ntyo kuhunyire bushiru bunji. Cikoki bulya rhumanyire oku okujira ntyo kwanarhulerhera obunguke, rhunacihangane buzira kurhama. Omanyage oku hali eyindi njira rhushinganine rhubemwo n’amagala minja.

2 Rhwaciyigirizize binji kuli Yehova, n’ogo guli murhondêro mwinja. Cikoki, rhushinganine rhugendekere rhwazibuhya obwîra bwirhu haguma naye. Yuda abwizire Abakristu oku “basêre omu buzigire bwa Nnamahanga” anabahugulira gurhi bakajiramwo ntyo. Ababwira erhi: “Musimbane omu bubake buyubasirwe oku ciriba c’obuyemere.” (Yuda 20, 21) Gurhi rhwakabamwo n’obuyemere buzibu?

OGENDEKERE WAZIBUHYA OBUYEMERE BWAWE

3-5. (a) Bici Shetani alonzize orhanye lugenda amakanuni ga Yehova? (b) Gurhi obona amarhegeko n’amakanuni ga Yehova?

3 Kuli kwa bulagirire oyemere n’obwalagale oku nta kandi kantu kinja rhwakaba nako kulusha okurhumikira Yehova.  Shetani alonzize orhanye oku amakanuni ga Nnamahanga gali mazibu okurhumikira. Alonzize orhanye oku wanaba n’obushagaluke bunji kulusha erhi wakacishoga wene ebiri binja n’ebiri bibi. Ntyo kw’alonzâgya ayemeze abantu barhanzi omu bustani bw’e Edeni. (Omurhondêro 3:1-6) Ene kandi agendekire ajira omukolo gwage.

4 Ka Shetani adesire okuli? K’amakanuni ga Yehova gaba mazibu bwenene okurhumikira? Nanga. Orhanye, kwa lwiganyo, ogere omu parke. Ho n’aho, orhinde oku cogo cilîri cihanza abantu barhajaga nafasi nguma z’omo parke. Wanaderha nkaba “bulya gurhi ntayemerirwi okuja mw’eci cogo wani?” Okuciri wacidosa er’idoso, oyumve engwi eyâme mw’eco cogo. Ka wanacicidosa bulya gurhi bakuhanzize oku orhajaga omo? Wanashagaluka bwenene okubona oku eco cogo cakulanzire okurhalibwa na wangwi! Kwo n’oko amakanuni ga Yehova ko ganali nk’eco cogo, na Shetani yeri nka eyo ngwi. Akanwa ka Nmamahanga karhubwizire ntya: “Mulange olugero munabe masu! Omushombanyi winyu Shetani, nka ntale yaluluma, adwirhe azunguluka-zunguluka mpu alonze oyu amira.”​—1 Petro 5:8.

5 Yehova alonzize rhube n’akalamo kinja bwenene. Arhalonzizi rhurhebwe na Shetani. Arhuhîre amarhegeko n’amakanuni lyo garhulanga ganarhulerhere obushagaluke. (Abefezi 6:11) Yakobo ayandîka ntya: ‘Ociseza okumanya irhegeko limâna, lirya irhegeko lijira abantu ba ntagengwa . . . oyo ye wabone iragi omu kushimba irhegeko.’​—Yakobo 1:25.

6. Bici byakarhuyemeza oku ebi Yehova arhuhunyîre biba oku bunguke bwirhu?

6 Erhi rwakajira ebi Yehova arhuhunyîre, akalamo kirhu kanaba kinja n’obwîra bwirhu haguma naye bwanazibuha. Kwa lwiganyo, erhi rhwakakamushenga burhahusa, nk’oku anarhuhire omurhima, rhwanayunguka bwenene. (Mateyo 6:5-8; 1 Abatesalonika 5:17) Erhi rhurhumikira irhegeko  lyage ly’okuja omu ntimanano lyo rhuha abandi omurhima, rhunabe n’obushagaluke. N’erhi rhujira okwirhu koshi lyo rhuja omu mukolo gw’amahubiri n’okuyigiriza abandi, rhunabe n’obushagaluke. (Mateyo 28:19, 20; Abagalasiya 6:2; Abahabraniya 10:24, 25) Erhi rhwakarhanya oku migisho okurhumikira ago marhegeko kwakarhulerhera, rhwanaba n’obuyemere buzibu n’okuhugûkwa oku ebi Yehova arhuhunyîre bibaho oku bunguke bwirhu.

7, 8. Bici byakarhurhabala rhurhayobohaga amazibu gakarhuhikira omu nsiku ziyishire?

7 Hali amango rhwakayoboha oku hanacihikire lusiku luguma rhuje omu kanga kakahira obuyemere bwirhu omu mazibu n’oko kube kuzibu okurhengamwo. Erhi akaba ntyo kw’oli warhanya, okengere ebi Yehova arhubwizire, adesire ntya: “Nie, Yehova Nyamuzinda wawe, nie nkuyigiriza oku bunguke bwawe, nie nkushokolera omu njira ogeramwo. Ociyumvagya amarhegeko gani, singa omurhula gwawe kwo guhulula nka lwishi, n’obushinganyanya bwawe nka mivumba y’omu nyanja.”​—Izaya 48:17, 18NWT.

 8 Erhi rhwakarhumikira Yehova, omurhula gwirhu gwanaba nka lwishi lunene lurhagana, n’obushinganya (olugenzi lwirhu lwinja) bwirhu bwanaba nka mpusi y’omu nyanja, onabone gurhi eyisha yabuganana, eba ho ensiku zoshi. Rhuyumvirhage oku amazibu garhuhikire erhi garharhuhikire, rhwanahasha rhwabêra bishwekerezi kuli Yehova. Ebibliya erhulaganyize erhi: “Amazibu gawe ogahengulire Yehova, wabona oku akurhamûla. Nta mango akaleka omushinganyanya ahirima.”​—Ennanga 55:22NWT.

“RHUJE EMBERE LYO RHUKULA”

9, 10. Okukula kw’okuderha gurhi?

9 Erhi wakazibuhya obwîra bwawe haguma na Yehova, wanahikira aha “waja embere ly’okula.” (Abahabraniya 6:1NWT) Okukula kw’okuderha gurhi?

10 Rhuli Bakristu bw’okuli, rhurhalinda obushosi mpu lyo rhukula. Lyo rhukula, rhukwanine rhujire Yehova abe mwîra wirhu w’okunali n’okubona ebintu nk’oku abibona. (Yowane 4:23) Paolo ayandisîre erhi: ‘Bulya abashomba engeso z’omubiri, bya mubiri bashwira, n’abashimba eb’iroho, biroho bashwira.’ (Abaroma 8:5) Okucishagalula n’okulongereza obuhirhi bw’omubiri, birhakahangayisa omukristu okuzire omu kiroho. Ebi ahira oku nafasi ntanzi omu kalamo kage, kuba kukolera Yehova n’okurhôla emihigo y’obwenge. (Emigani 27:11; osome Yakobo 1:2, 3) Arhayemera muntu mulebe erhi bintu bilebe bimushumye ajire amabi. Okuzire, ayishi emihigo minja ashinganine arhôle.

11, 12. (a) Bici Paolo adesire lugenda “okukomereza obwenge” kw’Omukristu? (b) Ohugûle bulya gurhi rhwakaderha oku okuba Mukristu okuzire kiroho ko kunali nka kula omuntu akahikira ah’aba mushasi mukulu.

11 Bihunyîre obushiru ly’omuntu ahikira okukula. Entumwa Paolo yayandîka ntya: ‘Abantu bakulu bôhe ebiryo byabo biba biryo bizibu, balya bàkomerîze obwenge bwabo  okumanyîrira ecinja n’ecibi.’ (Abahabraniya 5:14) Oluderho “kukomereza” lurhukengezize, gurhi abasharha akabumbu erhi gundi mucezo bajira embere bacisharha, banarhang’icikomereza.

12 Erhi wakabona ebi omushasi mukulu w’akabumbu ahikira ah’ajira, wanahugûkwa oku ly’ahikira aho, byal’imuhunyîre acikomereze buzibu-zibu. Erhi aburhwa arhâli mushasi w’akabumbu, bulya akabonjo karhayish’ikolesa amaboko n’amagulu. Cikoki erhi akasanzi kagera, ako kabonjo kanarhangira kagwarha bintu biguma na biguma, buzinda wanabona ako kabonjo kakola kali kalambagira. Erhi ako kabonjo kakula n’okuba muntu mukulu anahikira ah’akacikomereza omu mucezo mulebe, buzinda anayish’iba mushasi mukulu. Ko nirhu binayosire ntyo, bihunyîre akasanzi lyo rhucikomereza okuba Bakristu bakuzire kiroho.

13. Bici byakarhurhabala rhucikomereze okurhanya aka Yehova?

13 Mw’eci citabu, rhwaganirire gurhi rhwakamanyamwo entanya za Yehova na gurhi rhwakabona ebintu nk’oku abibona. Rhwashubir’iyumva obulagirire bw’anmakanuni ga Yehova, rhwanayizire okugazigira. Irhondo rhukaja omu kanga kahunyîre rhurhôle emihigo, rhukwanine rhucidose ntya: ‘Irhegeko erhi kanuni kahi kakakolesibwa mw’aka kanga? Gurhi nakakolesa er’irhegeko erhi aka kanuni omu kalamo kani? Bici Yehova alonzize njire?’​—Osome Emigani 3:5, 6; Yakobo 1:5.

14. Bici rhwakajira lyo rhuzibuhya obuyemere bwirhu?

14 Rhurhakwanini rhuleke okuzibuhya obuyemere bwirhu muli Yehova. Okulya ebiryo binja kwanarhurhabala rhube n’emisi. Na ntyo kobinayosire lugenda okuba n’emisi y’ekiroho, okuciyigiriza binji kuli Yehova kwanarhurhabala rhube b’obuyemere buzibu. Erhi rhurhondêra rhwaciyigiriza Ebibliya, rhwaciyigirizize okuli kurhangiriza kuli Yehova n’oku arhanya. Cikoki ensiku zoshi, rhushinganine rhuhugûkwe  ebintu bizibu. Ebyo bintu by’entumwa Paolo yalonzagya okuganirira erhi eyandika ntya: “Ebiryo bizibu biba bya bantu bakulu.” Erhi rhwakakakolesa ebi rhuli rhaciyigiriza, rhwanaba n’obwenge. N’oko kwanarhulerhera obunguke, bulya Ebibliya edesire oku “obwenge ko kantu ka bulagirire bwenene.”​—Emigani 4:5-7NWT; 1 Petro 2:2.

15. Bulya gurhi kuli kwa bulagirire rhuzigire Yehova na bene wirhu na bali birhu?

15 Omuntu anahikira aha aba n’amagala minja erhi abe n’emisi, cikoki ly’agendekera aba n’emisi, ashinganine agendekere acishibirira. Ko n’oko lugenda omuntu okuzire kiroho, ahugûsirwe oku ashinganine ajire okwage koshi ly’obwîra bwage haguma na Yehova bugendekera bwazibuha. Paolo arhukengezize ntya: “Mucirhangule mwenene, lyo mumanya erhi muli omu buyemere; mucilabirize ly’omumanya gurhi muyosire.” (2 Abakorinti 13:5NWT) Birhahunyîri rhube n’obuyemere buzibu bone. Obuzigire bwirhu kuli bene wirhu na Yehova bushinganine bugendekere bwaba buzibu. Paolo adesire erhi: ‘Erhi nakaba ngwere . . . obumanye, ciru nakagwarha obuyemere buzibu, bulya bwakahamisa entondo, nka nta buzigire ngwerhe, erhi bunali busha.’​—1 Abakorinti 13:1-3.

OSEGEZE OBUYEMERE BWAWE

16. Bici Shetani aba alonzize rhurhanye?

16 Shetani aba alonzize rhukarhanya mpu ciru rhwakajira gurhi rhurhakasimisa Yehova. Aba alonzize rhuvunike omurhima n’okurhanya mpu amazibu girhu garhakahwa. Arhalonzizi rhulangalire bene wirhu na bali birhu. Arhanalonzizi rhube n’obushagaluke. (Abefezi 2:2) Shetani amanyire oku entanya mbi zanarhujira kubi n’oku zananyihya obwîra bwirhu haguma na Nnamahanga. Cikoki Yehova arhuhîre akantu kw’obulagirre bwenene kakarhuhashisa rhuhagalike ezo ntanya. Arhuhîre obulangalire.

17. Bulya gurhi obulangalire bwirhu buli bwa bulagirire bwenene?

 17 Omu lwandiko lwa 1 Abatesalonika 5:8, Ebibliya eshushanyize obulangalire n’ensirha elanga irhwe ly’omusoda amango ali okw’ivita. Ehamagire eyo nsirha oku “bw’obulangalire bw’obucire.” Okulangalira ebiragane bya Yehova, kwanalanga obwenge bwirhu, na ntyo rhwanahagalika entanya mbi.

18, 19. Gurhi obulangalire bwa Yezu bwamurhabire agendekere alembera?

18 Obulangalire Yezu agwerhe bwamurhabîre abe n’emisi. Obudufu buzinda bw’akalamo kage hanw’igulu, Yezu alembêra mazibu manji. Omwîra wage amulenganya. Owundi mwira wage aderha oku arhamumanyiri. Abandi bîra bage bagajira ikumi n’abirhi erhi bagwarha Yezu lyo barhabagwarhaga haguma naye. Abantu b’omu lugo lwage barhangira bamuhagalika n’okurhondêra baderha oku anigwe anamanikwe oku murhi. Bici byamurhabire alembere ago  malumwa goshi? Ebibliya eshuzize ntya: “Ye wacihanganiraga omurhi gw’amalibuko ahâli h’amasima ankabwine, agayaguza enshonyi zago, na buno akola adamire ebwa kulyo kw’entebe ya Nnamahanga.”​—Abahabraniya 12:2NWT.

19 Yezu al’imanyire oku omu kubêra kwage mwishwekerezi ashagalula Ishe n’okuyerekana oku Shetani ali munywesi. Obo bulangalire bwakamulerhêra bushagaluke bunji. Al’imanyire oku omu nsiku nsungunu ashubira hw’Ishe empingu. Obo bulangalire nabo bwamurhabala agendekere alembera amalumwa. Aka Yezu, Rhukwanine rhusegeze entanya zirhu oku bulangalire rhugwerhe. Oko kwanarhurhabala rhukendekere rhwalembera ciru bici byakaba.

20. Bici byakurhabala ogendekere waba n’entanya nyinja?

20 Yehova agendekire abona obuyemere bwawe na kunganaci oli walembera amazibu. (Izaya 30:18; osome Malakiya 3:10) Akulaganyize oku “akuha ngasi kantu omurhima gwawe gulagirirekwo.” (Ennanga 37:4NWT) Ocihangane  osegeze entanya zawe oku bulangalire. Shetani alonzize oheze obulangalire n’okurhanya mpu ebiragane bya Yehova birhakahikirira ciru n’olusiku luguma. Cikoki okengere oku kuli kwabulagirire ohagalike entanya mbi! Erhi wakabona oku obulangalire bwawe bukola buli mw’omuzimya, salira Yehova akurhabale. Okengere ebi binwa bya Abafilipi 4:6, 7, bidesire ntya: “Murharhindibukaga na cici; ci omu ngasi bulagirire musengere Nnamahanga, mumushenge, munamuvuge omunkwa. Ntyo omurhûla gwa Nnamahanga gulushire ngasi nkengero gwalanga emirhima yinyu n’obukengere bwinyu muli Kristu Yezu.”

21, 22. (a) Omuhigo gwa Yehova okw’igulu guba guhi? (b) Bici ohizire okujira?

21 Ocihe akasanzi kw’okurhanya lusiku oku lundi oku bintu binja biri byarhulinga omu nsiku ziyishire. Aha hofi-hofi, abantu boshi bayish’ikaharamya Yehova. (Amafulûlo 7:9, 14) Orhanye gurhi akalamo kayish’iba omw’igulu lihyahya. Lyayish’iba linja bwenene kulusha ebi rhwakarhanya! Shetani n’abazimu bage haguma na banyankola maligo basherezibwa. Orhakacilwala orhakanacifâ. Wayish’ikazuka ngasi sezi erhi onashagalukire akalamo. Abantu boshi bayish’ikakola haguma lyo bajira igulu lyoshi libe paradizo. Abantu boshi bayish’ikalya ebiryo binja bwenene na ngasi muntu ayish’iba n’enyumpa nyinja. Abantu bayish’ilama omu murhula bulya harhakaciba bantu baminya. Abantu boshi bayish’ilama omo bayish’ikakolerana ebintu binja. Aha buzinda abantu boshi bayish’iba “n’oluhûma lw’irenge ly’abana ba Nnamahanga.”​—Abaroma 8:21NWT.

22 Yehova aba alonzize omujire mwîra wage w’okuli. Ojirage okwawe koshi ly’omurhumikira onamuyegere bwenene ngasi lusiku. Ngasi muguma wirhu asêre omu buzigire bwa Nnamahanga emyaka n’emyaka!​—Yuda 21.