Olole evideo ziriho

Olole emyanzi erimwo

 CIGABI CA 11

Bulya gurhi hali malibûko manji?

Bulya gurhi hali malibûko manji?

1, 2. Idoso lihi bantu banji balug’icidosa?

LUGO luguma lwahêkwa na kalemera. Mulume muguma âja omu kanisa erhi anayambalire okw’ibunduki: ashurha-shurha amasoro; ayîrha bantu banji n’abandi bayagalika. Mukazi muguma alwâla akafinjo/kanseri, n’ako kafinjo kwokanamuyisîre: asiga nfuzi irhanu.

2 Erhi amahanya gahikira abantu, banac’idose ntya: “Bulya gurhi igulu liyunjwire enshombo n’amalibûko?” Ka nawe, okola ocidosize elyo idoso?

3, 4. (a) Madoso gahi Habakuki adosâgya Yehova? (b) Gurhi Yehova amushuzîze?

3 Ebibliya eganirire bantu banji bâl’igwerhe obuyemere muli Nnamahanga, cikoki nabo bakâg’icidosa elyola idoso. Kwa lwiganyo, omulebi Habakuki adôsa Yehova ntya: “Carhuma wanyereka obulyalya, ogal’ilolereza obubisha/obubi? Ntacidwirh’inabona oburhali buhagwe n’akamene. Ekola ntambala n’enongwe byone bigandazize.”​—Habakuki 1:3NWT.

4 Omu Habakuki 2:2, 3, Nnamahanga amûha ishuzo anamulagânya oku ayusa ebyo byoshi. Yehova aba azigire abantu bwenene. Ebibliya edesire ntya: “Kushibirira ayorha ammushibirira.” (1 Petro 5:7) Nnamahanga ye gaya bwenene kurhulusha erhi abona abantu bali balibûka. (Izaya 55:8, 9) Cikwone bulya gurhi hali malibûko manji?

 BULYA GURHI HALI MALIBÛKO MANJI?

5. (a) Gurhi abigiriza b’amadîni baderha okubiyerekire amalibûko? (b) Bici Ebibliya erhuyigirizize okubiyerekire amalibûko?

5 Kanji kanji, erhi omuntu akaba ali alibûka, abigiriza n’abakulu b’amadîni banaderhe oku obo “buli bulonza bwa Nnamahanga.” Kandi banaderhe oku Nnamahanga ye rheganya byoshi bihikira omuntu ciru n’obuhanya n’oku omuntu arhamanya bulya gurhi. N’erhi omuntu mukulu erhi omwana akafâ banaderhe mpu Nnamahanga olonzize aj’ilama haguma naye empingu. Cikoki banakanywerha. Arhali Yehova ye lerha amahanya. Ebibliya edesire oku Nnamahanga arhaba nkola-maligo erhi mulenzi.​—Ayubu 34:10.

6. Bulya gurhi bantu banji banakaderha mpu Nnamahanga ye lerha amalibûko?

6 Bantu banji banaderhe oku Nnamahanga ye lerha amalibûko. Bulya gurhi baderha ntyo? Bulya banarhanye mpu Nnamahanga ye murhegesi w’igulu. Cikoki omu cigabi ca 3, rhwayizîre oku Shetani ye murhegesi w’igulu.

7, 8. Bulya gurhi igulu liyunjwiremwo amalibûko?

7 Ebibliya edesire ntya: “igulu lyoshi liri omu buhashe bw’Omubi.” (1 Yowane 5:19) Shetani, ye murhegesi w’igulu, aba munizi. ‘Anakarheba (kuhabula) igulu lyoshi.’ (Amafulûlo 12:9) Bantu banji bayizîre engeso zage. Co cirhumire igulu liyunjwiremwo obunywesi, enshombo n’amaligo.

8 Haligi ebindi birhumire igulu liyunjwiremwo amalibûko. Adamu na Eva bagomêra Nnamahanga banayahukiza iburha lyabo ecaha. Eco caha co cirhuma abantu balibuza ababo. Kanji kanji banakalonza barhegeke ababo. Abantu bal’ibalwisanya, bal’ibajirirana amabi, n’okulerha amavita. (Omuhanûzi 4:1; 8:9) Okubundi,  amalibûko galug’ilerhwa “n’akasanzi karhâli karheganye.” (Omuhanûzi 9:11NWT) Omukuba omuntu ali ahantu habi n’omu kasanzi kabi anagwarhwa n’obuhanya.

9. Bulya gurhi rhwakayemera n’obwalagale oku Yehova agwerhe ecirhumire cinja c’okulekerera amalibûko?

9 Arhali Yehova ye lerha amalibûko. Arhali ye lerha ivita, obunizi n’obushumusi. Arhali ye lerha amahanya; kalemera, omusisi gw’idaho, kalaba/mulaba. Cikoki nkaba onacidose ntya: “Ci Yehova ye muntu w’obuhashe boshi, bulya gurhi alekerire aga malibûko goshi?” Rhumanyire oku Nnamahanga arhuzigira bwenene. Akaba alekerire amalibûko, agwerhe ecirhumire cinja.​—1 Yowane 4:8.

BULYA GURHI NNAMAHANGA ALEKERIRE AMALIBÛKO?

10. Gurhi Shetani anywerhîre Yehova?

10 Omw’ishwa lye Edeni, Shetani Ibilisi arhêba Adamu na Eva. Anywerhêra Nnamahanga oku ali murhegesi mubi. Abwîra Adamu na Eva oku hali kantu kaguma kinja Nnamahanga abayîmire. Shetani abayemêza oku âba murhegesi mwinja, n’oku barhâl’ilagirirekwo Yehova.​—Omurhondêro 3:2-5; olole amahugûlo nomero 27 gali oku bukurasa bwa 222.

11. Idoso lihi rhwashuzakwo?

11 Adamu na Eva bagomêra Yehova barhanacimurhumikiraga. Barhânya oku bone bâl’igwerhe obuhashe bw’okucishoga ebinja n’ebibi. Cikwone bacîrheba. Yehova ayishi ebiba binja kuli bene bantu. Gurhi Yehova akayerêkinemwo oku ye yishi ebyakaba binja n’ebibi kuli bene bantu?

12, 13. (a) Bulya gurhi Yehova arhayîrhaga Adamu na Eva ho n’aho? (b) Bulya gurhi Yehova alesîre Shetani abe murhegesi w’igulu? (c) Bulya gurhi Yehova alesîre bene bantu bacirhambule bone?

12 Yehova arhayirhaga Adamu na Eva ho n’aho. Abalêka  baburhe abana. Analêka abana ba Adamu na Eva bacishoge ndi bâl’ilonzize abe murhegesi wabo. Nnamahanga âl’ilonzize igulu liyunjule bantu bimana. Ciru akaba Shetani agomîre, ntyo ko byananabè.​—Omurhondêro 1:28; Izaya 55:10, 11.

13 Bamalahika banji babwîne erhi Shetani ashobeka Yehova. (Ayubu 38:7; Daniyeli 7:10) Kwo kw’arhumire Yehova alekera Shetani akasanzi kwo kuyerekana obunywesi bwage. Alekîre bene bantu nabo akasanzi bayerekane obuhashe bwabo bw’okurhambula buzira burhabale bwa Nnamahanga. Abalesîre bacijirire amarhegesi lyo Shetani agendekera abarhambula.

14. Bici akasanzi kayerekîne okubiyerekire oburhegesi bwa bene bantu?

14 Hakola hali myaka minji, bene bantu bali bacirhambula bone. Cikwone bayabirwe. Bibonekine oku Shetani anywesîre. Bene bantu balagirire oku burhabale bwa Nnamahanga. Omulebi Yeremiya adesîre n’obwalagale ntya: “Yagirwa Yehova, manyire bwinja oku omuntu [ . .] arhakamanya enjira yage yene. Burhali buhashe bwage bulongoza olushando lwage.”​—Yeremiya 10:23NWT.

BULYA GURHI YEHOVA ALEKERIRE AMALIBÛKO KUHIKA ENE?

15, 16. (a) Bulya gurhi Yehova alekerire amalibûko kuhika ene? (b) Bulya gurhi Yehova arhaciyusa amazibu Shetani arhondezâgya?

15 Bulya gurhi Yehova alekerire amalibûko kasanzi kanji? Bulya gurhi alekerire amahanya? Byâl’ihunyire akasanzi kagere lyo ayerekana oku oburhegesi bwa Shetani buli bubi. Bene bantu bacihanganyîre okurhegeka omunjira zoshi, cikoki nta burhegesi bwabo bukola burhambwire bwinja. Ciru akaba abasomi n’abalenga b’ebyuma bagendekire bayushula okumanya binji  ene, obukenyi, obunizi, ivita n’okubula obushinganyanya bigendekire byayushuka. Oko kuyerekine oku bene bantu barhakacirhegeka bone buzira burhabale bwa Nnamahanga.

16 Yehova arhayusâgya amazibu Shetani arhondezâgya. Acigayusâgya, akabîre ndyalya, bulya erhi akajijire ntyo, akabîre âli arhabala Shetani okurhambula igulu. Cikoki, nta lusiku Yehova akarhabala Shetani Ibilisi okurhambula! N’oko kwakarhumîre bene bantu bayemera oku banacirhambula bone. Obwo, buli bunywesi. Nta lusiku Yehova akalonza abantu bayemere obwo bunywesi! Yehova arhankanywerha.​—Abahabraniya 6:18.

17, 18. Gurhi Yehova ayish’ijira lyo ayusa amahanya Shetani arhondezâgya?

17 Obugoma bwa Shetani n’abantu bwalesîre mahanya manji. Ka Yehova anamala ebyo byoshi? Neci. Byoshi bihashikine emwa Nnamahanga. Yehova yene omanyire akasanzi obunywesi boshi bwa Shetani bwahika ebuzinda. Hano ako kasanzi kahika, ahindula igulu libe paradizo nk’oku âl’ilonzize. Abantu boshi bali omu “nshinda” bayish’ifûka bashibilama. (Yowane 5:28, 29) Abantu barhakac’ilwala erhi kufâ. Yezu ayishiyukiriza amazibu goshi Shetani arhondezâgya. Yehova ayish’ikolesa Yezu lyo “ahererekeza emikolo ya Shetani.” (1 Yowane 3:8) Okumanya oku Nnamahanga arhacishereza igulu kuhika ene, kurhushagalwire. Bulya kurhuhire akasanzi kw’okumumanya n’okucishogaye nka murhegesi wirhu. (Osome 2 Petro 3:9, 10) Yehova, anakarhurhabala omu mazibu girhu.​—Yowane 4:23; Osome 1 Abakorinti 10:13.

18 Yehova arhaba arhusezize mpu rhucishoge ye nka murhegesi wirhu. Arhuhîre oluhembo lwinja bwenene: oluhûma lw’okucishoga, kw’okuderha oluhûma lw’okujira  ebirhulonzize. Rhubonage gurhi rhwakakolesa olwo luhembo.

GURHI WAKOLESA OLUHÛMA NNAMAHANGA AKUHÎRE?

19. Luhembo luci Yehova arhuhîre? Bulya gurhi rhukwanine okushagalukira olo luhembo lwinja?

19 Oluhûma lw’okucishoga luli luhembo lwinja lwa Nnamahanga. Olo luhembo loluyerekana olubero luli ekarhi kirhu n’ensimba. Ensimba zirhajira luhûma lwa kucishoga ebizajira. Zirhajira buhashe bw’okuhiga ebinja erhi bibi. Cikoki rhwehe, rhwanacishoga akalamo rhulonzize okuba nako n’okuhiga okushagalula Yehova. (Emigani 30:24-28) Kandi, rhuba lubero n’amashini. Amashini gaba marheganye okujira ebibagabwizire gajire. Cikoki rhwehe, rhugwerhe oluhûma lw’okucishoga rhwaba bantu bagurhi, bandi bwo baba bira birhu na bici rhwajira omu kalamo kirhu. Yehova alonzize rhube n’akalamo kinja.

20, 21. Gurhi wakakolesa bwinja oluhûma lwawe lw’okucishoga?

20 Yehova alonzize rhumuzigire. (Mateyo 22:37, 38) Kw’ali nka mubusi oshagaluka erhi omwana wage amubwira n’obwalagale oku “amuzigîre,” arhali mpu bulya bamusezize oku abwire ishe ntyo. Yehova arhulekire oluhûma lw’okucishoga erhi rhwamukolera erhi nanga. Shetani, Adamu na Eva bacishozîre okurhakolera Nnamahanga. Nawe, gurhi wakolesa oluhûma Yehova akuhîre?

21 Bantu banji bacishozîre okurhumikira Yehova n’okulahira Shetani. Nawe, okolese oluhûma lwawe omu kukolera Yehova. (Emigani 27:11) Omw’igulu lihyahya, Yehova ayishiyukiriza amalibûko goshi. Gurhi wakajira ly’oyish’ilama omw’igulu lihyahya? Ecigabi cikulikire cashuza kw’elyo idoso.