Olole evideo ziriho

Olole emyanzi erimwo

 ECIGABI C’OKUYIGA 36

Kw’Oli Mubidu Okuba Mudubi w’Abantu?

Kw’Oli Mubidu Okuba Mudubi w’Abantu?

“Orhayobohaga: kurhenga ene, bantu wakaz’iduba.”​—LK. 5:10.

LWIMBO NOMERO 73 Tupe Ujasiri

EBI RHWACIYIGIRIZA *

1. Mulali guhi Yezu ahire balume bani bakagiduba ensamaki, na gurhi bashuzize?

ENTUMWA Petro, Andreya, Yakobo, na Yowane bakagijira omukolo gw’okuduba ensamaki. Orhanye gurhi baciyumvirhe erhi Yezu ababwira erhi: “Nkulikiragi nammujira badubi b’abantu.” * Gurhi bashuzize? Ebibliya edesire ntya: “Ho n’aho baleka obwarho bwabo bamushimba.” (Mt. 4:18-22NWT) Ogo muhigo gwakashanjire akalamo kabo ensiku zoshi. Barhakacibire badubi ba nsamaki cikone bali babà “badubi b’abantu.” (Lk. 5:10NWT, mahugûlo g’idako) Ene nalyo Yezu acigendekire ahamagala abantu bazigire okuli oku bamukulikire. (Mt. 28:19, 20) Ka wayemire ogo mulali gwa Yezu gw’okuba mudubi w’abantu?

2. Bulya gurhi rhushinganine rhurhôle omuhigo gw’okuba badubi b’abantu kwa buzibu-zibu na bici byakarhurhabala rhuhikire aho?

2 Hali amango erhi wajijire amajambere omu kuciyigiriza Ebibliya onakola ohikirizize ebi hunyirwe ly’oba muhubiri w’omwanzi mwinja gw’Obwami. Erhi akaba oli warhindira okuyemera omulali gwa Yezu, oko kurharhumaga wavunika omurhima. Oko kurhindira kwawe kuyerekine oku ohûgusirwe oku ogo muhigo guli gwa kurholwa buzibu-zibu. Ebibliya edesire oku Petro n’ababo bakagiduba boshi ensamaki baleka “ho n’aho” orhweshe rhwabo bakulikira Yezu. Cikone oko kurhayerekini oku Petro n’omulumuna bal’ihûgusirwe binji okubiyerekire Yezu. Bulya bayishiriyemera n’okuhûgukwa oku Yezu ye Masiya enyuma za myezi ndarhu. (Yn. 1:35-42) Kwo n’oko nawe byanahashikana erhi okola oba omanyire bintu binji okubiyerekire Yehova na Yezu, onalonzize ogendekere wajira amajambere g’ekiroho. Cikone orhashinganini orhôle ogo muhigo buzira kurhanya oku bulagirire bwago.  Bici byarhabire Petro, Andreya, n’abandi okurhôla ogo muhigo?

3. Morhere gahi gakazibuhya irala lyawe ly’okuyemera omulali gwa Yezu?

3 Abanafunzi baligwerhe oburhwali, obumanye, banali bakucihâna. Ago morhere n’agandi maguma na maguma gwo gabarhabire omu mukolo gwabo gw’okuba badubi b’abantu. Eci cigabi caganirira gurhi rhwakaba n’ago morhere lyo rhuba banafunzi ba Yezu bw’okunali.

OZIBUHYE IRALA LYAWE LY’OKUHUBIRI

Petro n’ababo bamaba badubi b’abantu. Ogo mukolo gugendekire kuhika ene (Olole ecifungo ca 4-5)

4. Bici byakagishumya Petro ajire omukolo gw’okuduba ensamaki?

Petro akag’ijira omukolo gw’okuduba ensamaki bulya gwo gwakag’ihikiriza amalagirire gw’omulala gwage. Na kandi aliguzigire bwenene. (Yn. 21:3, 9-15) Buzinda aciyigiriza okuzigira omukolo gw’okuba mudubi w’abantu. Na Yehova amurhabala okuhikiriza bwinja ogo mukolo.​—Ebj. 2:14, 41.

5. Nk’oku biyerekinwe omu Luka 5:8-11, bulya gurhi Petro ayobohaga na bici byakarhurhabala rhuhagalike entanya za ntyo?

5 Obuzigire bwirhu kuli Yehova kwo kantu karhanzi karhushumya rhujire omukolo gw’okuyaliza omwanzi mwinja gw’Obwami. Obuzigire rhujirako Yehova bwanarhurhabala rhuhagalike entanya z’okuciyumva nka rhurhashinganini okuba banafunzi ba Kristu. Erhi Yezu ahamagala Petro oku ayishe abe mudubi w’abantu amubwira ntya: “Orhayobohaga.” (Osome Luka 5:8-11.) Petro arhayobohaga ebyakamuhikire erhi akabire mwanafunzi wa Kristu. Lubero n’oko asomerwa n’ecisomerine Yezu abajiriraga c’okuduba nsamaki nyinji, aciyumva nk’arhashinganini abe mwanafunzi wa Kristu. Nkabaga nawe onakaciyumva oku orhashinganini okuba mwanafunzi wa Kristu n’okuhikiriza ebihunyirwe ly’oba mwanafunzi wage. Akaba ntyo kw’ociyumva, obuzigire ojirako Yehova, Yezu n’omulungu bwanakushumya obe n’irala  ly’okuyemera omulali gwa Yezu n’okuba mudubi w’abantu.​—Mt. 22:37, 39; Yn. 14:15.

6. Bici bindi birhushumya rhuhubiri?

6 Rhuganirirage ebindi bintu biguma na biguma birhushumya rhujire omukolo gwʼamahubiri. Rhunakayaliza omwanzi mwinja gw’Obwami bulya rhuba rhukenzire irhegeko lya Yezu liba lidesere ntya: “Gendagi . . . munajire abanafunzi.” (Mt. 28:19, 20NWT) Na kandi rhunakayaliza omwanzi mwinja gw’Obwami, bulya “abantu balakerirwe” banalagirire oku muntu wakabayigiriza okuli okubiyerekire Obwami bwa Nnamahanga. (Mt. 9:36NWT) Yehova aba alonzize abantu boshi babe n’obumanye bw’okuli banayishihikira aha bacunguka.​—1 Tm. 2:4.

7. Nk’oku biyerekinwe omu Abaroma 10:13-15, bulya gurhi omukolo gwirhu gw’okuyaliza omwanzi mwinja gw’Obwami guba gwabulagirire?

7 Okuhûgukwa oku ogo mukolo gwirhu guli gwa bulagirire kwo kurhushumya rhugurhôle kwa buzibu-zibu. Omudubi w’ensamaki anazidube lyo azirya erhi aziguze, cikone rhwehe “rhunadube” abantu lyo bayish’icunguka.​—Osome Abaroma 10:13-15; 1 Tm. 4:16.

OBE N’OBUMANYE

8-9. Bici omudubi ashinganine ahugûkwe na bulya gurhi?

8 Abadubi bw’omu mango ga Yezu bal’ihûgusirwe nsamaki za gurhi bal’ishinganine badube. (Lev. 11:9-12) Na kandi bal’imanyire ngahi ensamaki zilugibêra. Ensamaki zinakalugibêra ahantu hali amishi manene n’ahali ebiryo. K’akasanzi kw’okugendiduba kali ka bulagirire? Neci. Rhulole ebi mwene wirhu muguma ojira omukolo gw’okuduba ensamaki abwiraga mwene wirhu muguma misiyonere erhi amulalika oku bagend’iduba boshi ensamaki. Misiyonere amubwira ntya: “Nayisha irhondo sezi aha ns’isharhu.” Oyo mwene wirhu amushuza erhi: “Nkaba orhahugusirwi bwinja ebi nakubwiraga. Rhunakagendiduba ensamaki omu kasanzi kinja zakabonekana, cikone arhali omu kasanzi rhuciyumvirhe oku rhwanagendiduba.”

9 Kwo n’oko abadubi b’abantu bw’omu myaka igana mirhanzi bakagigendilongeza “ensamaki” aha zakabonekana n’omukasanzi kashinganine. Kwa lwiganyo, abanafunzi ba Yezu bakagiyigiriza omu hekalu, omu sinagogi, nyumpa oku yindi n’omu cibuye. (Ebj. 5:42; 17:17; 18:4) Nirhu ene, rhushinganine rhuhûgukwe enkomêdu n’amorhere g’abantu bw’omu eneyo yirhu. Rhushinganine rhube babidu okugendilonza abantu omu kasanzi bakabonekana n’ahantu bakaba bali.​—1 Kr. 9:19-23.

ABADUBI BAYISHIDUBA . . . 1. banakagend’idubira aha bakabona ensamaki nyinji na kandi banagendiduba omu kasanzi kashinganine (Olole ecifungo ca 8-9)

10. Bikolanwa bihi ikubuliro lya Yehova lirhuha lyo rhukola bwinja omukolo gw’amahubiri?

10 Omudubi ashinganine abe n’ebikolanwa byoshi by’okuduba na kandi ashinganine ahûgukwe gurhi ngasi cikolanwa cakakolesibwa. Nirhu rhushinganine rhube n’ebikolanwa byoshi by’okujira omukolo gwirhu gw’okuyigiriza. Na kandi rhushinganine rhuhûgukwe gurhi ngasi cikolanwa cikolesibwa. Yezu ahire abanafunzi bage amahano, ababwira ebibaheka, ngahi bajihubiri n’ebi bajiderha. (Mt. 10:5-7; Lk. 10:1-11) Ene nalyo ikubuliro lya Yehova linarhuhe Ebikolanwa by’Omwigiriza birhurhabala rhuhikirize bwinja omukolo gwirhu gw’amahubiri. * Na kandi linarhukomereze lyo rhuhûgukwa gurhi rhwakakolesa ngasi cikolanwa. Oko kurhukomereza kunarhurhabale rhurhacibe n’oboba na kandi kunarhuhashise rhube n’oburhwali.​—2 Tm. 2:15.

ABADUBI BAYISHIDUBA . . . 2. baba bahûgusirwe oku ngasi cikolanwa cakakolesibwa (Olole ecifungo ca 10)

OBE N’OBURHWALI

11. Bulya gurhi abadubi b’abantu bashinganine babe n’oburhwali?

11 Omudubi w’ensamaki ashinganine abe  n’oburhwali. Bulya mango maguma maguma anakalwisa mazibu maguma maguma gakaba gali omu nyanja. Kwa lwiganyo, ashinganine akole budufu, azuke sezi-sezi ajiduba n’okulembera nk’omulaba gwamazuka omu nyanja. Abadubi b’abantu nabo bashinganine babe n’oburhwali. Bulya rhuli Bahamirizi ba Yehova, rhunakalwisa “mazibu” maguma maguma; nk’okuhagalikwa n’abantu bw’omulala gwirhu, okushekerwa n’abîra birhu n’abantu okulahira emyanzi rhuli rhwabayigiriza. Cikone oko kurhakarhusomeza, bulya Yezu abwizire abanafunzi bage oku banashombwe n’abantu.​—Mt. 10:16.

12. Nk’oku biyerekinwe omu Yozwe 1:7-9, bici byakarhuhashisa rhube n’oburhwali?

12 Gurhi wakabamwo n’oburhwali? Burhangiriza oshinganine oyemere oku Yezu ali alongoza omukolo gw’amahubiri erhi anali empingu. (Yn. 16:33; Maf. 14:14-16) Na kandi oshinganine obe n’obuyemere omu ciragane ca Yehova c’okushibirira amalagirire gawe. (Mt. 6:32-34) Erhi obuyemere bwawe bwakaba busezire, oko kwanakurhabala obe n’oburhwali. Petro n’ababo bakagiduba boshi bayerekine oku bagwerhe obuyemere erhi baleka omukolo gwabo gwakagihikiriza amalagirire g’emilala yabo, lyo bashimba Yezu. Nawe wayerekine oku ogwerhe obuyemere erhi orhondera wabwira abandi oku okola okayiga Ebibliya haguma n’Abahamirizi ba Yehova onakola okaja omu ntimanano zabo! Buzira karhinda bibonekine oku warhondire wajira mpindûlo nguma na nguma omu kalamo kawe ly’olama nk’oku amakanuni ga Yehova gadesire. Oko nako kuhunyire omuntu abe n’obuyemere  n’oburhwali. Ly’ogendekera waba n’oburhwali oshinganine oyemere n’obwalagale oku Yehova “Nyamuzinda wawe ali haguma nawe ngasi hoshi wankanaja.”​—Osome Yozwe 1:7-9.

ABADUBI BAYISHIDUBA . . . 3. banakole n’obushiru ciru akaba bali omu kasanzi kazibu (Olole ecifungo ca 11-12)

13. Gurhi okurhanya kw’ebi Yehova amakajira n’okusalira kwakakurhabala obe n’oburhwali?

13 Bindi bici byakakuhashisa obe n’oburhwali? Okahûna Yehova kugerera isala akuhashise obe n’oburhwali. (Ebj. 4:29, 31) Yehova anashuza oku masala gawe arhakanakulekerera ciru n’ehitya. Na kandi agendekera akurhabala. Kandi okarhanya kunganaci Yehova akagirhabala abakozi bage ba mîra. Na kandi okarhanya kunganaci Yehova amakakuhashisa ohime mazibu maguma maguma omu kalamo kawe. Kandi okarhanya kunganaci Yehova akurhabire ly’ojira empindûlo omu kalamo kawe. Oyemere n’obwalagale oku Nyamuzinda wayikizagya abantu bage omu Nyanja Ndukula, anakurhabala ojire empindûlo ly’oba mwanafunzi wa Kristu. (Lub. 14:13) Obe n’obuyemere buli nk’ob’omwandisi w’ennanga waderhaga ntya: “Yehova ali haguma nani; nta bwoba bungwerhe. Gurhi abantu bakanjira?“​—Enna. 118:6NWT.

14. Bici wakaciyigiriza kugerera olwiganyo lwa mwali wirhu Masae na Tomoyo?

14 Okundi kwakakuhashisa obe n’oburhwali, kuli kukarhanya kunganaci Yehova arhabala abantu bayumva enshonyi erhi boba bw’okuganîra, abo bantu bahikire aha babà n’oburhwali. Rhuganirire olwiganyo lwa mwali wirhu Masae. Akagiyumva enshonyi bwenene anakagiyoboha okubwira abantu okubiyerekire obuyemere bwage. Entanya z’okuderha oku anaganiza abantu, kwo zali nka lwishi lunene arhakanahashiluyikira. Ajira bushiru bunji bwenene ly’azigira Yehova n’abalungu. Arhanya okubiyerekire akasanzi rhulamiremo, na ntyo ashenga Yehova amurhabale abe n’irala ly’okuyaliza omwanzi mwinja gw’Obwami. Ahagalika obo bwoba, na buzinda aba painiya w’akasanzi koshi. Yehova anarhabala ciru n’abahubiri bahyahya “babe n’oburhwali.” Rhucibiganirira olundi lwiganyo lwa mwali wirhu ohamagalwa Tomoyo. Olusiku lurhanzi ajaga omu mahubiri ga nyumpa okuyindi, ecogo cirhazi alamusagyamo, mukazi muguma arhenga omu nyumpa amoka erhi: “Murhenge aho, ntamubonako!” Ho n’aho anayigala olumvi. Mwali wirhu Tomoyo abwira oyu bali boshi n’oburhwali mpu: “Koyumvirhe wa? Ci ntalicimubwira oku ndi Muhamirizi wa Yehova kwone amab’amanyirira wani, oko kwamanshagalula bwenene!” Mwali wirhu Tomoyo ali akola nka painiya w’akasanzi koshi.

OBE WAKUCIHÂNA

15. Okucihâna kw’okuderha gurhi na bulya gurhi Abakristu bashinganine babe ba kucihâna?

15 Ly’omudubi ahikiriza bwinja omukolo gwage, biba bihunyire abe wakucihâna. Okucihâna kuli nka “kucijira koshi wakanahasha lyo mukolo mulebe gujirwa.” Omudubi w’ensamaki aba ashinganine abe wakucihâna, bulya ashinganine azuke sezi ajiduba, alegerere eyo, alembere mazibu maguma maguma; nk’enkuba n’omulaba. Nirhu rhushinganine rhube bakulembera lyo rhuhikiriza bwinja omukolo gwirhu.​—Mt. 10:22.

16. Bici byakarhuhashisa rhube n’oborhere bw’okucihâna?

16 Oborhere bw’okucihâna burhaba bwa kaburhano. Obuzamba bwirhu bw’akurhaba bimana bunarhume rhwabula kucihâna. Co cirhumire bihunyire rhube ba kucihasha lyo rhukacihâna. Na kandi binahune barhuhe oburhabale, lyo rhuhikiriza ebintu rhurhakahasha. Yehova anakarhuha obo burhabale kugerera iroho lyage litagatifu.​—Gl. 5:22, 23.

17. Nk’oku biyerekinwe omu 1 Abakorinti 9:25-27, gurhi Paolo ahugwire obushiru akagijira ly’aba n’oborhere bw’okucihâna?

17 Entumwa Paolo yagwerhe oborhere bw’okucihâna.  Cikone alihûgusirwe oku “akagishurhashurha” omubiri gwage lyo ajira ebintu binja. (Osome 1 Abakorinti 9:25-27, NWT.) Ayinginga abandi Bakristu oku bashinganine bakajira ebintu byoshi “bwinja bwinja na buzira kavulindi.” (1 Kr. 14:40) Rhushinganine rhube n’oborhere bw’okucihâna lyo rhujira amajambere minja g’ekiroho na kandi lyo rhuhikiriza bwinja omukolo gwirhu gw’okuduba abantu.​—Ebj. 2:46.

ORHARHAMAGA

18. Bici byakarhuma Yehova abona oku hali ebi rhwajijire omu mukolo gwage?

18 Omudubi anakacitakirira ensamaki anadubire. Lubero n’oko rhwehe rhurhacitakirira abantu rhwamakarhabala bahike omu ikubuliro lya Nnamahanga. (Lk. 8:11-15) Yehova agendekera abona oku hali ebi rhwajijire erhi rhwakagendekera rhwaba n’obushiru omu mukolo gw’okuyigiriza abandi omwanzi mwinja gw’Obwami bwage. Bulya gurhi rhudesire ntyo? Bulya erhi rhwakagendekera rhwajira omukolo gw’okuhubiri rhwanaba erhi rhuli rhwahikiriza ebi Yehova n’Omugala barhurhegesire oku rhujire.​—Mk. 13:10; Ebj. 5:28, 29.

19-20. Bici bindi birhushumya okugendekera kwayaliza omwanzi mwinja gw’Obwami?

19 Hali bihugo biguma na biguma bahanzamwo okuduba ensamaki omu nyanja myezi miguma na miguma. Oko kunarhume abadubi bayushula obushiru bwabo bw’okuduba kuhika oku lusiku babwizirwe oku barhacidubaga. Nirhu nka badubi b’abantu hali ecirhumire cinja cakarhushumya rhube babidu mw’ogo mukolo: Obuzinda bw’er’igulu buli hofi! Rhurhacigwerhi kasanzi kanji kw’okujira ogo mukolo. Orhacirhindiraga erhi oje warhanya mpu ebintu byaciyorha kundi-kundi ly’ojira ogo mukolo.​—Muh. 11:4.

20 Mw’aka kasanzi ocihangane obe n’irala ly’okuyaliza omwanzi mwinja gw’Obwami, obe n’obumanye bw’Ebibliya, obe n’obushiru na kandi obe n’iroho ly’okucihâna. Ocihangane obe muguma w’omu bantu balushire miliyoni munani bali bagendekera okujira omukolo gw’okuduba abantu na ntyo waba n’omwishingo gwa Yehova. (Neh. 8:10) Ohige okugendekera kwajira ogo mukolo kuhika guhike ebuzinda. Ecigabi cikulikire caganirira njira isharhu za karhurhabala rhugendekere rhwazibuhya omuhigo gwirhu gw’okujira omukolo gw’amahubiri.

LWIMBO 66 Tangaza Habari Njema

^ kip. 5 Yezu ahamagala abantu birhohye bakag’ijira omukolo gw’okuduba ensamaki oku bayishe babe banafunzi bage. Ene nalyo agendekire alalika abantu bagwerhe oborhere bwa ntyo oku bayishe babe badubi b’abantu. Mw’eci cigabi rhwaganirira ebi abanafunzi b’Ebibliya bakarhindira okuyemera omulali gwa Yezu bakajira lyo baba banafunzi bage.

^ kip. 1 AMAHUGÛLO GA NDERHO NGUMA NA NGUMA: Oluderho “badubi b’abantu,” luganirire balya boshi bakayaliza omwanzi mwinja gw’Obwami n’okurhabala abandi babe banafunzi ba Kristu.

^ kip. 10 Olole ecigabi cidesire “Tufundishe Kweli” ciri omu Ilabiro ly’Akalalizi ly’omu mwezi gw’Ikumi 2018-ZS, buk. 11-16.