Olole evideo ziriho

Olole emyanzi erimwo

 ENGANÎRO Z’AKALAMO K’ABANTU

“Nkola Mba Nzigire Omukolo gw’Amahubiri!”

“Nkola Mba Nzigire Omukolo gw’Amahubiri!”

NAKULIRAGA omu lugo lw’e Balclutha, omu Cirhwa c’Emukondwe (Sud) y’ecihugo c’e Nouvelle-Zélande. Erhi ndi mwana, nakagizigira Yehova bwenene nanakagizigira okuba Muhamirizi wa Yehova. Ntakagiciyunva kubi okuja omu ntimanano, nakagishagalukira okuba omu cigamba cirhu bulya mwo nakagiciyumva ngwerhe omwishingo nandi omu murhula. Nakagishagalukira bwenene okuja omu mahubiri ngasi mugobe ciru akaba nnali wa nshonyi. Ntakagiyoboha okuhubiri abirhu banafunzi n’abandi bantu. Bulya nakagishagalukira okuba Muhamirizi wa Yehova, co carhumaga erhi nyeneza myaka 11 nacihâna emwa Nnamahanga kugerera isala.

NAHEZA OMWISHINGO GWANI

Akantu kw’okugayisa kuli kubona oku erhi ndi omu myaka y’omushuko, obwîra bwani haguma na Yehova bwarhondera okurhà. Narhonderha nabona nk’abirhu banafunzi bagwerhe oluhûma lw’okujira ebi balonzize, oko kwakarhuma naciyumva nka hali akantu mbuzire. Nakayumva nk’amarhegeko g’ababusi bani n’amakanuni g’Ecikristu guli mugozi, nnanarhondera okubona nk’emikolo y’ekiroho gukola muzigo. Ciru akaba nta lusiku narhanyize oku Yehova arhabaho, nahikira aha naheza obwira bwani haguma naye.

Ntalekaga okuhubiri, cikoki gali mahubiri ga ntya-ntya. Bulya ntacikagirheganya amahubiri, nakaba n’amazibu gw’okurhondeza erhi okugendereza enganîro haguma n’abantu. Bulya omukolo gwani gw’amahubiri gurhacikagileheka, gurhanacikag’inderhera omwishingo, okwo kwarhuma nagaya amahubiri bwenene. Narhondera nacidosa ntya, ‘Ka kobinali ogu gw’omukolo omuntu anashinganine akajira ngasi mugobe na ngasi mwezi?’

Erhi nyeneza myaka 17, narhonderha naba n’irala ly’okulama akalamo nansimire. Ago mango narhenga aha mwirhu nahamira e Australie. Erhi ntenga ahamwirhu ntyo, ababusi bani baciyumva kubi bwenene.  Bacidosa gurhi bajira bakuhaba, cikone balibalangalire oku nanacigalukire ehali yani nyinja y’ekiroho.

Erhi mpika e Australie, ehali yani y’ekiroho yasherera bwenene. Nakaja oku ntimanano amango naciyumvirhe. Najira obwîra haguma na misole miguma yakagi shagalukira ebi nnani nakagishagalukira, kw’okuderha kuja oku ntimanano, buzinda rhugende ahantu h’okunywera amamvu n’okusama budufu. Erhi nkengera ebyagezire nambone oku nagwerhe kugulu kuguma omu okuli n’okundi omw’igulu, cikone mw’ako kasanzi koshi, nta haguma nakagiciyumva ndi.

NACIYIGIRIZA ISOMO LY’OBULAGIRIRE NTALILANGALIRE

Myaka ibirhi enyuma ly’aho, narhimanana na mwali wirhu muguma wantabalaga buzira kumanya ntanye bwenene okubiyerekire emunda akalamo kani kayerekire. Nalilamire omu nyumpa nguma haguma na birhu banyere barhanu, mango maguma rhwalalika mwangalizi w’omuzunguko na mukage Tamara oku bayish’ilama ahamwirhu ogo mugobe goshi balambagiriraga ecigamba cirhu. Erhi mwangalizi akajire omu mikolo y’ecigamba, mukage Tamara akag’igeza akasanzi haguma nirhu, n’okusheka haguma nirhu. Nakashagalukira oko bwenene. Arhali wa bucibone n’okumuyegerera kwali kulembu. Nasomerwa bwenene okubona gurhi omuntu okuzire kiroho ntyo akaba wakushesa abandi.

Tamara ali mushagalusi bwenene. Obuzigire bwage okubiyerekire okuli n’amahubiri bwali bwakushumya bwenene. Yehe aligwerhe omwishingo bulya akagiha Yehova ebinja agwerhe nobo niehe ntaligwerhe omwishingo bulya ntakagimukolera n’emisi yani yoshi. Oborhere bwage bwinja n’omwishingo gw’okuli agwerhe, byahuma oku kalamo kani. Olwiganyo lwage lwantabala nkengere ezi ntanya z’okuli z’Ebibliya: Yehova alonzize ngasi muguma amukolere “n’enshagali n’omwishingo.”​—Enna. 100:2NWT.

NASHUBISHAGALUKIRA AMAHUBIRI

Nalilonzize mbe n’omwishingo guli nk’ogwa Tamara, cikoki, lyo mpikira aho, byali mpunyire njire empindûlo omu kalamo kani. Byampunyire kasanzi kanji, cikone narhondera najira empindûlo nsungunu nsungunu. Narhondera nakacirheganya embere z’okuja omu omukolo gw’amahubiri, na  nakajira omukolo gw’obupainiya murhabazi liguma-liguma. Oko kwantabala napunguza oboba nagwerhe, na kandi kwantabala narhondera okucilangalira. Okukolesa bwenene Ebibliya omu mahubiri, kwarhuma nasima omahubiri bwenene. Buzinda nahikira aha naba painiya murhabazi ngasi mwezi.

Narhondera okujira obwîra n’abantu ba ngasi myaka bakag’ikolera Yehova n’emisi yabo yoshi n’okushagalukira omukolo gwa Yehova. Olwiganyo lwabo lwinja lwantabala nabona bintu bihi biba bya bulagirire omu kalamo kani, na kandi lwantabala nacibiba n’eprograme nyinja y’ekiroho. Narhondera nazigira amahubiri bwenene na buzinda naba painiya w’akasanzi koshi. Ogo mwaka narhonderaga obupainiya, bo bwali burhanzi naciyumva ntulirire, nshagalukire aha mwirhu kw’okuderha omu cigamba.

NASHEBWA N’OMULUME OLI PAINIYA

Enyuma za mwaka muguma, mwene wirhu Alex, arhondera ansheba. Alizigire Yehova bwenene n’omukolo gw’amahubiri. Ali murhabazi w’abagula analikola agwerhe myaka ndarhu ali ajira obupainiya. Kandi hali amango Alex akoleraga omu eneo yalimw’obulagirire bw’abahubiri omu cihugo c’e Malawi. Eyo munda akomerana na bamisionere, ashagalukira olwiganyo lwabo bakanamuha omurhima oku agendekere ahira Obwami oku nafasi ntanzi.

Omu mwaka gwa 2003, niè na Alex rhwajira obuhya, rhwanagendekera rhwajira omukolo gw’akasanzi koshi kuhika buno. Rhwaciyigirizize bintu binji na Yehova arhugishire omu njira nyingi.

YEHOVA ARHUGISHA BWENENE KULUSHA

Omu mukolo gw’amahubiri e Gleno, Timor oriental

Omu mwaka gwa 2009, rhwarhumwa oku rhube ba misionere omu cihugo cisungunu c’e Timor oriental, ciba omu birhwa by’e Indonésie. Mw’ako kasanzi rhwasomerwa, rhwashagaluka, rhwanayoboha. Myezi irhanu enyuma z’aho, rhwahika omu Dili, vile nkulu y’eco cihugo.

Okuhama kwirhu kwalirhuhunyîre rhujire mpindûlo nyinji omu kalamo kirhu. Byalihunyîre rhukomere enkomêdu mpyahya z’eyo munda, olulimi luhyahya, ebiryo, n’akalamo k’eyo munda. Omu  mahubiri rhwakagirhimanana n’abantu bakenyi bwenene, barhasomaga, banakagibonererwa bwenene. Na kandi, rhwakag’ibuganana n’abantu bagwerhe mazibu manji gw’omubiri n’ag’ekandalala, galerhagwa n’ivita erhi bumînya. *

Amahubiri gali minja bwenene! Kwa lwiganyo, mango maguma narhimanana na munyere muguma wa myaka 13 ohamagalwa Maria. * Oyo munyere aligayire bwene. Nnina ali erhi afîre nsiku nsungunu embere rhubonane, arhanakagibona ishe ngasi mango. Nk’oku onamanyire lugenda abana b’emyaka ya Maria, ntaco ali manyire akajira omu kalamo kage. Nkengire mango maguma alakaga erhi ali ambwira oku akagiciyumva. Ciru ntayumvagya bici akag’iderha bulya ntalicirhondera okuderha bwinja olwo lulimi lwage. Nashenga Yehova antabale lyo muha omurhima, narhondera namusomera amandiko gw’okumuha omurhima. Omu myaka misungunu yakulikiraga, narhondera nabona gurhi okuli kuli kwahindula oborhere bwa Maria, oku aliyosire, n’akalamo kage koshi. Abatizibwa, n’ene ali alongoza agage mafunzo g’Ebibliya. Ene, Maria akola agwerhe omulala munene gw’ekiroho, anakola aciyumva nka muguma wa mw’ogo mulala.

Yehova ali agisha omukolo omu Timor oriental. Ciru akaba banji b’omu bahubiri babatizibwe mw’eyi myaka ikumi egezire, bene wirhu na bali birhu banji bali bapainiya, barhabazi b’abagula erhi bagula. N’abandi bali bakolera omu mabiro g’okuhindula ebitabu na ntyo bali barhabaza okuhîra ebiryo by’ekiroho omu ndimi z’eyo munda. Nakagishagaluka bwenene okubayumva bali bayimba omu ntimanano, okubona bali bamwemwerhwa n’okubona amajambere gabo g’ekiroho.

Nie na Alex, rhwagenda omu eneo erhasagihabwa muhubiri yeshi yeshi lyo rhujigabira abantu emilali y’okubayegereza oku lusiku lw’Okukengera olufû lwa Yezu

NTALIRHANYIZE OKU NANABA N’OMWISHINGO MUNENE OMU KALAMO

Omukolo gwirhu omu cihugo c’e Timor oriental gwâli lubêro n’akalamo rhwagwerhe e Australie, cikone gwarhulerhera omwishingo munene omu kalamo. Hali amango rhwakagigenda omu hituga hisungunu hyarhenga ecibuye, hiyunjwiremw’abantu, ensamaki n’enshogo. Hali amango rhwakagilongogeza ifunzo ly’Ebibliya omu hinyumpa hisungunu hirimw’idûrhu linene bwenene, obucafu ngasi hoshi, n’engoko ziri zageragera ngasi hoshi. Neci, ciru akaba ago mazibu goshi, kanji kanji nakagirhanya ntya, ‘Aka kalamo kali ka kusomerana!’

Rhuli omu njira, rhuyerekire omu eneo

Erhi nkengera ebyagezire, namvuge ababusi bani omunkwa okubona bajijire okwabo koshi lyo banyigiriza enjira za Yehova banantabala, ciru n’omu myaka yani mizibu y’omushûko. Nacibwinire okuli kw’olwandiko lwa Emigani 22:6. Larha na Nyama banacishinge bwenene okubona niè na Alex rhuli rhwakolera Yehova. Kurhondera omu mwaka gwa 2016, Alex aba mwangalizi w’omuzunguko omu eneo y’etawi y’e Australasie.

Ndi nayeresa aba bana b’omu Timor video nguma ya Caleb na Sophia, bayishagalukire bwenene

Kurhaba kulembu okuyemera oku hali amango ntakagishagalukira omukolo gw’amahubiri. Buno, nkola mba nzigire ogo mukolo bwenene! Nahugûsirwe oku ciru bici byakarhukira omu kalamo, okukolera Yehova n’omurhima goshi kwo kuha omuntu omwishingo gw’okunali. Kobinali, eyi myaka 18 namayusa ndi nakolera Yehova haguma na Alex, yo myaka nabiremwo n’omwishingo munene omu kalamo kani. Kuhika buno, nkola mba mpugusirwe ezi nderho omuzihi w’Ennanga abwiraga Yehova: “Abayakira muli we bacîshinge; ensiku zoshi babanda orhubûli rhw’omwishingo . . . N’abazigira izino lyawe bacîshinge muli we.”​—Enna. 5:11NWT.

Buli bushagaluke bunji okuyigiriza abantu birhohye Ebibliya!

^ kip. 21 Kurhondera omu mwaka gwa 1975, ecihugo c’e Timor oriental cajijire myaka 20 ciri omw’ivita ly’okulonza okucirhegeka cone (indépendence).

^ kip. 22 Izino lishanjirwe.