Olole evideo ziriho

Olole emyanzi erimwo

 ECIGABI C’OKUYIGA 48

“Amasu Gawe Gakazilola Embere”

“Amasu Gawe Gakazilola Embere”

“Amasu gawe gakazilola embere, n’obusu bwawe bukaziyerekera embere zawe.”​—MIG. 4:25.

LWIMBO 77 Nuru Katika Ulimwengu Wenye Giza

EBI RHWAYIGA *

1-2. Gurhi rhwakakulikira ihano liri omu lwandiko lwa Emigani 4:25? Ohâne olwiganyo.

ORHANYE kw’ezi nyiganyo isharhu. Mwali wirhu muguma mugikulu ali arhanya oku kalamo kinja al’ilamire omu mango gageraga. Cikone ciru akaba akola alamire akalamo kazibu, acigendekire ajira ebi akanahasha omu mukolo gwa Yehova. (1 Kr. 15:58) Ngasi lusiku agendekire arhanya gurhi ayish’ilama omw’igulu lihyahya haguma n’abîra bage. Owundi mwali wirhu amakengera gurhi owabo mwemezi amuvunâga omurhima, cikone amahîga oku arhamubikire akarhinda. (Kl. 3:13) Mwene wirhu muguma ali akengera ebyaha ajiraga omu mango gageraga, cikoki ali asegeza obwenge omu gurhi akagendekera abêra mwishwekerezi kuli Yehova mwagano mango.​—Enna. 51:10.

2 Bici bishushine biri mw’ezi nyiganyo isharhu z’aba bene wirhu? Boshi bali bakengera ebyabahikîre omu mango gageraga, cikone barhacigendekiri babirhanyako ngasi mango. Boshi amasu gabo gali ‘galola embere,’ kwo kuderha kusegeza obwenge oku mango gayisha.​—Osome Emigani 4:25.

3. Bulya gurhi kuli kwa bulagirire amasu girhu “gakazilola embere”?

3 Bulya gurhi kuli kwa bulagirire amasu girhu “gakazilola embere”? Nka kula omuntu arhakahash’ilambagira bwinja omu njira nk’ali akabagana, nirhu rhurhakagendekera embere omu mukolo gwa Yehova erhi rhwakaja rhwakabagana enyuma omu kurhanya ngasi mango oku byarhuhikiraga mango gageraga.​—Lk. 9:62.

4. Bici rhwaganirira mw’eci cigabi?

4 Mw’eci cigabi, rhwaganirira mirhego isharhu yakarhuma rhwagendekera rhwarhanya oku bintu byagezire. * Eyo mirhego y’eyi: (1) okucifinja akalamo kirhu ka mîra, (2) okubika akarhinda, (3) okucitumuza okurhalusire olugero. Muli ngasi kanga,  rhwaganirira gurhi amakanuni g’Ebibliya gakarhurhabala rhuyake okusegeza obwenge oku ‘ebiri nyuma,’ na ntyo rhusegeze obwenge bwirhu oku “biri emalanga” girhu.​—Fl. 3:13, Mashi Bible.

OMURHEGO GW’OKUCIFINJA AKALAMO KIRHU KA MÎRA

Bici byakarhuma rhwayabirwa okukalola embere oku mango gayisha? (Olole ecifungo ca 5, 9, 13) *

5. Murhego guhi rhushinganine rhuyake gudesirwe omu lwandiko lwa Omuhanûzi 7:10?

5 Osome Omuhanûzi 7:10. Ogu mustari gurhadesiri oku kuli kubi okudosa ntya: “Bulya gurhi ensiku zageraga zàli nyinja kulusha zino?” Obuhashe bw’okukengera ebintu binja byagezire luli luhembo lurhenga emwa Yehova. Cikone, ogu mustari gudesire: “Orhaderhaga erhi, ‘cici cirhumire ensiku zàli burhanzi zilusha eziri buno?’” Kuli kuderha, oku hanaba omurhego omu kushushanya akanga kagezîre n’aka buno n’okuhikira aha rhwaderha oku akanga kabuno kwo kabî bwenene. Hali Ebibliya ehindwire ogu mustari ntya: “Orhakag’icidosa erhi, ‘Bulya gurhi ebintu by’omu nsiku za mîra byali binja bwenene?’ Kulya kuba eryola idoso lirhali lya burhimanya.”

Enyuma z’okurhenga e Misiri, igosa lihi aba Israheli bajijire? (Olole ecifungo ca 6)

6. Bulya gurhi buli buhwinja okukarhanya oku amango gagezîre gwo gali minja bwenene kulusha aga buno? Ohâne olwiganyo.

6 Bulya gurhi buli buhwinja okukarhanya oku amango gagezîre go gali minja bwenene kulusha aga buno? Okucifinja akalamo kirhu ka mîra kwanarhuma rhwakakengera ebintu binja byone byâli mw’ago mango. N’oko kwanarhuma rhwarhanya mpu nta mazibu rhwalwisize mw’ako kasanzi. Rhuganirire olwiganyo lw’aba Israheli ba mîra. Enyuma z’okurhenga omu buja e Misiri, bayibagira ho n’aho akalamo kazibu bal’ilamire eyo munda. Barhondera bakengera ebiryo binunu bakag’ilya eyo munda. Barhondera baderha erhi: “Rhwamadula zirya nfi rhwakagilya busha busha konene e Misiri, rhwamadula gulya mundagwe, galya malehe, birya bitumbura na balya bapwaro birhu!” (Mib. 11:5) Cikone, ka kobinali kwa “busha busha konene” bakag’ilya ebyo biryo? Nanga. Aba Israheli balibuka bwenene akasanzi bali omu buja e Misiri. (Lub. 1:13, 14; 3:6-9) Ciru akaba ntyo, bayibagira amazibu balimo e Misiri, barhondera bacifinja akalamo bal’ilamiremw’eyo munda. Basegeza obwenge bwabo oku “kasanzi kinja ka mîra”  ahali hw’okusegeza obwenge oku bintu binja Yehova ali amarheng’ibajirira. Yehova agaya bwenene enyanya z’oko.​—Mib. 11:10.

7. Bici byarhabire mwali wirhu muguma ayake omurhego gw’okucifinja akalamo kage ka mîra?

7 Gurhi rhwakajira lyo rhuyaka omurhego gw’okucifinja akalamo kirhu ka mîra? Rhuganirire olu lwiganyo lwa mwali wirhu muguma warhonderaga wakola oku Beteli y’e Brooklyn omu mwaka gwa 1945. Enyuma za myaka misungunu, ajira obuhya na mwene wirhu muguma naye wâli oku Beteli. Cikone, omu garhi kw’omwaka gwa 1976 iba alwala. Oyo mwali wirhu adesire oku erhi iba abona oku obo bulwala buli bwamuheka ebwa lûfu, amuha amahano gayerekire gurhi alama omu bukana bwage. Amubwira ntya: “Rhwagwêrhe omwishingo omu buhya. Bantu banji barhajira mwishingo omu buhya bwabo.” Buzinda omuyinginga ntya: “Orhakayibagira ebintu binja rhwakagijira haguma, cikone orhasegezagya obwenge bwawe kw’ezo ntanya. Hano hagera nsiku, oburhe bwawe bwanapunguka. Orhavunikaga omurhima n’oko kurhakubulisagya obushagaluke. Oshagalukire akasanzi kinja rhwagezize haguma omu mukolo gwa Yehova. Okukengera ebintu byagezire luli luhembo lurhenga emwa Nnamahanga.” K’orhayumvirhi oku eryo lyali ihano linja?

8. Gurhi oyo mwali wirhu ayungusire n’ihano iba amuhâga?

8 Oyo mwali wirhu akulikira er’ihano iba amuhâga. Agendekera akolera Yehova n’obwishwekerezi kuhika erhi afâ oku myaka 92. Myaka misungunu embere oyo mwali wirhu afê aderha ntya: “Erhi nkengera emyaka 63 nagezize omu mukolo gw’akasanzi koshi nambone oku nal’igwerhe akalamo kw’omwishingo bwenene.” Bulya gurhi aderhaga ntyo? Ahugwîre erhi: “Ebirhuma omuntu aba n’omwishingo ciba cinyabuguma rhujira haguma na bene wirhu n’obulangalire bwirhu bw’okuyishilama haguma na bene wirhu na bali birhu omu paradizo na ntyo rhwayishikolera Omulemi wirhu, Nnamahanga muguma w’okuli, emyaka n’emyaka.” * Olo luli lwiganyo lwinja bwenene lw’omuntu wasegezagya amasu gage embere oku mango gayisha!

 OMURHEGO GW’OKUBIKA AKARHINDA

9. Nk’oku biyerekinwe omu Bene-Levi 19:18, mangaci rhuyumva kurhali kulembu okurhabika akarhinda?

9 Osome Bene-Levi 19:18. Kurhaba kulembu okurhabika akarhinda erhi akaba omuntu warhujiriraga kubi ali mwîra wirhu, mwene wirhu w’omu mulala erhi wirhu Mukristu. Kwa lwiganyo, mwali wirhu muguma owabo amushobeka oku anamuzimbire ensaranga. Buzinda, oyo mwali wirhu washobekanâga ayisha ahûna obonjo, cikone oyo mwali wirhu washobekagwa agendekera arhanya kw’ebyo. Ka hali amango okola ociyumvirhe ntyo? Ciru akaba rhurhasag’ija omu kanga ka ntyo, byanahashikana banji muli rhwe bakola babisire akarhinda n’okuyumva nka barhakayibagira oku babajirirâga.

10. Bici byakarhurhabala erhi rhwakaciyumva rhubisire akarhinda?

10 Bici byakarhurhabala erhi rhwakaciyumva rhubisire akarhinda? Burhangiriza, okakengera oku Yehova anabone ebintu byoshi. Anabone ngasi byoshi rhuli rhwageramwo, ciru n’amango abantu barhujirire omu njira y’okubula obushinganyanya. (Hb. 4:13) Anaciyumve kubi erhi akabona rhuli rhwalibuka. (Iz. 63:9) Na kandi alaganyize oku eyishikula ngasi bubî boshi na ngasi bubule bw’obushinganyanya rhuli rhwakolerwa mwakano kasanzi.​—Maf. 21:3, 4.

11. Bunguke buci rhwakaba nabo erhi rhwakaleka okubika akarhinda?

11 Na kandi rhukwanine rhukengere oku erhi rhwakaleka okubika akarhinda, rhwanayunguka bwenene. Ntyo kw’olya mwali wirhu washobekagwa ayishir’ihikira aha ahugûkwa. Erhi hagera nsiku, aleka okubika akarhinda. Ahikira aha ahugûkwa oku erhi rhwakakababalira abandi, Yehova naye anarhubabalira. (Mt. 6:14) Ahugûkwa oku kobinali oyo wundi mwali wirhu anamushobesire bwenene, cikone ahîga oku arhamubikire akarhinda. Oyo mwali wirhu agendekera aba n’omwishingo anasegeza obwenge bwage omu kujira omukolo gwa Yehova.

OMURHEGO GW’OKUKACITUMUZA OKURHALUSIRE OLUGERO

12. Bici olwandiko lwa 1 Yowane 3:19, 20 lurhuyeresire?

12 Osome 1 Yowane 3:19, 20. Entanya z’okucitumuza kantu kalebe zinarhuhikire mango oku gandi. Kwa lwiganyo, bantu banji banacitumuze lugenda ebintu bajirâga amango barhalicimanya okuli. Abandi banacitumuze ebintu bajirâga enyuma z’okubatizibwa. (Rm. 3:23) Kobinali, rhunalonze okujira ebishinganine erhi ebiri binja, cikone “rhweshi rhweshi rhunahabuke kanji.” (Yk. 3:2; Rm. 7:21-23) Ciru akaba rhurhashagalukira okucitumuza kantu kalebe, cikone oko kwanarhulerhera bunguke bulebe. Bulya gurhi rhudesire ntyo? Bulya okucitumuza kantu kalebe kwanarhurhabala rhukubule olugenzi lwirhu n’okuhîga okurhacigalukira eco caha.​—Hb. 12:12, 13.

13. Bulya gurhi rhukwanine rhuyake okucitumuza kurhalusire olugero?

13 Haligi agandi mango rhugendekera rhwacitumuza okurhalusire olugero, kandi erhi kugendekera rhwacitumuza bintu bilebe n’obu rhwabihungamire na Yehova ayerekana oku arhubabalire. Oko kucitumuza kwa ntyo kwanaba kubi bwenene. (Enna. 31:10; 38:3, 4) Bulya gurhi? Rhuganirire olwiganyo lwa mwali wirhu muguma wagendekeraga acitumuza ebyaha ajirâga omu mango gageraga. Adesire ntya: “Nakarhanya oku ntashinganini okucihâna omu mukolo gwa Yehova bulya ntashinganini okuyishicunguka.” Bantu banji muli rhwe banaciyumve ak’oyo mwali wirhu. Kuli kwa bulagirire rhuyake omurhego gw’okucitumuza okurhalusire olugero. Orhanye kunganaci Shetani akashagaluka erhi rhwakakacitumunza mpu rhurhashinganini okukolera Yehova n’obu acirhuzigire!​—Oshushanye n’olwandiko lwa 2 Abakorinti 2:5-7, 11.

14. Gurhi rhwakamanyamwo oku Yehova acirhuzigire?

14 Cikone rhwanacidosa ntya: ‘Gurhi nakamanyamwo oku Yehova acinzigire?’ Okucidosa ir’idoso kuyerekine oku Yehova anarhubabalira.  Hakola hali myaka minji, Ilabiro ly’Akalalizi lidesire ntya: “[Rhwanahikira] aha rhwahabuka kanji-kanji n’okuja omu nkomêdu mbi rhwakag’ijira amango ga geraga. . . . Cikone oko kurharhumaga rhwarha. Orhahikiraga aha warhanya mpu wajijire ecaha cirhakababalirwa. Ntyo kwo Shetani alonza mpu orhanye. Oko kucitumuza ntyo kuyerekine oku orhashagalukiri amabi na Yehova anakubabalira. Obe mwirhohye ohûne Nnamahanga obonjo akurhabale obe n’ezamiri nyinja na ntyo oyake okucibija mw’eco caha. Okamuyegera nka kula omwana ayegera ishe nk’ali omu mazibu, wanajira ntyo burhahusa ciru akaba galya magosa go na galya gw’oli wamuhûna kw’obonjo. Yehova akurhabala n’okugendekera akuyereka olukogo lwage rhurhashinganini.” *

15-16. Gurhi bantu banji bahikîre okuciyumva erhi bahugûkwa oku Yehova acibazigire?

15 Bahamirizi ba Yehova banji bayishir’ihikira aha bayemera n’obwalagale oku Yehova acibazigire. Kwa lwiganyo, omu myaka minji egezire mwene wirhu muguma ashagalukire emyanzi yâli omu cigabi cal’idesire “Biblia Inabadili Maisha.” Muli eco cigabi, mwali wirhu muguma ayerekine gurhi agwerhe amazibu gw’okuyemera oku Yehova anamuzigira enyanya z’akalamo kage ka mîra. Agendekera aba n’ezo ntanya myaka minji ciru n’enyuma z’okubatizibwa. Cikone, erhi arhanya bwenene okubiyerekire engombôlo, ahugûkwa kunganaci Yehova aba amuzigire. *

16 Gurhi ebyo mwali wirhu acibwinire byarhabire oyo mwene wirhu? Oyo mwene wirhu ayandika ntya: “Amango naciri musole nakag’ija kanji-kanji omu murhego gw’okulola enfoto ziyerekine eby’enshonyi, na kandi kwali kuzibu bwenene okuleka eyo nkomêdu. Omu mango gagezire nacib’ija mw’ogo murhego. Najihûna oburhabale emw’abagula, bantabala nahima ago mazibu. Abagula banyemeza n’obwalagale oku Yehova aba wa bonjo bunji n’obuzigire. Cikoki, hali amango nciyumva nka ndi wa busha bwenene na Yehova arhakanzigira. Okusoma [ebi oyo mwali wirhu] abwine byarhabala bwenene. Ene, nkolaga mpugûsirwe oku erhi nakakarhanya mpu nkaba Nnamahanga arhambabalirâga nanaba ndi nagayaguza obuhashe  bw’engombôlo bw’okubabalira ebyaha. Natwa ako karatasi k’ali kw’ogo mwanzi guganirire akalamo kw’oyo mwali wirhu lyo nkakasoma ngasi mango n’okurhanya bwenene kuli kwo amango namayumva entanya z’okuciyumva wabusha.”

17. Gurhi Paolo ayasiremw’omurhego gw’okucitumuza okurhalusire olugero?

17 Ebyo bene wirhu babwine birhukengezize entumwa Paolo. Embere abe Mukristu, ajijire byaha binji bwenene. Paolo akagikengera abyaha byage, cikone arhakagibisegezakw’obwenge. (1 Tm. 1:12-15) Ahugûkwa oku Yehova anamubabalira kugerera engombôlo yahânagwa enyanya zage. (Gl. 2:20) Paolo ayaka omurhego gw’okucitumuza okurhalusire olugero omu kugendekera asegeza obwenge bwage oku mukolo gwa Yehova n’okugendekera embere.

OSEGEZE OBWENGE BWAWE OKU MANGO GAYISHA!

Rhweshi rhuhige okusegeza amasu girhu oku mango gayisha (Olole ecifungo ca 18-19) *

18. Bici rhwayizire mw’eci cigabi?

18 Bici emirhego rhwaganîriraga mw’eci cigabi yarhuyigirizize? (1) Obuhashe bw’okukengera ebintu binja byagezire luba luhembo lurhenga emwa Yehova; cikone ciru akaba rhwal’ilamire akalamo kinja amango gageraga, omw’igulu lihyahya akalamo kirhu kaba kinja bwenene. (2) Abandi banarhushobeka erhi kurhugayisa, cikone erhi rhwakahîga okubabalira, rhwanaba n’obuhashe bw’okusegeza obwenge bwirhu oku mukolo gwa Yehova. (3) Okucitumuza okurhalusire olugero kwanarhuma rhwayabirwa okukolera Yehova n’omwishingo. Aka Paolo, rhushinganine rhuyemere n’obwalagale oku Yehova arhubabalire.

19. Gurhi rhumanyiremwo oku omw’igulu lihyahya rhurhakacikengera ngasi kantu kali karhugayisa ene?

19 Rhugwerhe obulangalire bw’okulama emyaka n’emyaka. Hano rhuja omw’igulu lihyahya, rhurhakacikengera ngasi kantu kali karhugayisa ene. Okubiyerekire oko kasanzi, Ebibliya edesire ntya: “Barhakacikengera ebyagezire.” (Iz. 65:17) Orhanye hisungunu: Banji muli rhwe bashosehalîre omu mukolo gwa Yehova, cikone omw’igulu lihyahya bacib’iba misole. (Ayu. 33:25) Co cirhumire, rhweshi rhuhige okurhasegeza obwenge bwirhu oku bintu byagezire. Rhugendekere rhwaseza amasu girhu oku kalamo kali embere zirhu!

LWIMBO 142 Kushikilia Tumaini Letu

^ kip. 5 Kwanaba kwinja okukengera ebintu byarhuhikîre omu mango gageraga. Cikone erhi rhwakagendekera rhwarhanya bwenene oku bintu byarhuhikîre omu mango gageraga, oko kwanarhuma rhurhacirhanye oku bindi bintu by’obulagirire erhi rhubule burhanya oku mango minja gayisha. Eci cigabi caganirira mirhego isharhu yakarhuma rhwarhanya bwenene oku bintu byagezire. Rhwaganirira gurhi amakanuni g’Ebibliya n’enyiganyo za bene wirhu ba mwakano kasanzi kirhu zakarhurhabala rhuyake eyo mirhego.

^ kip. 4 AMAHUGÛLO GA NDERHO NGUMA NA NGUMA: Mw’eci cigabi oluderho “kugendekera rhwarhanya oku bintu byagezire” luhugwîre okukagendekera kwarhanya n’okuganirira akalamo rhwal’ilamire n’okulonza okurhanya oku kwo kâli kinja kulusha.

^ kip. 14 Olole Ilabiro ly’Akalalizi, ly’omu nsiku 15/6/1954, buk. 185 (omu Cifaransa).

^ kip. 59 AMAHUGÛLO G’ENFOTO: Okucifinja akalamo kirhu ka mîra, okubika akarhinda n’okukacitumuza okurhalusire olugero biba nka mizigo mizibu bwenene rhuli rhwabulula yakarhuhanza okulambagira omu njira y’okuja ebwa buzine.

^ kip. 66 AMAHUGÛLO G’ENFOTO: Erhi rhurhula entanya ziri nka mizigo, rhunarhamuke n’okuba n’omwishingo na ntyo rhunabe n’emisi mihyahya. Muli oko rhwanaba n’obuhashe bw’okuseza amasu girhu oku mango gayisha.