Gue na tënë ti yâ ni

Gue na li ti atënë ni

 LEGE TI DUTI NA NGIA

Duti na beku

Duti na beku

“Mbi pensé ti mû na ala siriri, me ye ti vundu pëpe, ti mû na ala mbeni nzoni gigi ti kekereke nga na beku.”​Jérémie 29:11.

 “BEKU AYEKE . . . KOTA YE MINGI TONGANA ZO AYE TI DUTI NA NZONI SONGO NA NZAPA,” so ayeke tënë so mbeni mbeti (Hope in the Age of Anxiety) atene la. A kiri atene: “Tongana zo ayeke na beku, a yeke aidé lo mingi ti pensé ape so lo yeke na ngangu ti sara mbeni ye ape, lo yeke gï lo oko, nga a yeke aidé lo ti sara mbeto ape.”

Bible afa so e azo e bezoin ti duti na beku, me a fa nga so a lingbi e handa terê ti e ape ti zia bê ti e na ndö ti ambeni ye. Psaume 146:3 atene: “Zia bê ti mo na ndö ti amokonzi wala na ndö ti mbeni molenge ti zo pëpe, so lo lingbi ti sö zo pëpe.” Ahon ti zia bê ti e na azo ti tene ala sö e, a yeke nzoni e zia bê ti e na Zo so aleke e, so ayeke na ngangu ti sara si azendo ti lo aga tâ tënë. Zendo wa la lo mû na e? Bâ ambeni zendo so lo mû la.

ASIONI YE AYEKE HUNZI ANDE; NA AZO TI MBILIMBILI AYEKE DUTI NA SIRIRI TETI LAKUE LAKUE: Mbeti ti Psaume 37:10, 11 atene: “Na yâ ti kete ngoi, azo ti sioni ayeke duti dä encore ape . . . Me azo so asara terê ti ala kete, sese ayeke ga ye ti ala, na ala yeke duti na ngia mingi na yâ ti siriri so amû ndo.” Na versê 29 atene so “azo ti mbilimbili . . . [ayeke] ngbâ na ndö [ti sese] lakue lakue.”

BIRA AYEKE HUNZI ANDE: “Jéhovah . . . [ayeke] sara si abira ahunzi na ndö ti sese kue. Lo fâ yâ ti kokora, nga lo fâ yâ ti likongo kete kete; lo zö apuse ti mbarata ti sarango na bira.”—Psaume 46:8, 9.

KOBELA, PASI NGA NA KUÂ AYEKE DUTI ANDE DÄ APE: “Tente ti Nzapa ayeke na azo . . . Lo yeke mbô ande ngu ti lê kue na lê ti ala, kuâ ayeke duti ande dä mbeni pëpe; mua, wala toto, wala pasi ayeke duti dä mbeni pëpe.”—Apocalypse 21:3, 4.

KOBE AYEKE DUTI ANDE DÄ MINGI NDALI TI AZO KUE: “Alê ti kobe ayeke dü mingi na ndö ti sese; a yeke sigi gbani gbani na li ti ahoto.”—Psaume 72:16.

ROYAUME TI CHRIST LA AYEKE DUTI ANDE OKO GOUVERNEMENT SO AYEKE KOMANDE DUNIA KUE: “A mû na [Jésus Christ] komandema, nengo nga na royaume tongaso si azo nde nde, azo ti amara nde nde nga na ti ayanga ti kodro nde nde, ala kue asara kua na lo. Komandema ti lo so ayeke ti lakue lakue ayeke hon lâ oko pëpe, nga a yeke futi royaume ti lo pëpe.”—Daniel 7:14.

Nyen la alingbi ti mû lege na e ti zia bê ti e na azendo ni so? Na ngoi so Jésus ayeke lani na sese, aye so lo sara afa so lo lingbi biani ti duti Gbia ti Royaume ti Nzapa. Lo sava lani azo ti kobela, lo mû kobe na awayere nga lo zingo akuâ. Ye so ayeke kota ye mingi ayeke afango ye ti lo, so na yâ ni a yeke wara amama-ndia so alingbi ti mû lege na azo ti duti na siriri nga ti duti beoko teti lakue lakue. Jésus afa nga lani aye so ayeke si na lâ ti nda ni.

KOTA PUPU AYA, NA PEKONI NDO ADË

Jésus atene lani kozo awe so na ngoi ti lâ ti nda ni siriri nga na nzoni duti ayeke duti dä ape. Lo fa aye so ayeke fa so e yeke na “ngoi so aye ti ngoi so ayeke gue ti hunzi,” na popo ni lo sara tënë ti abira so amû ndo, kota nzara, asioni kobela nga na sese so ayeke yengi ngangu (Matthieu 24:3, 7; Luc 21:10, 11; Apocalypse 6:3-8). Jésus atene nga atene: “So kpengo ndia pëpe ayeke wu mingi, ndoye ti mingi ti azo ni ayeke dë dengo.”—Matthieu 24:12.

Azo afa so ala sara ye na ndoye ape na alege mingi, tongana ti so mbeni oko ti azo so asû Bible afa ni kozo awe. Na 2 Timothée 3:1-5, a tene so “na lâ ti nda ni,” azo ayeke ndoye gï terê ti ala wani, ala yeke ndoye nginza nga na angia. Azo ayeke duti azo ti baba, nga asioni zo. Na yâ ti asewa, azo ayeke ye amba ti ala ape, nga amolenge ayeke mä yanga ti ababâ na amama ti ala ape. Azo ayeke handa lê ti amba ti ala ti fa so ala voro Nzapa na bê kue.

Asioni sarango ye so, so ayeke tongana kota pupu so, afa biani so e yeke na lâ ti nda ni. Aye ni so afa nga biani so Royaume ti Nzapa, so ayeke sara si ndo adë, aga nduru ti komande sese awe. Me, na yâ ti prophétie so Jésus afa na ndö ti lâ ti nda ni, lo fa mbeni ye so adë bê ti zo, lo tene: “A yeke fa ande nzoni tënë ti Royaume na ndö ti sese kue so azo ayeke dä tongana mbeni tënë ti témoin ndali ti amara kue. Na pekoni, nda ni ayeke ga.”—Matthieu 24:14.

A yeke fa nzoni tënë ni so ti gboto mê ti azo so ayeke sara ye na lege ni ape nga ti mû beku na azo ti mbilimbili, na fango na ala so azendo so Nzapa amû aga nduru ti ga tâ tënë awe. Eskê mo ye ti hinga ye mingi na ndö ti aye ti nzoni so ayeke ga ande so? Tongana a yeke tongaso, e wa mo ti diko tënë so ayeke na peko ti mbeti so.