Gue na tënë ti yâ ni

Gue na li ti atënë ni

Aita-koli so ayeke ambakoro: Jéhovah abâ dutingo be-ta-zo ti ala na nene ni mingi

Aita-koli so ayeke ambakoro: Jéhovah abâ dutingo be-ta-zo ti ala na nene ni mingi

NA YÂ ti dunia kue, a-ancien abâ na nene ni mingi akua so ala yeke sara na popo ti awakua ti Nzapa. Ala yeke tâ mbeni tufa ndali ti e kue. Me ade ti ninga mingi ape a sara mbeni changement. A hunda na a-ancien so ayeke ambakoro ti zia ambeni kota kua so ala yeke sara na a-ancien so angbâ ngangu. A yeke akua wa?

Fini ye so a leke ni ayeke so, a hunda na asurveillant ti circonscription nga na aita-koli so ayeke fa ye na a-ekole ti bungbi ti Jéhovah ti zia kua ni tongana ala wara ngu 70 awe. Nga, a-ancien so ayeke na ngu 80 ayeke zia ambeni kua so ala yeke sara na a-ancien so angbâ ngangu, a yeke akua tongana kua ti coordinateur ti Komite ti filiale wala kua ti coordinateur ti bungbi ti a-ancien. Aita so e ye ala mingi so asara ye lani tongana nyen na gbele changement so? Ala fa lani so ala yeke be-ta-zo na Jéhovah nga na bungbi ti lo.

Ken, so ayeke lani coordinateur ti mbeni Komite ti filiale teti ngu 49 tongaso, atene: “Mbi yeda lani na desizion so na bê ti mbi kue. Biani, na ndapre so afa na mbi desizion ni, mbi sambela Jéhovah kozo awe, mbi fa na lo so e yeke na bezoin ti mbeni ita-koli so angbâ ngangu ti sara kua tongana coordinateur.” Sarango ye ti Ken so  afa tâ gï tënë so ayeke na bê ti a-ancien kue so ayeke ambakoro na yâ ti dunia kue. Biani, so ala ye mingi ti sara kua ndali ti aita ti ala, na tongo nda ni a nzere kue na ala ape.

Esperandio, so ayeke lani coordinateur ti bungbi ti a-ancien ti congrégation ti lo, atene: “Vundu asara mbi lani kete.” Me lo tene: “Mbi yeke lani na bezoin ti wara ngoi ti bâ lege ti seni ti mbi so ayeke nzoni ape.” A dö bê ti e ape so Esperandio angbâ ti sara na Jéhovah be-ta-zo nga lo ngbâ ti duti mbeni tufa ndali ti congrégation ti lo.

Ka ti asurveillant so ague na ando nde nde teti angu mingi so ayeke sara fadeso ambeni kua nde ayeke tongana nyen? Allan, so asara kua ti surveillant so ague na ando nde nde teti ngu 38, atene: “Na ngoi so a fa na mbi desizion ni, li ti mbi akpe kue.” Me lo bâ nzoni ti fango kua na aita-koli so angbâ ngangu ti sara kua ni, na lo ngbâ ti sara na Jéhovah be-ta-zo.

Russell, so teti ngu 40 lo sara kua ti surveillant so ague na ando nde nde nga lo fa ye na a-ekole ti bungbi ti Jéhovah, atene so na tongo nda ni vundu asara lo na wali ti lo. Lo tene: “E ye kua ti e mingi nga e bâ so e yeke na ngangu ti ngbâ ti sara kua ni.” Russell na wali ti lo ayeke sara kua fadeso na aye so a fa na ala nga na aye so ala hinga na yâ ti congrégation ti ala, na a sara si awafango tënë so ala na ala ayeke sara kua ayeke na ngia.

Même tongana ade mo wara mara ti pensé ti aita so a sara tënë ti ala so ape, peut-être mbeni mbaï so ayeke na 2 Samuel ayeke mû maboko na mo ti comprendre ala.

MBENI KOLI SO ABÂ TERÊ TI LO KETE NGA SO AYEKE NA NZONI BANGO NDO

Kiri mo gbu li ti mo na ndö ti ngoi so Absalom, molenge ti Gbia David, asara lani kpengbango-li na lo. David akpe Jérusalem lo gue na Mahanaïm, na mbage ti est ti Ngu ti Jourdain. Kâ, David na azo so ayeke na terê ti lo ayeke lani na bezoin ti ambeni ye so ayeke akota ye. Mo dabe ti mo na ye so apassé lani?

Akoli ota ti ndo ni, so ayeke na nzoni bê, aga na ala agbogbo, akobe nde nde nga na ambeni ye so ala bezoin ni. Barzillaï ayeke lani mbeni oko ti akoli so (2 Sam. 17:27-29). Na ngoi so a kanga lege na kpengbango-li ti Absalom ni, David alingbi fadeso ti kiri na Jérusalem na Barzillaï azia lo na lege na yanga ti Ngu ti Jourdain. David awa lo ti gue na Jérusalem. David atene na lo so ni ye ti mû na lo kobe ndali ti nzoni so lo sara lani na ni, atâa so Barzillaï ayeke lani “kota zo ti mosoro” nga lo yeke lani na bezoin ti kobe so David aye ti mû na lo so ape (2 Sam. 19:31-33). Me âmanke David aye lani mingi apendere sarango ye ti Barzillaï nga lo ye ti tene Barzillaï aduti nduru na lo ti mû na lo anzoni wango. Biani a yeke lani mbeni pendere pasa tongana Barzillaï aduti lani na yangbo ti gbia nga lo sara kua kâ.

So Barzillaï ayeke na nzoni bango ndo nga lo bâ terê ti lo kete, lo fa na David so lo yeke na ngu 80. Na pekoni, lo tene: “Mbi lingbi ti kangbi popo ti nzoni ye na sioni ye?” Lo ye ti tene nyen la? Barzillaï adoit lani ti wara ndara ndali ti so lo te gigi aninga. Nga lo lingbi lani ti ngbâ ti mû anzoni wango gï tongana ti so ambeni ngoi  na pekoni “a-ancien” asara lani na Gbia Roboam (1 aGbia 12:6, 7; Ps. 92:12-14; aProv. 16:31). Tongaso, peut-être tënë so Barzillaï atene na ndö ti kangbingo popo ti nzoni ye na sioni ye aye ti fa so lo lingbi pëpe ti sara ambeni ye ndali ti so lo ga mbakoro awe. Lo tene so mbakoro asara si lo lingbi pëpe ti hinga nzerengo ti kobe nga ti mä ndo nzoni (Zo-ti. 12:4, 5). Ni la Barzillaï wani awa David ti mû Kimham, so âmanke lo yeke molenge ti lo ti koli, ti gue na lo na Jérusalem.—2 Sam. 19:35-40.

LEKENGO YE NDALI TI KEKEREKE

Barzillaï ake pasa so lo wara ndali ti so lo yeke mbakoro na afa so lo yeke na nzoni bango ndo. Changement so a sara tënë ni na tongo nda ti article so aluti na ndö ti mara ti raison so. Tongaso, na ngoi ti e, ye so ayeke kota ye ti bâ ni ayeke gï pëpe dutingo ti mbeni zo nga na akode ti lo, tongana ti Barzillaï lani. A bezoin lani ti gbu li na ndö ti ye so ayeke nzoni mingi ndali ti aita-koli so ayeke be-ta-zo so ayeke sara kua ti ancien na yâ ti dunia kue.

Aita-koli so ayeke ambakoro, so asara terê ti ala kete, alingbi ti bâ hio so bungbi ti Jéhovah ayeke kpengba nga ayeke maï na yâ ti angoi so ayeke ga tongana a mû akua so ala yeke sara teti ngu mingi na aita-koli so angbâ ngangu. Mingi ni, aita-koli mbakoro ni la afa ye na aita-koli so angbâ ngangu, tongana ti so âmanke Barzillaï afa ye na molenge ti lo ti koli nga bazengele Paul afa ye na Timothée (1 aCor. 4:17; aPhil. 2:20-22). Aita-koli so angbâ ngangu afa so ala yeke fadeso ‘akoli so a mû ala tongana amatabisi’ so alingbi ti mû maboko “ti leke terê ti Christ”.—aÉph. 4:8-12; bâ Nombre 11:16, 17, 29.

ALEGE NDE NDE SO AZI TI SARA KUA TI NZAPA

Azo mingi na yâ ti bungbi ti Jéhovah so ayeda ti tene a mû ambeni kua ti ala na ambeni zo alingbi ti wara ambeni fini lege ti sara ambeni kua wala ti kono yâ ti kua so ala yeke sara na Jéhovah.

Marco, so asara lani kua ti surveillant so ague na ando nde nde ngu 19, atene: “Fini dutingo ti mbi amû lege na mbi ti gi ti mû maboko na akoli ti aita-wali so ayeke aTémoin ape na yâ ti congrégation ti e.”

Geraldo, so asara kua ti surveillant so ague na ando nde nde ngu 28, atene: “Ambeni fini ye so e zia na gbele e ayeke ti mû maboko na aita so ayeke fa tënë encore ape nga ti manda Bible na azo mingi.” Lo tene so lo na wali ti lo ayeke manda Bible na azo 15 nga gbâ ti aita so ayeke fa tënë encore ape ayeke ga fadeso na abungbi.

Allan, so a sara tënë ti lo fade, atene: “Fadeso e lingbi ti mû ngoi mingi ndali ti ambage nde nde ti kua ti fango tënë. A nzere na e mingi ti fa tënë na ando so azo ayeke hon dä mingi, ando ti dengo buze nga ti fa tënë na avoizin ti e, na use na popo ti ala aga na Da ti Royaume.”

Tongana mo yeke mbeni ita-koli so ayeke mbakoro so alingbi nga so ayeke be-ta-zo nga a mû na mo mbeni fini kua na popo ti awakua ti Nzapa, mbeni mbilimbili lege ti tene mo mû maboko ayeke dä. Mo lingbi ti mû maboko na kua ti Jéhovah na lege so mo fa na aita-koli so angbâ ngangu na yâ ti congrégation aye so mo hinga so alingbi ti mû maboko na ala mingi. Russell, so a sara tënë ti lo fade, atene: “Jéhovah ayeke fa ye na aita-koli so angbâ ngangu so ayeke na apendere kode nga lo yeke sara kua na ala. Sewa ti e ti aita ti dunia kue ayeke bâ nzoni na lege ti apendere fango ye ti ala nga na avizite so ala yeke sara na aita ti kpengba ala na lege ti yingo.”—Bâ encadré “ Mû maboko na aita-koli so angbâ ngangu ti sara kua nzoni na akode ti ala.”

JÉHOVAH ABÂ NA NENE NI MINGI DUTINGO BE-TA-ZO TI MO

Tongana ade ti ninga ape a changé kua ti mo, ngbâ ti duti na nzoni bango ndo. Kua so mo sara lani na bê ti mo kue andu bê ti azo mingi awe, na mo lingbi ti ngbâ ti sara tongaso. Kite ayeke dä ape so azo aye mo na ala yeke ngbâ ti ye mo.

Kota ye ni ayeke so Jéhovah ayeke ngbâ ande ti bâ na nene ni mingi kua so mo sara. Lo lingbi pëpe ti ‘girisa kusala ti mo nga na ndoye so mo fa ndali ti iri ti lo na lege so mo sara kua na azo ti be-vulu na mo ngbâ ti sara kua na ala.’ (aHéb. 6:10). Versê so a sû na gbe ti yingo ti Nzapa so adë  bê ti e kue so zendo so abâ gï pëpe aye so e sara ândö. Jéhovah aye tâ mo mingi na lo lingbi pëpe ti girisa angangu so mo sara lani nga na ti so mo ngbâ ti sara fadeso ti zia ngia na bê ti lo.

Ka tongana mo yeke pëpe mbeni zo so a changé kua ti lo tongana ti so e sara tënë na ndö ni so? Tënë so alingbi nga ti ndu mo tongana nyen?

Tongana mo yeke sara ka lisoro na mbeni ita-koli mbakoro so a changé kua ti lo, so lo yeke biazo nga lo hinga aye mingi na yâ ti angu mingi, mo lingbi ti bâ nzoni dä. Hunda wango na lo. Hunda na lo ti fa na mo ambeni ye so mo lingbi ti sara. Nga bâ tongana nyen la lo yeke sara kua na aye so lo hinga na yâ ti fini kua ti lo.

Atâa mo yeke mbeni mbakoro so a changé kua ti mo wala mo yeke mbeni ita-koli wala mbeni ita-wali so alingbi ti bâ nzoni na lege ti akode ti mbeni mbakoro, girisa ape so Jéhovah abâ na nene ni mingi azo so asara na lo be-ta-zo teti angu mingi na so angbâ ti sara ni.