Gue na tënë ti yâ ni

Gue na li ti atënë ni

Kangango nzara ti bê: E bezoin ni ti zia ngia na bê ti Jéhovah

Kangango nzara ti bê: E bezoin ni ti zia ngia na bê ti Jéhovah

“Na ngoi so mbeni ita ti mbi akomanse ti tiri na mbi, mbi gbu go ti lo nga mbi komanse ti pete ni. Mbi ye lani ti fâ lo.”—Paul.

“Na yanga-da, mbi yeke sara ngonzo hio hio mingi. Mbi yeke fâ yâ ti aye ti yâ ti da, ajouet wala ye kue so ayeke na maboko ti mbi.”—Marco.

Peut-être e yeke sara mara ti ye tongaso ape. Ye oko, na ambeni ngoi a yeke ngangu na e kue ti kanga nzara ti bê ti e. Kozoni kue a yeke ndali ti so a dü e dungo na nzara ti sarango siokpari, e wara nzara ni so na lege ti kozo koli, Adam (aRom. 5:12). Tongana ti Paul na Marco, a yeke ngangu na ambeni zo ti kanga ndö ti ngonzo ti ala. Peut-être ti ambeni zo, a yeke ngangu na ala ti sara hange na aye so ala yeke pensé na ndö ni. Na tapande, ala yeke pensé gï na aye so amû mbeto na ala wala aye so asara si ala découragé. Ti ambeni zo nde, peut-être a yeke ngangu na ala ti dö sese na nzara ti sarango lango-sioni, ti nyongo sämba ahon ndö ni wala ti nyon kirikiri ambeni ye so alingbi ti tourné li ti zo.

Azo alingbi ti buba gigi ti ala tongana ala sara hange pëpe na aye so ala pensé na ni, anzara ti bê ti ala nga na asarango ye ti ala. Me e lingbi ti kpe mara ti ye tongaso. Na lege wa? Na lege so e gi ti kanga nzara ti bê ti e. Ti mû maboko na e ti sara ni, zia e kiri tënë na ahunda ota so: (1) Ti kanga nzara ti bê aye ti tene nyen? (2) Ngbanga ti nyen la e bezoin ni? (3) Tongana nyen la e lingbi ti gi ti duti na sarango ye so, so ayeke mbage ti “lengo ti yingo”? (aGal. 5:22, 23). Na pekoni, e yeke bâ nyen la e lingbi ti sara tongana na ambeni ngoi e kanga nzara ti bê ti e ape.

TI KANGA NZARA TI BÊ AYE TI TENE NYEN?

Zo so akanga nzara ti bê ti lo ayeke sara gï hio ape ye kue so bê ti lo apusu lo ti sara sân ti leke ni kozo. Me lo yeke sara hange ti sara pëpe mbeni tënë wala mbeni ye so ason bê ti Nzapa.

Jésus afa polele ye so kangango nzara ti bê aye ti tene

Jésus afa na e ye so aye ti tene ti kanga nzara ti bê. Bible atene: “Tongana a yeke zonga lo, lo kiri peko ti zonga ni pëpe. Tongana lo yeke bâ pasi, lo gi ti son na ndö ti zo pëpe, me lo ngbâ ti zia tënë ti lo kue na maboko ti Lo so ayeke fâ ngbanga mbilimbili.” (1 Pi. 2:23). Na ngoi so Jésus ayeke na ndö ti keke ti pasi, lo kanga lani nzara ti bê ti lo na ngoi so awato ti lo ahe lo (Mat. 27:39-44). Kozo na ngoi ni so, lo kanga nzara ti bê ti lo ngangu na ngoi so akota zo ti nzapa so ake lo agi ti gbu lo na lege ti tënë ti yanga ti lo (Mat. 22:15-22). Nga lo zia na e mbeni nzoni tapande mingi na ngoi so ambeni Juif so ngonzo agbu ala amû atênë ti bo na lo. Ahon ti kiri peko ti sioni so a sara na lo, “Jésus ahonde terê ti lo na lo sigi na yâ ti temple ni.”—Jean 8:57-59.

E lingbi ti mû tapande ti Jésus? Na yâ ti ambeni ye e lingbi ti sara ni. Bazengele Pierre atene: “Christ abâ lani pasi ndali ti ala, na lo zia na ala mbeni tapande si ala mû peko ti gere ti lo mbilimbili.” (1 Pi. 2:21). Atâa so e yeke mbilimbili-kue ape, e lingbi ti mû mbilimbili tapande ti Jésus so akanga nzara ti bê ti lo. Ngbanga ti nyen la a yeke kota ye ti sara ni?

 NGBANGA TI NYEN LA E BEZOIN TI KANGA NZARA TI BÊ TI E?

E bezoin ti kanga nzara ti bê ti e si e zia ngia na bê ti Jéhovah. Atâa tongana e sara na Jéhovah be-ta-zo teti ngu mingi, e lingbi ti girisa songo ti kamarade ti e na lo tongana e sara hange pëpe na ye so e sara nga e tene.

Gbu li na ndö ti Moïse, so ayeke lani “zo so asara terê ti lo kete mingi ahon azo kue na ndö ti sese.” (Nom. 12:3). Moïse akanga bê na adema ti azo ti Israël teti angu mingi, me mbeni lâ lo kanga nzara ti bê ti lo ape. Ngonzo asara lo na ngoi so ala kiri adema ndali ti so ngu ayeke dä ape. Lo son na ndö ti azo ni, lo tene: “Ala mä si, ala azo ti kpengba-li so! E doit ti sara si ngu asigi na yâ ti kota tênë so ndali ti ala?”—Nom. 20:2-11.

Moïse akanga nzara ti bê ti lo ape. Lo mû gonda pëpe na Jéhovah so amû na azo ni ngu na lege ti miracle (Ps. 106:32, 33). Ye ti peko ni ayeke so Jéhovah amû lege na lo pëpe ti lï na Sese ti zendo (Nom. 20:12). Juska ti si na ngoi so Moïse akui, peut-être lo regretté so lo kanga lani nzara ti bê ti lo ape.—Deut. 3:23-27.

Nyen la e lingbi ti manda dä? Atâa tongana e yeke na yâ ti tâ tënë aninga awe, a lingbi e tene lâ oko ape mbeni tënë so ane zo ape na azo so ason bê ti e wala azo so abezoin ti tene a kiri na ala na nzoni lege (aÉph. 4:32; aCol. 3:12). Tâ tënë, na ngoi so ngu ti e ayeke gue na li ni, na ambeni ngoi a yeke ngangu na e ti kanga bê. Me girisa ape tapande ti Moïse. E ye lâ oko ape ti buba nzoni iri ti e na gbele Jéhovah ndali ti so e kanga nzara ti bê ti e ape. Nyen la e lingbi ti sara ti gi ti duti na sarango ye so, so e bezoin ni so?

AYE SO E LINGBI TI SARA TI KANGA NZARA TI BÊ TI E

Sambela ti wara yingo vulu. Ngbanga ti nyen? Ngbanga ti so kangango nzara ti bê ayeke mbeni mbage ti lengo ti yingo ti Nzapa, nga Jéhovah ayeke mû yingo ti lo na azo so ahunda ni na lo (Luc 11:13). Jéhovah alingbi ti mû na e ngangu so e bezoin ni na lege ti yingo ti lo (aPhil. 4:13). Lo lingbi nga ti mû maboko na e ti maï ambeni mbage ti lengo ti yingo, na tapande ndoye so ayeke sara si a yeke ngangu mingi na e ape ti kanga nzara ti bê ti e.—1 aCor. 13:5.

Kpe ye kue so alingbi ti sara si a yeke ngangu na mo ti kanga nzara ti bê ti mo

Kpe ye kue so alingbi ti sara si a yeke ngangu na mo ti kanga nzara ti bê ti mo. Na tapande, kpe asite Internet nga na angia so afa asioni sarango ye (aÉph. 5:3, 4). Ti tâ tënë ni, a lingbi e kpe ye kue so alingbi ti pusu e ti sara sioni ye (aProv. 22:3; 1 aCor. 6:12). Na tapande, mbeni zo so a yeke ngangu ape ti tene nzara ti bungbingo koli na wali  asara lo abezoin peut-être ti kpe abuku nga na afilm so asara tënë na ndö ti yengo terê ti koli na wali.

E lingbi ti bâ so a yeke ngangu ti sara ye alingbi na wango so. Ye oko, tongana e sara effort, Jéhovah ayeke mû na e ngangu so e bezoin ni ti kanga nzara ti bê ti e (2 Pi. 1:5-8). Lo yeke mû maboko na e ti sara hange na aye so e pensé na ni, atënë so e tene nga na aye so e sara. Ti fa so tënë so ayeke tâ tënë, Paul na Marco, so a sara fade tënë ti ala, amanda ti kanga ndö ti ngonzo ti ala. Gbu li nga na ndö ti tapande ti mbeni ita-koli so fani mingi ngonzo asara lo lani na terê ti ambeni mba ti lo so ayeke kpe na oto, lo papa même na ala. Nyen la lo sara ti hon ndö ti ngonzo ti lo? Lo tene: “Mbi sambela ngangu lâ na lâ. Mbi manda a-article na ndö ti kangango nzara ti bê nga mbi bata na li aversê ti Bible so alingbi ti mû maboko na mbi. Atâa so teti angu mingi mbi yeke gi ti kanga nzara ti bê ti mbi, lakue na ndapre mbi yeke dabe ti mbi so mbi ye ti gi ti duti kpô. Nga mbi yeke quitté yanga-da hio ti gue na ando so mbi leke ti gue dä tongaso si mbi sara ye na loro loro ape.”

TONGANA E KANGA NZARA TI BÊ TI E APE

Na ambeni ngoi, e yeke kanga ka nzara ti bê ti e ape. Tongana a si tongaso, peut-être kamene ayeke sara e mingi ti sambela Jéhovah. Me ge la e bezoin ti sambela mingi. Tongaso, sambela Jéhovah hio. Voro yanga na lo ti pardonné mo, gi mungo maboko ti lo nga leke na bê ti mo ti kiri ti sara oko faute so encore ape (Ps. 51:9-11). Jéhovah ayeke ke pëpe ti mä sambela so mo sara na bê ti mo kue ti tene lo sara nzoni bê na mo (Ps. 102:17). Bazengele Jean adabe ti e so mênë ti Molenge ti Nzapa “asukula e na a zi asiokpari kue awe.” (1 Jean 1:7; 2:1; Ps. 86:5). Girisa ape so Jéhovah ahunda na awakua ti lo ti pardonné mba fani mingi. Tongaso, e lingbi ti duti na confiance so lo yeke sara nga tongaso na e.—Mat. 18:21, 22; aCol. 3:13.

Moïse azia lani vundu na bê ti Jéhovah na ngoi so, teti mbeni ngoi, Moïse akanga nzara ti bê ti lo ape na yâ ti benyama. Ye oko, Jéhovah apardonné lani lo. Nga Bible afa so Moïse ayeke mbeni zo so ayeke be-ta-zo mingi so a lingbi e mû tapande ti lo (Deut. 34:10; aHéb. 11:24-28). Jéhovah amû lege pëpe na Moïse ti lï na Sese ti zendo, me lo yeke mû ande lege na lo ti duti na yâ ti Paradis na ndö ti sese nga lo yeke mû na lo pasa ti duti na fini ti lakue lakue. E lingbi ti duti na oko beku so tongana e sara ngangu ti duti na kangango nzara ti bê, so ayeke sarango ye so e bezoin ni.—1 aCor. 9:25.