Gue na tënë ti yâ ni

Gue na li ti atënë ni

 ARTICLE TI MANDANGO NI 18

‘Hunzi kpengo loro ni’

‘Hunzi kpengo loro ni’

“Mbi kpe loro ni ahunzi awe.”​—2 TIM. 4:7.

BIA 129 E yeke ngbâ ti gbu ngangu

AYE SO E YEKE BÂ NI *

1. A lingbi e kue e sara nyen?

ESKÊ mo yeke yeda ti sara mbeni mandako ti kpengo loro so mo hinga so ayeke ngangu, mbilimbili tongana terê ti mo ason wala mo fatigué? Peut-être mo yeke yeda ape. Ye oko, bazengele Paul atene so atâ Chrétien kue ayeke na yâ ti mbeni mandako ti kpengo loro (aHéb. 12:1). Na ndö ni, e kue, atâa e yeke maseka wala mbakoro, e yeke na ngangu wala e fatigué, tongana e ye ti wara futa so Jéhovah aye ti mû na e a lingbi e gbu ngangu juska na nda ni.—Mat. 24:13.

2. Tongana ti so 2 Timothée 4:7, 8 afa, ngbanga ti nyen la Paul alingbi ti sara lani tënë na kamene oko ape?

2 Paul asara lani tënë na kamene oko ape ndali ti so lo ‘kpe loro ni ahunzi’ nzoni. (Diko 2 Timothée 4:7, 8.) Me loro so Paul asara tënë ni ayeke lani mbilimbili loro wa?

KPENGO LORO WA LA E YEKE NA YÂ NI?

3. Kpengo loro wa la Paul asara tënë ni?

3 Na ambeni ngoi, Paul asara kua na ambeni ye so a yeke sara na ngoi ti angia so a sara na Grèce ti ândö ti fa akpengba ye ti manda (1 aCor. 9:25-27; 2 Tim. 2:5). Fani mingi, lo haka fini ti mbeni Chrétien na kpengo loro (1 aCor. 9:24; aGal. 2:2; aPhil. 2:16). Mbeni zo ayeke komanse ti “kpe loro” so na ngoi so lo mû terê ti lo na Jéhovah na lo wara batême (1 Pi. 3:21). Lo yeke hunzi loro ni na ngoi so Jéhovah ayeke mû na lo futa so ayeke fini ti lakue lakue.—Mat. 25:31-34, 46; 2 Tim. 4:8.

4. Nyen la e yeke bâ na yâ ti article so?

4 Ambeni ye wa la akpa terê na yâ ti kpengo loro so ayo nga na gigi ti mbeni Chrétien? Aye mingi ayeke dä so akpa terê. Zia e bâ ambeni ota. Kozoni, a lingbi e mû gï lege so a yeke kpe loro ni dä; use ni, a lingbi e zia li ti e na ndö ti place so mandako ni  ayeke hunzi dä; nga ota ni, a lingbi e hon ndö ti akpale so e yeke wara na ngoi ti loro ni.

MÛ GÏ LEGE SO A YEKE KPE LORO NI DÄ

E kue e doit ti mû lege so aChrétien adoit ti mû ti wara fini (Bâ paragraphe 5-7) *

5. Nyen la a lingbi e sara? Ngbanga ti nyen?

5 Ti tene azo ti kpengo loro awara futa ti ala, a lingbi ala mû gï lege so azo so a leke kpengo loro ni afa. Legeoko nga, tongana e ye ti wara futa ti fini ti lakue lakue, a lingbi e sara aye so a hunda na aChrétien ti sara (Kus. 20:24; 1 Pi. 2:21). Ye oko, Satan nga na azo so amû tapande ti lo aye ti tene e sara ye tongana aChrétien ape; ala ye ti tene e ‘ngbâ ti kpe loro na ala’. (1 Pi. 4:4). Ala yeke he fason so e yeke vivre na ni nga ala tene so fason so ala yeke vivre na ni ayeke nzoni mingi nga so asara si ala yeke na liberté. Me tënë ti ala ni ayeke gï mvene.—2 Pi. 2:19.

6. Nyen la mo manda na lege ti tapande ti Brian?

6 Azo kue so akpe loro legeoko na azo so dunia ti Satan asara ngangu na ndö ti ala ayeke bâ hio so lege so ala soro ague na ala na liberté ape; a gue na ala ti ga ngbâa (aRom. 6:16). Bâ tapande ti Brian. Babâ na mama ti lo awa lo lani ti sara ye tongana Chrétien. Me na ngoi so lo wara ngu bale-oko na ndö ni, lo yeke na kite so lege ni so ayeke sara si lo duti na ngia. Brian amû desizion ti kpe loro legeoko na azo so asara aye so Satan aye. Lo tene: “Mbi hinga lani ape so ye so azo apensé atene ayeke liberté, so mbi ye lani ti wara, asara si mbi ga ngbâa ti ambeni sioni ye. A si na mbeni ngoi, mbi ga ngbâa ti adrogue na ti sämba nga mbi sara lango-sioni. Teti angu mingi, yeke yeke mbi komanse ti nyon adrogue so ayeke sioni mingi nga mbi ga ngbâa ti adrogue mingi. . . . Mbi komanse ti kä adrogue ti mû lege na mbi ti ngbâ ti vivre tongaso.” Na nda ni, Brian asoro ti sara ye alingbi na aye so Jéhovah ahunda. Lo changé lege ti lo na lo wara batême na ngu 2001. Laso, a nzere na lo mingi so lo yeke sara aye so a hunda na aChrétien. *

7. Ti gue oko na Matthieu 7:13, 14, alege use wa la ayeke na gbele e?

7 A yeke kota ye mingi ti tene e soro nzoni lege so e ye ti mû. Satan aye ti tene e kue e zia ti kpe loro na ndö ti lege so lê ni ayeke kete so “ague na fini” e gue na ndö ti kota lege so mingi ti azo ti dunia so amû. Gbâ ti azo amû kota lege so nga a yeke ngangu ape ti hon na ndö ni. Me a yeke “gue na futingo”. (Diko Matthieu 7:13, 14.) Ti ngbâ na ndö ti nzoni lege ni nga ti zia pëpe si mbeni ye agboto lê ti e, a lingbi e zia bê ti e na Jéhovah nga e mä lo.

ZIA LÊ TI MO NA NDÖ TI KPENGO LORO NI

A lingbi e zia li ti e na ndö ti loro ni nga e sara pëpe si amba ti e apika gere ti ala (Bâ paragraphe 8-12) *

8. Tongana mbeni zo ti kpengo loro atï, nyen la lo yeke sara?

8 Azo so ayeke sara mbeni mandako ti loro so  ayo ayeke zia lê ti ala gï na ndö ti lege so ayeke tâ na devant ti ala tongaso si ala pika gere ti ala ape. Ye oko, na mbana ape, mbeni mba ti ala alingbi ti sara si ala tï, wala ala lingbi ti bi gere ti ala na yâ ti mbeni dû. Tongana ala tï, ala yeke londo na ala yeke ngbâ ti mû loro. Li ti ala ayeke kozoni kue na ndö ti place so mandako ni ayeke hunzi dä nga na ndö ti futa so ala ye ti wara, me pëpe na ndö ti ye so asara si ala tï.

9. Tongana e pika gere ti e, a lingbi e sara nyen?

9 Na yâ ti kpengo loro ti e, e lingbi ti pika gere ti e fani mingi na lege so e sara afaute na lege ti ye so e tene wala e sara. Wala peut-être amba ti e ti kpengo loro ni alingbi ti sara afaute so ason bê ti e. A lingbi li ti e akpe ape tongana a si. E kue e yeke mbilimbili-kue ape, nga e kue e yeke kpe na ndö ti oko lege so ague na fini so lê ni ayeke kete. Tongaso, na ambeni ngoi e lingbi ti gu terê na mba. Paul ahinga so na ambeni ngoi e yeke sara si amba ti e ‘adema terê’. (aCol. 3:13). Me ahon ti zia li ti e na ndö ti ye so asara si e pika gere ti e, zia e zia li ti e na ndö ti futa so ayeke na devant. Tongana e pika gere ti e, zia e londo na e ngbâ ti kpe loro ni. Tongana bê ti e ason na e ke ti londo, e yeke si pëpe na place so mandako ni ayeke hunzi dä nga e yeke wara futa ni ape. Na ndö ni, peut-être e yeke kanga lege na ambeni zo so ayeke sara ngangu ti kpe loro na ndö ti lege so ague na fini so lê ni ayeke kete.

10. Tongana nyen la e lingbi ti ga pëpe “mbeni ye so” amba ti e ti kpengo loro ‘ayeke pika gere ti ala dä’?

10 Mbeni lege ti ga pëpe “mbeni ye so” amba ti e ti kpengo loro ‘ayeke pika gere ti ala dä’ ayeke ti zia lege na ala ti sara ye na fason ti ala ahon ti luti nganganga na ndö ti adroit ti e tongana a yeke sioni ape (aRom. 14:13, 19-21; 1 aCor. 8:9, 13). So ayeke mbeni kota ye so asara kangbi na popo ti e na azo ti sarango vrai mandako ti loro. Ala yeke sara mandako na amba ti ala, nga zo oko oko ayeke gi ti wara futa ni gï ndali ti lo wani. Ala yeke pensé kozoni kue gï na aye so agbu bê ti ala. Tongaso, peut-être ala yeke pusu amba ti ala na peko ti duti na devant. Me ti e, e yeke sara mandako na amba ti e ape (aGal. 5:26; 6:4). Ye so e zia na gbele e ayeke ti mû maboko na azo mingi ti tene e na ala e si na place so mandako ni ayeke hunzi dä ti wara futa so ayeke fini. Ndani la e yeke gi ti sara ye ague oko na wango so yingo vulu apusu Paul ti sû so awa e ti ‘zia lê ti e gï na ndö ti aye ti e wani pëpe, me nga na ndö ti aye ti amba ti e.’—aPhil. 2:4.

11. Nyen la mbeni zo ti kpengo loro ayeke zia li ti lo na ndö ni? Ngbanga ti nyen?

 11 Azo ti sarango vrai mandako ayeke bâ lege so ayeke tâ na devant ti ala, nga ala yeke zia li ti ala na ndö ti place so mandako ni ayeke hunzi dä. Même tongana ala bâ ni na lê ti ala ape, ala imaginé na li ti ala so ala si na place so mandako ni ahunzi dä na ala wara futa ni. So ala zia li ti ala na ndö ti futa ni apusu ala ti ngbâ ti kpe loro.

12. Nyen la na nzoni bê Jéhovah amû zendo ti sara?

12 Na yâ ti loro so e yeke kpe, na nzoni bê, Jéhovah amû zendo ti futa awakua ti lo so ahunzi kpengo loro ni. Lo yeke mû na ala fini ti lakue lakue na yayu wala na yâ ti Paradis na ndö ti sese. Bible afa ambeni ye na ndö ti futa so, tongaso si e lingbi ti imaginé tongana nyen la gigi ti e ayeke duti ande pendere mingi. Tongana e ngbâ ti gbu li mingi na ndö ti beku so Jéhovah amû zendo ni, e yeke leke na bê ti e ti gbu ngangu ahon ti kozo.

NGBÂ TI KPE LORO ATÂA AKPALE

E ye ti ngbâ ti kpe loro ti wara fini atâa e wara akpale (Bâ paragraphe 13-20) *

13. Pasa wa la e yeke na ni so azo ti kpengo vrai loro ayeke na ni ape?

13 Azo ti kpengo loro na yâ ti angia so a yeke sara lani na Grèce adoit ti hon ndö ti akpale, na tapande ala yeke fatigué nga yâ ti terê ti ala ayeke son. Me ala zia bê ti ala gï na ndö ti aye so a fa na ala nga na ndö ti ngangu ti ala wani. Legeoko tongana ala, e nga kue a fa na e tongana nyen ti kpe loro so e yeke na yâ ni. Me e yeke na mbeni pasa so ala yeke na ni ape. E lingbi ti wara ngangu so alondo na Jéhovah, na lo lingbi lakue ti mû maboko na e. Tongana e zia bê ti e na Jéhovah, lo mû zendo ti fa ye na e nga ti sara si e kpengba.—1 Pi. 5:10.

14. Tongana nyen la 2 aCorinthien 12:9, 10 amû maboko na e ti gbu ngangu na yâ ti akpale?

14 Paul adoit lani ti gbu ngangu na yâ ti akpale mingi. Azo azonga lo nga asara aye ti ngangu na lo, nga na ambeni ngoi lo bâ so lo woko na lo doit ti kanga bê na yâ ti mbeni kpale so lo tene ayeke “mbeni kî na yâ ti terê ti” lo (2 aCor. 12:7). Me ahon ti tene lo bâ akpale so tongana aye so akanga lege na lo ti sara na Jéhovah, lo bâ ni tongana mbeni lege so a zi na lo ti zia bê ti lo na Jéhovah. (Diko 2 aCorinthien 12:9, 10.) Ndali ti so Paul ayeke na bango ndo so, Jéhovah amû maboko na lo na yâ ti akpale kue so lo wara.

15. Tongana e sara ye tongana Paul, nyen la e yeke bâ?

15 Azo alingbi nga ti zonga e wala ti sara aye ti ngangu na e ndali ti mabe ti e. Peut-être e doit nga ti kanga bê na ngoi so e yeke na kpale ti seni wala e fatigué ngangu. Me tongana e sara ye tongana Paul, akpale so oko oko kue alingbi ti ga mbeni lege so azi na e ti bâ tongana nyen la Jéhovah amû maboko na e na ndoye.

16. Même tongana mo yeke na ngangu kpale ti seni, nyen la mo lingbi ti sara?

16 Eskê mo yeke na ndö ti gbogbo wala na yâ ti puse ti azo so ayeke na kpale ti seni? Eskê agenou ti mo ayeke son wala mo yeke bâ ndo nzoni ape? Tongana a yeke tongaso, eskê mo lingbi ti kpe loro legeoko na azo so angbâ maseka so ayeke na nzoni seni? Biani, mo peut! Aita mingi so aga mbakoro nga na aita so ayeke na ngangu kpale ti seni ayeke kpe loro na ndö ti lege so ague na fini. Ala lingbi pëpe ti kpe loro so na ngangu ti ala wani. Me ala wara ngangu so alondo na Jéhovah na lege so ala yeke mä abungbi so a enregistré ni a ga na ni na ala. Ala yeke sara nga adisciple na lege so ala yeke fa tënë na adocteur, a-infirmier nga na afami ti ala.

17. Tongana nyen la Jéhovah abâ aita so ayeke na akpale ti seni?

17 Zia lâ oko ape si akpale ti seni so mo yeke na ni adécouragé mo na asara si mo bâ so mo woko mingi na mo lingbi pëpe ti kpe loro na ndö ti lege so ague na fini. Jéhovah aye mo ndali ti so mo yeke na mabe na lo nga mo gbu  ngangu na yâ ti aye mingi. Mo bezoin mungo maboko ti lo laso mingi ahon ti kozo, na lo yeke zia mo ape (Ps. 9:10). Me lo yeke ga même nduru mingi na mo. Bâ atënë so mbeni ita-wali so ayeke na ambeni kpale ti seni atene: “Ndali ti so akpale ti seni ti mbi ayeke gue gï guengo na li ni, mbi wara lege ti fa tënë mingi na azo tongana ti kozo ape. Me mbi hinga so même kete effort so mbi sara azia ngia na bê ti Jéhovah, na a sara si mbi yeke na ngia.” Tongana mo bâ so mo découragé, girisa ape so mo yeke gï mo oko ape. Gbu li na ndö ti tapande so Paul azia, nga dabe ti mo na atënë ti lo so akpengba zo so: “Mbi wara ngia na yâ ti awokongo ti mbi, . . . biani, na ngoi so mbi woko, a yeke na ndembe ni so la si mbi yeke na ngangu.”—2 aCor. 12:10.

18. Mbeni kpale wa la ayeke ngangu mingi so ambeni ita awara?

18 Ambeni ita so ayeke kpe loro na ndö ti lege so ague na fini ayeke na mbeni kpale nde. Ala yeke gbu lê ni na yâ ti akpale so abâ ala wani so amba ti ala alingbi ti bâ ni ape nga so ala lingbi ti comprendre ni ape. Na tapande, ala yeke na kota vundu wala ala yeke gi bê ti ala ahon ndö ni. Ngbanga ti nyen la awakua ti Jéhovah so lo ye ala mingi so awara kpale so ayeke ngangu mingi so? Tongana maboko ti mbeni zo akungbi wala lo yeke gï na yâ ti puse ti azo so ayeke na kpale ti seni, azo kue alingbi ti bâ kpale ti lo ni na peut-être bê ti ala ayeke pusu ala ti mû maboko na lo. Ye oko, peut-être na bango azo so agi bê ti ala ahon ndö ni wala ala so mbeni ye atambela nzoni ape na yâ ti li ti ala, ala kpa pëpe azo so ayeke na kpale. Pasi ti ala ayeke tongana ti mbeni zo so gere ti lo akungbi, me peut-être azo ayeke bâ mawa ti ala ape tongana ti mbeni zo so gere ti lo akungbi.

19. Nyen la e manda na lege ti tapande ti Mephibosheth?

19 Tongana mo lingbi ti sara aye kue ape nga mo bâ so azo acomprendre mo ape, tapande ti Mephibosheth alingbi ti kpengba mo (2 Sam. 4:4). Lo doit lani ti gbu ngangu ndali ti mbeni mbage ti terê ti lo so abuba nga Gbia David asara ye na lo na lege ni ape. Aye so asi lani na Mephibosheth so faute ni ayeke ti lo ape. Ye oko, lo zia lani pëpe si bê ti lo ason; lo kiri singila ndali ti anzoni ye so lo wara na yâ ti fini ti lo. Lo kiri singila ndali ti nzoni bê so David afa ândö na mbage ti lo (2 Sam. 9:6-10). Tongaso, na ngoi so David ayeke na sioni bango ndo na ndö ti Mephibosheth na lo sara ye na lo na lege ni ape, Mephibosheth agi ti gbu li na ndö ti aye kue so apusu David ti duti na sioni bango ndo na ndö ti lo. Lo zia pëpe si bê ti lo ason ndali ti faute so David asara. Nga, lo bi tënë pëpe na li ti Jéhovah ndali ti ye so David asara na lo. Mephibosheth azia lani li ti lo na ndö ti ye so lo lingbi ti sara ti mû maboko na gbia so Jéhovah asoro lo (2 Sam. 16:1-4; 19:24-30). Jéhovah asara si a sû tapande ti Mephibosheth  so ayeke nzoni mingi na yâ ti Bible ndali ti nzoni ti e.—aRom. 15:4.

20. Nyen la gingo bê alingbi ti sara na ndö ti ambeni ita? Nyen la ala lingbi ti duti na confiance na ni?

20 Ndali ti so ambeni ita ayeke gi bê ti ala ahon ndö ni, mbeto asara ala mingi nga ala pensé so na yâ ti aye so ala na ambeni zo ayeke sara lâ na lâ, azo ni ayeke na sioni bango ndo na ndö ti ala. Peut-être a yeke ngangu na ala ti duti na popo ti gbâ ti azo, me ala ngbâ ti gue na abungbi nga na akota bungbi. A yeke ngangu na ala ti sara lisoro na azo so ala hinga ala ape, me ala yeke sara lisoro na azo na fango tënë. Tongana a yeke kpale ti mo la, hinga biani so mo yeke gï mo oko ape. Azo mingi ayeke na akpale so. Girisa ape so angangu kue so mo yeke sara na âme ti mo kue anzere na Jéhovah. So mo ngbâ ti sara ngangu afa so lo yeke sara tufa na ndö ti mo nga lo yeke mû na mo ngangu so mo bezoin ni * (aPhil. 4:6, 7; 1 Pi. 5:7). Tongana mo yeke sara na Jéhovah atâa akpale ti seni, kota vundu wala gingo bê ahon ndö ni, duti na confiance so mo zia ngia na bê ti Jéhovah.

21. Na mungo maboko ti Jéhovah, nyen la e kue e lingbi ti sara?

21 Merci so kangbi ayeke na popo ti vrai mandako ti kpengo loro na ti so Paul asara tënë ni. Na yâ ti vrai kpengo loro ti gere ti ngoi ti ândö, gï zo oko la ayeke wara futa ni. Me zo kue so agbu ngangu na yâ ti loro so aChrétien ayeke mû ti wara fini ayeke wara futa ni so ayeke fini ti lakue lakue (Jean 3:16). Nga, na yâ ti vrai mandako ti kpengo loro, azo kue adoit ti duti na nzoni seni tongaso ape ala yeke sö benda ape. Ye oko, e mingi e yeke na nzoni seni ape, me e yeke gbu ngangu (2 aCor. 4:16). Na mungo maboko ti Jéhovah, e kue e lingbi ti mû loro ni juska na nda ni.

BIA 144 Zia lê ti mo na ndö ti futa ni!

^ par. 5 Awakua ti Jéhovah mingi ayeke na akpale ti gango mbakoro wala ala yeke na mbeni kobela so asara si ala woko. Nga, e kue e yeke fatigué na ambeni ngoi. Ni la e bâ so a yeke ngangu mingi ti tene e sara mbeni mandako ti kpengo loro. Na yâ ti article so, e yeke bâ tongana nyen la e kue e lingbi ti gbu ngangu ti hunzi kpengo loro ni nga ti sö benda na yâ ti loro ti fini so bazengele Paul asara tënë ni.

^ par. 6 Bâ article “Bible achangé fini ti azo” so ayeke na yâ ti Tour ti Ba Ndo ti lango 1 ti janvier 2013.

^ par. 20 Ti wara ambeni nzoni wango na ndö ti aye so mo lingbi ti sara ti kanga bê na yâ ti gingo bê nga ti bâ aye so ambeni ita ayeke sara ti hon ndö ni, bâ JW Télédiffusion ti mai 2019 na ndö ti jw.org®. Gue na gbe ti AMBETI TI E > JW TÉLÉDIFFUSION.

^ par. 63 NDA TI FOTO: So mbeni ita-koli so ayeke mbakoro angbâ ti fa tënë mingi asara si lo ngbâ na ndö ti nzoni lege so aChrétien adoit ti mû.

^ par. 65 NDA TI FOTO: E lingbi ti sara si amba ti e apika gere ti ala tongana e ngbâ ti pusu ala ti nyon sämba mingi wala tongana e nyon sämba ahon ndö ni.

^ par. 67 NDA TI FOTO: Même na ngoi so mbeni ita-koli ayeke na ndö ti gbogbo ti hôpital, lo ngbâ na yâ ti loro ti aChrétien na lege so lo fa tënë na azo so ayeke bâ lege ti lo.