Gue na tënë ti yâ ni

Gue na li ti atënë ni

Lawa la Royaume ti Nzapa ayeke komande ande sese?

Lawa la Royaume ti Nzapa ayeke komande ande sese?

Ambeni adisciple ti Jésus aye ti hinga lani lawa la Royaume ti Nzapa ayeke komanse ti komande. Jésus atene so ala yeke hinga pëpe tâ lango so Royaume ni ayeke komanse ti komande na ndö ti sese (Kusala 1:6, 7). Me kozo, lo tene so tongana adisciple ti lo abâ ambeni ye nde nde so ayeke si kue na yâ ti oko ngoi, zia ala “hinga so Royaume ti Nzapa aga nduru awe” nga so ngoi alingbi awe ti tene Royaume ni akomanse ti komande sese.​—Luc 21:31.

AYE WA LA JÉSUS ATENE AYEKE SI?

Jésus atene: “Mara ayeke londo na bira na terê ti mbeni mara, na royaume ayeke londo na bira na terê ti mbeni royaume. Sese ayeke yengi ngangu, nga na ando nde nde na peko ti terê, kota nzara ayeke tï nga asioni kobela so amû ndo.” (Luc 21:10, 11). Aye so kue ayeke bungbi ti ga mbeni preuve so zo alingbi ti dë kite ni ape so afa biani so “Royaume ti Nzapa aga nduru awe.” Eskê aye ni so kue asi na yâ ti même ngoi awe? Eskê asi na yâ ti dunia kue? Zia e bâ aye so asi.

1. ABIRA

Na yâ ti mbaï ti azo, a yeke na ngu 1914 la bira akomanse ti fâ azo mingi nga andu akodro mingi. Awasungo mbaï asara tënë ti ngu 1914 tongana ngu so kota changement asi na yâ ti mbaï ti azo, ndali ti so na ngu ni so la kozo bira so amû sese kue akomanse. Na ngoi ti bira so, a sara kua na aye tongana achar, abombe, angangu ngombe, asioni gaz ti fango zo nga na ambeni sioni gbakuru ti bira. Na pekoni, use bira so amû sese kue akomanse, na ngoi ni azo asara kua lani na bombe atomique. Depuis na ngu 1914 ti ga na ni, abira atï na ando nde nde na ndö ti sese na afâ azo kutu mingi.

2. AYENGINGO TI SESE

Mbeni mbeti (Britannica Academic) atene so ngu oko oko, ayengingo ti sese 100 tongaso ayeke si, so apeut ti buba aye ngangu mingi. Nga ndokua so a iri ni Centre américain d’études géologiques atene so tongana e bâ “liste [ti ayengingo ti sese] so a enregistré ni depuis (ti londo na ngu 1900 ti ga na ni), e yeke ku terê ti e ti bâ angangu yengingo ti sese 16 tongaso ngu oko oko.” Ambeni zo atene so ye so asara si e bâ laso e tene ayengingo ti sese ayeke mingi so, a yeke so laso e yeke na angangu appareil so amû lege na e ti hinga ni. Me tâ tënë ni ayeke so, akota yengingo ti sese so asi na yâ ti dunia asara si wungo ti azo so abâ pasi wala akui ahon ti kozo.

 3. AKOTA NZARA

Akota nzara ayeke si na yâ ti dunia ndali ti bira, sarango ye ti likisi, angangu kpale ti konomi nga na akobe ti yaka so asigi nzoni ape. Tondo ti ngu 2018 ti Ndokua ti Bendo ti Gigi so abâ tënë ti kobe (PAM) atene: “Na ndö ti sese kue, azo kutu 821 awara ye ti te alingbi na nzara ti ala ape na azo kutu 124 ayeke na yâ ti kota nzara.” Ngu oko oko, amolenge ahon kutu ota ayeke kui ndali ti so ala te kobe nzoni ape. Na ngu 2011, tongana a mû amolenge 100 so akui, 45 na milieu ni akui ndali ti so ala te ye nzoni ape.

4. ASIONI KOBELA

Ndokua ti Bendo ti Gigi so abâ tënë ti seni (OMS) atene: “Na yâ ti angu 20 so ahon, gbâ ti angangu épidémie amû ndo mingi. Angbene kobela tongana choléra, peste nga na fièvre jaune akiri abâ gigi, na ambeni fini ni asigi, na tapande SARS (kobela so asara si zo awu gbä), angangu grippe so amû ndo, MERS (kobela so andu fufu ti zo), Ebola nga na Zika (kobela so a wara na lege ti angungu).” Atâa so awandara na awanganga amanda ye mingi na ndö ti akobela, ala wara yorö ti akobela kue ape.

5. A YEKE FA NZONI TËNË NA NDÖ TI SESE KUE

Jésus afa lani mbeni mbage ti signe ni na ngoi so lo tene: “A yeke fa ande nzoni tënë ti Royaume na ndö ti sese kue so azo ayeke dä tongana mbeni tënë ti témoin ndali ti amara kue. Na pekoni, nda ni ayeke ga.” (Matthieu 24:14). Na yâ ti dunia so laso angangu kpale ahon ndö ni so, azo na popo ti amara kue so wungo ti ala ahon kutu 8 ayeke fa nzoni tënë ti Royaume na yâ ti akodro 240 na ayanga ti kodro ahon saki oko. Ade a fa tënë lâ oko tongaso kozo ape.

 AYE SO KUE AFA NYEN NA E?

Aye so abungbi si aga signe so Jésus asara tënë ni lani so asi laso awe. Ngbanga ti nyen la e doit ti gbu li ti e na ndö ni? Ngbanga ti so Jésus atene: “Tongana ala bâ aye so ayeke si, ala nga, zia ala hinga so Royaume ti Nzapa aga nduru awe.”​—Luc 21:31.

Fafadeso, Royaume ti Nzapa ayeke sara si sese ayeke ga tongana ti so bê ti Nzapa aye

Signe so Jésus afa, so e bâ ni nga na aye so Bible afa so asi na molongo ni, a-aidé e ti hinga so Nzapa azia Royaume ti lo na yayu na ngu 1914. * Na ngoi ni so lani, lo zia Molenge ti lo Jésus Christ tongana Gbia ni (Psaume 2:2, 4, 6-9). Fafadeso, Royaume ti Nzapa ayeke komande na ndö ti sese, na ayeke futi ande agouvernement kue ti azo na lo yeke sara si sese aga paradis ti tene azo aduti dä teti lakue lakue.

Na yâ ti ngoi kete, atënë ti yâ ti sambela so Jésus afa lani ayeke ga tâ tënë: “Zia Royaume ti mo aga. Zia a sara ye so bê ti mo aye, na yayu legeoko nga na ndö ti sese.” (Matthieu 6:10). Nyen la Royaume ni ayeke sara depuis so akomanse ti komande na ngu 1914? Nga aye wa la e yeke ku ti bâ tongana Royaume ni akomande ande na ndö ti azo kue?

^ par. 17 Ti hinga ambeni tënë na ndö ti ngu 1914, bâ buku Bible alingbi ti fa nyen na e? so aTémoin ti Jéhovah asigi na ni, na kete tënë 22.