Gue na tënë ti yâ ni

Gue na li ti atënë ni

Bible nga na gigi ti mo ti kekereke

Bible nga na gigi ti mo ti kekereke

TARA ti bâ so mo yeke tambela na ndö ti mbeni lege na bï. Lâ alï aninga awe, me mo hinga so nzoni lege la mo ngbâ ti mû so, ndali ti so mo yeke na mbeni ngangu torche na maboko. Tongana mo za torche ni na sese, mo yeke bâ aye so ayeke nduru na mo polele. Nga tongana mo za ni na devant, wâ ni ayeke za ayo na ndö ti lege ni.

Bible ayeke tongana mbeni torche. Tongana ti so e bâ fade, Bible apeut ti aidé e ti leke akpale so e yeke tingbi na ni na ndembe so, so ti tene akpale ti lâ oko oko so e kue e yeke tingbi na ni na yâ ti dunia ti kirikiri so. Me Bible akiri a-aidé e mingi ahon so. A aidé nga e ti bâ ye polele na ndö ti aye so alingbi ti si kekereke tongaso si e mû mbeni lege so ayeke gue na e ti wara ngia so angbâ lakue (Psaume 119:105). Tongana nyen?

Zia e bâ ambeni lege use so na yâ ni Bible amû na e mbeni nzoni beku ndali ti kekereke: 1 A yeke aidé e ti duti na ngia na yâ ti fini ti e, nga 2 a fa na e tongana nyen la e peut ti sara kamarade teti lakue lakue na Zo so acréé e.

BIBLE ASARA SI E KIRI E DUTI NA NGIA MINGI

Bible amû na e akpengba wango ti aidé e ti leke na akpale ti e, me lo yeke nde mingi na abuku so zo lo wani lo peut ti diko ti tene a-aidé lo. Ahon ti tene Bible awa e ti zia lê ti e gï na ndö ti akpale ti e, lo fa na e ti pensé na ambeni ye nde. Sarango tongaso la alingbi ti mû lege na e ti duti na tâ ngia na yâ ti fini ti e.

Na tapande, bâ mama-ndia ti Bible so: “Mungo ye na zo aga na ngia mingi ahon warango ye na tïtî zo.” (Kusala 20:35). Tara ti dabe ti mo na ngoi so lani mo aidé mbeni zo so ye amanke lo, wala na ngoi so mo mû ngoi ti mä mbeni kamarade ti mo so afa lani atënë ti bê ti lo na mo. Eskê anzere lani na mo ape so mo aidé azo tongaso ti tene ala kiri ala wara ngia ti ala?

Terê ti e ayeke nzere mingi tongana e mû ye na zo sân ti ku ti wara mbeni ye na pekoni. Mbeni wasungo mbeti atene: “A yeke ngangu ti wara ye mingi ahon ti  so mo mû ni na mbeni zo; a yeke si gï tongana mo mû ye na zo sân ti tene mo ku mbeni ye na pekoni.” Me tongana e mû ye na azo, mbilimbili na azo so ayeke na ye ti kiri na ni na e ape, e yeke wara ye ti peko ni. A yeke fa so e zia lê ti e gï na ndö ti akpale ti e ape. E yeke sara kua maboko na maboko na Nzapa so asara e, so ayeke bâ nzoni bê so e sara na amba ti e tongana bon la e sara na Lo (aProverbe 19:17). Tongana e mû ye na zo so ye ti lo ayeke dä ape ayeke kota ye mingi na lê ti Nzapa, na Lo mû zendo ti futa e na mungo na e fini ti lakue lakue na yâ ti paradis na ndö ti sese. So tâ pendere beku ndali ti gigi ti e ti kekereke!​—Psaume 37:29; Luc 14:12-14. *

Na ndö ti aye so kue, Bible afa na e so e lingbi ti duti na tâ ngia tongana e voro tâ Nzapa, Jéhovah. Mbeti ti lo awa e ti mû na lo gonda, ti ne lo nga ti mä yanga ti lo (Zo-ti-fa-tene 12:13; Apocalypse 4:11). Tongana e sara tongaso, e yeke sara mbeni ye so ayeke kota mingi: E yeke zia ngia na bê ti Zo so acréé e. Ndali ni la lo wa e, lo tene: “Sara ye na ndara . . . na mo zia ngia na bê ti mbi.” (aProverbe 27:11). Gbu li ti mo kete si: tongana e mû adesizion ague oko na amama-ndia ti Bible, e yeke zia ngia na bê ti Babâ ti e ti yayu so aye e mingi. Ngbanga ti nyen? Ngbanga ti so lo yeke pensé na e nga lo ye si e wara ye ti nzoni na peko ti so e sara ye alingbi na awango ti lo (Ésaïe 48:17, 18). Biani, tongana e voro Gbia ti dunia kue nga e duti na mbeni fini so alingbi ti zia ngia na bê ti lo, mbeni ye ti pendere ti hon ni ayeke dä ape.

BIBLE ALINGBI TI AIDÉ E TI SARA KAMARADE NA ZO SO ACRÉÉ E

Bible afa nga na e ti lë kpengba songo na Nzapa. Na yâ ni a tene: “Ala ga nduru na Nzapa, lo yeke ga ande nduru na ala.” (Jacques 4:8). Na ambeni ngoi, peut-être e lingbi ti duti na kite so zo alingbi ti ga kamarade ti Nzapa, so ngangu ti lo ahon angangu kue. Me Bible adë bê ti e na tenengo so tongana e “gi Nzapa,” e yeke “wara lo biani” ndali ti so “lo yeke yongoro pëpe na e oko oko kue.” (Kusala 17:27). Wango so Bible amû na ndö ti tënë ti gango kamarade ti Nzapa so ayeke kota ye mingi ndali ti gigi ti e ti kekereke. Na lege wa?

Bâ tënë so si: Atâa e sara nyen, zo oko na popo ti e alingbi pëpe ti kpe kota wato ti e kuâ (1 aCorinthien 15:26). Me, Nzapa ayeke ti lo dä lakue. Lo peut lâ oko ti kui ape, na lo ye si akamarade ti lo nga angbâ na fini lakue lakue. Bible atene mbeni pendere tënë ti fa ye so Jéhovah aye ndali ti azo so agi lo. A tene: “Zia si ala ngbâ na fini lakue lakue.”​—Psaume 22:26.

Tongana nyen la e lingbi ti lë mara ti songo so angbâ lakue lakue so na Nzapa? Ngbâ lakue ti manda ye na ndö ti lo na lege ti Bible (Jean 17:3; 2 Timothée 3:16). Hunda lo ti aidé mo ti mä yâ ti Bible. Bible afa na e biani so tongana, na bê ti e kue, e ‘ngbâ ti hunda na Nzapa’ ti mû ndara na e, lo yeke mû ni na e (Jacques 1:5). * Ti hunzi na ni, sara kue ti sara ye alingbi na aye so mo manda, zia si Mbeti ti Nzapa aga tongana “lampe ndali ti gere ti [mo]” nga tongana “lumière ndali ti lege ti [mo]” laso nga teti lakue lakue.​—Psaume 119:105.

^ par. 8 Ti hinga ambeni tënë na ndö ti zendo ti fini ti lakue lakue na yâ ti Paradis, bâ chapitre 3 ti buku Bible alingbi ti fa nyen biani na e? so aTémoin ti Jéhovah asigi na ni.

^ par. 13 A-Témoin ti Jéhovah alingbi ti aidé mo ti mä yâ ti Bible encore nzoni mingi, na ala yeke sara ni senge senge. Ti hinga tongana nyen la ala yeke manda na mo ye ni, e wa mo ti bâ vidéo E yeke manda Bible na azo tongana nyen? Mo lingbi ti wara vidéo ni tongana mo gue na ndö ti site www.jw.org. (Bâ na gbe ti tënë AMBETI TI E> AVIDÉO).

Nzapa ayeke ti lo dä lakue, na lo ye si akamarade ti lo nga angbâ na fini lakue lakue