Gue na tënë ti yâ ni

Gue na li ti atënë ni

Atënë so azo ahunda

Atënë so azo ahunda

Ngbanga ti nyen la a mû lege na mbeni zo pëpe ti zia ambeti ti aTémoin ti Jéhovah na ndö ti site ti lo wani wala na ndö ti Internet?

Ndali ti so e yeke mû ka na azo ambeti ti Nzapa senge senge, ambeni zo abâ so ala lingbi ti mû ambeti ti e ti zia ni na ndö ti ambeni site nde wala na ndö ti Internet senge. Ye oko, sarango tongaso ague nde na lege ti sarango kua * na site ti e nga aga na angangu kpale. Tongana ti so a fa ni polele na yâ ti lege ti sarango kua na site ti e, a mû lege na zo oko pëpe ti mû “afoto, ambeti so a imprimé ni ape, aye so a hinga na bungbi ti e, abia, avidéo, wala a-article so ayeke na ndö ti site ti e ti zia ni na ndö ti Internet (asite kue, site so na lege ni azo ayeke tokua ye na mba, azo ayeke tokua avidéo na mba, wala site so na lege ni azo ayeke sara lisoro.)” Ngbanga ti nyen la a ke na azo ti sara ni?

Zo oko alingbi pëpe ti zia ambeti ti e, so ndia amû lege na e ti sigi na ni, na ndö ti ambeni site ti Internet nde

Ndia abata aye kue so ayeke na ndö ti site ti e. A-apostat nga na ambeni wato ayeke gi ti zia ambeti ti e na ndö ti asite ti ala ti handa na aTémoin ti Jéhovah nga na ambeni zo. Ndani ayeke ti dü kite na yâ ti li ti azo so ayeke diko ambeti ni (Ps. 26:4; aProv. 22:5). Ambeni zo ayeke sara kua na ambeti ti e wala logo ti jw.org ti sara na publicité ti aye ti kango ni nga na yâ ti a-application ti téléphone wala tablette. Tongana e bata droit so ndia amû na e ti sigi na ambeti ti e nga na aye so a hinga na bungbi ti e, e yeke wara lege na gbele ngbanga ti kanga lege na mara ti asioni sarango ye tongaso (aProv. 27:12). Me tongana e hinga so azo wala même aita ayeke zia aye so e sigi na ni na ndö ti ambeni site nde wala ala sara kua na aye ti jw.org ti ka na aye ti ala, si e zia lege na ala ti sara ni, akota da-ngbanga alingbi peut-être pëpe ti mû mbage ti e na yâ ti ngangu  so e yeke sara ti kanga lege na awato nga na andokua ti dengo buze.

Ti téléchargé ambeti ti e na mbeni ndo nde me pëpe na ndö ti jw.org ayeke ga na kpale. Jéhovah amû kua ti mungo kobe ti yingo gï na “ngbâa be-ta-zo so ayeke sara ye na ndara”. (Mat. 24:45). “Ngbâa” so ayeke sigi na kobe ti yingo gï na ndö ti atâ site ti lo: www.jw.org, tv.jw.org nga wol.jw.org. E yeke na atâ application gï ota ndali ti téléphone wala tablette: JW Language®, JW Library® nga na JW Library Sign Language®. E lingbi ti duti na confiance so dunia ti Satan alingbi ti mû aye so ti sara na asabango ape wala dunia ti Satan alingbi ti yôro asioni ye na yâ ni ape. Tongana e wara kobe ti yingo na ambeni lege nde, azo alingbi ti changé aye na yâ ni wala ti yôro asioni ye na yâ ni.—Ps. 18:26; 19:8.

Na ndö ni, ti zia ambeti ti e na ndö ti asite na ti zia lege na azo ti sara commentaire na ndö ni ayeke zi lege na a-apostat nga na azo so ayeke tene sioni tënë ti e ti sara si azo aduti na confiance pëpe na bungbi ti Jéhovah. A handa ambeni ita na ala pika patara na azo na lege ti Internet na sarango tongaso ala ga na zonga na ndö ti iri ti Jéhovah. Me pikango patara na azo na lege ti Internet ayeke pëpe nzoni lege ti “fa ye na ngangu pëpe na azo so aye ti mä wango pëpe.” (2 Tim. 2:23-25; 1 Tim. 6:3-5). Ambeni zo asigi na ambeni sioni site so na lege ni azo ayeke sara lisoro nga na ambeni site na iri ti bungbi ti Jéhovah, na iri ti Bebungbi nga na iri ti amembre ti Bebungbi. Ye oko, mbeni membre ti Bebungbi oko ayeke pëpe na site ti lo wani wala mbeni site so na lege ni azo ayeke sara lisoro.

Ti gboto lê ti azo na ndö ti jw.org ayeke sara si “nzoni tënë” amû ndo (Mat. 24:14). Aye so e yeke na ni na ndö ti tâ site ti e so e lingbi ti sara kua na ni na fango tënë ayeke gue gï lakue na li ni. E ye ti tene azo kue abâ nzoni na lege ni. Tongaso, tongana ti so lege ti sarango kua na site ti e afa, mo lingbi ti tokua mbeni mbeti ti e na zo na lege ti Internet wala mo lingbi ti tokua na mbeni zo ye so alingbi ti mû lege na lo ti wara mbeni ye na ndö ti jw.org. Tongana e gboto lê ti azo so aye ti mä tënë ti Nzapa na ndö ti atâ site ti e, andâ e yeke gue na ala na mbage ti “ngbâa be-ta-zo so ayeke sara ye na ndara”, tâ zo so ayeke mû na e kobe ti yingo.

^ par. 1 Na ndö ti jw.org na Kozo place na mbage ti gbe ni, mo yeke wara “Lege ti sara kua na ni.” Tongana mo cliqué dä a yeke fa na mo tongana nyen ti sara kua na ni. Aye so a ke na zo ti sara ni andu aye kue so ayeke na ndö ti site ni.