Jérémie 42:1-22
42 Tongaso, amokonzi ti aturugu ni kue, na Johanan+ molenge ti Caréah, Jézaniah molenge ti Hoshaïah nga na azo ni kue, ti londo na asenge zo ti si na akota zo, ala ga,
2 ala tene na prophète Jérémie: “E voro mo, zia mo dengi mê ti mo na dema ti e so, na mo sambela Jéhovah Nzapa ti mo ngbanga ti e, ngbanga ti tanga ti azo so kue so angbâ so, ndali ti so e yeke lani mingi me fadeso e ngbâ mingi pëpe,+ tongana ti so mo yeke bâ na lê ti mo so.
3 Zia si Jéhovah Nzapa ti mo afa na e lege so a lingbi e tambela dä nga ye so a lingbi e sara.”
4 Prophète Jérémie atene na ala: “Mbi mä tënë ti ala ni awe, mbi yeke sambela Jéhovah Nzapa ti ala alingbi na ye so ala hunda. Tënë so kue Jéhovah ayeke kiri na ni na ala, mbi yeke fa ande peko ni na ala. Mbi yeke honde ande ye oko na ala pëpe.”
5 Ala tene na Jérémie: “Zia Jéhovah aduti mbeni témoin so atene gï tâ tënë na lo punir e tongana e sara ye pëpe alingbi na atënë kue so Jéhovah Nzapa ti e afa ni na e na lege ti mo.
6 Atâa tënë ni ayeke nzoni tënë wala sioni tënë, e yeke mä ande yanga ti Jéhovah Nzapa ti e, lo so si e tokua mo na lo, tongaso si ye aga nzoni na e ndali ti so e mä yanga ti Jéhovah Nzapa ti e.”
7 Lango bale-oko na pekoni, Jéhovah asara tënë na Jérémie.
8 Tongaso, lo iri Johanan molenge ti Caréah, na amokonzi ti aturugu ni kue so ayeke na terê ti lo nga na azo ni kue, ti londo na asenge zo ti si na akota zo.+
9 Lo tene na ala: “Bâ tënë so Jéhovah Nzapa ti Israël atene la, lo so ala tokua mbi na lo ti fa na gbele lo tënë ti nzoni bê so ala hunda ti tene lo sara na ala so, lo tene:
10 ‘Tongana ala ngbâ na yâ ti kodro so, mbi yeke leke ala na nduzu, mbi yeke kungbi ala na sese pëpe, mbi yeke lu ala ande tongana keke na mbi yeke gboto gunda ti ala pëpe ndali ti so mbi yeke regretté ande* ye ti vundu so mbi sara na ala.+
11 Ala sara mbeto ti gbia ti Babylone pëpe, lo so ala yeke kpe lo so.’+
“Jéhovah atene: ‘Ala sara mbeto ti lo pëpe, ndali ti so mbi yeke sö ala nga mbi yeke zi ala na maboko ti lo.
12 Mbi yeke sara ande nzoni bê na ala,+ lo nga kue lo yeke sara nzoni bê na ala, na ala yeke kiri na yâ ti kodro ti ala wani.
13 “‘Me tongana ala tene: “Ên-ën, e yeke ngbâ na yâ ti kodro so pëpe,” si ala ke yanga ti Jéhovah Nzapa ti ala,
14 na ala tene: “Ên-ën, e yeke gue ti e ande na kodro ti Égypte,+ e yeke bâ bira kâ pëpe nga e yeke mä toto ti hurungo adidi pëpe, nzara ti kobe ayeke sara e pëpe; e yeke sara kodro gï kâ,”
15 tongana ye ni ayeke tongaso, ala atanga ti azo ti Juda so angbâ so, zia ala mä tënë so Jéhovah atene na ala. Bâ tënë so Jéhovah ti aturugu, Nzapa ti Israël, atene la: “Tongana ala ye biani ti gue na Égypte na ti sara kodro kâ,
16 épée so ala yeke sara mbeto ni so ayeke wara ala kâ na kodro ti Égypte, nga kota nzara so ala yeke sara mbeto ni so ayeke mû peko ti ala na Égypte, na ala yeke kui ande kâ.+
17 Azo kue so aye gï ti gue na Égypte ti sara kodro kâ so, ala yeke kui kâ na lege ti épée, na lege ti kota nzara nga na lege ti sioni kobela so amû ndo. Zo oko na popo ti ala ayeke sö ande kuâ pëpe nga zo oko ayeke kpe ye ti vundu so mbi yeke ga na ni ande na ndö ti ala so pëpe.”’
18 “Bâ tënë so Jéhovah ti aturugu, Nzapa ti Israël, atene la: ‘Tongana ti so mbi tuku lani ngonzo nga na kota ngonzo ti mbi na ndö ti azo ti Jérusalem,+ legeoko nga mbi yeke tuku ande kota ngonzo ti mbi na ndö ti ala tongana ala gue na Égypte, na ala yeke ga mbeni ye so a deba ni awe, mbeni ye so amû mbeto mingi na zo, mbeni deba, mbeni ye ti kamene,+ na ala yeke kiri ande ti bâ ndo so encore ape.’
19 “Ala, tanga ti azo ti Juda so angbâ, Jéhovah asara tënë so na ndö ti ala. Ala gue na Égypte pëpe. Zia ala hinga so mbi gboto mê ti ala na ndö ni laso awe,
20 tongana ala handa terê ti ala si ala gue, ala yeke girisa ande fini* ti ala. Ndali ti so ala la atokua mbi na Jéhovah Nzapa ti ala, ala tene: ‘Mo sambela Jéhovah Nzapa ti e ngbanga ti e, na mo fa na e atënë kue so Jéhovah Nzapa ti e atene na e, e yeke sara ye alingbi na ni.’+
21 Mbi sara tënë ni na ala laso awe, me ala yeke mä ande yanga ti Jéhovah Nzapa ti ala pëpe nga atënë kue so lo tene na mbi ti fa peko ni na ala so, ala yeke sara ande ye alingbi na ni pëpe.+
22 Tongaso, zia ala hinga biani so na ndo so ala ye ti gue ti sara kodro dä so, ala yeke kui na lege ti épée, ti kota nzara nga na ti sioni kobela so amû ndo.”+
