Jérémie 4:1-31

  • Changengo bê aga na tufa (1-4)

  • Futingo ayeke londo na mbage ti nord si aga (5-18)

  • Jérémie asara vundu ndali ti futingo so ayeke ga (19-31)

4  Jéhovah atene: “Israël, tongana mo kiri ande,tongana mo kiri ande na mbi,tongana mo zi afungo yanda ti mo so na lê ti mbi,mo yeke ga ande pëpe zo so ayeke kpe na ando nde nde.+   Tongana mo deba yanga ti mo, mo tene: ‘Ti tâ tënë ni so Jéhovah ayeke na fini!’ na mo deba yanga ti mo ni na lege ti tâ tënë, ti mbilimbili nga na ti ye so ayeke tâ na lege ni,azo ti amara ayeke gi ti wara tufa na lege ti lo,*na ala yeke pika kate ti ala na ndö ti lo.”+  Ni la, bâ tënë so Jéhovah atene na azo ti Juda nga na azo ti Jérusalem la: “Ala dë afini yaka ti ala,zia ala ngbâ ti lu ye na yâ ti akî pëpe.+   Ala fâ ganza ndali ti Jéhovah,ala fâ bê ti ala na ganza,+ala azo ti Juda na ala azo ti Jérusalem,tongaso ape, ngonzo ti mbi ayeke londo tongana wâ,ndali ti aye ti sioni so ala sara,na a yeke gbi ye si zo oko ti mingo ni ayeke dä pëpe.”+   Ala fa tënë ni na yâ ti Juda, ala to mbela na ni na yâ ti Jérusalem. Ala dekongo nga ala hûru didi na yâ ti kodro ni kue.+ Ala dekongo ngangu, ala tene: “Azo, ala bungbi terê ti ala,zia e kpe e lï na yâ ti agbata so angangu gbagba ayeke na terê ni.+   Ala lu mbeni yongoro keke na nduzu ti fa lege so ague na Sion. Ala gi mbeni ndo ti bata terê ti ala dä, ala luti ndo oko pëpe,”ndali ti so mbi yeke sara si ye ti vundu alondo na mbage ti nord aga,+ mbeni kota ye ti vundu.   Lo sigi tongana ti so mbeni bamara alondo na yâ ti gbako ti lo si lo sigi.+ Zo ti futingo azo ti amara alondo awe.+ Lo londo na ndo ti lo ti gue ti sara si kodro ti mo aga ye so amû mbeto mingi na zo. Agbata ti mo ayeke buba kue, zo oko ayeke ngbâ na yâ ni pëpe.+   Tongaso, mo yü bongo ti vundu,+mo sara mawa nga mo toto,ngbanga ti so kota ngonzo ti Jéhovah so alondo na terê ti e ade ti kaï pëpe.   Jéhovah atene: “Na lango ni so, bê ti gbia ayeke woko,*na bê ti amokonzi ayeke woko*+ nga. Mbeto ayeke hon ndö ti aprêtre nga li ti aprophète ayeke kpe kue.”+ 10  Tongaso mbi tene: “Aï! Jéhovah, Seigneur ti dunia kue, ti tâ tënë ni mo handa azo so+ nga na azo ti Jérusalem biani awe, mo tene: ‘Ala yeke duti na siriri,’+ andâ épée ayeke na terê ti go ti e.”* 11  Na ngoi ni so, a yeke tene ande na azo so nga na azo ti Jérusalem, atene: “Mbeni pupu so ayeke wâ alondo na ndö ti akete hoto so ayeke na yâ ti désert,ahoto so li ni ayeke senge senge; pupu ni so ayeke ya na ndö ti amolenge-wali* ti kodro ti mbi. Pupu ni ayeke ga pëpe ti pe alê ti kobe wala ti sara si alê ti kobe ni avuru. 12  Mbi la mbi mû yanga na ngangu pupu ni ti londo kâ ti ga. Fadeso mbi yeke dë ngbanga ande na li ti ala. 13  Bâ! Lo yeke ga ande tongana ambinda ti ngu-nzapa,apuse ti mbarata ti lo ayeke tongana mbeni kota pupu ti ngu-nzapa.+ Ambarata ti lo ni akpe loro mingi ahon a-aigle.+ Mawa na e, ndali ti so ti e ahunzi awe! 14  Jérusalem, zi sioni ye na bê ti mo ti tene mo sö kuâ.+ Mo yeke ngbâ ti bata asioni ye na bê ti mo juska lawa? 15  Ngbanga ti so na kodro ti Dan mbeni go ato mbela,+go ni so afa tënë ti kota ye ti vundu so alondo na ahoto ti Éphraïm si ayeke ga. 16  Sara tënë ni na azo ti amara nde. To mbela na tënë ni so na ndö ti azo ti Jérusalem.” “Asinziri* alondo na yongoro ndo ayeke ga,ala yeke dekongo ti sara bira na agbata ti Juda. 17  Ala ga na ndö ti Jérusalem na ambage nde nde kue tongana azo so ayeke bata mbeni yaka,+ndali ti so lo sara kpengba-li na mbi,”+ tënë ti yanga ti Jéhovah la. 18  “Asarango ye ti terê ti mo nga na aye so mo sara ayeke kiri ande na ndö ti mo.+ Aye ti vundu so asi na mo ason ti mbana,ndali ti so a gue juska na yâ ti bê ti mo!” 19  Aï, yâ* ti mbi! Aï, yâ ti mbi! A son mbi ngangu tâ na yâ ti bê ti mbi kâ.* Bê ti mbi apika ngangu. Mbi peut ti duti kpô pëpe,ndali ti so mbi* mä totongo ti didi. So dekongo ti azo so aye ti sara bira la!+ 20  A fa tënë ti kota vundu na peko ti terê,ndali ti so a buba kodro ni kue awe. Gï gbagburu tongaso, a kungbi atente ti mbi,gï hio tongaso a futi abongo ti tente ti mbi.+ 21  Juska lawa si mbi yeke ngbâ ti bâ yongoro keke so afa lege ti gue na Sion so? Juska lawa si mbi yeke ngbâ ti mä totongo ti didi ni?+ 22  “Azo ti mbi ayeke azo ti buba.+ Ala hinga mbi pëpe. Ala ga abuba molenge, ala hinga ndo pëpe. Tongana a yeke ti sara ye ti sioni, ala hinga ndo* mingi,me ala hinga pëpe ti sara ye ti nzoni.” 23  Mbi bâ kodro ni, na bâ, yâ ni ayeke senge senge, zo oko ayeke dä pëpe.+ Mbi bâ ndo na yayu, na lumière ayeke encore ape.+ 24  Mbi bâ ahoto, na bâ, ala yeke yengi,nga akete hoto ayeke dö.+ 25  Mbi bâ ndo, na bâ, zo oko ayeke dä pëpe,na andeke ti nduzu kue akpe awe.+ 26  Mbi bâ ndo, na bâ, yaka ti akeke so zo ayeke te lê ni aga benyama,a kungbi agbata kue so ayeke na ndo ni so na sese awe.+ A yeke ndali ti Jéhovah,ndali ti kota ngonzo ti lo. 27  Bâ tënë so Jéhovah atene la: “Kodro ni kue ayeke ga ande ndo so azo ayeke na yâ ni pëpe,+me mbi yeke buba ni kue kue kue pëpe. 28  Ndali ti ye so, kodro ni ayeke duti ande na yâ ti vundu,+lê ti nduzu kâ ayeke vuko.+ A yeke ndali ti so mbi sara tënë awe, mbi mû desizion awe,mbi yeke changé ni* pëpe wala mbi yeke kiri na ndö ni pëpe.+ 29  Gï so azo amä go ti azo ti kpengo na mbarata nga ti azo ti pikango kokora,azo ti gbata ni kue akpe.+ Ala lï na yâ ti akete gbako,ala monté na yâ ti adû ti akota tênë.+ Agbata ni kue angbâ senge senge,zo oko ayeke na yâ ni pëpe.” 30  Ka so fadeso ye oko angbâ na mo ape so, mo yeke sara ande nyen? Mo yeke yü lani bengba bongo,mo yeke yü lani apendere ye ti baba so a sara ni na lor,mo yeke kpaka lani vuko fard na lê ti mo.* Me baba so kue mo sara so, a yeke gï senge senge,+ndali ti so azo so kue ayeke sara nzara ti mo so, ala ke mo awe;ala yeke gi lege fadeso ti fâ mo.*+ 31  Mbi mä toto ti mbeni zo, so akpa ti wali so terê ti lo ason,dema ni akpa ti wali so angbâ ti dü kozo molenge ti lo,go ti molenge-wali ti Sion so ayeke wu gbä. Lo yô maboko ti lo na nduzu, lo tene:+ “Mawa na mbi, ndali ti so mbi fatigué* awe ngbanga ti azo ti fango zo.”

Kete tënë

So ti tene Jéhovah.
Wala “ngangu ti gbia ayeke hunzi.”
Wala “ngangu ti gbia ayeke hunzi.”
Wala “épée ague juska akpo âme ti e.”
So a yeke mbeni fason ti sarango tënë la, na a sara tënë ti Jérusalem mo bâ mo tene mbeni zo, peut-être a yeke kangbi vundu na lo wala a yeke sara mawa ti lo.
Na Hébreu: “Azo so alango pëpe,” so ti tene ala yeke bâ ndo na ndö ti kodro ni, ti hinga ngbonga wa ala yeke ga ti sara bira na ni.
Na Hébreu: “kamba ti yâ.”
Na Hébreu: “na yâ ti amur ti bê ti mbi.”
Wala “âme ti mbi ayeke.”
Wala “ala yeke na ndara.”
Wala “regretté.”
Wala “na gbe ti dê ti lê ti mo.”
Wala “ala yeke gi âme ti mo.”
Wala “âme ti mbi afatigué.”