Genèse 31:1-55

  • Jacob ahon na hondengo ni na Canaan (1-18)

  • Laban ague awara Jacob (19-35)

  • Mbele na popo ti Jacob na Laban (36-55)

31  Mbeni lâ, Jacob amä tënë so amolenge ti Laban ti koli ayeke tene: “Jacob amû aye ti babâ ti e kue awe; nga a yeke na lege ti aye ti babâ ti e la lo wara mosoro so kue.”+  Tongana Jacob abâ lê ti Laban, lo bâ so bango ndo ti Laban na mbage ti lo achangé awe.+  A si na mbeni ngoi, Jéhovah atene na Jacob: “Kiri na kodro ti akotara ti mo, na ndo ti afami ti mo,+ na mbi yeke ngbâ na mo.”  Tongaso, Jacob atokua ndo ti iri Rachel na Léa si ala ga awara lo na ndo so lo yeke bata anyama ti lo dä,  na lo tene na ala: “Mbi bâ so bango ndo ti babâ ti ala na mbage ti mbi achangé awe;+ me Nzapa ti babâ ti mbi ayeke na mbi.+  Ala wani ala hinga so mbi sara kua na babâ ti ala na ngangu ti mbi kue.+  Babâ ti ala ahanda mbi nga lo changé futa ti mbi fani bale-oko, me Nzapa azia lege na lo pëpe ti sara sioni na mbi.  Tongana lo tene: ‘Anyama so terê ti ala ayeke top top ayeke ga ande futa ti mo,’ anyama ni kue adü anyama so terê ti ala ayeke top top. Me tongana lo tene: ‘Anyama so terê ti ala ayeke rayé rayé ayeke ga ande futa ti mo,’ anyama ni kue adü anyama so terê ti ala ayeke rayé rayé.+  Tongaso, Nzapa amû anyama ti babâ ti ala lo mû ni na mbi. 10  Mbeni lâ, na ngoi so anyama ni awara nzara ti montengo terê, mbi yeke bâ li ti mbi. Na yâ ti bango li ni, mbi yô lê ti mbi na nduzu, mbi bâ so akoli-ngasa so ayeke monté amama ni, terê ti ala ayeke rayé rayé wala terê ti ala ayeke top top.+ 11  Ange ti tâ Nzapa airi mbi na yâ ti bango li ni, lo tene: ‘Jacob!’ na mbi yeda, mbi tene: ‘Mbi la!’ 12  Lo tene: ‘Pardon, yô lê ti mo na nduzu, mo bâ, akoli-ngasa kue so ayeke monté amama ni, terê ti ala ayeke rayé rayé wala terê ti ala ayeke top top, teti mbi bâ aye kue so Laban ayeke sara na mo.+ 13  Mbi yeke tâ Nzapa so asi na mo lani na Béthel,+ ndo so mo tuku mafuta na ndö ti mbeni pilier nga so mo mû zendo na mbi dä.+ Fadeso, londo, zia sese so, mo kiri na kodro so a dü mo dä.’”+ 14  Na mango tënë so, Rachel na Léa atene na lo: “Mbeni ye so e lingbi ti wara na peko ti babâ ti e so angbâ na yâ ti da ti lo ayeke dä? 15  Lo bâ e tongana awande ape? teti lo kä e, na lo ngbâ gï ti te nginza ti peko ti e.+ 16  Amosoro kue so Nzapa amû na terê ti babâ ti e ayeke ti e na amolenge ti e.+ Tongaso, ye kue so Nzapa atene na mo, sara gï ni.”+ 17  Jacob alondo, lo zia amolenge ti lo na awali ti lo na ndö ti achameau;+ 18  anyama ti lo kue nga na aye ti lo kue so lo wara+ na Paddan-Aram, lo mû ni na lo tï na lege ti gue na ndo ti babâ ti lo Isaac na sese ti Canaan.+ 19  Andâ Laban ague fade ti fâ kuä ti terê ti ataba ti lo. Na yâ ti ngoi ni so, Rachel anzi astatue ti téraphim*+ ti babâ ti lo.+ 20  Nga Jacob asara ye na mayele na terê ti Laban so ayeke Araméen, ndali ti so lo tene na lo pëpe so lo yeke hon. 21  Lo kpe lo hon, lo fâ Ngu ti Euphrate,+ lo na azo ti lo kue nga na aye ti lo kue. Na pekoni, lo mû lege ti ndo so ahoto ayeke dä na sese ti Galaad.+ 22  Na ota lango ni, a tene na Laban so Jacob akpe awe. 23  Tongaso, lo mû aita* ti lo, lo tomba peko ti Jacob lango mbasambala; lo wara lo na ndo so ahoto ayeke dä na sese ti Galaad. 24  Me Nzapa asi na Laban, so ayeke Araméen,+ na yâ ti bango li na bï,+ lo tene: “Sara hange na tënë so mo yeke tene na Jacob, atâa a yeke nzoni ni wala sioni ni.”*+ 25  Tongaso, Jacob aleke tente ti lo na ndö ti hoto me Laban na aita ti lo asara camp ti ala na ndo so ahoto ayeke dä na sese ti Galaad. Na pekoni, Laban aga nduru na Jacob. 26  Laban atene na Jacob: “Nyen la mo sara tongaso so? Ngbanga ti nyen mo sara ye na mayele na terê ti mbi, na mo hon na amolenge ti mbi mo bâ mo tene ala yeke azo so a gbu ala na ngbâa na ngoi ti bira? 27  Mo kpe kpengo na hondengo ni ngbanga ti nyen? Mo sara ye na mayele na terê ti mbi, na mo tene na mbi pëpe ngbanga ti nyen? Tongana mo tene tënë ni fade na mbi, ka e yeke he bia, e pika tambourin nga na harpe, na mbi zia mo na lege, mo gue na ngia. 28  Mo sara si mbi wara lege pëpe ti su ngbangba ti a-âta* ti mbi nga na amolenge ti mbi. Ye ti buba la mo sara so. 29  Mbi yeke na ngangu ti sara sioni na mo, me Nzapa ti babâ ti mo atene na mbi na bï so, atene: ‘Sara hange na tënë so mo yeke tene na Jacob, atâa a yeke nzoni ni wala sioni ni.’+ 30  Mo yeke kiri ndali ti so nzara ti da ti babâ ti mo ahon ndö ti mo; me mo nzi anzapa ti mbi ngbanga ti nyen?”+ 31  Jacob atene na Laban: “A yeke ngbanga ti so mbeto asara mbi. Mbi tene na bê ti mbi, mbi tene: ‘Mo yeke mû amolenge ti mo na ngangu na maboko ti mbi.’ 32  Zo so mo wara anzapa ti mo na maboko ti lo, lo yeke ngbâ na fini pëpe. Na lê ti aita ti e kue, mo gi yâ ti aye ti mbi, na mo mû aye ti mo so mo wara dä.” Me Jacob ahinga pëpe so Rachel anzi anzapa so. 33  Tongaso, Laban alï na yâ ti tente ti Jacob, na yâ ti tente ti Léa nga na yâ ti tente ti angbâa ti wali use so,+ me lo wara anzapa ni pëpe. Na pekoni, lo sigi na yâ ti tente ti Léa, lo lï na yâ ti tente ti Rachel. 34  Andâ Rachel amû astatue ti téraphim ni, lo zia ni na yâ ti sakpa ti ye ti dutingo na ndö ti chameau so awali ayeke zia ye na yâ ni, na lo duti na ndö ni. Tongaso Laban agi ndo na yâ ti tente ni kue, me lo wara ni pëpe. 35  Rachel atene na babâ ti lo: “Sara ngonzo pëpe, seigneur ti mbi, mbi lingbi pëpe ti londo ti luti na gbele mo, ngbanga ti so ye ti e awali la asi na mbi so.”+ Tongaso Laban agi ndo nzoni, me lo wara atéraphim ni pëpe.+ 36  Ngonzo agbu Jacob, na lo yô Laban na tënë. Jacob atene na Laban: “Sioni ti mbi ni ayeke na ndo wa? Siokpari ti nyen la mbi sara, si mo tomba peko ti mbi na loro tongaso so? 37  So mo gi yâ ti akungba ti mbi kue so, akungba ti da ti mo oke la mo wara? Zia ni ge na lê ti aita ti mbi na aita ti mo, si ala fâ yâ ti tënë ni na popo ti e. 38  Na yâ ti ngu 20 so mbi sara na ndo ti mo, ngo ti awali-taba na ti awali-ngasa ti mo atuku lâ oko pëpe,+ na mbi te akoli-taba ti mo lâ oko pëpe. 39  Nyama so nyama ti ngonda asuru yâ ti lo,+ mbi yeke ga na ni na mo pëpe. Mbi la mbi yeke zia mbeni nyama na place ni. Atâa tongana a nzi mbeni na kota lâ wala na bï, mo yeke hunda mbi ti zia mbeni na place ni. 40  Na kota lâ, ndowa ayeke fâ mbi; nga na bï, dê ayeke hûru mbi; lango akpe na lê ti mbi.+ 41  A sara ngu 20 awe la mbi yeke na yâ ti da ti mo. Mbi sara kua na mo ngu 14 ndali ti amolenge ti mo ti wali use so, mbi bata anyama ti mo ngu 6, na mo changé futa ti mbi fani bale-oko.+ 42  Tongana fade Nzapa ti babâ ti mbi,+ Nzapa ti Abraham na Lo so Isaac akpe mbeto ti lo,*+ ayeke na mbi pëpe, ka mo zia mbi, mbi hon maboko senge. Nzapa abâ mawa ti mbi nga na ngangu kua so mbi sara, ni la lo suku na mo na bï so.”+ 43  Laban atene na Jacob: “Amolenge-wali ni ayeke amolenge ti mbi, na amolenge ti ala ayeke a-âta ti mbi. Anyama ni ayeke anyama ti mbi, nga aye kue so mo yeke bâ ni so ayeke ti mbi na ti amolenge ti mbi ti wali so. Sioni ti nyen la mbi lingbi ti sara na ala laso wala na amolenge ti yâ ti ala? 44  Fadeso, zia mbi na mo e te mbele; na mbele ni ayeke duti ande tongana témoin na popo ti e.” 45  Tongaso, Jacob amû mbeni tênë, lo kpo ni na nduzu tongana pilier.+ 46  Jacob atene na aita ti lo: “Ala ro atênë!” Tongaso ala mû atênë ala dö ni na ndö ti terê. Na pekoni, ala te kobe na ndö ti atênë so ala dö so. 47  Laban airi ni Jégar-Sahadutha,* me Jacob airi ni Galéed.* 48  Laban atene: “Atênë so a dö ni so ayeke témoin na popo ti mbi na mo laso.” Ndani la lo iri ni Galéed,+ 49  nga Tour ti bâ ndo, ngbanga ti so lo tene: “Zia Jéhovah angbâ ti bâ mbi na mo na ngoi so e yeke na ndo so e lingbi ti bâ terê pëpe. 50  Tongana mo sara pasi na amolenge ti mbi nga tongana mo komanse ti mû ambeni wali na ndö ti ala, atâa tongana zo abâ ni pëpe, girisa pëpe so Nzapa ayeke témoin na popo ti mbi na mo.” 51  Laban akiri atene na Jacob: “Atênë so a dö ni so la, nga pilier so mbi kpo na nduzu na popo ti mbi na mo la. 52  Atênë so a dö ni so ayeke témoin, nga pilier ni ayeke témoin,+ so mbi yeke hon ande atênë so pëpe ti gue ti sara sioni na mo, nga so mo yeke hon ande atênë so na pilier so pëpe ti ga ti sara sioni na mbi. 53  Zia Nzapa ti Abraham+ na Nzapa ti Nahor, so ayeke Nzapa ti babâ ti ala, afâ ngbanga na popo ti e.” Me Jacob adeba yanga ti lo na iri ti Lo so babâ ti lo Isaac akpe mbeto ti lo.*+ 54  Na peko ti ye so, Jacob amû mbeni sandaga na ndö ti hoto ni, na lo tisa aita ti lo ti te kobe. Tongaso, ala te kobe, na ala lango na ndö ti hoto ni na bï ni so. 55  Hio na ndapre, Laban alondo lo su ngbangba ti a-âta*+ ti lo na ti amolenge ti lo ti wali, nga lo iri tufa na ndö ti ala.+ Na pekoni, Laban alondo lo kiri na ndo ti lo.+

Kete tënë

Wala “anzapa ti yâ ti sewa; ayanda.”
Wala “afami.”
Na Hébreu: “Sara hange si mo tene pëpe na Jacob mbeni tënë, ti londo na nzoni ni ti si na sioni ni.”
Na Hébreu: “amolenge-koli.”
Na Hébreu: “so mbeto ti Lo asara Isaac.”
Mbeni tënë ti Araméen so ndani aye ti tene “Atênë so a dö na ndö ti terê so ayeke témoin.”
Mbeni tënë ti Hébreu so ndani aye ti tene “Atênë so a dö na ndö ti terê so ayeke témoin.”
Na Hébreu: “na iri ti Lo so mbeto ti Lo asara Isaac.”
Na Hébreu: “amolenge-koli.”