Gue na tënë ti yâ ni

HUNDA TI AMASEKA

Tongana nyen la mbi peut ti wara courage ti sara sport?

Tongana nyen la mbi peut ti wara courage ti sara sport?

 Ngbanga ti nyen la mbi doit ti sara sport?

Na yâ ti ambeni kodro, amaseka ayeke mû temps mingi ape ti sara sport, ye so asara si ala yeke wara kpale ti seni. A yeke ndani la Bible atene “tarango terê na lege ti ngia ti awanguru ayeke sara nzoni na zo.” (1 Timothée 4:8). Gbu li na ndö ti atënë so:

  • Sport ayeke sara si mo sentir terê ti mo bien. Tongana zo asara sport, a yeke sara si cerveau ti lo ayeke tokua mbeni ye na yâ ti terê ti lo so a iri ni endorphine, so ayeke sara si zo ni ayapu nga terê ti lo anzere. Ambeni zo atene so sport ayeke mbeni yorö so asara si li ti zo adë.

    “Tongana lakue na ayanga ti ndapre mbi mû loro, mbi yeke sara kua nzoni nga mbi yeke na ngia na yâ ti lango ni. Mungo loro ayeke sara si mbi sentir terê ti mbi bien.”—Regina.

  • Sport ayeke aidé mo ti wara pendere forme. Tongana mo sara sport alingbi na ni, mo yeke ga mbeni zo so akpengba, so ayeke na nzoni seni nga mo yeke bâ so mo peut ti sara aye mingi.

    “A nzere na mbi mingi so mbi peut fadeso ti sara traction à la barre fani 10; tâ na ngu so ahon mbi peut même ti sara oko ape! Me ye so anzere na mbi mingi ayeke so, mbi mû soin ti terê ti mbi.”—Olivia.

  • Sport apeut ti sara si mo ngbâ na fini aninga. Tongana zo asara sport, bê ti lo ayeke sara kua nzoni nga lo yeke wu nzoni. Asport so ayeke sara ni na lege ti dongo dodo apeut nga ti sara si zo akpe ti wara kobela so ayeke sara si mênë ahon nzoni ape na yâ ti akamba ti mênë ti lo so ayeke na terê ti bê ti lo. Akobela ni so ayeke fâ ka akoli na awali mingi.

    “Tongana e yeke sara mbeni sport lakue ti bata seni ti e, e yeke fa na Nzapa so e tene merci na lo ndali ti fini so e yeke na ni.”—Jessica.

Bata tënë so: Sarango sport ayeke sara nzoni mingi na seni ti zo ande na yâ ti gigi ti lo, me lo peut nga ti bâ nzoni dä laso. Mbeni maseka-wali so iri ti lo ayeke Tonya atene so na ambeni temps, lo yeke gi araison ti sara sport ape. Me lo tene so tongana lo sara effort lo sara sport ni, lakue terê ti lo ayeke nzere na pekoni, nga lâ oko lo regretté ape.

Tongana a bâ lege ti mbeni oto ape, a gue ngbii oto ni ayeke sara kua encore ape; ye so ayeke si nga na terê ti mo la tongana mo bâ lege ni ape

 Nyen la ayeke kanga lege na mbi ti sara sport?

Araison ni ayeke mingi, bâ ambeni la:

  • Courage ti sarango ni ayeke dä ape. “Tongana zo ade maseka, mingi ni lo yeke pensé so ye oko ti kinda lo ayeke dä ape. A yeke ngangu ti tene mo pensé so mbeni lâ mo yeke wara ande kpale ti seni. Mo yeke pensé so gï ambakoro la ayeke ka na kpale ni so.”—Sophia.

  • Temps ayeke dä ape. “Comme mbi yeke ka na gbâ ti aye ti sarango ni, mbi doit ti wara temps ti te ye nzoni nga ti lango nzoni, me tâ ti tene mbi wara temps ti sara sport a yeke ka lakue ngangu na mbi mingi.”—Clarissa.

  • Place ti sarango ni ayeke dä ape. “Ti tene zo angbâ na nzoni forme, a hunda nginza. Tongana mo ye ti gue na salle ti sport, mo doit ti payé mbeni ye.”—Gina.

Gbu li na ndö ti ye so:

Nyen la ayeke kanga ka lege na mo mingi ti sara sport? A hunda ti tene mo sara effort mingi ti tene mo hon ndö ti ye ni so, me mo yeke bâ nzoni na pekoni.

 Nyen la apeut ti aidé mbi ti komanse ti sara sport?

Bâ ambeni wango la:

  • A yeke na mo wani ti bâ lege ti seni ti mo.—aGalate 6:5.

  • Gi araison ape (Zo-ti-fa-tene 11:4). Na tapande, ti komanse ti sara sport, mo yeke na bezoin gï ti gue na salle ti sport ape. Mo yeke gï na bezoin ti bâ sport wa la anzere na mo ti sara ni nga mo sara effort ti sara ni lakue lakue.

  • Tongana mo ye ti hinga sport wa la mo peut ti sara, hunda na amba ti mo sport wa la ala yeke sara ka.—aProverbe 20:18.

  • Sara mbeni nzoni programme. Sara na mbeti aye so mo ye ti sara effort ti sara ni nga na ati so mo sara effort mo sara ni awe, tongaso si mo wara courage ti ngbâ ti sara sport ni.—aProverbe 21:5.

  • Gi mbeni zo mo na lo asara sport ni. Tongana mo wara mbeni “compagnon” ti mo so mo na lo ayeke sara lakue sport, lo peut ti encouragé mo nga lo peut ti aidé mo ti ngbâ ti bata programme ti sarango sport ti mo.—Zo-ti-fa-tene 4:9, 10.

  • Hinga so akpale ayeke si ande, na tongana akpale ni asi, zia lege ti sarango sport ni ape.—aProverbe 24:10

 Sara ye ahon ndö ni ape

Bible atene na akoli nga na awali ti tene “sarango ye ti terê ti [ala] ayeke lakue nzoni.” (1 Timothée 3:2, 11). Tongaso, sara ye ahon ndö ni ape. Mingi ni, azo ayeke bâ azo so ayeke sara ka sport ahon ndö ni tongana azo so aye ti gboto lê ti azo gï na ndö ti ala. Mbeni maseka-wali so iri ti lo Julia atene: “Tongana gâba ti mbeni koli ahon hingango ndo ti lo, lo yeke pendere na lê ti mbi ape.”

Sara hange na atënë so a yeke sara ka na lê ti ambeti ti pusu azo ti sara sport ahon ti so ala yeke na bezoin ni. Amara ti atënë tongaso apeut ti joué na ndö ti seni ti mo, nga apeut ti sara si mo zia lê ti mo encore ape na ndö ti “aye so ayeke akota ye mingi ahon atanga ni” kue na yâ ti gigi ti mo.—aPhilippien 1:10.

Na ndö ni, atënë so a sara ni na lê ti mbeti ti encouragé azo so apeut nga ti découragé mo. Mbeni maseka-wali so iri ti lo Vera atene: “Gbâ ti amaseka-wali ayeke na afoto ti azo so ala ye ti kpa ala, na ala yeke bâ afoto ni tongana ala bâ so courage amanke ala. Me comme ala yeke haka terê ti ala na azo ni so, na nda ni ala yeke découragé. A yeke bien ti tene mo pensé na seni ti mo ahon ti pensé gï na forme ti mo.”