Eskê mo yeke mbeni zo so ayeke tâ na aye mingi ti sara so, tongana mo sara ngia ape, mo risqué ti tï na yâ ti kota fatigue? Tongana a yeke tongaso, article so apeut ti aidé mo!

 Ye ni so asi ngbanga ti nyen

  • Tongana e yeke na gbâ ti aye ti sara. Mbeni maseka-wali so iri ti lo ayeke Julie atene: “Na yâ ti aye so andu mbage ti gigi ti e oko oko, a fa na e ti gi lakue ti sara ye nzoni, ti sara ye nzoni ahon ti kozo, ti zia akota objectif na devant ti e na ti gi lakue ti wara gï anzoni résultat. Ti sara aye so kue ayeke kete ye ape!”

  • Aye so awandara asigi na ni. Atéléphone, atablette, nga na ambeni appareil ni nde ayeke sara si e yeke lakue na ndö ti Internet nga azo alingbi ti sara lisoro na e na ngoi kue, ye so alingbi ti sara si li ti e ayeke kpô ape, na tongana ngoi ayeke hon, e lingbi ti tï na yâ ti kota fatigue.

  • Tongana zo alango mingi ape. Mbeni maseka-wali so iri ti lo ayeke Miranda atene: “Ekole, kua ti nginza nga na aye so e yeke sara ti passé na temps, asara si gbâ ti amaseka ayeke zingo hio na ndapre nga ala yeke lango hio ape; ye so ayeke sara nzoni na ala ape, nga ala bâ so mbeni ye ti sarango ni ayeke dä ape.” Mingi ni, ye ni so ayeke gue na ala ti tï na yâ ti kota fatigue.

 Ngbanga ti nyen la a lingbi e gbu li na ndö ti tënë ni so

Bible agonda azo so ayeke sara kua ngangu (aProverbe 6:6-8; aRomain 12:11). Me lo tene nga na e ape ti sara kua ngbii juska ti sara si e bâ pasi na pekoni, na tapande ti wara kpale ti seni.

“Na mbeni ngoi lani, mbi bâ so mbi te ye na yâ ti mbeni lango kue tongaso ape ndali ti so mbi zia gï li ti mbi kue na ndö ti gbâ ti akua so mbi yeke lani na ni ti sara. Mbi bâ so a yeke nzoni ape ti tene mbi gi lakue ti yeda ti sara akua kue so a mû na mbi; mbi ye ti sacrifié seni ti mbi na place ni ape.”​Ashley.

A yeke senge ape la si Bible atene: “Mbo so ayeke na fini ayeke nzoni ahon bamara so akui awe.” (Zo-ti-fa-tene 9:4). Ti forcé terê ti mo ti sara aye kue alingbi ti sara si mo pensé so mo yeke na ngangu tongana ti bamara, me a yeke gï teti kete ngoi. Me tongana mo fatigué mingi apeut ti sara si mo wara akota kpale ti seni na pekoni.

 Ye so mo peut ti sara

  • Manda ti tene ên-ën. Bible atene: “Azo so abâ terê ti ala kete, ala yeke na ndara.” (aProverbe 11:2). Azo so abâ terê ti ala kete ahinga so ala peut ti sara ye kue ape, tongaso ala yeke yeda ti sara gï ye so alingbi na ngangu ti ala.

    “Akozo zo so ayeke tï na yâ ti kota fatigue ayeke azo so ahinga ti tene ên-ën ape, so ti tene azo so ayeke forcé terê ti ala ti yeda ti sara akua kue so a mû na ala ti sara. So sarango terê kete la ape. A ye lawa lawa, a yeke gue na mo ti tï na yâ ti kota fatigue.”​Jordan.

  • Wu terê ti mo nzoni. Bible atene: “Ti wu terê kete ayeke nzoni ahon sarango kua ahon ndö ni nga na tombango peko ti pupu.” (Zo-ti-fa-tene 4:6). A tene ka so lango ayeke tongana “kobe ndali ti cerveau ti e.” Maseka oko oko abezoin ti lango aninga l’heure miombe ti si na bale-oko na yâ ti lango oko oko, me mawa ni ayeke so mingi ti ala asara tongaso ape.

    “Na ngoi so mbi yeke lani mbeni zo so ayeke tâ na gbâ ti aye ti sarango ni, mbi yeke lango ka mingi ape. Na ambeni ngoi mbi bâ so tongana mbi lango lani aninga fade kete na ndö ni, ka mbi yeke sara kua nzoni mingi nga mbi yeke na ngia.”​Brooklyn.

  • Leke yâ ti akua ti mo. Bible atene: “Tongana azo so asara kua ngangu aleke gere ti akua ti ala, ye ni ayeke ga gï nzoni.” (aProverbe 21:5). Ti hinga ti leke yâ ti ngoi ti mo nga na akua ti mo ayeke mbeni ye so ayeke aidé ande mo mingi na yâ ti gigi ti mo kue.

    “Tongana zo asara programme ti aye so lo yeke na ni ti sara ayeke aidé lo ti kpe ti tene li ti lo ayeke gï na nduzu nduzu. Tongana programme ti mo ayeke na devant ti lê ti mo, a yeke duti ande ngangu na mo ape ti hinga ndo so mo doit ti sara achangement dä tongaso si mo tï na yâ ti kota fatigue ape.”​Vanessa.