Kiringo tënë ti Bible

Bible asara pëpe tënë ti nyongo manga * wala ti ambeni fason ti nyongo manga. Me, e yeke wara na yâ ni ambeni mama-ndia so afa so Nzapa ake asarango ye so apeut ti buba seni ti zo nga na ati so ayeke sara si zo aga sioni na lê ti Nzapa. Tongaso ti Nzapa, nyongo manga ayeke sioni.

  • Bâ fini na nene ni. ‘Nzapa . . . amû na azo kue fini, pupu so ala yeke wu.’ (Kusala 17:24, 25). So fini ayeke mbeni cadeau ti Nzapa, a lingbi e sara pëpe mbeni ye so alingbi ti sara si fini ti e ahunzi hio, na tapande ti nyon manga. Nyongo manga ayeke mbeni ye so ayeke fâ gbâ ti azo mingi laso na yâ ti dunia kue, atâa so azo apeut ti kpe ni.

  • Ndoye azo so ayeke nduru na mo. “Mo ndoye mba ti mo tongana mo wani.” (Matthieu 22:39). Tongana zo anyon manga na milieu ti azo, a fa so lo yeke na ndoye ti azo ni ape. Tongana mbeni zo so ayeke nyon ka manga ape aduti lakue na terê ti zo so ayeke nyon manga, lo peut ti wara ambeni kobela so azo ti nyongo manga ayeke wara ka.

  • Ti duti nzoni-kue. “Ala mû terê ti ala tongana sandaga so ayeke na fini, so ayeke nzoni-kue, so anzere na Nzapa”. (aRomain 12:1). “Zia e sukula terê ti e wani ti zi aye kue so asara si terê na bibe aga sioni, nga na lege ti kpengo mbeto ti Nzapa zia e gi ti ga azo so ayeke nzoni-kue ahon ti kozo.” (2 aCorinthien 7:1). Nyongo manga ayeke mbeni ye so ayeke na lege ni ape nga ayeke sara si zo apeut pëpe ti ga nzoni-kue na lê ti Nzapa, ndali ti so azo ti nyongo manga ayeke nyon na bê ti ala wani mbeni poison so ayeke sara sioni mingi na seni ti ala.

Bible atene nyen tongana mbeni zo anyon mbangi gï ndali ti senge nzerengo terê?

Na yâ ti Bible e yeke wara pëpe tënë ti mbangi. Me, e yeke wara na yâ ni amama-ndia so afa so ti nyon mara ti aye tongaso ayeke na lege ni ape. Na ndö ti amama-ndia so e londo ti fa so, e yeke wara nga ati so na gbe ni ge so:

  • A lingbi e bata li ti e nzoni. “Mo ndoye Jéhovah Nzapa ti mo . . . na bibe ti mo kue.” (Matthieu 22:37, 38). “Ala zia tâ li ti ala kpô.” (1 Pierre 1:​13). Nyongo mbangi ayeke sara si zo ayeke sara ye kirikiri, nga mingi ti azo aga même ngbâa ni. A hon ti pensé na aye so ayeke nzoni, ye so agbu bê ti zo ni ayeke gï ti wara mbangi ti nyon.​—aPhilippien 4:8.

  • Ti mä yanga ti azo ti komande. Ala “woko terê na gbe ti agouvernement nga na akomandema”. (Tite 3:1). Na yâ ti akodro mingi, ndia akanga lege ngangu na azo ti nyon mbangi. Tongana e ye ti nzere na Nzapa, a lingbi e mä yanga ti azo ti komande.​—aRomain 13:1.

^ par. 3 Nyongo manga so a sara tënë ni ge so aye ti sara tënë ti mbeni zo so na bê ti lo wani lo nyon manga tongana cigarette, cigare, pipe wala chicha. Me amama-ndia so a sara tënë ni ge abâ nga manga ti hôn, ati so a te ni tengo nga na ambeni nde.