Gue na tënë ti yâ ni

Mbi ye ti kui: Eskê Bible apeut ti aidé mbi tongana mbi pensé ti fâ terê ti mbi?

Kiringo tënë ti Bible

En! Bible alondo na “Nzapa, lo so ayeke dë bê ti ala so vundu ahon ndö ti ala.” (2 aCorinthien 7:6). Atâa so Bible ayeke pëpe mbeni livre so ayeke fa tongana nyen ti duti na nzoni seni ti li, lo aidé déjà gbâ ti azo awe ti tomba apensé so ala yeke na ni ti fâ terê ti ala. Awango ti ndara so ayeke na yâ ni apeut ti aidé mo nga kue.

 Awango ti ndara wa la Bible amû ni?

  • Fa atënë ti bê ti mo na mbeni zo.

    Bible atene: “Tâ kamarade aye mba ti lo na ngoi kue nga lo yeke mbeni ita so a dü lo ndali ti angoi ti vundu.”​—aProverbe 17:17.

    Nda ti versê ni: Tongana e yeke na yâ ti vundu si e wara apensé so ayeke na lege ni ape, e yeke vraiment na bezoin ti tene ambeni zo a-aidé e.

    Tongana mo fa atënë ti bê ti mo na zo ape, vundu ayeke hon ndö ti mo. Me tongana mo sara tënë ni na mbeni zo, mo peut ti sentir terê ti mo nzoni kete na pekoni, nga mo peut ti komanse ti wara anzoni pensé.

    Sara ye so: Fa atënë ti bê ti mo laso na mbeni zo, peut-être na mbeni zo ti sewa ti mo wala na mbeni kota kamarade ti mo. * Mo peut nga ti fa apensé ti mo tongana mo sara ni na mbeti.

  • Gue mo bâ awanganga.

    Bible atene: “Azo so ayeke na nzoni terê ayeke na bezoin ti wanganga pëpe, me gï azo ti kobela.”​—Matthieu 9:12.

    Nda ti versê ni: Tongana terê ti e ason, a lingbi e gue e bâ awanganga.

    Tongana mbeni zo apensé ti fâ terê ti lo, a ye ti fa so peut-être mbeni kobela ayeke na gbe ni. Legeoko tongana tanga ti akobela kue, a yeke nzoni zo asara kamene ape ti gue ti bâ awanganga tongana lo pensé ti fâ terê ti lo. Awanganga apeut ti aidé lo.

    Sara ye so: Sara hio ti gue ti bâ mbeni nzoni wanganga.

  • Grisa ape so Nzapa ayeke pensé na mo.

    Bible atene: “A yeke kä anzêrë oku na asenge lê ti pata use, ni la ape? Me, Nzapa agirisa mbeni oko ti anzêrë so pëpe. . . . Ala sara mbeto pëpe; ngere ti ala ahon ngere ti gbâ ti anzêrë.”​—Luc 12:6, 7.

    Nda ti versê ni: Mo yeke na valeur mingi na lê ti Nzapa.

    Tongana mo pensé so zo oko apensé na mo ape, hinga so Nzapa ayeke bâ pasi so mo yeke bâ. Lo yeke pensé na mo, même si nzara ti gigi asigi na yâ ti mo. Psaume 51:17 atene: “Bê so ayeke na vundu nga so anze kue, Nzapa ti mbi, mo yeke ke ni pëpe.” Nzapa aye si mo ngbâ na fini ndali ti so lo ye mo.

    Sara ye so: Gi ti bâ na yâ ti Bible aye so afa biani so Nzapa aye mo. Na tapande, bâ ambeni ye ni na yâ ti chapitre 24 ti buku Ga ndulu na Jéhovah.

  • Sambela Nzapa.

    Bible atene: “Ala mû agingo bê ti ala kue ala bi ni na ndö ti [Nzapa], ngbanga ti so lo yeke bi bê ti lo na ndö ti ala.”​—1 Pierre 5:7.

    Nda ti versê ni: Nzapa aye si mo fa na lo polele comment mo sentir terê ti mo nga lo ye si mo fa na lo agingo bê ti mo.

    Nzapa apeut ti mû na mo siriri ti bê nga na ngangu ti hon ndö ti asituation so mo yeke na yâ ni so (aPhilippien 4:6, 7, 13). A yeke na lege so la lo yeke mû maboko na azo so ayeke sambela lo ti tene lo aidé ala.​—Psaume 55:22.

    Sara ye so: Sambela Nzapa laso. Iri lo na iri ti lo, Jéhovah, nga fa na lo apensé ti mo (Psaume 83:18). Hunda lo ti aidé mo ti gbû ngangu.

  • Gbu li na ndö ti beku ti kekereke so Bible amû.

    Bible atene: “Beku so e yeke na ni so, a yeke tongana kale ti bateau ndali ti fini ti e. Beku ni so aluti nzoni nga aluti ngangu.”​—aHébreu 6:19, kete tënë na gbe ni.

    Nda ti versê ni: Tongana ti mbeni bateau so pupu ayeke hon na ni mbage na mbage, na ambeni temps, mo peut ti duti na anzoni pensé, me na ambeni temps mo peut ti duti na anzoni pensé ape. Me beku so Bible amû apeut ti aidé mo ti duti na anzoni pensé.

    Beku ni so ayeke gï mbeni senge tënë ti bango li ape. Me beku ni aluti na ndö ti zendo so Nzapa amû ti zi aye kue so ayeke sara si e yeke bâ pasi.​—Apocalypse 21:4.

    Sara ye so: Mo peut ti manda ye mingi na ndö ti beku so Bible amû tongana mo diko ye ti manda 5 ti brochure Nzoni tënë so alondo na Nzapa!

  • Sara mbeni ye so mo ye ni mingi.

    Bible atene: “Bê so ayeke na ngia ayeke nzoni yorö.”​—aProverbe 17:22.

    Nda ti versê ni: Na ngoi so e yeke sara ambeni ye so apeut ti sara si e duti na ngia, a yeke aidé e ti hon ndö ti asioni pensé.

    Sara ye so: Sara aye so mo ye ka ti sara ni mingi. Na tapande, ti mä mbeni pendere bia, ti diko mbeni mbeti so apeut ti dë bê ti mo, wala ti sara mbeni ye so mo yeke sara ka ti passé na temps. Mo yeke duti nga na ngia mingi tongana mo aidé ambeni zo, même si a yeke na yâ ti akete kete ye.​—Kusala 20:35.

  • Bâ lege ti seni ti mo.

    Bible atene: “Tarango terê na lege ti ngia ti awanguru ayeke sara nzoni na zo.”​—1 Timothée 4:8.

    Nda ti versê ni: Tongana e sara sport, e lango nzoni nga e te anzoni kobe, ayeke sara nzoni na terê ti e.

    Sara ye so: Tara ti sara sport, na tapande ti tambela na loro, même tongana mo sara gï minute 15.

  • Grisa ape so vundu ti bê ti mo nga na situation ti mo apeut ti changé.

    Bible atene: “Ala hinga ye so ayeke si na gigi ti ala kekereke pëpe.”​—Jacques 4:14.

    Nda ti versê ni: Mbeni kpale so mo yeke gi bê ti mo na ndö ni wala même mbeni kpale so na bango ni solution ayeke dä ape apeut ti duti mbeni ye so ayeke gï teti kete ngoi.

    Même si mo bâ so situation ti mo ni ayeke ngangu laso, kekereke aye apeut ti changé. Tongaso, gi alege kue ti hon ndö ti vundu ti mo (2 aCorinthien 4:8). Situation ti mo so ayeke ngangu so apeut ti changé tongana ngoi ayeke hon, me tongana mo fâ terê ti mo, andâ awe la.

    Sara ye so: Diko ambaï ti Bible so asara tënë ti azo so vundu ahon ndö ti ala lani si ala ye ti kui, na bâ tongana nyen la na nda ni gigi ti ala achangé aga nzoni ahon ti kozo, mingi ni na mbeni lege so ala ku terê ti ala na ni ape. Zia e bâ ambeni tapande ti azo ni.

 Eskê Bible asara nga tënë ti ambeni zo so aye lani ti kui?

En. Bible asara tënë ti ambeni zo so aye ti kui. Nzapa asuku na ala lani ape, me lo aidé ala. Lo peut nga ti aidé mo.

Élie

  • Lo yeke lani zo wa? Élie ayeke lani mbeni prophète ti Nzapa, so ayeke na courage mingi. Me na ambeni temps, lo kue lo découragé. Jacques 5:17 atene: “Élie ayeke ândö mbeni zo so ayeke na abibe tongana ti e.”

  • Ngbanga ti nyen la lo ye lani ti kui? A si na mbeni ngoi lani, Élie abâ so lo yeke gï lo oko, mbeto asara lo nga lo bâ so mbeni ye ti sarango ni ayeke dä ape. Ni la lo voro yanga na Nzapa lo tene: “Jéhovah, . . . mû fini ti mbi.”​—1 aGbia 19:4.

  • Nyen la a-aidé lo lani? Élie afa atënë ti bê ti lo kue na Nzapa. Nzapa amû na lo courage tongana nyen? Nzapa afa na lo so lo pensé na lo nga lo fa na lo tongana nyen la lo yeke mbeni Nzapa so ayeke na ngangu. Nzapa afa nga na Élie so ni yeke lakue na bezoin ti lo. Lo mû nga na Élie mbeni nzoni zo so apeut ti mû maboko na lo.

  • Diko mbaï ti Élie: 1 aGbia 19:2-18.

Job

  • Lo yeke lani zo wa? Job ayeke lani mbeni koli so ayeke na mosoro mingi nga lo yeke na wali nga na gbâ ti amolenge. Lo yeke mbeni zo so avoro Nzapa na bê ti lo kue.

  • Ngbanga ti nyen la lo ye lani ti kui? Gbâ ti akpale asi na Job lani na mbeni ngoi so lo ku terê ti lo na ni ape. Lo perdre amosoro ti lo kue. Amolenge ti lo kue akui na yâ ti mbeni ngangu kpale so asi. Lo wara mbeni sioni kobela na terê ti lo. Na nda ni, ambeni kamarade ti lo atene na lo vîi so lo wani la lo sara si lo wara akpale ni so kue. Job atene: “Nzara ti gigi asigi na yâ ti mbi awe; mbi ye ti ngbâ na fini pëpe.”​—Job 7:16.

  • Nyen la a-aidé lo lani? Job asambela Nzapa nga lo fa vundu ti bê ti lo na ambeni zo (Job 10:1-3). Élihu, so ayeke mbeni nzoni kamarade ti lo, a-encouragé lo ti duti na mbeni nzoni pensé na ndö ti akpale so asi na lo. Me ye so ayeke kota mingi ayeke so, Job ayeda na bê ti lo kue na awango so Nzapa amû na lo.

  • Diko mbaï ti Job: Job 1:1-3, 13-​22; 2:7; 3:1-13; 36:1-7; 38:1-3; 42:1, 2, 10-13.

Moïse

  • Lo yeke lani zo wa? Moïse ayeke lani zo so ayeke mû li ni na ndö ti mara ti Israël ândö nga lo yeke mbeni prophète ti Nzapa so ayeke be-ta-zo.

  • Ngbanga ti nyen la lo ye lani ti kui? Moïse ayeke lani na akota kua ti sara, lakue azo ayeke kasa lo nga lo bâ so ngangu ahunzi na lo. Ye so asara si lo tene na Nzapa lo tene: “Pardon, mo fâ gï mbi awe.”​—Nombre 11:11, 15.

  • Nyen la a-aidé lo lani? Moïse afa atënë ti bê ti lo na Nzapa. Nzapa adiminué mbage ti akua so lo yeke na ni; ye so so asara si lo gi bê ti lo mingi ape.

  • Diko mbaï ti Moïse: Nombre 11:4-6, 10-17.

^ par. 14 Tongana mo pensé tâ ngangu mingi ti fâ terê ti mo, si zo oko ayeke na terê ti mo ape, iri mbeni service d’urgence na téléphone.