Gue na tënë ti yâ ni

BIBLE ACHANGÉ FINI TI AZO

Pendere futa so mbi wara so ahon atanga ni kue

Pendere futa so mbi wara so ahon atanga ni kue
  • A DÜ LO NA NGU: 1967

  • NA KODORO TI: FINLANDE

  • LO YEKE ÂNDÖ: MBENI KOTA ZO TI JOUENGO TENNIS

GIGI TI MBI ÂNDÖ

Mbi kono na Tampere (Finlande), mbeni gbata so akeke ayeke dä mingi nga ayeke kpô. Tënë ti Nzapa agbu bê ti azo ti sewa ti mbi mingi ape, me ala bâ tënë ti mandango mbeti na nene ni mingi nga ala ye si e duti na anzoni sarango ye. Mama ti mbi ayeke zo ti kodro ti Allemagne, ni la na temps so mbi de lani kete, mbi yeke gue ka na Allemagne de l’ouest, ndo so a-âta ti mbi ayeke dä.

Depuis la mbi ye sport mingi so. Na temps so mbi de lani kete, mbi yeke sara mara ti asport nde nde. Me na temps so mbi yeke na ngu 14, mbi décidé ti joué gï tennis awe. Na ngoi so mbi yeke na ngu 16, mbi yeke sara entrainement fani use wala ota tongaso na yâ ti lango oko oko: fani use na yâ ti lango ni mbi na mbeni entraîneur la e yeke sara ni, nga na pekoni mbi oko la mbi yeke sara entraînement na alakui. Aye nde nde so a yeke sara na yâ ti tennis anzere na mbi mingi; jouengo ni amû lege na mbi ti sara ambeni ye so mbi pensé so mbi peut ti sara ni lâ oko ape. Atâa so a yeke nzere ka na mbi ngoi na ngoi ti tene mbi na akamarade ti mbi e wara terê ti nyon ye kete, lâ oko mbi nyon mbangi ape wala mbi nyon sämba ahon ndö ni ape. Gigi ti mbi ayeke gï tennis awe, ye so agbu lani bê ti mbi la.

Na temps so mbi yeke na ngu 17, mbi komanse ti joué tournoi ti ATP. * Na peko ti so mbi gagné gbâ ti atournoi, iri ti mbi awu mingi na Finlande. Na ngoi so mbi yeke na ngu 22, mbi yeke na milieu ti azo ti jouengo tennis 50, so ahinga ti joué tennis mingi na yâ ti dunia kue.

Teti angu mingi, mbi tambela na yâ ti dunia kue ti joué tennis. Mbi bâ apendere ndo, me mbi bâ nga tongana nyen la akpale asi singo na yâ ti dunia: akpale tongana sarango sioni ye, nyongo mbangi nga na tënë ti pollution. Na tapande, na temps so mbi yeke na États-Unis, a tene na e ti gue pëpe na yâ ti aquartier ti ambeni gbata ndali ti so a yeke sara sioni ka na azo dä mingi. Aye ni so asara mbi nzoni ape. Na ndö ni, atâa so mbi yeke sara lani mbeni ye so mbi ye ni mingi, na nda ti lango oko oko mbi bâ so mbeni ye amanke mbi.

LEGE SO BIBLE ACHANGÉ FINI TI MBI

A-Témoin ti Jéhovah akomanse ti manda lani Bible na Sanna, so ayeke ndeko ti mbi. A sara mbi ngia ti bâ lo lani na mandango Bible ni, me mbi ke nga na lo ti manda ni ape. Na ngu 1990, e sara mariage, na lo wara batême lo ga Témoin ti Jéhovah ngu oko na pekoni. Mbi ye lani tënë ti Nzapa mingi ape, me mbi mä na bê so Nzapa ayeke dä. Mbi rappelé so âta ti mbi ti wali, so ayeke na Allemagne, ayeke diko Bible lani mingi, na lo fa même na mbi lani tongana nyen ti sambela.

Mbeni koli na wali ti lo, so ayeke aTémoin ti Jéhovah, aga ti bâ mbi na Sanna. Koli ni, so iri ti lo ayeke Kari, afa na mbi prophétie ti Bible so asara tënë na ndö ti “lâ ti nda ni”. (2 Timothée 3:1-5). Tënë ni andu bê ti mbi mingi; mbi comprendre fadeso ngbanga ti nyen la aye ayeke tambela nzoni ape na yâ ti dunia. Na lango ni so, e sara nga lisoro mingi ape na ndö ti tënë ti Nzapa. Me a yeke na ndö ti lisoro ni so la mbi na Kari e komanse ti manda tënë ti Nzapa. Ye kue so mbi yeke manda lani ayeke na lege ni. Me teti so mbi yeke na gbâ ti aye ti sarango ni nga mbi yeke voyagé mingi, a yeke ngangu ti tene e sara lisoro ni lakue lakue; me Kari adécouragé ape. Lo yeke tokua lani na mbi alettre ti kiri tënë na ahunda so mbi yeke hunda na lo na ngoi ti mandango ye ti e ni. Mbi wara lani anzoni kiringo tënë na akota hundango tënë so mbi yeke hunda ka terê ti mbi na ni. Yeke yeke, mbi komanse ti hinga kota mama-tënë ti Bible: Nzapa ayeke sara si ye so lo leke ti sara aga tâ tënë na lege ti Royaume ti lo. So mbi hinga so iri ti Nzapa ayeke Jéhovah, nga so mbi bâ aye so lo sara ndali ti e, a sara ye mingi na ndö ti mbi (Psaume 83:18). Ye so andu bê ti mbi mingi ayeke ye so a futa ti zi na azo; a yeke mbeni ye so Nzapa asara ni gï tongaso ape, me lo sara ni ndali ti so lo ndoye e (Jean 3:16). Mbi manda nga so mbi peut ti ga kamarade ti Nzapa nga ti duti na fini ti lakue lakue na yâ ti paradis (Jacques 4:8). Mbi komanse ti hunda terê ti mbi: “Tongana nyen la mbi peut ti kiri singila na Nzapa ndali ni?”

Mbi gbu li ngangu na ndö ti gigi ti mbi. Mbi manda na yâ ti Bible so zo ayeke wara ngia mingi tongana lo mû ye na azo, na mbi yeke lani na nzara ti fa aye so mbi manda so na amba ti mbi (Kusala 20:35). So jouengo tennis ayeke tongana kua ti nginza ti mbi lani, na yâ ti ngu oko, mbi yeke na yanga-da ape teti nze omene na ndambo tongaso, ndali ti so mbi doit ti gue ti joué atournoi. Gigi ti azo ti sewa ti mbi kue atourné gï na ndö ti mbi: entraînement ti mbi, aprogramme ti mbi ti lango oko oko, nga na kua ti jouengo tennis ti mbi. Mbi comprendre lani so a lingbi mbi sara ambeni changement.

Mbi hinga so tongana mbi zia jouengo tennis ndali ti tënë ti Nzapa, azo mingi ayeke comprendre ande desizion ti mbi ni ape. Me pasa so mbi yeke na ni ti hinga Jéhovah nga ti wara fini ti lakue lakue ayeke kota mingi ahon afuta kue so mbi peut ti wara na yâ ti jouengo tennis. Ti mû desizion ni so ayeke lani ngangu na mbi ape. Mbi leke na bê ti mbi ti konde tënë ti azo ape, ndali ti so a yeke desizion ti mbi. Versê ti Bible so a-encouragé lani mbi mingi ti hon ndö ti kpale ni so ayeke Psaume 118:6, so atene: “Jéhovah ayeke na terê ti mbi; mbeto ayeke sara ande mbi pëpe. Nyen la zo apeut ti sara na mbi nyen?”

Na yâ ti oko ngoi ni, ambeni ndokua aye ti tene mbi signé mbeni kota contrat so apeut ti sara si mbi yeke duti na kpale ti nginza ape teti angu mingi. Me, mbi mû lani mbeni desizion awe, tongaso mbi ke ti signé contrat ni, na pekoni mbi sigi na yâ ti tournoi ti ATP. Mbi continué ti manda Bible, ni la na lango 2 ti nze ti juillet ngu 1994 mbi wara batême, mbi ga Témoin ti Jéhovah.

NZONI YE SO MBI WARA NA PEKONI

A yeke pëpe mbeni ye ti ngangu la asi na mbi si asara si mbi ga na mbage ti Nzapa. Nga, mbi yeke lani pëpe mbeni zo so ayeke gi ti hinga tâ tënë na ndö ti Nzapa. Gigi ti mbi ayeke lani nzoni nga mbi bâ nga mbeni ye so mbi yeke gi ti wara na ndö ni ape. Me, tâ gï tongaso, mbi wara tâ tënë, na mbi hinga ndani so e yeke biani na fini; gigi ti mbi akiri aga encore pendere ahon ti so kozo mbi pensé na ni! Sewa ti mbi akpengba nga e yeke beoko ahon ti kozo. A nzere na mbi mingi so amolenge ti mbi ti koli ota amû peko ti mbi: ala mû peko ti mbi na yâ ti sport ape, me ala kue aga awakua ti Nzapa.

Mbi ngbâ lakue ti joué tennis. Mbi yeke wara nginza grâce na akua so mbi sara so andu tënë ti tennis, na tapande, kua ti coach nga na kua ti bango ndo na ndö ti mbeni club ti tennis. Me gigi ti mbi ayeke fadeso gï na ndö ti tënë ti sport ape. Kozo, mbi yeke sara entraînement teti al’heure mingi ti tene mbi ga mbeni nzoni zo ti jouengo tennis. Fadeso, mbi yeke fa tënë ti Nzapa teti al’heure mingi nze na nze. A nzere na mbi mingi ti mû temps ti aidé azo ti hinga nga ti sara ye alingbi na amama-ndia ti Bible so achangé fini ti mbi. Ye so asara si mbi yeke na ngia mingi ayeke so mbi zia na kozo ndo songo ti mbi na Jéhovah Nzapa nga mbi yeke fa na azo beku ti mbeni gigi ti kekereke so ayeke pendere mingi.​—1 Timothée 6:19.

^ par. 10 ATP ayeke mbeni tënë na yanga ti anglais so aye ti sara tënë ti bungbi ti azo so ahinga ti joué tennis mingi. A yeke mbeni bungbi so ayeke bâ ndo na ndö ti atournoi kue ti tennis ti akoli. Tongana mbeni zo agagné tournoi, a yeke mû na lo nginza nga lo yeke wara apoint. A yeke sara classement ti azo ti jouengo tennis ti dunia kue na lege so a yeke bungbi apoint kue so ala wara na ngoi ti atournoi nde nde so ala joué.