Gue na tënë ti yâ ni

BIBLE ACHANGÉ FINI TI AZO

“Kamene asara encore mbi ape”

  • A dü lo na ngu: 1963

  • Na kodro ti: Mexique

  • Lo yeke ândö: Godobe; nga lo bâ lani terê ti lo tongana mbumbuse zo

GIGI TI MBI ÂNDÖ

A dü mbi na Ciudad Obregón, mbeni gbata na nord ti Mexique. A dü e gumbaya, mbi la mbi yeke oku molenge ni. E lango lani na mbeni quartier so ayeke na yanga ti gbata ni, na babâ ti mbi ayeke na kete ferme ti lo so lo yeke fâ yaka dä nga lo yeke bata anyama dä. Ndo ni ayeke lani bien, sewa ti e ayeke na ngia nga e yeke na pendere songo na milieu ti e. Mawa ni ayeke so, na temps so mbi yeke tâ gï na ngu oku, mbeni kota pupu asara na abuba ferme ti e ni; e yeke obligé ti quitté ti gue ti lango na mbeni gbata nde.

Na pekoni, babâ ti mbi asara mbeni kua so lo wara nginza dä bien, me lo tï na yâ ti nyongo sämba ahon ndö ni, ye so abuba yâ ti songo ti lo na mama nga ajoué na ndö ti e amolenge ni. Mbi na ayaya ti mbi ti koli e komanse ti nzi manga ti papa, e nyon ni. Mbi komanse ti nyon sämba mbi soulé na temps so mbi yeke tâ gï na ngu omene. Kete na pekoni, babâ na mama ti mbi akangbi terê na mbi kiri mbi nyon sämba nga na manga ti mbana.

Mama amû mbeni koli nde, na lo mû e, e gue e lango na da ti koli ni. Me koli ni ayeke mû nga nginza na lo ape, nga kete nginza so mama ayeke wara grâce na kua ti nginza ti lo alingbi ape ti tene e vivre na ni. Tongaso, mbi na aita ti mbi e sara kua kue so e peut ti sara, me nginza so e wara alingbi ti tene e te gï na ye awe. Mbi yeke ciré poro ti azo, mbi yeke ka mapa, ajournal, chewing-gum nga na ambeni ye nde. Mbi yeke fono lani na yâ ti ville ti ro ye ti tengo ni na ndö ti poubelle ti azo ti mosoro.

Na temps so mbi wara ngu bale-oko, mbeni koli ahunda na mbi ti tene mbi na lo e sara kua na place so ayeke tuku asaleté ti gbata ni dä. Mbi yeda, mbi ke ekole na mbi quitté yanga-da. Lango oko oko, lo payé mbi asi nga 500 FCFA ape na lo yeke mû na mbi akobe so e wara na ndö ti apoubelle ni. Mbi mû ambeni ye so mbi wara na ndö ti poubelle la mbi leke na mbeni da si mbi lango na yâ ni. Na place so mbi yeke lango dä, azo ni aye buba tënë mingi nga ala ye sarango lango-sioni. Ambeni mingi ayeke azo so anyon sämba ahon ndö ni nga azo ti nyongo mbangi. Sioni ngoi ti yâ ti gigi ti mbi la. Lakue na bï, mbi yeke toto nga mbeto ayeke sara mbi. So mbi yeke pauvre mingi nga mbi gue na ekole ayo ape, kamene asara mbi mingi. Mbi lango na place ti poubelle ni so ngu ota, na pekoni mbi gue mbi vivre na mbeni gbata ti Mexique ni nde. Kâ, mbi sara kua na yâ ti ayaka ti afleur, ti canne à sucre, ti coton nga na ti pomme de terre.

Place ti bingo asaleté so akpa terê na ti so mbi lango lani na yâ ni teti ngu ota

Ngu osio na pekoni, mbi kiri na Ciudad Obregón. Mbeni omba ti mbi, so ayeke mbeni nganga, amû na mbi mbeni chambre na yâ ti da ti lo. Na pekoni, mbi komanse ti bâ gï asioni bango-li na bï juska vundu ahon ndö ti mbi, mbi pensé ti fâ terê ti mbi. Na mbeni bï, mbi sambela Nzapa, mbi tene: “Seigneur, tongana mo yeke dä, aidé mbi ti hinga mo na mbi yeke sara na mo lakue. Tongana mbeni tâ bungbi ti Nzapa ayeke dä, mbi ye ti wara ni.”

LEGE SO BIBLE ACHANGÉ FINI TI MBI

Mbi ye ka mingi ti manda ye na ndö ti Nzapa. Même na temps so mbi ngbâ lani kete, mbi yeke gue na yâ ti a-eglize nde nde, me ala kue azia vundu na bê ti mbi. Oko tongaso na milieu ni afa na mbi ye mingi na ndö ti Bible ape wala akaï nzara so mbi yeke na ni ti hinga ye na ndö ti Nzapa ape. Mingi ti a-eglize ni ayeke sara gï tënë na ndö ti nginza, nga ti ambeni, azo ti yâ ti eglize ni ayeke sara lango-sioni.

Na temps so mbi yeke na ngu 19, mbeni koli ti ita ti mbi atene na mbi so aTémoin ti Jéhovah afa na lo ye so Bible atene na ndö ti a-image so azo ayeke voro na Nzapa. Lo diko Exode 20:4, 5 na mbi. Aversê ni afa so a lingbi e sara pëpe mbeni statue ti voro ni. Versê 5 ni atene: “Mo kuku na gbe ti ala pëpe wala zia mbeni ye ahanda mo ti voro ala pëpe, ndali ti so mbi Jéhovah Nzapa ti mo, mbi yeke Nzapa so mbi hunda ti tene zo avoro gï mbi oko awe.” Na pekoni, koli ti ita ti mbi ni ahunda mbi, lo tene: “Tongana fade Nzapa asara kua na a-image ti sara amiracle wala tongana fade lo ye ti tene e voro lo na lege ti a-image, ngbanga ti nyen la lo interdire ni?” Hundango tënë ti lo so asara si mbi gbu li ti mbi. Na pekoni, mbi na lo e sara lisoro mingi na ndö ti tënë ti Nzapa. Lisoro ni anzere lani na mbi mingi asara si mbi bâ hongo ti temps ape.

Ambeni ngoi na pekoni, lo mû mbi, mbi na lo e gue na bungbi ti aTémoin ti Jéhovah. Ye so mbi bâ nga mbi mä na ngoi ti bungbi ni atouché mbi mingi. Même akete molenge kue ayeke mû mbage na yâ ti bungbi ni, ala yeke sara tënë sân mbeto na ndö ti estrade! Mbi tene, ‘A fa ye na azo ni ge pendere mingi-ein!’ A-Témoin ti Jéhovah ni ayamba mbi nzoni atâa so kuä ti li ti mbi ayo nga mbi yü bongo nzoni ape. Ambeni atisa même mbi ti gue ti te ye na ndö ti ala na peko ti bungbi ni!

Na mandango Bible na aTémoin ti Jéhovah, mbi manda so Jéhovah Nzapa ayeke mbeni Babâ so aye e nga lo yeke pensé na e, atâa e yeke zo ti moyen wala pëpe, atâa e hinga mbeti wala pëpe nga atâa couleur ti poro ti terê ti e ayeke so wa. Lo yeke sara kangbi kete tongaso na popo ti azo ape (Kusala 10:34, 35). Na nda ni, mbi wara lege ti kaï nzara so mbi yeke na ni ti hinga ye na ndö ti Nzapa. Mbi yeke fadeso na ngia, nga mbi bâ encore ape so mbeni ye amanke mbi na yâ ti gigi ti mbi.

NZONI YE SO MBI WARA NA PEKONI

Gigi ti mbi achangé tâ ngangu! Mbi zia lege ti nyon manga, ti nyon sämba ahon ndö ni nga ti tënë abuba tënë. Vundu so angbâ lani na bê ti mbi depuis kete ti mbi akomanse ti hon yeke yeke, nga mbi yeke bâ encore asioni bango-li ape. Mbi zia nga ti pensé so mbi yeke mbeni mbumbuse zo; mbi yeke lani na pensé ni so ndali ti angangu kpale so mbi hon na yâ ni na temps so mbi de lani kete nga ndali ti so mbi manda mbeti lani ayo ape.

Mbi marié mbeni nzoni wali so aye Jéhovah nga so amû maboko na mbi mingi. Fadeso, mbi yeke mbeni surveillant so ague na ando nde nde ti sara vizite na acongrégation ti aTémoin ti Jéhovah ti kpengba amba ti mbi nga ti fa ye na ala. Ala yeke tongana aita ti mbi ti koli na ti wali. Grâce na atënë ti dengo bê so ayeke na yâ ti Bible nga na pendere fango ye so Nzapa ayeke fa na e, mbi sara encore kamene ape.

Mbi na wali ti mbi e ngbâ ti mû maboko na azo tongana ti so a sara lani na mbi nga