Gue na tënë ti yâ ni

BIBLE ACHANGÉ FINI TI AZO

“Mbi yeke encore zo so aye sarango ye ti ngangu na zo ape”

“Mbi yeke encore zo so aye sarango ye ti ngangu na zo ape”
  • A dü lo na ngu: 1956

  • Na kodro ti: Canada

  • Lo yeke ândö: Zo so gigi adécouragé lo, lo gi awali mingi nga lo yeke sara ye ti ngangu na zo

GIGI TI MBI ÂNDÖ

A dü mbi na gbata ti Calgary na Alberta (Canada). Na temps so mbi ngbâ kete mingi, babâ na mama ti mbi adivorcé, na mama amû mbi e gue na ndo ti a-âta ti mbi. Ala ye mbi na mama mingi, mbi yeke lani na ngia mingi na temps so mbi ngbâ kete. Mbi ngbâ ti rappelé na apendere souvenir ti ngoi ni so.

Na ngu mbasambala, gigi aga ngangu na mbi na temps so babâ na mama akiri asara mariage, na e quitté e gue na Saint-Louis, na Missouri (États-Unis). Hio mbi ga ti bâ so babâ ti mbi apeut ti duti mbeni zo so apeut ti sara sioni na zo. Na tapande, na ngoi so mbi gue pan na fini ekole so a zia mbi dä, amba ti mbi apika mbi, me mbi sara ye oko na ala ape. Babâ ti mbi amä tënë ni na ngonzo asara lo mingi. Lo pika mbi ngangu ahon ti amba ti mbi ti ekole ni! Mbi comprendre ye so babâ ti mbi aye ti fa na mbi so, na mbi komanse ti tiri na amba ti mbi na ngoi so mbi yeke tâ gï na ngu mbasambala.

Sioni sarango ye ti babâ ti mbi ayeke son ka bê ti mama mingi nga fani mingi ala yeke papa ka sioni. Mbi komanse ti nyon sämba ahon ndö ni nga ti nyon mbangi na temps so mbi yeke gï na ngu 11. Mbi ga zo so aye sarango ye ti ngangu mingi nga mbi yeke tiri fani mingi na azo na yâ ti quartier. Na ngoi so mbi hunzi ekole na lycée, mbi kiri mbi ga zo so aye sarango ye ti ngangu mingi na zo.

Na temps so mbi yeke na ngu 18, mbi ga mbeni oko ti aturugu ti États-Unis (Corps des Marines des États-Unis). A fa na mbi tongana nyen ti fâ zo. Ngu oku na pekoni, mbi quitté kua ti turugu ti manda ye na ndö ti psychologie ndali ti so mbi ye ti sara kua na Lapolice ti États-Unis (FBI). Mbi komanse mandango mbeti ni na États-Unis nga na peko ti so mbi kiri na Canada, mbi continué ni kâ.

Na université sarango ye ti azo adécouragé mbi. Azo kue aye ti pensé gï na intérêt ti ala wani, na bango ni aye kue na dunia ayeke gï senge senge, nga a kpa mo bâ mo tene solution ti akpale ti azo ayeke dä ape. Mbi zia bê ti mbi ape na ndö ti azo ti sara si dunia aga mbeni pendere ndo.

Ndali ti so mbi hinga ye ti sara na yâ ti gigi ti mbi ape, mbi komanse ti bi terê ti mbi na yâ ti nyongo sämba nga na mbangi, ti gi gï nginza, nga ti gi awali. Vie ti mbi ayeke lani gï guengo na place ti afête; nga tongana mbi gi mbeni wali tongaso awe mbi yeke pensé encore na mbeni nde so mbi peut ti gi. Formation ti turugu so mbi sara asara si mbi yeke na confiance na terê ti mbi na mbi ye ka ti tiri na azo mingi. Mbeni zo la ayeke fa na mbi pëpe nyen la ayeke nzoni na nyen la ayeke sioni, nga tongana mbeni zo asara ye na amba ti lo na lege ni ape, mbi yeke ke na zo ni. Me ti vrai ni, ye ni so asara si mbi ga tâ encore zo so aye sarango ye ti ngangu na zo mingi.

LEGE SO BIBLE ACHANGÉ FINI TI MBI

Mbeni lâ, na temps so mbi na mbeni kamarade ti mbi e ngbâ ti nyon mbangi na sous-sol ti da ti mbi, nga e yeke leke ambangi ni ti gue ti kä ni, kamarade ti mbi ni ahunda mbi wala eskê mbi mä na bê na Nzapa? Mbi tene: “Tâ tongana Nzapa la ayeke na gunda ti pasi ti dunia, mbi bezoin ti hinga lo ape!” Na ndade ni, mbi komanse ti sara kua na mbeni ndo, na mbeni mba ti mbi ti place ti kua ni so ayeke Témoin ti Jéhovah ahunda mbi atene: “Ti mo, eskê Nzapa la ayeke na gunda ti pasi ti azo?” Li ti mbi akpe na temps so lo hunda na mbi tënë ni so ndali ti so ye ni apassé gï na ndade ti tënë so mbi tene na kamarade ti mbi so; ye so asara si mbi ye ti hinga ye mingi na ndö ni. Na anze omene so aga na pekoni, e sara lisoro mingi, nga lo fa na mbi akiringo tënë ti Bible na ndö ti ambeni ngangu hunda ti mbi so andu gigi ti e azo.

Wali so mbi na lo e yeke vivre lani aye ape ti tene mbi fa na lo aye so mbi manda so. Na mbeni dimanche mbi tene na lo so mbi tisa aTémoin ti Jéhovah ti ga ti manda Bible na e na yanga-da. Na ndade ni, na kiringo ti mbi na kua, mbi bâ so lo mû aye kue na da, lo quitté. Mbi sigi na mbi toto. Mbi sambela, mbi voro yanga na Nzapa ti aidé mbi. Kozo ti tene mbi sambela Nzapa mbi di iri ti lo Jéhovah na yâ ni la.—Psaume 83:18

Lango use na pekoni, mbeni couple so ayeke Témoin ti Jéhovah akomanse ti manda Bible na mbi, kozo ti tene a manda Bible na mbi la. Na peko ti so ala hon, mbi continué ti diko buku so ala mû na mbi si ala yeke manda ye na mbi na yâ ni so, li ni ayeke Mo lingbi ti douti la koue la koue na paradis na ndo sesse, na mbi hunzi ni na bï ni kue. * Aye so mbi manda na ndö ti Jéhovah Nzapa nga na Molenge ti lo Jésus Christ andu bê ti mbi. Mbi bâ so Jéhovah ayeke bâ mawa ti zo nga vundu asara lo na ngoi so e bâ pasi (Ésaïe 63:9). Ye so andu bê ti mbi mingi ayeke ndoye ti Nzapa na mbage ti mbi nga sacrifice so Molenge ti lo asara ndali ti mbi (1 Jean 4:10). Mbi tene so Jéhovah akanga bê na mbi “ngbanga ti so lo ye si a futi zo oko pëpe, me lo ye si azo kue achangé bê ti ala.” (2 Pierre 3:9). Mbi bâ so Jéhovah aye ti tene mbi ga kamarade ti lo.—Jean 6:44.

Mbi komanse ti gue na abungbi tâ gï na yâ ti yenga ni so. Kuä ti li ti mbi ayo lani mingi, mbi yü aye ti mê, na gï na bango mbi zo apeut ti ga nduru na mbi ape. Me aTémoin ti Jéhovah abâ mbi tongana mbeni fami ti ala so aninga ala bâ lo ape. Ala sara ye tongana atâ Chrétien. Mbi sentir terê ti mbi tongana ti so mbi yeke kozo na yanga-da na a-atâ ti mbi, me ti so ni so na yâ ti mbeni pendere ndo encore mingi.

Kete na pekoni, mandango Bible so mbi manda lani akomanse ti changé gigi ti mbi. Mbi fâ kuä ti li ti mbi, mbi zia lege ti gingo awali kirikiri, ti nyongo mbangi nga na nyongo sämba ahon ndö ni (1 aCorinthien 6:9, 10; 11:14). Mbi ye lani ti zia ngia na bê ti Jéhovah. Tongaso, tongana mbi manda so mbeni ye so mbi sara, Nzapa ayeda na ni ape, mbi yeke gï araison ape. Fani mingi, vundu ayeke sara tâ mbi mingi ndali ni. Mbi yeke tene na terê ti mbi mbi tene ‘Mbi yeke sara encore ni ape.’ Na sân ti ku, mbi yeke sara kue ti changé fason so mbi yeke pensé na ni nga mbi yeke changé asarango ye ti mbi. Ye ti peko ni ayeke so, hio mbi bâ so gigi ti mbi ayeke nzoni mingi tongana mbi sara ye so Jéhovah ahunda na mbi ti sara. Na lango 29 ti nze ti juillet, ngu 1989, so ti tene nze omene na peko ti so a komanse ti manda Bible na mbi, mbi wara batême, mbi ga Témoin ti Jéhovah.

NZONI YE SO MBI WARA NA PEKONI

Bible a-aidé mbi ti changé sarango ye ti mbi. Ândö, tongana mbi na mbeni zo e mä terê ape, mingi ni mbi yeke sara ye na lo na ngangu. Me fadeso, mbi yeke sara kue ti “duti na siriri na azo kue.” (aRomain 12:18). Mbi pika kate na ndö ni ape, me merci na Jéhovah so lo changé mbi grâce na ngangu ti Mbeti ti lo nga na yingo vulu ti lo.—aGalate 5:22, 23; aHébreu 4:12.

A hon ti tene mbi duti zo so aye nyongo mbangi mingi, zo so ayeke sara ye ti ngangu na azo, nga so agi awali mingi, fadeso mbi yeke sara kue ti zia ngia na bê ti Jéhovah Nzapa nga ti sara na lo na bê ti mbi kue. Ye so andu nga mungo maboko na azo ti hinga lo. Ambeni ngu kete na peko ti so mbi wara batême, mbi quitté mbi gue na mbeni kodro ti fa tënë ti Nzapa na ndo so bezoin ti awafango tënë ti Nzapa ayeke dä mingi. Tongana ngu ayeke hon, mbi wara ngia ti manda Bible na gbâ ti azo nga ti bâ tongana nyen la Bible achangé gigi ti ala tongana ti mbi. Terê ti mbi anzere nga mingi so mama ti mbi aga Témoin ti Jéhovah; mbeni raison so lo ga ni ayeke so lo bâ so sarango ye ti mbi achangé.

Na ngu 1999, na kodro ti El Salvador, mbi gue na ekole so laso a iri ni Ekole ti awafango nzoni tënë ti Royaume. Ekole so aformé mbi nga amû maboko na mbi ti mû li ni na yâ ti kua ti fango tënë ti Nzapa, ti fa ye na yâ ti congrégation nga ti bâ ndo na ndö ti azo ti yâ ti congrégation ni. Kete na pekoni gï na yâ ti oko ngu ni so, mbi sara mariage na Eugenia, wali ti mbi so mbi ye lo mingi. Laso mbi na lo kua ti e ayeke ti fa gï tënë ti Nzapa na azo na Guatemala.

Fadeso, a hon ti tene gigi anzere na mbi ape, mbi yeke na ngia mingi. So mbi sara ye alingbi na awango ti Bible a sara si mbi zia lege ti gingo awali kirikiri, mbi zia lege ti sarango ye ti ngangu na azo, nga a sara si mbi ye azo nga mbi yeke na siriri na ala.

^ par. 17 Mingi ni aTémoin ti Jéhovah ayeke manda laso Bible na azo na lege ti buku Bible alingbi ti fa nyen na e?