Gue na tënë ti yâ ni

Tene na ala so mo ye ala

Tene na ala so mo ye ala

Ong-li ayeke mbeni Témoin ti Jéhovah na kodro ti Bulgarie. Lo manda Bible na mbeni maseka-wali so iri ti lo ayeke Zlatka; me koli ti Zlatka amanda ti lo ni ape. Ong-li atene: “Na ngoi so e yeke sara étude ni na ndö ti tënë ti sewa, mbi fa na lo so a yeke kota ye mingi ti tene e tene na koli ti e nga na amolenge ti e so e ye ala. Mawa asara Zlatka, na lo tene na mbi so lâ oko lo tene pëpe na koli ti lo, wala na molenge ti lo ti wali so ayeke ngu gumbaya, so lo ye ala!”

Zlatka atene: “Mbi peut ti sara ye kue ndali ti ala, me a yeke ngangu na mbi ti tene na ala so mbi ye ala.” Lo kiri lo tene: “Lâ oko mama ti mbi atene na mbi ape so lo ye mbi, nga lâ oko âta ti mbi ti wali atene na mama ti mbi ape so lo ye lo.” Ong-li afa na Zlatka na yâ ti Bible so Jéhovah atene na Jésus na kota go so lo ye lo (Matthieu 3:17). Lo encouragé Zlatka ti sambela Jéhovah na ndö ti tënë ni, na ti sara kue ti tene na koli ti lo nga na molenge ti lo so lo ye ala.

Ong-li atene: “Lango use na pekoni, terê ti Zlatka anzere ti tene na mbi so lo sambela Jéhovah ti aidé lo. Na temps so koli ti lo akiri na yanga-da, lo tene na lo so lo manda na yâ ti Bible so a yeke kota ye ti tene wali ane koli ti lo nga lo ndoye lo. Lo duti kpô kete, lo ngbâ lo tene na koli ni so lo ye tâ lo mingi! Na temps so molenge ti lo ti wali akiri na yanga-da, Zlatka agbu lo na kate na lo tene na lo so lo ye lo!” Zlatka atene na mbi atene: ‘Ti fadeso mbi sentir terê ti mbi tâ bien. A yeke ngangu na mbi ka depuis ti fa atënë ti bê ti mbi na azo ti sewa ti mbi, me grâce na aide ti Jéhovah mbi peut fadeso ti tene na azo ti sewa ti mbi so mbi ye ala.’

Ong-li angbâ ti hunda ti manda Bible na azo ti yâ ti quartier ti lo

Ong-li akiri atene: “Yenga oko na peko ni, mbi wara koli ti Zlatka na lo tene na mbi: ‘Gbâ ti azo atene na mbi so Zlatka adoit ti manda Bible na ala ape, me mbi bâ so so lo manda Bible, a sara tâ nzoni mingi na sewa ti e. Fadeso, e yeke na nzoni songo na yâ ti sewa ti e.’”