Gue na tënë ti yâ ni

Gue na gbe ti menu

aTémoin ti Jéhovah

Sango

Mbeni Bible so a sara ni ti tene angbâ aninga

Mbeni Bible so a sara ni ti tene angbâ aninga

Ti aTémoin ti Jéhovah, mbeni mbeti so ayeke kota mingi ahon Bible ayeke dä ape. Ala yeke manda ni lakue nga ala yeke sara kua na ni ti fa na nzoni tënë ti Royaume ti Nzapa na azo (Matthieu 24:14). Ye so asara si Bible ti ala ayeke buba ka hio mingi. Ni la, aTémoin ti Jéhovah asara kue ti tene Mbeti ti Nzapa ti fini dunia so a sigi na ni na ngu 2013 aduti mbeni bible so ayeke pendere nga alingbi ti buba hio ape.

A lingbi couverture ti fini bible ni so akpengba. Na ngoi so aTémoin ti Jéhovah so ayeke imprimé ambeti na Wallkill, na États-Unis, asara lisoro na ndö ti ye so ala ye ti sara so na kota zo ti mbeni ndokua ti lekengo ambeti, kota zo ni atene na ala: “Bible so ala yeke gi so ayeke dä ape.” Lo kiri lo tene: “A yeke ye ti mawa, mingi ti abible so azo aleke ni ayeke gï ti tene aduti pendere na ndö ti table wala na yâ ti étagère, me ti tene angbâ aninga ape.”

Ambeni Mbeti ti Nzapa ti fini dunia so a sigi na ni ândö akpengba mingi ape. A yeke si ka so tongana ndo achauffé mingi afeuille ni ayeke zi. Ti tene a wara mbeni Bible so a lingbi ti sara kua na ni na ngoi ti dë nga na ti ndowa, équipe so ayeke imprimé ambeti ni agbu li ti ala ti bâ couverture wala a peut ti zia na pekoni nga tongana nyen la a yeke tingbi afeuille ti bible ni. Ni la, ala sigi na akozo bible ni nga ala tokua ni na aTémoin ti Jéhovah so ayeke na yâ ti akodro nde nde, so aclimat ni ayeke nga nde nde, ti tara ti bâ wala abible ni akpengba.

Nze omene na pekoni, a kiri na abible ni si a bâ ni. Équipe ti imprimengo ambeti ni akiri asara achangement na terê ni na ala kiri ala tokua ambeni fini ni. Wungo ti abible kue so a tara ti bâ wala akpengba so ayeke 1697. Ti ambeni abible ni aye ti ngangu asi na ni. Na tapande, a girisa mbeni na gigi na ngu-nzapa apika dä juska na ndapre. Na peko ti so mbeni kota pupu ti ngu asara, a wara mbeni bible ni na yâ ti ngu. Abible so a tokua ni si aye ti ngangu nde nde asi na ni so, a sara si a mû lege ti bâ wala bible ni akpengba wala akpengba ape.

Na ngu 2011, na ngoi so a ngbâ ti tara kpengbango ti bible ni, aTémoin ti Jéhovah avo afini machine so ayeke leke acouverture ti ambeti hio hio ndali ti imprimérie ti Wallkill nga na ti Ebina na Japon. Ala sara tongaso ti tene ala imprimé abible alingbi na wungo ti acommande ni me nga ti tene a imprimé abible so akpa terê na yâ ti ando use.

Mbeni kpale abâ gigi

Na tongo nda ti ngu 2012, aplace ti imprimengo ambeti use so akomanse ti imprimé abible so a sigi na ni déjà awe. Me a zia afini couverture na terê ni, so couleur ni ayeke noir wala marron na so a sara ni na ye so a iri ni polyuréthane, so ayeke mbeni ye so alingbi ti sara si ngu nga na ndowa abuba couverture ni ape. Me acouverture ni so a sara ni so abuba, ndali ti so afini machine ni ayeke sara kua pëpe na a-oko aye so a sara lani na akozo couverture ti abible so si a tara ti bâ wala akpengba lani so. Ye so a sara si acouverture ni aba, alondo londongo na nduzu. A sara ambeni ye ti leke na kpale ni so, me kue gbä, na a yeke ndali ni la a zia lege ti imprimengo abible ni.

Ambeni zo so ayeke sigi ka na aye so ayeke sara na couverture ti ambeti afa so kpale ni so ayeke ye so a yeke si ka mingi tongana a ye ti sara acouverture so awoko wokongo, na a yeke ka kete ye ape ti leke kpale ni so. Me ahon ti tene aTémoin ti Jéhovah asigi na bible so couverture ni akpengba kpengbango, ala ye ti sara kue ti sigi na mbeni bible so couverture ni awoko tongaso si aduti pendere na agboto lê ti zo. Ala mû nze osio ti tara akode nde nde. Na nda ni ala wara mbeni kode ni so alingbi ti sara si acouverture ti bible ni alondo londongo na nduzu ape. Fadeso alingbi ti sigi na abible so acouverture ni awoko wokongo.

A kiri akaï kua ti sigingo na bible ni kete

Na septembre 2012, a hunda na ando ti imprimengo ambeti ti zia lege ti imprimengo abible so asigi na ni awe si azo ayeke sara kua ni, na ti ku ti tene a kangbi ati so angbâ kue si. A hunda nga na ala ti leke aye ndali ti sigingo na Mbeti ti Nzapa ti fini dunia so a kiri a leke yâ ti atënë ni. A leke ti sigi na Mbeti ti Nzapa ti fini dunia ni so na lango 5 ti octobre, ngu 2013 na ngoi ti kota bungbi so asara ni na Pennsylvania.

Na vendredi lango 9 ti août, ngu 2013, a tokua atënë ti yâ ti fini bible ni so na azo ti imprimengo ambeti ni na lege ti internet, nga ala komanse ti imprimé ni na ndade ni. Na lango 15 ti août, a imprimé kozo bible ni. Na ayenga mbasambala so aga na pekoni, équipe ti azo ti imprimengo abible ni, so ayeke na Wallkill nga na Ebina, asara kua na bï nga na kota lâ kue ti sigi na abible ahon 1600000 tongaso. Ye so a yeke mû lege na zo oko oko kue so aga na kota bungbi ni ti wara mbeni bible ni oko.

Fini bible so ayeke pendere nga a sara ni ti tene aninga. Me atënë ti yâ ni ayeke encore kota mingi ndali ti so ayeke mû fini na zo. Gï lango oko na peko ti so mbeni wali awara fini bible ni so, lo tene: “Fini Bible so asara si mbi kiri mbi mä fadeso yâ ti bible nzoni ahon ti kozo.”